Helamani 3; 6

“Kështu Ne Shohim”

Përfytyro sikur po shkruan një letër për t’i ndihmuar njerëzit që do të jetojnë pas qindra vitesh në të ardhmen. Në thelb, profet Mormoni bëri pikërisht këtë. Ndërsa e përmblodhi historinë nefite dhe e gdhendi atë në fletë të arta, ai vuri në dukje herë pas here të vërteta të rëndësishme duke përdorur thënie si “kështu ne shohim”. Të vërtetat që ai theksoi, mund të na ndihmojnë me sfidat me të cilat përballemi sot. Ky mësim mund të të ndihmojë të përcaktosh të vërteta nga shkrimet e shenjta dhe ta analizosh se si ato të vërteta mund të ndikojnë në jetën tënde.

Ndihmojini nxënësit të mësojnë nga fjalët dhe frazat kyç. Fjalë ose fraza të caktuara në shkrimet e shenjta mund të japin për lexuesit të dhëna për kontekstin. Ndihmojini nxënësit të dallojnë fjalë që të drejtojnë te doktrina dhe parime të rëndësishme të vlefshme sot.

Përgatitja e nxënësve: Ftojini nxënësit të kërkojnë një ose dy të vërteta të rëndësishme gjatë studimit të tyre vetjak ose familjar të shkrimeve të shenjta. Kërkojuni atyre të përgatiten për të shpjeguar se si gjejnë të vërtetë kuptimplotë në shkrimet e shenjta.

Veprimtari të Mundshme të të Mësuarit

Një udhëzues për mbijetesë

Fillojeni mësimin me një veprimtari që i ndihmon nxënësit të mendojnë se si shkrimet e shenjta janë të dobishme në jetën e tyre. Kjo mund t’i ndihmojë ata të dëshirojnë t’i kërkojnë më me zell doktrinat dhe parimet në shkrimet e shenjta. Në vijim është një mënyrë për ta bërë këtë gjë.

• Nëse do të të kërkonin të shkruaje një udhëzues shkollor për mbijetesë për 12 dhe 13-vjeçarë, çfarë do të përfshije?

Lexoje atë që tha Presidenti Rasëll M. Nelson rreth një udhëzuesi për mbijetesë për jetën tënde:

“Profetët e [Librit të Mormonit], siç u frymëzuan nga Zoti, e panë kohën tonë dhe e përzgjodhën doktrinën dhe të vërtetat që do të na ndihmonin më së shumti. Libri i Mormonit është udhëzuesi ynë për mbijetesë në ditët e mëvonshme.” (Rasëll M. Nelson, “Përqafojeni të Ardhmen me Besim”, Liahona, nëntor 2020, f. 75)

• Si po të ndihmojnë doktrina dhe të vërtetat që gjen në shkrimet e shenjta të mbijetosh shpirtërisht? A mund të mendosh për ndonjë shembull të kohëve të fundit?

Ndërsa studion kapitujt te Helamani 3 dhe Helamani 6, do të kesh mundësinë ta ushtrosh përcaktimin e doktrinës dhe parimeve nga shkrimet e shenjta. Kjo mund të të ndihmojë të kesh studim më kuptimplotë të shkrimeve të shenjta dhe të sjellë ty dhe familjen tënde më pranë Krishtit.

“Kështu ne shohim …”

Mes të gjitha grindjeve të shënuara te Helamani 1–6, kishte çaste të përkohshme paqeje. Te Helamani 3, disa mijëra vetë u pagëzuan në Kishë dhe Kisha përparoi. Te Helamani 6, pas kthimit në besim të shumë lamanitëve, nefitët dhe lamanitët jetuan në unitet ndërsa të dy grupet u kthyen te Zoti. Në të dy këta kapituj, Mormoni e ndaloi rrëfimin e tij të historisë nefite për të theksuar doktrinën dhe parimet e rëndësishme të së vërtetës. Ai e bëri këtë duke përdorur thënien “kështu ne shohim”.

Veprimtaria vijuese ka për qëllim t’i trajnojë nxënësit të kërkojnë fjalë ose fraza që i ndihmojnë ata të përcaktojnë doktrinën ose parimet, dhe të shohin se si ato të vërteta mund të ndikojnë në jetën e tyre.

