Helaman 10

Pinagpala ng Panginoon si Nephi

kabataang babae na nagninilay

Matapos ang kanyang mga propesiya tungkol sa pagpaslang sa punong hukom, pinagnilayan ni Nephi ang lahat ng ipinakita sa kanya ng Panginoon, ngunit pinanghinaan din siya ng loob dahil sa kasamaan ng mga tao. Habang pauwi na siya, nagkaroon siya ng pambihirang karanasan kung saan pinagpala siya ng Panginoon dahil sa kanyang katapatan sa paggawa ng Kanyang kalooban. Ang lesson na ito ay makatutulong sa iyo na maunawaan ang mga katotohanan mula sa karanasan ni Nephi na makapag-aanyaya sa patnubay at kapangyarihan ng Panginoon sa iyong buhay.

Sabihin sa mga estudyante na maging responsable sa sarili nilang pag-aaral at pagkatuto. Bagama’t mahalaga ang tungkulin ng isang titser, ang mga mag-aaral pa rin ang responsable sa sarili nilang pag-aaral at pagkatuto. Ang mga estudyante ay natututo kapag sinasaliksik nila ang salita ng Diyos upang tumuklas ng mga katotohanan tungkol kay Jesucristo at sa Kanyang ebanghelyo para sa kanilang sarili. Tulungan ang iyong mga estudyante na makita ang kahalagahan ng personal na pagninilay, pag-iisip, at pakikipag-ugnayan sa klase.

Paghahanda ng estudyante: Sabihin sa mga estudyante na basahin ang Helaman 10 at alamin ang matututuhan nila mula sa halimbawa ni Nephi na magpapala sa kanilang buhay.

Mga Posibleng Aktibidad sa Pag-aaral

Pagiging karapat-dapat

Maaari mong simulan ang klase sa pag-anyaya sa isang estudyante na alam kung paano gawin ang isang partikular na kasanayan, tulad ng pagsusuot ng kurbata, para ipaliwanag sa isa pang estudyante kung paano ito gawin. Matapos sandaling gawin ito, ipapakita ng maalam na estudyante sa isa pang estudyante kung paano ito gawin. Kung pipiliin mong gawin ito, laktawan ang pangalawang tanong na kasunod nito.

• May naiisip ka bang isang pagkakataon na may natutuhan ka mula sa halimbawa ng ibang tao? Ano iyon?

• Bakit napakaepektibo ng pagkatuto sa pamamagitan ng halimbawa?

Magkakaroon ka ngayon ng mga pagkakataong matuto ng mga katotohanan mula sa halimbawa ng propetang si Nephi. Maaaring naaalala mo na si Nephi ay maling pinaratangan na sangkot sa pagpaslang sa punong hukom ng mga Nephita (tingnan sa Helaman 9:16–20). Sa pamamagitan ng inspirasyon, nakilala ni Nephi ang pumaslang at pinalaya siya (tingnan sa Helaman 9:20–38). Sa pag-uwi ni Nephi, nagkaroon siya ng mahalagang karanasan sa Panginoon na nakatala sa Helaman 10. Ang sumusunod na tatlong aktibidad ay tutulong para magabayan ka sa pag-aaral mo ng kabanata.

Maaari mong ipamahagi sa mga estudyante ang mga sumusunod na handout at anyayahan silang gawin ang mga aktibidad.

Maaari mong hatiin ang mga estudyante sa maliliit na grupo para gawin ang isa sa mga aktibidad sa pag-aaral. Tiyaking magtalaga ng lider ng talakayan para sa bawat grupo. Matapos ang sapat na oras na magawa ng mga estudyante ang unang aktibidad sa pag-aaral, bumuo ng mga bagong grupo at sabihin sa kanila na gawin ang ibang aktibidad sa pag-aaral. Ang prosesong ito ay maaaring ulitin hanggang sa magawa lahat ng mga estudyante ang tatlong aktibidad sa pag-aaral.

Ang isa pang ideya ay bigyan ng oras ang mga estudyante na pag-aralan ang mga materyal mula sa isa sa mga handout nang mag-isa at maghanda ng maikling lesson tungkol sa natutuhan nila. Pagkatapos ay maaaring bigyan ang mga estudyante ng mga pagkakataong ituro ang kanilang lesson sa isang maliit na grupo, o maaaring ituro ng ilang boluntaryo ang kanilang lesson sa klase.

