“Doctrinal Mastery: Alma 41:10—‘Ang Kasamaan ay Hindi Kailanman Kaligayahan,’” Manwal ng Titser para sa Aklat ni Mormon (2024)

“Doctrinal Mastery: Alma 41:10,” Manwal ng Titser para sa Aklat ni Mormon

Doctrinal Mastery: Alma 41:10

“Ang Kasamaan ay Hindi Kailanman Kaligayahan”

Sa Alma 41:10, nalaman mo na “ang kasamaan ay hindi kailanman kaligayahan.” Ang lesson na ito ay makatutulong sa iyo na maisaulo ang doctrinal mastery passage at ang mahalagang parirala ng banal na kasulatan para sa Alma 41:10, maipaliwanag ang doktrina, at masanay na gamitin ang mga alituntunin ng pagtatamo ng espirituwal na kaalaman sa mga sitwasyon sa tunay na buhay.

Tulungan ang mga mag-aaral na maging mga aktibo sa pakikilahok sa klase. Ang mga estudyante ay aktibo kapag itinutuon nila ang kanilang puso’t isipan sa pag-aaral ng ebanghelyo. Kabilang sa ilang paraan para makapag-anyaya ng aktibong pakikilahok ang pagtulong sa mga estudyante na matuklasan ang kaugnayan sa mga katotohanan ng ebanghelyo; paghikayat sa kanila na magtanong at maghanap ng mga sagot; at pag-anyaya sa kanila na ibahagi ang kanilang mga ideya, karanasan, at damdamin at sanayin ang mga kasanayan sa pag-aaral ng mga banal na kasulatan at mag-ukol ng oras na magnilay at manalangin.

Paghahanda ng estudyante: Sabihin sa mga estudyante na isaulo ang Alma 41:10.

Mga Posibleng Aktibidad sa Pag-aaral

Ang doctrinal mastery passage lesson na ito ay ginawa upang maituro pagkatapos ng lesson na “Alma 41,” na siyang kontekstuwal na lesson para sa doctrinal mastery passage na Alma 34:9–10. Kung kailangang ilipat ang doctrinal mastery passage lesson na ito sa ibang linggo, tiyaking ituro din ang kaukulang kontekstuwal na lesson sa linggong iyon.

Isaulo at ipaliwanag

Maaari mong hikayatin ang mga estudyante na isaulo ang mga doctrinal mastery passage hangga’t kaya nila.

Gamitin ang mga sumusunod na aktibidad o iba pang epektibong paraan upang matulungan ang mga estudyante na maisaulo ang scripture reference at mahalagang parirala ng banal na kasulatan para sa Alma 41:10 at maipaliwanag ang doktrinang itinuro sa passage na ito.

Pagpartner-partnerin ang mga estudyante. Ipasabi nang malakas sa unang estudyante ang unang salita: “ang.” Ipasabi nang malakas sa pangalawang estudyante ang una at pangalawang salita: “ang kasamaan.” Patuloy na magdagdag ng salita sa bawat pagkakataon at sa huli, ang reperensya para masabi ng huling estudyante ang buong parirala at reperensya: “ang kasamaan ay hindi kailanman kaligayahan (Alma 41:10).”

Sabihin sa mga estudyante na ulitin ang prosesong ito nang maraming beses, at magsalitan kung sinong estudyante ang mauuna sa bawat pagkakataon.

Mag-isip ng isang sitwasyon kung saan makatutulong sa isang tao na malaman ang doktrinang itinuro sa Alma 41:10. Pagkatapos ay ipaliwanag kung paano makatutulong ang doktrina sa sitwasyon.

Maaari mong anyayahan ang mga estudyante na makipag-ugnayan sa isa’t isa sa pamamagitan ng pagbabahagi sa kanilang mga kaklase ng sitwasyong naisip nila. Kapag naibahagi na ang sitwasyon, maaaring ipaliwanag ng kaklase kung paano makatutulong ang mga katotohanan sa Alma 41:10.

