Alma 41

Ipinanunumbalik ni Jesucristo ang Lahat ng Bagay

Matapos ituro kay Corianton ang mga panganib ng kanyang mga kasalanan, nagsikap si Alma na itama ang mga maling turo. Itinuro niya kay Corianton ang mahahalagang katotohanan upang tulungan siyang maunawaan ang plano ng pagpapanumbalik ng Ama sa Langit at upang tulungan siyang magsisi. Ang lesson na ito ay tutulong sa iyo na makita kung paanong ang kasamaan ay hindi hahantong sa kaligayahan.

Ituro ang mga banal na kasulatan sa mga paraang nagpapatibay ng pananampalataya kay Jesucristo. Ang isang layunin ng mga banal na kasulatan ay tulungan tayong mas mapalapit sa Ama sa Langit at kay Jesucristo (tingnan sa 1 Nephi 6:4). Mag-ukol ng oras na tulungan ang mga estudyante na makita kung paano pinagpala ang mga tao sa mga banal na kasulatan ng kapangyarihan, awa, at pagmamahal ng Diyos. Hikayatin ang mga estudyante na kilalanin ang gayon ding mga pagpapala sa sarili nilang buhay kapag nanampalataya sila kay Jesucristo.

Paghahanda ng estudyante: Sabihin sa mga estudyante na isipin kung paano nagdulot sa kanila ng kaligayahan ang pagsunod sa mga kautusan at kung paano ito nakatutulong sa kanila na madamang handa silang humarap sa Tagapagligtas at sa Ama sa Langit pagkatapos ng buhay na ito.

Mga Posibleng Aktibidad sa Pag-aaral

Mga paniniwala tungkol sa kabilang buhay

Ang sumusunod ay makatutulong sa mga estudyante na pag-isipan ang mga walang-hanggang bunga ng kanilang mga pagpili. Maaari kang huminto pagkatapos ng bawat pahayag para makasagot ang mga estudyante.

Isipin kung paano maaaring maimpluwensyahan ang iyong mga ginagawa kung naniniwala ka sa alinman sa mga sumusunod na maling pahayag:

Walang buhay pagkatapos ng kamatayan.

Pagkatapos nating mamatay, tayo ay dadakilain kahit ano pa ang ginawa natin sa mundo.

• Bakit mahalaga na nauunawaan natin nang tama ang mangyayari sa atin pagkatapos nating mamatay?

• Ano ang alam mo tungkol sa kabilang-buhay na nakakaimpluwensya sa iyong mga ginagawa ngayon?

Ang kahulugan ng pagpapanumbalik

Alalahanin na tinuturuan ni Alma ang kanyang anak na si Corianton, na nakagawa ng mabibigat na kasalanan (tingnan sa Alma 39), at may mga tanong tungkol sa ebanghelyo. Sa Alma 41, nalaman natin na nalito si Corianton ng mga turo ng mga taong lumihis mula sa ebanghelyo ni Jesucristo.

Basahin ang Alma 41:1, at alamin kung ano ang hindi naunawaan ni Corianton. (Sa mga turo ni Alma, ang salitang panunumbalik o pagpapanumbalik ay tumutukoy sa isang bagay na ibinabalik o ibinabalik sa dating kalagayan. Maaari ding makatulong na malaman na ang ibig sabihin ng sinalungat ang mga banal na kasulatan ay iniba, minali, o binago ang kahulugan ng mga ito.)

• Ano ang hindi naunawaan ni Corianton?

Para matulungan si Corianton na magsisi, itinuro sa kanya ni Alma ang totoong doktrina. Alam niya na “ang tunay na doktrina, kapag naunawaan, ay nagpapabago ng asal at pag-uugali” (Boyd K. Packer, “Huwag Matakot,” Liahona, Mayo 2004, 79). Ang pag-unawa sa doktrina ng pagpapanumbalik ay tumutulong sa atin na maunawaan kung bakit napakahalaga ng mga pagpiling ginagawa natin sa buhay na ito.

Maaari mong basahin ang mga talata 2–9 bilang isang klase at maaaring huminto paminsan-minsan para tulungan ang mga estudyante na maunawaan ang binabasa nila. Matapos magbasa, maaaring makatulong na alamin kung ano ang naunawaan ng mga estudyante tungkol sa pagpapanumbalik na binanggit ni Alma. Maaari mong isulat sa pisara ang salitang pagpapanumbalik at anyayahan ang klase na bumuo at luminang ng kahulugan habang pinag-aaralan ang lesson na ito.

