Alma 57

Përpjekja për t’iu Bindur Urdhërimeve Përherë

luftëtarë të rinj të plagosur

Cili është qëndrimi yt kundrejt mbajtjes së urdhërimeve? Përse ka rëndësi qëndrimi yt? Ndërkohë që luftonin në një betejë tjetër të rrezikshme, luftëtarët e rinj iu bindën “çdo fjal[e] të urdhrit me përpikmëri”, duke e vendosur “përherë besimin e tyre në Perëndi” (Alma 57:21, 27). Ky mësim është hartuar për të të ndihmuar të përpiqesh t’u bindesh urdhrave të Perëndisë përherë.

Ndihmojini nxënësit të ushtrojnë përdorimin e aftësive të studimit gjatë gjithë vitit. Mësuesit mund t’u tregojnë nxënësve se si të përdorin shumë aftësi të ndryshme të studimit të shkrimeve të shenjta dhe metoda të të mësuarit në orën mësimore. Nëse dëshironi, mund të ndaloni dhe të diskutoni shkurtimisht se si mund të përdoret një metodë ose aftësi dhe më pas ta ushtroni atë gjatë mësimit. Nxitini nxënësit ta përdorin gjithashtu aftësinë në studimin e tyre vetjak.

Përgatitja e nxënësve: Ftojini nxënësit të mendojnë për shembuj të bindjes së Shpëtimtarit ndaj Atit Qiellor dhe të përsiatin se çfarë mund të mësojnë nga ata shembuj.

Veprimtari të Mundshme të të Mësuarit

Qëndrimet ndaj urdhërimeve

Për të ndihmuar që nxënësit të përgatiten të mësojnë rreth mbajtjes së urdhërimeve, merreni parasysh t’i ftoni ata të bëjnë veprimtarinë vijuese. Nxitini nxënësit që t’i bëjnë përshkrimet e tyre realiste dhe të përshtatshme.

Përshkruaj tre qëndrime të ndryshme që mund të ketë dikush kundrejt mbajtjes së urdhërimeve të Perëndisë dhe përse.

Ndërsa nxënësit flasin, merreni parasysh t’i shkruani qëndrimet në tabelë. Nxitini nxënësit të tregojnë arsye realiste përse dikush mund ta ketë këtë qëndrim.

Ndalu një çast për t’i shkruar përgjigjet për pyetjet vijuese në ditarin tënd të studimit:

• Cili është qëndrimi yt ndaj mbajtjes së urdhërimeve të Perëndisë? Përse ka rëndësi qëndrimi yt?

• Nëse nuk po përpiqesh aktualisht t’i zbatosh urdhërimet sa më mirë që mundesh, çfarë po të pengon të mos e bësh këtë?

Ndërsa studion sot, kërko parime rreth bindjes që mund të të frymëzojnë, shtyjnë dhe ndihmojnë me çdo pyetje ose shqetësim. Përsiat se si ato mund të gjejnë zbatim dhe ta bekojnë jetën tënde.

Luftëtarët e rinj

Në mësimin e mëparshëm, ti mësove se si 2 000 luftëtarë të rinj e ndihmuan Antipusin dhe njerëzit e tij ta mundnin ushtrinë “më [të] fortë” dhe “më [të] madhe në numër” lamanite në atë pjesë të vendit (shih tek Alma 56:34). Tek Alma 57, Helamani e vazhdoi letrën e tij për kapiten Moronin. Gjashtëdhjetë bij të tjerë të popullit të Amonit u bashkuan me ushtrinë e tij (shih tek Alma 57:6) dhe 2 060 luftëtarët e rinj u përballën me një tjetër kërcënim. Lamanitët i sulmuan nefitët dhe gati sa nuk po i mundnin ata kur Helamanit dhe njerëzve të tij iu bashkua një grup ushtarësh që më parë kishin shoqëruar robërit lamanitë (shih tek Alma 57:1–18).

Dy aftësi të studimit të shkrimeve të shenjta që mund ta thellojnë studimin tënd të këtij rrëfimi dhe të të ndihmojnë t’i zbatosh mësimet e tij në jetën tënde janë të përcaktosh fjalë ose fraza të rëndësishme dhe t’i përsiatësh ato.