Pagsasanay ng pagsasabuhay

Hatiin ang klase sa mga grupo na may tig-tatlong estudyante. Sabihin sa bawat estudyante na pumili ng magkakaibang alituntunin ng pagtatamo ng espirituwal na kaalaman at basahin ang mga kaukulang talata para sa kanyang alituntunin sa Doctrinal Mastery Core Document (2022). Kapag tapos na ang mga estudyante, sabihin sa kanila na ipaliwanag ang alituntunin sa kanilang grupo. Ang sumusunod na matching exercise ay makatutulong sa mga estudyante na maalala ang natutuhan nila. Ang mga sagot sa matching exercise ay (1) B, F; (2) C, E; at (3) A, D.

Basahin ang bawat isa sa tatlong alituntunin ng pagtatamo ng espirituwal na kaalaman sa Doctrinal Mastery Core Document (2022). Pagkatapos ay itugma ang mga pahayag na A–F sa naaangkop na alituntunin. Bawat alituntunin ay may dalawang pahayag na nauugnay rito.

“Ang Unang Panguluhan at ang Korum ng Labindalawang Apostol—ang mga propeta ng Panginoon sa mundo ngayon—ay isang mahalagang source o pinagmumulan ng katotohanan.”
“Kapag hinahangad natin na pagbutihin ang ating pang-unawa at malutas ang mga problema, mahalagang umasa tayo sa ating patotoo kay Jesucristo.”
“Isinasaalang-alang natin ang [mga tanong] sa konteksto ng plano ng kaligtasan at sa mga turo ng Tagapagligtas.”
“Ang matutong matukoy at maiwasan ang di-mapagkakatiwalaang sources ay maaaring magprotekta sa atin laban sa mga maling impormasyon at mula sa mga naghahangad na sirain ang ating pananampalataya.”
“Hinahangad natin ang tulong ng Espiritu Santo para makita ang mga bagay-bagay tulad sa kung paano nakikita ng Panginoon ang mga ito.”
“Kapag patuloy nating hinahanap ang mga sagot, dapat tayong mamuhay nang may pananampalataya—nagtitiwala na kalaunan ay matatanggap natin ang mga sagot na hinahanap natin.”

Kung pinaggrupo-grupo ang mga estudyante para pag-aralan ang mga alituntunin ng pagtatamo ng espirituwal na kaalaman, maaaring makatulong na panatilihin sila sa mga grupo.

Idispley ang sumusunod na sitwasyon upang magamit ito ng mga estudyante bilang sanggunian habang tinatalakay nila ito nang magkakasama.

Si Carlos, isang miyembro ng Simbahan, ay nahihirapang makita ang kahalagahan ng pagsunod sa mga kautusan ng Diyos. Sinabi niya sa iyo kamakailan, “Marami akong kilalang tao na lumalabag sa mga kautusan at tila maayos naman ang kanilang buhay. Paano mo masasabi na kailangan mong sundin ang mga kautusan upang maging maligaya?” Nakikita mo ang katapatan ng tanong ni Carlos ngunit nadarama mo na kailangan mo ng kaunting panahon para maiayos ang lahat ng iyong naiisip para masagot ang kanyang tanong. Nagkasundo kayong dalawa na pag-uusapan pa ninyo ang kanyang tanong kinabukasan.

Gamitin ang natutuhan at nadama mo habang pinag-aaralan mo ang Alma 41:10 at ang mga alituntunin ng pagtatamo ng espirituwal na kaalaman upang maghandang talakayin ang tanong ni Carlos.

Hangaring mas makaunawa sa pamamagitan ng sources na itinalaga ng Diyos

Ang mga banal na kasulatan ay sources na itinalaga ng Diyos na makatutulong sa atin na sagutin ang ating mga tanong. Basahin ang Alma 41:10 at maghanap ng isa pang doctrinal mastery passage na makatutulong sa pagsagot mo.