Merreni parasysh t’i vendosni nxënësit në grupe të vogla ose dyshe dhe t’ua paraqitni udhëzimet që t’i ndjekin.

Lexo te Helamani 3:27–30; 6:34–36 për të përcaktuar thëniet “kështu ne shohim” të së vërtetës. Merre parasysh t’i shenjosh ato të vërteta në shkrimet e shenjta dhe t’i mbash shënim me fjalët e tua në ditarin tënd të studimit.

Edhe pse nxënësit mund të përdorin fjalë të ndryshme, ata mund të përcaktojnë parime të ngjashme me sa vijojnë:

• Zoti është i mëshirshëm ndaj të gjithë atyre që e thërrasin në sinqeritetin e zemrave (shihni te Helamani 3:27).

• Porta e qiellit është e hapur për të gjithë ata që besojnë te Jezu Krishti (shihni te Helamani 3:28).

• Kushdo që ka dëshirë, mund ta studiojë fjalën e Perëndisë, që do ta udhëheqë atë drejt mbretërisë së Perëndisë (shihni te Helamani 3:29–30).

• Sa më mirë ta njohim Perëndinë, aq më shumë të ngjarë ka që ne t’i zbatojmë urdhërimet e Tij (shihni te Helamani 6:34).

• Nëse jemi të ligj dhe i ngurtësojmë zemrat tona, atëherë Shpirti i Zotit do të largohet nga ne (shihni te Helamani 6:35).

• Nëse zgjedhim t’i besojmë me gatishmëri fjalët e Zotit, atëherë Ai do ta derdhë Shpirtin e Tij mbi ne (shihni te Helamani 6:36).

Një mundësi është t’u jepni nxënësve më shumë kohë për të ushtruar përcaktimin e të vërtetave. Merreni parasysh t’u kërkoni atyre të shkruajnë thënie të tjera “kështu ne shohim” nga një varg i zotërimit doktrinor, diçka që e studiuan kohët e fundit në shtëpi, ose një tjetër varg të parapëlqyer që e kanë zgjedhur vetë.

Më pas, zgjidh një nga të vërtetat që gjete dhe renditi disa nga rreziqet shpirtërore, sfidat ose sulmet ndaj besimit që kjo e vërtetë mund të të ndihmojë t’u mbijetosh. Për shembull, nëse përdore të vërtetën nëse zgjedhim t’i besojmë me gatishmëri fjalët e Zotit, atëherë Ai do të derdhë Shpirtin e Tij mbi ne (shih te Helamani 6:36), ti mund të renditësh rreziqe si, nevoja për prova shkencore përpara se t’i besosh shkrimet e shenjta, besimi te ekspertët e botës më shumë sesa te profetët ose mirëbesimi i logjikës në vend të mbresave shpirtërore.

Kujtoje thënien nga Presidenti Nelson, në fillim të këtij mësimi rreth faktit që Libri i Mormonit është udhëzuesi ynë për mbijetesë në ditët e mëvonshme.

Nëse janë në dispozicion, siguroni bojëra dhjami, lapsa me ngjyra ose bojëra uji që nxënësit të krijojnë një “udhëzues për mbijetesë” me një faqe. Ata mund ta bëjnë sa vijon në mënyrë individuale ose si grupe.

Në një fletë letre shkruaj “Si të mbijetosh …” dhe përfundoje thënien me një prej rreziqeve, sfidave ose sulmeve që rendite. Për shembull, nëse përdore të vërtetën e përcaktuar më parë, mund të shkruash “Si t’i mbijetosh një sulmi ndaj një mbrese shpirtërore”. Përdore të vërtetën që zgjodhe për të krijuar një udhëzues me një faqe për mbijetesë. Shpjegoje me vizatime ose fjalë se si kjo e vërtetë mund ta ndihmojë një adoleshent të mbijetojë shpirtërisht. Përfshiji të paktën dy nga idetë vijuese në udhëzuesin tënd për mbijetesë:

• Arsyet përse kjo e vërtetë mund ta ndihmojë dikë t’i mbijetojë shpirtërisht vështirësisë që rendite

• Shkrime të shenjta të tjera që lidhen me këtë të vërtetë ose ndihmojnë me vështirësinë që rendite