Lexo tek Alma 57:19–23 për të parë se çfarë ndodhi. Merre parasysh t’i shenjosh fjalët dhe frazat që i përshkruajnë luftëtarët e rinj të Helamanit.

Për të përcaktuar modelin e kësaj aftësie, merreni parasysh të studioni vargjet tek Alma 57:19–20 së bashku dhe të vini në dukje fjalë dhe fraza si “të vendosur” dhe “të paepur”. Merreni parasysh t’i nxitni nxënësit të kërkojnë kuptimet e këtyre fjalëve dhe të tregojnë se si kuptimet e tyre ndikojnë në kuptueshmërinë e tyre. Më pas ftojini nxënësit të gjejnë fjalë dhe fraza të tjera të rëndësishme tek Alma 57:21–23 dhe të tregojnë mendimet e tyre rreth tyre.

Te vargu 21, merre parasysh të shenjosh se si e përshkroi Helamani bindjen e këtyre djemve të rinj. Lexo tek Alma 58:40, duke kërkuar qëndrimin e luftëtarëve kundrejt Perëndisë dhe urdhërimeve të Tij pas kërcënimit ushtarak të radhës.

• Si mendon, çfarë do të thotë të “zbatonin çdo fjalë të urdhërit me përpikmëri” (Alma 57:21) dhe “përpiqen të zbatojnë … urdhërimet e tij përherë” (Alma 58:40)?

• Si ndikon besimi ynë te Jezu Krishti dhe kujtimi i Jezu Krishtit në dëshirën dhe aftësinë tonë për t’iu bindur urdhërimeve të Perëndisë?

Lexo tek Alma 57:24–27, duke kërkuar fjalë ose fraza që tregojnë se si u bekuan bijtë e Helamanit në betejën e tyre të dytë për shkak të besimit dhe bindjes së tyre ndaj Perëndisë.

Ftojini nxënësit të tregojnë se cilat fraza u bënë përshtypje dhe përse mendojnë se këto fraza janë të rëndësishme.

• Çfarë mësove nga ky rrëfim që mund të ketë lidhje me jetën tënde sot?

Nxitini nxënësit të tregojnë parime të ndryshme. Merreni parasysh t’i shkruani përgjigjet në tabelë.

Një parim që mund të mësojmë është se nëse ne e vendosim mirëbesimin tonë te Perëndia dhe përpiqemi t’i zbatojmë urdhrat e Tij përherë, atëherë Ai do të na bekojë me anë të fuqisë së Tij të mrekullueshme.

• Si mund të ndikojë të diturit se ka “një Perëndi të drejtë” që ka “fuqi … mrekulluese” (Alma 57:26) në qëndrimin tonë kundrejt bindjes ndaj Tij?

• Çfarë qëndrimi mendon se mund të dojë Zoti që të kemi kur përpiqemi t’i zbatojmë urdhërimet e Tij por nuk e arrijmë bindjen e përsosur? Si ndihmon kuptueshmëria jote për Shlyerjen e Jezu Krishtit për t’iu përgjigjur kësaj pyetjeje?

Është e rëndësishme të kuptosh se, ndërsa jemi të bindur ndaj urdhrave të Tij, Perëndia do të na bekojë në mënyrën dhe kohën e Tij. Në të dy betejat e tyre, luftëtarët e rinj u bekuan me ruajtjen e jetës së tyre pavarësisht luftimeve të rrezikshme dhe lëndimeve.

Jepuni nxënësve disa minuta për të bërë të paktën dy nga pikat vijuese.

1. Lexo të paktën dy nga fragmentet vijuese për ta rritur kuptueshmërinë tënde për qëllimet e urdhërimeve të Perëndisë dhe se si Ai mund të të bekojë për bindjen tënde: Abraham 3:25; Gjoni 14:15; Mosia 2:41; Alma 9:13.