Maaaring magtulungan ang mga estudyante sa kanilang grupo na hanapin at talakayin ang mga karagdagang doctrinal mastery passage na makatutulong kay Carlos. Kabilang sa ilang makatutulong na talata ang 2 Nephi 2:25, 27 at Mosias 2:41.
Isipin ang ilang sources na sasabihin mo kay Carlos na pag-aralan para sa karagdagang impormasyon. Maaari mo ring ipaliwanag kung bakit mapagkakatiwalaan ang isang source tungkol sa mga espirituwal na bagay.

Suriin ang mga konsepto o tanong nang may walang-hanggang pananaw

Maaaring sagutin ng mga estudyante sa mga grupo ang isa sa mga sumusunod na tanong nang mag-isa, pagkatapos ay maaari nilang ibahagi ang kanilang mga sagot sa kanilang grupo.

Tulungan ang mga estudyante na matukoy ang mga posibleng palagay ni Carlos. Kung kailangan ng mga estudyante ng tulong, maaari mong ibahagi ang isa o mahigit pa sa mga sumusunod: Maaaring iniisip ni Carlos na mahigpit ang mga kautusan o nililimitahan ng mga ito ang kanyang kakayahang pumili. Maaaring iniisip niya na ang kaligayahan ay matatagpuan sa mga temporal na kasiyahan.

Ang mga sumusunod na tanong ay makatutulong sa iyo na matukoy ang mga palagay ni Carlos:

Anong mga palagay ang maaaring mayroon siya tungkol sa mga kautusan o kaligayahan?
Anong mga turo ng ebanghelyo ang nauugnay o nagbibigay ng mga sagot sa kanyang tanong?
Ano sa palagay mo ang kailangang malaman ni Carlos tungkol sa Ama sa Langit, sa Kanyang plano, at kung paano Siya makitungo sa Kanyang mga anak?

Kumilos nang may pananampalataya

Ang mga estudyante sa mga grupo ay maaaring anyayahang gumawa nang mag-isa upang matukoy ang mga kautusan, pagkatapos ay magsama-sama upang ibahagi ang kanilang mga halimbawa. Pagkatapos ay maaari silang magtulungan sa pagbibigay ng mga mungkahi kung paano maaaring kumilos si Carlos nang may pananampalataya sa pamamagitan ng paghahangad na mas makaunawa o sa pamamagitan ng pagpaplanong sundin ang mga kautusan.

Si Carlos ay maaaring kumilos nang may pananampalataya sa pamamagitan ng paghahangad na mas maunawaan ang mga kautusan ng Ama sa Langit. Ang pagpiling sundin ang mga kautusan kapag hinangad niyang mas maunawaan ang kahalagahan ng mga ito ay pagkilos din nang may pananampalataya. Pumili ng kahit dalawang kautusan at tukuyin kung paano makatutulong kay Carlos ang pagsunod sa mga ito na makadama ng kaligayahan o kung paano hahantong ang paglabag sa mga ito sa kalungkutan. Maaari mo ring ibahagi kung paano nagdulot sa iyo ng kaligayahan ang pagsunod sa mga kautusang ito.

Anyayahan ang mga estudyante na ibahagi ang inihanda nila. Kung may oras pa, maaari mong anyayahan ang klase na mag-isip ng iba’t ibang paraan na posibleng tumugon si Carlos. Pagkatapos ay sabihin sa mga estudyante na bumalik sa kanilang mga grupo para i-adjust ang kanilang mga plano. Maaaring magdula-dulaan ang mga estudyante sa harap ng klase o sa kanilang mga grupo. Maaari din nilang i-text ang isa’t isa bilang dula-dulaan.

Pagrerebyu ng doctrinal mastery

Ang sumusunod na pagrerebyu ay maaaring gawin sa isang lesson sa hinaharap. Itanong sa mga estudyante kung naaalala nila ang mahalagang parirala ng banal na kasulatan para sa Alma 41:10. Kung kinakailangan, ipaalala sa kanila ang aktibidad sa pagsasaulo na ginawa nila sa lesson na ito. Sabihin sa mga estudyante na ulitin ang reperensya at mahalagang parirala hanggang sa maisaulo nila ang mga ito.