• Mënyra se si kjo e vërtetë të sjell ty ose të tjerët te Jezu Krishti ose të ndihmon ta marrësh forcën e Tij

• Mendime mbi atë se çfarë mund t’u ndodhë njerëzve nëse kjo e vërtetë nuk dihet ose zbatohet

• Mënyra se si do të ndryshonte bota nëse të gjithë do të zgjidhnin të jetonin sipas kësaj të vërtete

Ftojini nxënësit t’ia tregojnë udhëzuesin e tyre për mbijetesë grupeve të tjera ose të gjithë klasës. Ndërsa e bëjnë këtë, merreni parasysh t’i ftoni ata të tregojnë përvojat vetjake që kanë pasur lidhur me të vërtetat që theksuan. Për shembull, nëse nxënësit përdorën të vërtetën nëse zgjedhim t’i besojmë me gatishmëri fjalët e Zotit, atëherë Ai do të derdhë Shpirtin e Tij mbi ne (shihni te Helamani 6:36), mund t’i pyesni se si e kanë ndier Shpirtin e Tij gjatë studimit dhe zbatimit të fjalëve të Tij nga Libri i Mormonit.

Nxitini nxënësit të kërkojnë doktrina dhe të vërteta të rëndësishme ndërsa studiojnë shkrimet e shenjta. Dëshmoni për fuqinë e fjalës së Perëndisë.

Komente dhe Informacion për Rrethanat

Helamani 3:27–28. Unë luftoj me kaq shumë. A është porta e qiellit vërtet e hapur për mua?

Plaku J. Devn Kornish, i Të Shtatëdhjetëve, dha mësim:

“Anëtarët tanë shpesh pyetin: ‘A jam mjaftueshëm i mirë si person?’ ose ‘A do t’ia dal vërtet për në mbretërinë çelestiale?’ Sigurisht që nuk ka gjëra të tilla si ‘të qenit mjaftueshëm i mirë’. Asnjëri prej nesh nuk mund ta ‘fitojë’ ose ‘meritojë’ ndonjëherë shpëtimin e vet, por është diçka e zakonshme të vrasim mendjen nëse pranohemi përpara Zotit, që është mënyra se si unë i kuptoj këto pyetje. …

… Perëndia i qiellit nuk është një arbitër i pashpirt që kërkon çdo justifikim për të na nxjerrë jashtë loje. Ai është Ati ynë përsosurisht i dashur, i cili dëshiron më shumë se çdo gjë tjetër që t’i ketë të gjithë fëmijët e Tij sërish në shtëpi dhe të jetojnë me Të si familje përgjithmonë. Ai njëmend dha Birin e Tij të Vetëmlindur që ne të mos humbasim por të kemi jetë të përjetshme! [shihni te Gjoni 3:16]. Ju lutem[,] besoni dhe ju lutem merrni shpresë e ngushëllim nga kjo e vërtetë e përjetshme. Ati ynë Qiellor synon që ne t’ia dalim! Kjo është vepra e Tij dhe lavdia e Tij [shihni te Moisiu 1:39].

… Asnjëri nga ne nuk do të jetë ndonjëherë ‘mjaftueshëm i mirë’ veçse nëpërmjet meritave dhe mëshirës së Jezu Krishtit [shihni te 2 Nefi 2:6–8], por, për shkak se Perëndia e respekton lirinë tonë të zgjedhjes, ne gjithashtu nuk mund të shpëtohemi pa u përpjekur vetë.” (J. Devn Kornish, “A Jam Mjaftueshëm i Mirë? A do t’ia Dal?”, Liahona, nëntor 2016, f. 32, 33, 34)

Helamani 6:35–36. Çfarë do të thotë që Shpirti i Zotit filloi të largohej?

Plaku Dejvid A. Bednar, i Kuorumit të Dymbëdhjetë Apostujve, na mësoi se zgjedhjet dhe veprimet tona mund të bëjnë që Shpirti i Shenjtë të largohet prej nesh:

“Pikërisht për faktin se bekimi i premtuar [i pagëzimit dhe sakramentit] është që të mund të kemi gjithmonë me vete Shpirtin e Tij, ne duhet t’u kushtojmë vëmendje dhe të mësojmë nga zgjedhjet dhe ndikimet të cilat na ndajnë nga Shpirti i Shenjtë.