Aktibidad sa Pag-aaral 1: Pagninilay at Personal na Paghahayag

Ano ang natutuhan mo tungkol sa pagtanggap ng paghahayag sa iyong buhay? Sa unang bahagi ng Helaman 10, nalaman natin ang tungkol sa isang karanasan ni Nephi kung saan tumanggap siya ng paghahayag at kapangyarihan mula sa Diyos. Itinuturo sa atin ng halimbawa ni Nephi kung paano natin mapagbubuti ang ating kakayahang tumanggap at makahiwatig ng paghahayag mula sa Panginoon.

Basahin ang Helaman 10:1–3, at alamin kung ano ang dahilan kaya nakatanggap si Nephi ng paghahayag mula sa Panginoon.

• Ano ang nalaman mo?

Pansinin ang salitang pagbubulay-bulay sa talata 2 at 3. Maaari mong markahan ang salitang ito sa iyong mga banal na kasulatan.

Ang isang katotohanan na matututuhan natin mula sa mga talatang ito ay ang pagbubulay-bulay sa mga bagay ng Panginoon ay naghahanda sa atin na tumanggap ng paghahayag.

• Paano mo ipaliliwanag ang pagbubulay-bulay sa isang taong hindi sigurado kung ano ito?

• Bakit maaaring makatulong sa atin ang pagbubulay-bulay para makatanggap tayo ng paghahayag?

Itinuro ni Pangulong M. Russell Ballard ng Korum ng Labindalawang Apostol:

Pangulong M. Russell Ballard

Mahalagang mapanatag at makinig at sundin ang Espiritu. Napakarami lang gumagambala sa atin na umaagaw sa ating pansin, na mas matindi kaysa noon.

Kailangan ng bawat isa na magnilay at mag-isip na mabuti. Maging ang Tagapagligtas ng mundo, noong Kanyang ministeryo sa lupa, ay humanap ng panahong gawin ito. (M. Russell Ballard, “Mapanatag at Malaman na Ako ang Diyos” [Church Educational System devotional para sa mga young adult, Mayo 4, 2014], broadcasts.ChurchofJesusChrist.org)

• Ano ang ilan sa mga hadlang na maaaring magpahirap na pagbulayan o pagnilayan ang mga espirituwal na bagay?

• Ano ang ilan sa “mga bagay ng Panginoon” na maaari mong pagbulayan o pagnilayan?

• Ano ang mga karanasan mo o mga karanasang alam mo kung saan ang pagbubulay-bulay o pagninilay ay humantong sa pagtanggap ng paghahayag?

Mag-isip ng isang mithiin na magagawa mo para maipamuhay ang katotohanang ito. Maaari mong isulat sa iyong study journal ang mithiin mo.

Aktibidad sa Pag-aaral 2: Pagsisikap na Gawin ang Kalooban ng Panginoon nang Walang Kapaguran

Pagnilayan ang isang pagkakataon na may ipinagagawa sa iyo na isang bagay na tila napakahirap. Binigyan ng Panginoon ang propetang si Nephi ng mahihirap na utos nang iutos Niya sa kanya na manawagan ng pagsisisi sa masasamang Nephita. Kahit mahirap, masigasig na nagsikap si Nephi na sundin ang kalooban ng Panginoon.

Basahin ang Helaman 10:4–5 at alamin ang sinabi ng Panginoon kay Nephi dahil sa kanyang katapatan.

• Ano ang ilan sa mga salita o parirala na pinakanapansin mo sa mga talatang ito? Bakit?

Ang isang katotohanan na matututuhan natin mula sa mga talatang ito ay kapag sinisikap nating sundin ang kalooban ng Panginoon at pinaglingkuran Siya nang walang kapaguran, pagpapalain tayo ng Panginoon sa maraming paraan.

• Ano ang maaaring mahirap sa pagnanais na gawin ang kalooban ng Panginoon?

• Ano ang maaalala mo tungkol sa Panginoon na mas magpapadali na sundin ang Kanyang kalooban sa halip na ang iyong sariling kalooban?

