Alma 40

Ang Daigdig ng mga Espiritu at Pagkabuhay na Mag-uli

Si Cristo sa daigdig ng mga espiritu

Matapos siyang anyayahan ng kanyang ama na magsisi, may ilang tanong si Corianton tungkol sa plano ng Diyos, kabilang na ang mangyayari sa atin pagkatapos nating mamatay. Sinagot ng kanyang amang si Alma ang kanyang mga tanong at nagpatotoo ito tungkol sa mahalagang tungkulin ni Jesucristo sa plano ng Ama sa Langit. Ang lesson na ito ay makatutulong sa iyo na mapalalim ang iyong pagpapahalaga sa ginawa ng Tagapagligtas para sa iyo at magbibigay sa iyo ng pagkakataong ipaliwanag kung ano ang mangyayari pagkatapos nating mamatay.

Tulungan ang mga estudyante na magtuon kay Jesucristo. Ang mga titser ay maaaring hindi sinasadyang gumugol ng masyadong maraming oras sa paglalarawan ng mga detalyeng nakapalibot sa mga katotohanan ng ebanghelyo. Dahil dito, maaaring mapalampas ang mga pagkakataong tulungan ang mga mag-aaral na mas makilala at mahalin nang lubusan ang Tagapagligtas. Mag-ukol ng oras na magturo at magpatotoo tungkol sa kapangyarihan, pagmamahal, at awa ni Jesucristo at sa Kanyang mahalagang tungkulin sa plano ng kaligtasan ng Ama sa Langit.

Paghahanda ng estudyante: Sabihin sa mga estudyante na pag-isipan ang mga tanong nila tungkol sa mangyayari pagkatapos nating mamatay at dumating sa klase na handang magbahagi.

Mga Posibleng Aktibidad sa Pag-aaral

Mga Tanong

Ang sumusunod na kuwento mula sa buhay ni Sister Aburto ay makatutulong sa mga estudyante na maghandang pag-aralan ang Alma 40. Bilang alternatibo, maaari ding ilista ng mga estudyante sa pisara ang ilan sa mga tanong nila tungkol sa kabilang-buhay.

Si Sister Reyna I. Aburto, tagapayo sa Relief Society General Presidency, ay nagbahagi ng isang personal na karanasan na naglalarawan ng mga tanong natin tungkol sa mangyayari pagkatapos nating mamatay. Panoorin ang video na “Hindi Nagtagumpay ang Libingan,” matatagpuan sa ChurchofJesusChrist.org, mula sa time code na 4:21 hanggang 5:13, o basahin ang sumusunod na pahayag:

Sister Reyna I. Aburto

Noong ako ay siyam na taong gulang, namatay ang aking kuya dahil sa mapaminsalang lindol. Dahil nangyari ito nang hindi inaasahan, matagal bago ko napagtanto ang realidad ng pangyayari. Nanlumo ako sa lungkot, at tinanong ang aking sarili, “Anong nangyari sa kapatid ko? Nasaan siya? Saan siya pumunta? Makikita ko ba siyang muli?”

Hindi ko pa alam noon ang plano ng kaligtasan ng Diyos, at gusto kong malaman kung saan ako nanggaling, ano ang layunin ng buhay, at ano ang mangyayari sa atin matapos tayong mamatay. Hindi ba’t inaasam nating lahat iyan kapag nawalan tayo ng mahal sa buhay o kapag dumaranas tayo ng mga paghihirap sa ating buhay? (Reyna I. Aburto, “Hindi Nagtagumpay ang Libingan,” Liahona, Mayo 2021, 86)

May alalahanin din ang anak ni Alma na si Corianton tungkol sa kabilang buhay.

Basahin ang Alma 40:1, at alamin kung ano ang ipinag-alala ni Corianton.

• Sa iyong palagay, bakit kaya siya nag-alala tungkol dito?

Alalahanin na nilabag ni Corianton ang mga kautusan ng Diyos, kabilang na ang batas ng kalinisang-puri. Dahil sa kanyang mga pinili, maaaring nag-alala siya tungkol sa kanyang kalagayan pagkatapos ng buhay na ito. Para matugunan ang mga alalahanin ni Corianton at matulungan siyang magsisi, itinuro sa kanya ni Alma ang doktrina. Ang tugon ni Alma sa mga alalahanin ni Corianton ay makatutulong din sa isang taong may mga tanong na tulad ng kay Sister Aburto.

Kalaunan ay tinuruan si Sister Aburto ng mga missionary na tumulong sa kanya na mahanap ang mga sagot sa kanyang mga tanong. Kunwari ay isa ka sa mga missionary na iyon at naghahanda kang turuan siya. Gamitin ang sumusunod na resources sa paghahanda ng maikling paliwanag para makatulong sa pagsagot sa mga tanong ni Sister Aburto.