2. Mendo për shembuj të bindjes së Shpëtimtarit ndaj Atit Qiellor dhe përsiat se çfarë mëson nga shembulli i Tij. Plaku Robert D. Hejls (1932–2017), i Kuorumit të Dymbëdhjetë Apostujve, dha mësim se “dashuria jonë për Shpëtimtarin është çelësi për bindje” (“Nëse Më Doni, Zbatoni Urdhërimet e Mia”, Liahona, maj 2014, f. 37). Mendo për disa prej arsyeve përse e do Shpëtimtarin dhe se si ajo dashuri ndikon në qëndrimin tënd kundrejt bindjes ndaj urdhërimeve.

3. Reflekto mbi mënyrat se si ti ke qenë i bindur ndaj urdhërimeve të Perëndisë dhe mbi bekimet që Ai të ka dhënë për bindjen tënde.

Pasi nxënësit të kenë mbaruar, ftojini ata të bëjnë më të mirën për t’i ndjekur këto udhëzime: Çohuni në këmbë. Gjeni dikë në dhomë dhe tregojini atë që mësuat nga një prej detyrave. Gjeni dikë tjetër në dhomë dhe tregojani atë që mësuat nga një prej detyrave të tjera. Kthehuni në vendet tuaja.

Pasi nxënësit të kenë mbaruar, ftojini ata t’i tregojnë klasës diçka që mësuan nëpërmjet studimit të tyre vetjak ose diçka kuptimplotë që tregoi një shok i klasës.

Mendo për një nga urdhërimet e Perëndisë. Përshkruaje se si mund të duket pamja reale e një adoleshenti sot që përpiqet ta kujtojë Zotin dhe t’i bindet këtij urdhërimi përherë. Më pas përshkruaj se çfarë bekimesh mund të marrë një adoleshent që bindet në këtë mënyrë.

• Cilat janë disa arsye përse ne mund të ndihemi të tunduar të mos bëjmë më të mirën për t’iu bindur një urdhërimi? Si mund t’i kapërcejmë këto tundime?

• Në ç’mënyrë përpjekja për t’i zbatuar urdhërimet përherë kërkon që ne të mbështetemi te Shpëtimtari Jezu Krisht?

Për ta përmbyllur këtë mësim, krijo një synim në ditarin tënd të studimit mbi atë se si do të doje ta “kujtoj[e] Zotin, Perëndinë [tënd], nga dita në ditë; [dhe] … [të] përpiqe[she t’i] zbatoj[e] … urdhërimet e tij përherë” (Alma 58:40). Ti mund të përzgjedhësh një urdhërim të caktuar që do të doje t’i bindeshe më mirë. Si pjesë e synimit tënd, merre parasysh t’i japësh vetes një periudhë kohe – për shembull: “Unë do të përpiqem të lutem sinqerisht mëngjeseve dhe mbrëmjeve për pesë ditët e ardhshme” ose “Unë do të në ditën e Shabatit për katër javët e ardhshme”.

Mund të jetë e dobishme të dini se do të ketë mundësi në mësimin “Vlerësoni të Mësuarit Tuaj 7” që nxënësit ta vlerësojnë ecurinë e tyre.

Komente dhe Informacion për Rrethanat

Çfarë bekimesh vijnë nga bindja ndaj të gjithë urdhërimeve të Perëndisë?

Presidenti Rasëll M. Nelson vuri në dukje një mënyrë tjetër se si mund të përpiqemi për t’u bindur me përpikëri:

Presidenti Rasëll M. Nelson

“[Ju] do të has[ni] njerëz, që përzgjedhin se cilat urdhërime do të mbajnë dhe nuk i marrin parasysh [urdhërimet e] tjera, të cilat vendosin t’i shkelin. Unë e quaj këtë ta trajtosh bindjen si përzgjedhja e ushqimeve në një vakt tip bufe. Ky zakon i përzgjedhjes dhe i të vendosurit, nuk do të funksionojë. Do të udhëheqë drejt mjerimit. Që të përgatitet të takohet me Perëndinë, një njeri i mban të gjitha urdhërimet e Tij. …

… Bindja ndaj urdhërimeve të Perëndisë do të sigurojë mbrojtje fizike e shpirtërore.” (Rasëll M. Nelson, “Të Përballosh të Ardhmen me Besim”, Liahona, maj 2011, f. 34–35)

Përse na jep Zoti urdhërime?