Maaaring makatulong na ipabasa sa mga estudyante ang Doktrina at mga Tipan 64:33 at ang isang kaugnay na turo na ibinahagi ng Panginoon tungkol sa walang kapaguran. Maaaring isulat ng mga estudyante ang reperensyang ito sa tabi ng Helaman 10:4–5 sa kanilang mga banal na kasulatan.

• Ano ang ilan sa mga paraan na naglingkod si Jesucristo sa Ama sa Langit nang walang kapaguran?

• Paano mo mapaglilingkuran ang Ama sa Langit at si Jesucristo nang walang kapaguran sa ating panahon?

Mag-isip ng isang mithiin na magagawa mo para hangarin ang kalooban ng Ama sa Langit at paglingkuran Siya nang walang kapaguran. Maaari mong isulat sa iyong study journal ang mithiin mo.

Aktibidad sa Pag-aaral 3: Ang Kapangyarihang Magbuklod

Isipin na kunwari ay pinagkalooban ka ng Panginoon ng kapangyarihang gawin ang anumang hiniling mo sa Kanya. Sa propetang si Nephi, sinabi ng Diyos na ipagkakaloob Niya ang anumang bagay na nanaisin ni Nephi dahil “hindi [siya] hihiling nang salungat sa kalooban [ng Diyos]” (Helaman 10:5).

Basahin ang Helaman 10:7, at alamin ang isa sa mga bagay na ipinagkaloob ng Panginoon na may kapangyarihan si Nephi na gawin.

Ang kapangyarihang inilarawan sa talata 7 ay tinatawag na kapangyarihang magbuklod. Mula sa talatang ito, nalaman natin na ang kapangyarihang magbuklod ay nagbubuklod at naghihiwalay ng anuman sa lupa at sa langit. Maaaring makatulong na malaman na ang ibig sabihin ng nagbubuklod ay nagdurugtong o nag-uugnay at ang ibig sabihin ng naghihiwalay ay nagkakalas o nagbubuwag.

Maaari mong isulat sa pisara ang mga talatang nakalista sa sumusunod na talata at sabihin sa mga estudyante na isulat ang mga ito bilang mga cross-reference sa tabi ng Helaman 10:7 sa kanilang mga banal na kasulatan.

Ang kapangyarihang magbuklod na binanggit sa talata 7 ay ang kapangyarihang magbuklod na siya ring hawak ni Elijah (tingnan sa 1 Mga Hari 17:1), ni Pedro at ng mga apostol (tingnan sa Mateo 16:15–19; 18:18), at ni Joseph Smith (tingnan sa Doktrina at mga Tipan 132:46). Ang mga susi ng kapangyarihan ding ito ay hawak ngayon ng Pangulo ng Ang Simbahan ni Jesucristo ng mga Banal sa mga Huling Araw at ng mga taong maaari niyang pagkalooban nito. Sa kapangyarihang ito, ang mga pamilya ay maaaring mabuklod magpakailanman sa pamamagitan ng mga ordenansa sa templo.

• Sa iyong palagay, bakit nais ng Ama sa Langit na gumawa tayo ng mga tipan na angkop sa buhay na ito at sa kabilang-buhay?

• Sa anong mga paraan ka napagpala dahil nalaman mo na maaaring mabuklod ang mga pamilya nang walang hanggan?

• Paano nakakaimpluwensya sa iyong pag-iisip o pagpili ngayon ang kaalaman na ang mga pamilya ay maaaring magkasama-sama nang walang hanggan?

Pagkatapos magawa ng mga estudyante ang mga aktibidad sa pag-aaral, maaari mong anyayahan ang maraming estudyante na magbahagi ng isang bagay na nadama nila na napakahalaga o napakamakabuluhan mula sa kanilang pag-aaral. Kung may oras pa, makatutulong din na basahin ang Helaman 10:11–19 para malaman kung ano ang ginawa ni Nephi matapos ang sagradong karanasang ito sa Panginoon.

Patotohanan ang mga katotohanang pinag-aralan ngayon, at hikayatin ang mga estudyante na kumilos ayon sa anumang espirituwal na impresyong natanggap nila.

Komentaryo at Impormasyon ng Konteksto

Paano ko mas mauunawaan at magagamit ang pagbubulay-bulay?