Pagpartner-partnerin ang klase para maghandang magturo na para bang mga missionary sila. Atasan ang bawat magka-partner na pag-aralan ang daigdig ng mga espiritu o pagkabuhay na mag-uli, at bigyan ang bawat magka-partner ng kaugnay na handout.

Bilang alternatibo sa paghahanda na para bang tuturuan nila si Sister Aburto, maaaring maghanap ang mga estudyante ng mga sagot sa mga tanong ng mga miyembro ng klase.

Ang Daigdig ng mga Espiritu

Manwal ng Aklat ni Mormon para sa Seminary Teacher (2024)—“Alma 40: Ang Daigdig ng mga Espiritu at Pagkabuhay na Mag-uli”

Basahin ang Alma 40:6–7, 11–14 para malaman ang itinuro ni Alma kay Corianton. Pagkatapos ay gamitin ang sumusunod na resources para matulungan kang ihanda pa ang ituturo mo.

• Doktrina at mga Tipan 138:11–13, 18–22, 57

• Gabay sa mga Banal na Kasulatan, “Paraiso,” scriptures.ChurchofJesusChrist.org

Itinuro ni Pangulong Dallin H. Oaks ng Unang Panguluhan:

Pangulong Dallin H. Oaks

Alam natin mula sa mga banal na kasulatan na pagkatapos mamatay ang ating mga katawan ay patuloy tayong mabubuhay bilang mga espiritu sa daigdig ng mga espiritu. Itinuturo din ng mga banal na kasulatan na ang daigdig ng mga espiritu ay nahahati sa pagitan ng mga yaong naging “mabuti” o “matwid” noong nabubuhay sila at ng mga naging masama. Inilalarawan din ng mga ito ang ilang matatapat na espiritu na itinuturo ang ebanghelyo sa masasama o rebelde (tingnan sa I Ni Pedro 3:19; Doktrina at mga Tipan 138:19–20, 29, 32, 37). (Dallin H. Oaks, “Magtiwala sa Panginoon,” Liahona, Nob. 2019, 26)

Ihanda kung paano mo ipapaliwanag ang mga sagot sa sumusunod na mga tanong:

• Ano ang nangyayari sa ating mga espiritu kapag namatay tayo?

• Ano ang kalagayan sa paraiso? Ano ang kalagayan sa lugar na tinatawag ni Alma na “labas na kadiliman,” ngunit tinatawag ding bilangguan ng mga espiritu (1 Pedro 3:19) o impiyerno (2 Nephi 9:12)?

• Paano madaragdagan ng pag-aaral tungkol sa paraiso at bilangguan ang ating pasasalamat sa Tagapagligtas?

• Paano tayo mapagpapala ng ating kaalaman tungkol sa daigdig ng mga espiritu sa ating mortal na buhay?

Kapag nagtuturo, tiyaking linawin na sa pagitan ng kamatayan at pagkabuhay na mag-uli, ang mga espiritu ng mabubuti ay mananahan sa paraiso at ang mga espiritu ng masasama ay mananahan sa bilangguan ng mga espiritu. Ibahagi kung paano nakakaimpluwensiya sa mga pagpiling ginagawa mo sa buhay na ito ang pagkaunawa mo sa katotohanang ito.

© 2023 by Intellectual Reserve, Inc. All rights reserved.

Pagkabuhay na Mag-uli

Manwal ng Aklat ni Mormon para sa Seminary Teacher (2024)—“Alma 40: Ang Daigdig ng mga Espiritu at Pagkabuhay na Mag-uli”

Basahin ang Alma 40:2–5, 23–24 para malaman ang itinuro ni Alma kay Corianton. Pagkatapos ay gamitin ang sumusunod na resources para matulungan kang ihanda pa ang ituturo mo.

• Alma 11:42–45

• Gabay sa mga Banal na Kasulatan, “Pagkabuhay na Mag-uli,” scriptures.ChurchofJesusChrist.org

Itinuro ni Pangulong Dallin H. Oaks ng Unang Panguluhan:

Pangulong Dallin H. Oaks

Ipinagdiriwang natin ang katotohanan ng Pagkabuhay na Mag-uli sa Paskong ito ng Pagkabuhay. Nagdudulot ito sa atin ng pananaw at lakas na pagtiisan ang mga pagsubok sa buhay na kinakaharap ng bawat isa sa atin at ng mga mahal natin, tulad ng mga kakulangan sa pisikal, mental, o emosyonal na taglay na natin mula sa pagsilang o nararanasan habang nabubuhay tayo sa mundo. Dahil sa Pagkabuhay na Mag-uli, batid natin na pansamantala lamang ang mga kakulangang ito! (Dallin H. Oaks, “Ang Dakilang Plano,” Liahona, Mayo 2020, 94–95)

Ihanda kung paano mo ipapaliwanag ang mga sagot sa sumusunod na mga tanong:

• Ano ang pagkabuhay na mag-uli? Sino ang mabubuhay na mag-uli?