Basahin ang Alma 41:2–9 para malaman ang itinuro ni Alma para masagot ang inaalala ni Corianton.

• Ano ang ipanunumbalik pagkatapos nating mamatay?

• Ayon kay Alma, paano naging posible ang pagpapanumbalik na ito?

• Paano mahihikayat ng kaalamang ito tungkol sa pagpapanumbalik ang isang taong tulad ni Corianton na bumalik sa landas ng tipan?

“Ang kasamaan ay hindi kailanman kaligayahan”

Basahin ang Alma 41:10, at alamin ang itinuro ni Alma tungkol sa pagpapanumbalik, kasamaan, at kaligayahan.

• Anong maling pagkaunawa ang itinama ni Alma kay Corianton?

Mula sa Alma 41:10, nalaman natin na ang kasamaan ay hindi kailanman kaligayahan.

• Habang iniisip mo ang mga turo ni Alma tungkol sa batas ng pagpapanumbalik, sa iyong palagay, bakit totoo na “ang kasamaan ay hindi kailanman kaligayahan”?

Maaaring makatulong na ipaliwanag na may ilang taong nag-iisip na makababalik sila sa kinaroroonan ng Diyos nang hindi personal na nananagot sa kanilang mga ginawa. Maaari nilang sabihin na ang mga ginawa nilang kasalanan ay katuwaan lang. Kung minsan, parang masaya pa ang mga gumagawa ng kasalanan.

Pag-unawa sa katangian ng Diyos

Ang plano ng pagpapanumbalik ng Diyos ay hindi lamang plano para mabuhay tayong muli. Ito ay isang plano para tulungan tayong maging katulad Niya at maranasan ang Kanyang kaligayahan.

Basahin ang Alma 41:11 at alamin kung bakit imposibleng maging tunay na masaya kapag mali ang pinipili natin. Maaaring makatulong na malaman na ang ibig sabihin ng “kasukdulan ng kapaitan” (talata 11) ay makaranas ng matinding kalungkutan o matinding pagkabalisa dahil sa kasalanan.

• Anong mga pagkakaiba ang nakita mo sa kaligayahang ibinibigay ng Diyos at sa kaligayahan ng mundo?

• Anong mga maling ideya ang nakikita mong ipinalalaganap na hindi nagdudulot ng kaligayahan, kahit na nakatutukso ang mga ito?

Ipinaliwanag ni Elder Marcus B. Nash ng Pitumpu ang kaugnayan ng katangian ng Diyos at ng kaligayahan:

Pansinin na ang pagiging walang Diyos sa daigdig—sa madaling salita, tumangging ipamuhay ang Kanyang ebanghelyo at samakatwid wala sa kanya ang Espiritu—ay [nasa] kalagayang salungat sa likas na kaligayahan. Ang ebanghelyo ni Jesucristo, sa katunayan, ay ang—pansinin na ito ay pang-isahan, ibig sabihin, ito ang tanging—“dakilang plano ng kaligayahan” (Alma 42:8). Kung pipiliin ninyo ang ibang landas ng buhay o ipamumuhay lamang ang mga bahagi ng ebanghelyo na tila madali, ang pagpiling iyon ay pagkakaitan kayo ng ganap na maningning na kagalakan at kaligayahang nilayon para sa inyo ng ating mapagmahal na Ama sa Langit at ng Kanyang Anak. (Marcus B. Nash, “Ang Dakilang Plano ng Kaligayahan,” Liahona, Nob. 2006, 49)

Tulungan ang mga estudyante na maunawaan na ang katangian ng Ama sa Langit ay kaligayahan at mararanasan natin ang tunay na kaligayahan kapag nagsikap tayong maging katulad Niya.

Ang isang paraan para maituro ito ay isulat sa pisara ang mga salitang Kaligayahan at Kalungkutan. Sabihin sa mga estudyante na isulat ang mga katangian ng Ama sa Langit sa ilalim ng salitang Kaligayahan at ipaliwanag kung bakit humahantong sa kaligayahan ang mga katangiang ito. Halimbawa, maaari mong talakayin kung paano humahantong sa mas malaking kaligayahan ang higit na kabanalan, pagtitiis, o pagsusumigasig. Pagkatapos ay maaaring isulat ng mga estudyante ang mga gawain at katangian na humahantong sa kalungkutan at maaari nilang ipaliwanag kung paano ito naging kabaligtaran ng katangian ng Diyos.