Ipinaliwanag ni Pangulong Henry B. Eyring ng Unang Panguluhan:

Pangulong Henry B. Eyring

Kapag nagbulay-bulay tayo, nag-aanyaya tayo ng paghahayag sa pamamagitan ng Espiritu. Ang pagbubulay, para sa akin, ay ang pag-iisip at pagdarasal na ginagawa ko matapos basahin at pag-aralang mabuti ang mga banal na kasulatan. (Henry B. Eyring, “Maglingkod nang May Espiritu,” Liahona, Nob. 2010, 60)

Itinuro ni Elder David A. Bednar ng Korum ng Labindalawang Apostol:

Elder David A. Bednar

Ang ibig sabihin ng salitang magbulay-bulay ay isaalang-alang, magmuni-muni, magnilay, o mag-isip. Ang pagbubulay-bulay sa mga banal na kasulatan, kung gayon, ay mapitagang pagninilay-nilay sa mga katotohanan, karanasan, at aral na nakapaloob sa mga pamantayang banal na kasulatan. Ang proseso ng pagbubulay-bulay ay nangangailangan ng panahon at hindi maaaring pilitin, apurahin, o madaliin. …

Ang pagsusulat ng natututuhan, naiisip, at nadarama natin habang pinag-aaralan natin ang mga banal na kasulatan ay isa pang uri ng pagbubulay-bulay at mabisang paanyaya sa Espiritu Santo para sa patuloy na pagtuturo. (David A. Bednar, “Because We Have Them before Our Eyes,” New Era, Abr. 2006, 6–7)

Paano ko uunahin ang kalooban ng Panginoon kaysa sa sarili kong kalooban?

Ipinaliwanag ni Elder Dale G. Renlund ng Korum ng Labindalawang Apostol:

Elder Dale G. Renlund

Kapag pinagninilayan natin ang kabutihan ng ating Ama sa Langit at ni Jesucristo, nadaragdagan ang ating tiwala sa Kanila. Nagbabago ang ating mga dalangin dahil alam natin na ang Diyos ay ating Ama at tayo ay Kanyang mga anak. Hindi natin hangad na baguhin ang Kanyang kalooban kundi iayon ang ating kalooban sa Kanya at kamtin para sa ating sarili ang mga pagpapalang nais Niyang ipagkaloob, kung hihilingin natin ang mga ito. Inaasam natin na maging mas mapagkumbaba, mas dalisay, mas matatag, mas katulad ni Cristo. Ang mga pagbabagong ito ay pinagigindapat tayo para sa mga karagdagang pagpapala mula sa langit. (Dale G. Renlund, “Pagnilayan ang Kabutihan at Kadakilaan ng Diyos,” Liahona, Mayo 2020, 43)

Ano ang ilang halimbawa ng mga katotohanan sa makabagong panahon na napag-aralan ngayon?

Itinuro ni Elder D. Todd Christofferson ng Korum ng Labindalawang Apostol ang tungkol sa pagmamahal at takdang panahon ng Diyos sa pagbibigay ng paghahayag.

Ang sumusunod na video ay naglalarawan ng kahalagahan ng kapangyarihang magbuklod na makukuha sa mga templo ng Panginoon.

Mga Karagdagang Aktibidad sa Pag-aaral

Helaman 10:11–12. Pagtugon agad sa tagubilin ng Panginoon

Pag-isipan ang pagbibigay-diin sa halimbawa ni Nephi na pagtugon agad sa tagubilin ng Panginoon. Maaari mong anyayahan ang mga estudyante na basahin ang Helaman 10:11–12 at tukuyin ang iniutos ng Panginoon na gawin ni Nephi at kung paano siya tumugon. Maaaring makatulong ang mga sumusunod na tanong sa pagtalakay sa mga talatang ito:

Kailan ka nakakita ng isang tao na tumugon agad sa tagubilin ng Panginoon?

Ano ang ilang halimbawa ng mga paraan na maaaring tumugon agad ang isang teenager sa tagubilin ng Panginoon?

Helaman 10:2–3. Ang pagbubulay-bulay ay naghahanda sa atin para sa paghahayag

Upang lalo pang mabigyang-diin ang alituntunin na ang pagbubulay-bulay ay naghahanda sa atin para sa paghahayag, maaari mong ipatukoy sa mga estudyante ang parehong huwaran sa 1 Nephi 11:1; Doktrina at mga Tipan 76:19; at Doktrina at mga Tipan 138:1–2, 11.

handout1

handout2