• Ayon sa Alma 40:2–3, paano naging posible ang Pagkabuhay na Mag-uli?

• Paano tayo mapagpapala ng ating kaalaman tungkol sa Pagkabuhay na Mag-uli sa ating mortal na buhay?

Kapag nagtuturo, tiyaking linawin na dahil si Jesucristo ay nabuhay na mag-uli, lahat tayo ay mabubuhay na mag-uli. Magbahagi ng isang dahilan kung bakit nagpapasalamat ka sa pangako ng pagkabuhay na mag-uli.

© 2023 by Intellectual Reserve, Inc. All rights reserved.

 ChurchofJesusChrist.org

Kapag natapos nang maghanda ang mga estudyante, sabihin sa kanila na turuan ang isang magka-partner na estudyante na naghanda ng ibang paksa. Maaari kang magbigay ng tulong kung kailangan habang nagtuturo sila.

Matapos ituro ng mga estudyante ang kanilang lesson, maaari mong pamunuan ang isang maikling talakayan sa klase gamit ang ilan o lahat ng sumusunod na tanong.

• Bakit mahalaga sa iyo ang natutuhan mo tungkol sa daigdig ng mga espiritu at pagkabuhay na mag-uli?

• Paano nakakaapekto ang kaalamang ito sa nadarama mo para sa Ama sa Langit at kay Jesucristo?

• Ano ang ilang tanong mo na nasagot ngayon?

• Anong mga tanong ang gusto mong patuloy na hanapan ng mga sagot?

Ipaalala sa mga estudyante na wala pa sa atin ang lahat ng sagot at OK lang na magkaroon ng mga tanong na hindi nasagot. Sabihin sa kanila na sundin ang mga alituntunin ng pagtatamo ng espirituwal na kaalaman habang naghahanap sila ng mga sagot.

Maaari mong ibahagi ang iyong patotoo tungkol sa kaloob na Pagkabuhay na Mag-uli at sa kapayapaang matatanggap natin sa daigdig ng mga espiritu dahil sa Pagbabayad-sala ni Jesucristo.

Komentaryo at Impormasyon ng Konteksto

Alma 40:16–20. Ano ang Unang Pagkabuhay na Mag-uli?

Itinuro ni Elder Bruce R. McConkie (1915–85) ng Korum ng Labindalawang Apostol:

Elder Bruce R. McConkie

Ang mga babangon sa umaga ng pagkabuhay na mag-uli na ito ay may katawang selestiyal at magmamana ng selestiyal na kaluwalhatian; sila ang mga yaong unang bunga ni Cristo. Ang mga babangon sa hapon ng pagkabuhay na mag-uli ay may katawang terestriyal at dahil dito ay magmamana ng kahariang yaon; sila ay inilalarawan bilang pagiging kay Cristo sa pagparitong ito. Lahat ng nabuhay na mag-uli sa ngayon ay tumanggap ng mga katawang selestiyal; ang pagbangon ng mga nilalang na para sa terestriyal na kaharian ay hindi magsisimula hanggang sa matapos ang Ikalawang Pagparito. (Doktrina at mga Tipan 76:50–80; 88:95–99.) (Bruce R. McConkie, Doctrinal New Testament Commentary [1965], 1:196)

Alma 40:21–22. Ano ang ibig sabihin ng “dadalhin upang tumayo sa harapan ng Diyos”?

Itinuro ni Elder D. Todd Christofferson ng Korum ng Labindalawang Apostol:

Elder D. Todd Christofferson

Sa Kanyang Pagbabayad-sala at Pagkabuhay na Mag-uli, nadaig ni Jesucristo ang lahat ng aspeto ng Pagkahulog. Ang pisikal na kamatayan ay magiging pansamantala, at maging ang espirituwal na kamatayan ay may katapusan, dahil lahat ay babalik sa kinaroroonan ng Diyos, kahit pansamantala lamang, para mahatulan. Lubos tayong makapagtitiwala sa Kanyang kapangyarihang daigin ang lahat ng iba pa at pagkalooban tayo ng buhay na walang hanggan. (D. Todd Christofferson, “Ang Pagkabuhay na Mag-uli ni Jesucristo,” Liahona, Mayo 2014, 112)

Alma 40:23. Ano ang anyo ng katawang nabuhay na mag-uli?