Standardi është i qartë. Nëse diçka që mendojmë, shikojmë, dëgjojmë, ose bëjmë na largon nga Fryma e Shenjtë, atëherë ne duhet të mos vazhdojmë më ta mendojmë, shikojmë, dëgjojmë ose bëjmë atë gjë. Për shembull, nëse ajo që ka për qëllim të na argëtojë, na largon nga Shpirti i Shenjtë, atëherë me siguri ky lloj argëtimi nuk është për ne. Duke qenë se Shpirti nuk pajtohet me atë që është vulgare, e vrazhdë ose jo modeste, atëherë me siguri që të tilla gjëra nuk janë për ne. Meqenëse kur merremi me ato aktivitete të cilat e dimë se duhet t’i shmangemi, e largojmë Shpirtin e Zotit, atëherë gjëra të tilla pa dyshim nuk janë për ne.” (Dejvid A. Bednar, “Që të Mund të Kemi Gjithmonë me Vete Shpirtin e Tij”, Liahona, maj 2006, f. 30; Konferenca e Përgjithshme, prill 2006, f. 49)

Veprimtari Plotësuese të të Mësuarit

Helamani 3:27–28. “Zoti është i mëshirshëm ndaj të gjithë atyre që do të …”

Merreni parasysh ta theksoni mëshirën e Zotit në pranimin e të gjithë atyre që “thërrasin … emrin e tij të shenjtë” ose “besojnë në emrin e Jezu Krishtit” (Helamani 3:27–28).

Nxënësit mund të lexojnë te Helamani 3:24–26, duke kërkuar se si Kisha i priti të penduarit dhe bekimet që ata morën nga Perëndia. Merreni parasysh të diskutoni se përse Perëndia dëshiron që të gjithë njerëzit të jenë pjesë e Kishës së Tij dhe se si ne mund t’i ndihmojmë të gjithë të ndiejnë mikpritje dhe dashuri.

Helamani 3:28. Porta e qiellit është e hapur për të gjithë ata që besojnë te Jezu Krishti

Merreni parasysh t’i ftoni nxënësit të bëjnë referencë‑kryq të vargut te Helamani 3:28 me vargjet te 2 Nefi 31:17–20. Diskutoni se si e hapim portën e qiellit nëpërmjet ordinancave të pagëzimit dhe konfirmimit. Mund të flisni gjithashtu për “shteg[un] … që të çon në jetën e përjetshme” (2 Nefi 31:18) dhe se si mund ta ndjekim atë me besim te Jezu Krishti. Nxënësit mund të vizatojnë disa nga simbolet kyç në këto vargje dhe të shpjegojnë se çfarë përfaqësojnë ato.

Helamani 6:34. Sa më mirë ta njohim Perëndinë, aq më shumë të ngjarë ka që t’i zbatojmë urdhërimet e Tij

Mund t’i ftoni nxënësit të bëjnë referencë‑kryq të vargut te Helamani 6:34 me Mosia 5:13; Gjoni 14:15 ose Gjoni 15:13–15. Diskutojeni se çfarë mund të mësojmë nga shembulli i lamanitëve dhe këto fragmente të shkrimeve të shenjta.

Helamani 6:35–36. “Shpirti i Zotit filloi të largohej”

Vizatojeni në tabelë diagramin vijues:

Nxënësit mund të lexojnë te Helamani 6:34–36, duke kërkuar veprimet ose qëndrimet që mund të shkaktojnë një rritje ose ulje të ndikimit të Frymës së Shenjtë. Ata mund t’i shkruajnë këto ide sipër ose poshtë diagramit, në varësi të drejtimit në të cilin na tërheqin ato veprime ose qëndrime në lidhje me Perëndinë.

Merreni parasysh t’i referoheni thënies së Plakut Dejvid A. Bednar te pjesa “Komente dhe Informacion për Rrethanat”.

Ftoni vullnetarë të tregojnë se si veprimet në gjysmën e sipërme të tabelës i kanë ndihmuar të zhvillojnë ndjeshmëri më të madhe ndaj ndikimit të Frymës së Shenjtë. Diskutoni se çfarë tjetër mund të mësojmë nga shembulli i nefitëve dhe lamanitëve të drejtë te Helamani 6:1–3, 34–36.