Plaku Dejll G. Renland, i Kuorumit të Dymbëdhjetë Apostujve, dha mësim:

Plaku Dejll G. Renland

“Qëllimi i Atit tonë Qiellor si prindi ynë nuk është që t’i bëjë fëmijët e Tij të bëjnë atë që është e drejtë; është që t’i bëjë fëmijët e Tij të zgjedhin të bëjnë atë që është e drejtë dhe më së fundi të bëhen si Ai. Nëse thjesht Ai do të donte që ne të ishim të bindur, Ai do të përdorte shpërblime dhe ndëshkime të menjëhershme për të ndikuar te sjelljet tona.

Por Perëndia nuk ka interes që fëmijët e Tij thjesht të bëhen ‘kafshë shtëpiake’ të ushtruara dhe të bindura. …

Perëndia krijoi një plan me anë të të cilit ne mund të bëhemi trashëgimtarë në mbretërinë e Tij, një shteg besëlidhjesh që na çon deri atje sa të bëhemi si Ai, na bën të kemi llojin e jetës që jeton Ai dhe të jetojmë përgjithmonë si familje në praninë e Tij. Zgjedhja vetjake ishte – dhe është – jetike për këtë plan, për të cilin mësuam në ekzistencën tonë para lindjes.” (Dejll G. Renland, “Zgjidhni Sot”, Liahona, nëntor 2018, f. 104)

Çfarë tjetër kanë dhënë mësim Autoritetet e Përgjithshme dhe udhëheqësit e Kishës rreth bindjes?

Materialet filmike vijuese theksojnë mësimet e Autoriteteve të Përgjithshme dhe udhëheqësve të tjerë të Kishës:

“Blessed and Happy Are Those Who Keep the Commandments of God” [“Të Bekuar dhe Të Lumtur Janë Ata Që i Zbatojnë Urdhërimet e Perëndisë”] (5:41)

“Going to Grandma’s” [“Duke Shkuar te Gjyshja”] (4:02)

Veprimtari Plotësuese të të Mësuarit

Një fillim alternativ

Merreni parasysh ta filloni mësimin duke paraqitur një listë të detyrave në tabelë. Këtu janë disa shembuj: Bëjini dikujt një kompliment. Lexojeni një fragment të zotërimit doktrinor me zë të lartë. Shkruajeni në tabelë një urdhërim për të cilin jeni mirënjohës.

Kërkojini klasës të bëjë numrin më të madh të mundshëm të tyre në rendin e saktë. Kur të mbarojnë, kërkojuni atyre të përsiatin nëse u përpoqën t’i bëjnë sfidat me saktësi. Ftojini ata të tregojnë se çfarë përfitimesh mund të vijnë nga përpjekja për t’i bërë detyrat me saktësi.

Alma 58. Kthehuni te Perëndia në kohë vështirësish

Për t’i ndihmuar nxënësit ta studiojnë një rrëfim shtesë të luftëtarëve të rinj, shpjegojuni se nefitët dëshiruan ta rimerrnin qytetin e Mantit. Ata ishin kaq të paktë në numër, saqë vendosën të prisnin për përforcime dhe furnizime nga Zarahemla.

Lexoni tek Alma 58:6–12, duke kërkuar atë që bënë nefitët ndërsa u përballën me këtë situatë të vështirë dhe se si u përgjigj Zoti. Ndihmojini nxënësit të përcaktojnë parimin që nëse kthehemi te Perëndia në kohë vështirësish, ne mund të marrim paqe që mund të na japë shpresë. Ftojini nxënësit t’i shkruajnë vështirësitë e zakonshme me të cilat mund të përballet një adoleshent, më pas ftojini ata të shtojnë disa mënyra se si mund të kthehemi te Perëndia në kohë të tilla. Kërkojuni nxënësve të tregojnë se si i ka bekuar Perëndia në kohët e tyre të vështira. Lexoni tek Alma 58:39–40, duke kërkuar se si luftëtarët e rinj zgjodhën të ktheheshin te Perëndia gjatë vështirësive të tyre.