Itinuro ni Elder Paul V. Johnson ng Pitumpu:

Elder Paul V. Johnson

Dahil sa Pagkabuhay na Mag-uli, ang espiritu at katawan ng isang tao ay magsasamang muli, at sa pagkakataong ito ang katawang iyan ay magiging imortal at perpekto—hindi na daranas ng sakit, karamdaman, o ng iba pang mga problema [tingnan sa Alma 11:43]. …

Bawat isa sa atin ay may mga pisikal, mental, at emosyonal na limitasyon at kahinaan. Ang mga problemang ito, na ang ilan ay tila imposibleng makayanan ngayon, ay malulutas kalaunan. Wala ni isa sa mga problemang ito ang makakaapekto sa atin pagkatapos nating mabuhay na mag-uli. (Paul V. Johnson, “At Hindi na Magkakaroon ng Kamatayan,” Liahona, Mayo 2016, 121–22)

Mga Karagdagang Aktibidad sa Pag-aaral

Ang pagkakasunud-sunod ng mga pangyayari

Ang pagtulong sa mga estudyante na malaman kung ano ang mararanasan ng lahat pagkatapos nating mamatay ay makatutulong sa kanila na magkaroon ng walang-hanggang pananaw at maalis ang ilan sa takot na nauugnay sa kamatayan. Maaari mong isulat ang kamatayan, daigdig ng mga espiritu, pagkabuhay na mag-uli, at huling paghuhukom sa mga piraso ng papel at ilagay ang mga ito sa pisara nang hindi sunud-sunod. Sabihin sa mga estudyante na basahin ang Alma 40:6–7, 11–14, at 21–23, at sabihin sa kanila na pagsunud-sunurin ang mga pangyayari sa pisara ayon sa kung kailan nangyari ang mga ito. Pag-isipan ding talakayin kung ano ang kahulugan ng mga pangyayari at ang ginagampanan ng bawat isa sa plano ng Ama sa Langit.

Kaalamang magsisi

Ang mga salita ni Alma sa Alma 40:11–26 ay makatutulong sa mga estudyante na madama ang kahalagahan ng paglapit sa Tagapagligtas at pagsisisi sa ating mga kasalanan sa buhay na ito. Maaari mong isulat ang Mabuti (Nagsisisi) at Masama (Hindi nagsisisi) sa pisara at sabihin sa mga estudyante na saliksikin ang Alma 40:11–26 at ilista sa pisara ang mga salita o parirala na ginamit ni Alma para ilarawan ang kalagayan ng bawat isa sa mga grupong ito pagkatapos nilang mamatay. Pagkatapos ay anyayahan ang mga miyembro ng klase na suriin ang tanong na “Paano tayo mahihikayat ng mga turong ito na magsisi?”

(Maaaring makatulong sa mga estudyante na maunawaan na sa pamamagitan ng Tagapagligtas, may pag-asa pa rin para sa mga mahal sa buhay na pumanaw bago nakapagsisi. Maaari mong anyayahan ang mga estudyante na basahin at talakayin ang mga katotohanang matatagpuan sa 1 Pedro 3:18–20; 4:6 at sa Doktrina at mga Tipan 138:29–37.)

Pagtatamo ng espirituwal na kaalaman

Maaari mong gamitin ang Alma 40 upang tulungan ang mga estudyante na marebyu ang mga alituntunin ng pagtatamo ng espirituwal na kaalaman. Magsimula sa pagtulong sa mga estudyante na matukoy ang tanong ni Alma sa Alma 40:1–3, 9, pagkatapos ay sabihin sa mga estudyante na maghanap ng mga talatang nagpapaliwanag kung paano kumilos si Alma nang may pananampalataya (Alma 40:5–6), kung paano niya sinuri ang kanyang tanong nang may walang-hanggang pananaw (Alma 40:9–13, 23–26), at kung paano siya umasa sa sources na itinalaga ng Diyos para mas makaunawa (Alma 40:3).

Tulungan ang mga estudyante na maipamuhay ang natutuhan nila sa pamamagitan ng pag-anyaya sa kanila na suriin ang tanong na “Paano mo matutularan ang halimbawa ni Alma sa paggamit ng mga alituntunin ng pagtatamo ng espirituwal na kaalaman habang naghahanap ng mga sagot sa iyong mga tanong?”

Mga tanong na sinagot ni Alma

Maaari mong italaga sa mga estudyante ang isang set ng mga talata mula sa Alma 40 at sabihin sa kanila na saliksikin ang mga talatang iyon, at hanapin ang mga tanong na sinagot ni Alma tungkol sa daigdig ng mga espiritu at pagkabuhay na mag-uli. Pagkatapos ay maaaring ibahagi ng mga estudyante ang mga tanong at mga sagot na nahanap nila.

handout the spirit world

handout resurrection