Upang matulungan kang makita kung paano naging katangian ng Diyos ang kaligayahan, ilista ang ilan sa Kanyang mga katangian. Kapag nakagawa ka na ng listahan, isipin kung paano nagdudulot ng kaligayahan ang mga katangiang ito para sa Ama sa Langit at sa iba. Halimbawa, ang Diyos ay maawain. Dahil ang Diyos ay maawain, Siya ay magagalak sa mga kaluluwang nagsisisi at magpapadama ng kagalakan ng pagpapatawad sa iba (tingnan sa Doktrina at mga Tipan 18:13). Pumili ng kahit isang katangian o kautusan ng Diyos at ilarawan kung paano magdudulot ng kaligayahan ang pamumuhay nang may ganoong katangian o pagsunod sa kautusang iyon.

Pagpapanumbalik sa kabutihan

Akala ni Coriantion, maaari siyang mamuhay nang masama at muling mabuhay pa rin sa kaluwalhatian. Ayon sa batas ng Diyos, hindi ito mangyayari (tingnan sa Galacia 6:7–8). Itinama ni Alma si Corianton at inanyayahan niya itong bumalik sa Diyos at sa kaligayahan sa huli. Basahin ang Alma 41:12–15, at alamin kung paano hinikayat ni Alma si Corianton na mamuhay upang maibalik siya sa kabutihan at kaligayahan.

• Mula sa nabasa mo, ano ang maaaring “ipinamamahagi” ng isang tao kung gusto niya ng higit na kaligayahan na “babalik sa [kanyang] muli”? (Alma 41:15).

• Kailan ka nakaranas ng tunay na kaligayahan mula sa pamumuhay ng ebanghelyo ni Jesucristo?

Ang sumusunod ay makatutulong sa mga estudyante na kumilos ayon sa mga impresyong natanggap nila.

Isipin ang natutuhan mo sa Alma 41 at ang hangarin mong maging maligaya. Ang mga sumusunod na tanong ay makatutulong sa iyo na gumawa ng plano para mahanap ang higit na kaligayahan:

• Ano ang isang bagay na masisimulan kong gawin na makatutulong sa akin na maging maligaya at maipanumbalik sa kabutihan?

• Ano ang isang bagay na maititigil kong gawin na makatutulong sa akin na maging maligaya at maipanumbalik sa kabutihan?

Anyayahan ang Espiritu Santo na gabayan ang iyong isipan at damdamin. Pag-isipang isulat ang iyong mga impresyon sa iyong personal journal o mga banal na kasulatan kung saan maaari mong balikan ang mga ito. Gumawa ng planong kumilos, pati na kung kailan ka magsisimula at kung paano mo susukatin ang iyong progreso.

Komentaryo at Impormasyon ng Konteksto

Ano ang ipanunumbalik sa atin sa kabilang-buhay?

Itinuro ni Pangulong Dallin H. Oaks ng Unang Panguluhan:

Bilang isa pang bahagi ng “plano ng panunumbalik” ng Diyos (Alma 41:2), ipanunumbalik ng Pagkabuhay na Mag-uli ang “lahat ng bagay … sa kanilang wasto at ganap na anyo” (Alma 40:23). Kabilang dito ang pagiging perpekto ng lahat ng ating mga pisikal na kapansanan at depekto ng katawan sa buhay na ito, kabilang na ang mga kapansanan o karamdaman mula sa pagsilang o sanhi ng trauma o sakit. (Dallin H. Oaks, “Nalinis sa Pamamagitan ng Pagsisisi,” Liahona, Mayo 2019, 94)

Paano ako maihahanda ng pagsisisi na manumbalik sa kabutihan?

Ipinahayag ni Pangulong Dallin H. Oaks ng Unang Panguluhan:

Gagawin bang perpekto ng panunumbalik na ito ang lahat ng ating mga hindi banal o hindi nasupil na mga pagnanasa o adiksiyon? Hindi ito mangyayari. Nalaman natin mula sa paghahayag sa panahong ito na tayo ay hahatulan ayon sa ating mga pagnanais gayundin sa ating mga gawa (tingnan sa Alma 41:5; Doktrina at mga Tipan 137:9) at maging ang ating mga iniisip ay magpapahamak sa atin (tingnan sa Alma 12:14). Hindi natin dapat “ipagpaliban ang araw ng [ating] pagsisisi” hanggang kamatayan, ayon sa itinuro ni Amulek (Alma 34:33), dahil ang parehong espiritu na nag-aangkin ng ating katawan sa buhay na ito—sa Panginoon man ito o sa diyablo—“ang may kapangyarihan na angkinin ang [ating] katawan sa walang hanggang daigdig na yaon” (Alma 34:34). Ang ating Tagapagligtas ang may kapangyarihan at handang linisin tayo mula sa kasamaan. Ngayon ang panahon para hangarin ang Kanyang tulong para mapagsisihan natin ang ating mga masasama o hindi marapat na mga pagnanais at iniisip para maging malinis at handa tayo na tumayo sa harapan ng Diyos sa Huling Paghuhukom. (Dallin H. Oaks, “Nalinis sa Pamamagitan ng Pagsisisi,” Liahona, Mayo 2019, 94)

Paano kung sinusunod ko ang mga kautusan ngunit hindi ako masaya?

Ipinaliwanag ni Elder Quentin L. Cook ng Korum ng Labindalawang Apostol:

Napapansin ko, sa kabila ng napakalaking kaligayahang matatagpuan sa banal na plano ng Diyos, na kung minsan pakiramdam natin ay napakalayo nito at walang kinalaman sa ating kasalukuyang sitwasyon. Sa pakiramdam ay parang hindi natin ito kayang abutin bilang nagpupunyaging mga disipulo. Sa ating limitadong pananaw, tila kaakit-akit ang mga tukso at gambalang nasa paligid natin ngayon. Ang mga gantimpala sa pagdaig sa mga tuksong iyon, sa kabilang banda, ay parang hindi maaabot at makakamtan. Ngunit kapag naunawaan natin ang plano ng Ama makikita natin na ang mga gantimpala sa ginawang kabutihan ay makakamtan ngayon mismo. Ang kasamaan, tulad ng imoralidad, ay hindi kailanman magdudulot ng kaligayahan. (Quentin L. Cook, “Maayos at Organisadong Tulad sa Bristol: Maging Karapat-dapat sa Templo—Madali Man o Mahirap ang Panahon,” Liahona, Nob. 2015, 40)

Mga Karagdagang Aktibidad sa Pag-aaral

Pagninilay sa mga kasalukuyang hangarin

Habang binabasa ng mga estudyante ang Alma 41:5, maaari nilang matukoy ang kahalagahan ng kanilang mga hangarin sa pagtatamo ng mabuting pagpapanumbalik. Kung kailangan pang maunawaan ng mga estudyante ang tungkol sa mga hangarin, maaari nilang saliksikin ang mga banal na kasulatan para sa iba pang mga talata tungkol sa mga hangarin (halimbawa, Alma 29:5; Doktrina at mga Tipan 11:8, 14, 17; o Doktrina at mga Tipan 137:9). Pagkatapos ay maaari mo silang anyayahang pag-isipan ang kanilang mga kasalukuyang hangarin at kung paano iyon maiaayon sa mga hangarin ng Diyos.

Pagtukoy sa mga maling paniniwala tungkol sa pagpapanumbalik pagkatapos ng buhay na ito

Itinuro ni Alma kay Corianton na sinalungat ng ilan ang mga banal na kasulatan hinggil sa pagpapanumbalik (tingnan sa Alma 41:1). Sa Alma 41:10, tinukoy niya ang isang maling paniniwala—na ang isang tao ay maipanunumbalik mula sa kasalanan tungo sa kaligayahan. Matapos pag-aralan ng mga estudyante ang tungkol sa katangian ng Diyos, maaari mong ibahagi ang mga sumusunod na halimbawa at sabihin sa mga estudyante na gamitin ang natutuhan nila para itama ang maling pagkaunawa o maling turo:

• “Alam kong hindi tama ang ginagawa ko, pero makapagsisisi ako anumang oras at magiging maayos ang lahat.”

• “Mahal ng Diyos ang lahat ng Kanyang mga anak, kaya hindi niya ipadadala ang sinuman sa atin sa impiyerno.”

Object lesson: Boomerang

Magpakita sa mga estudyante ng isang boomerang o magdrowing nito sa pisara. Itanong sa mga estudyante kung ano ang ginagawa ng boomerang kapag tama ang pagkakahagis nito. (Bumabalik ito sa lugar kung mula saan ito inihagis.)

Sabihin sa mga estudyante na ipaliwanag kung paano natutulad ang boomerang sa doktrina ng pagpapanumbalik na ipinaliwanag sa Alma 41:12–15.