Helamani 13–16

Të Kuptosh Profetët e Zotit

Si je ndier kur ke dëgjuar njerëz të shprehin shqetësime ose kritika rreth profetëve? Ndërsa Samuel lamaniti qëndroi mbi mur dhe u bëri thirri njerëzve të pendoheshin, ata patën një sërë reagimesh ndaj fjalëve të tij. Njerëzit përjetojnë reagime të ngjashme ndaj profetëve në kohën tonë. Ky mësim mund të të ndihmojë ta kuptosh rolin e profetëve dhe se si ata mund të na ndihmojnë.

Ndihmojini nxënësit t’u përgjigjen pyetjeve nga një qëndrim besimi. Ndërsa nxënësit i marrin parasysh pyetjet e veta dhe të të tjerëve rreth doktrinës dhe besimeve të Kishës, ftojini ata të përpiqen për ndikimin e Shpirtit. Nxitini nxënësit ta kujtojnë atë që dinë tashmë dhe t’i këqyrin shkrimet e shenjta për kuptueshmëri shtesë. Jepuni atyre kohë për ta ushtruar atë që mund t’i thonë dikujt me pikëpamje të ndryshme.

Përgatitja e nxënësve: Ftojini nxënësit të vijnë të përgatitur për të treguar se si e dinë se Zoti ka qenë me profetët e Tij të lashtë dhe është tani me profetët e Tij bashkëkohorë.

Veprimtari të Mundshme të të Mësuarit

Mirëbesimi te profetët e Zotit

Për t’i përgatitur nxënësit të mendojnë rreth profetëve, merreni parasysh të vizatoni tabelën vijuese në dërrasë dhe të diskutoni ide si klasë ose t’i ftoni nxënësit ta vizatojnë atë në ditarët e tyre të studimit dhe ta plotësojnë atë individualisht ose në grupe të vogla.

Rreth figurës që përfaqëson secilin grup, rendit disa arsye përse njerëzit ose i besojnë dhe i ndjekin profetët, ose nuk i besojnë dhe madje i kritikojnë.

Nëse nxënësit e kryen veprimtarinë në grupe të vogla ose individualisht, ftojini t’i japin mendimet e tyre.

Ndalu një çast për të përsiatur çfarë ke mësuar dhe di tashmë rreth profetëve që mund të të ndihmojë ty dhe të tjerët të besoni se ata janë të thirrur nga Perëndia. Për shembull, mund të kesh bërë një listë të të vërtetave rreth profetëve ndërsa studiove rreth Nefit te Helamani 7–10.

Te Helamani 13, Zoti dërgoi një profet tjetër, Samuel lamanitin. Ky mësim është një vështrim i përgjithshëm i mësimeve të tij (shih te Helamani 13–16). Ndërsa studion, ti mund t’i shtosh listës tënde të vërtetat rreth profetëve. Kërko ide që mund ta ndihmojnë dikë që e ka të vështirë të besojë.

Bazuar në nevojat e nxënësve tuaj dhe nxitjet e Shpirtit, vendosni se si t’i bëni veprimtaritë vijuese. Mund të përqendroheni në një ose dy si klasë dhe t’i përmblidhni të tjerat. Mund t’i ndani nxënësit në grupe, t’i vini të bëjnë njërën nga të tria dhe t’i raportojnë pjesës tjetër të klasës. Mund ta vendosni secilën veprimtari në një fletë letre në vende të ndryshme përreth dhomës dhe t’u kërkoni nxënësve të lëvizin nëpër secilin vend dhe t’i studiojnë të tria veprimtaritë.

Veprimtaria A: Samueli u predikon nefitëve

Lexo te Helamani 13:1–7; 14:9 dhe kërko atë që të lë mbresa rreth Samuelit.

• Çfarë mësove rreth profetëve nga shembulli i Samuelit? (Merre parasysh ta shtosh çdo të vërtetë që gjete në listën tënde.)

Një nga të vërtetat që mund të kesh përcaktuar është se mesazhi i një profeti nuk është nga vetja; ai vjen nga Zoti. Merre parasysh t’i shenjosh frazat te Helamani 13:5, 7; 14:9 që e mbështetin këtë të vërtetë. Nëse dëshiron, mund edhe të lexosh te Helamani 7:29 dhe Doktrina e Besëlidhje 1:38; 21:4–5 si referenca‑kryq dhe t’i lidhësh ato me vargjet te Helamani 13.

• Si mund të ndikojë të kuptuarit e kësaj të vërtete në mënyrën se si i dëgjojmë profetët?

• Si mund të të ndihmojë kur ndihemi të tunduar t’i vëmë në dyshim ose kritikojmë ata?

Merreni parasysh të siguroni disa kopje të botimit të fundit të revistës Liahona për konferencën e përgjithshme që nxënësit ta plotësojnë veprimtarinë vijuese.

Shpenzo disa minuta për ta shqyrtuar një pjesë të një bisede të fundit të konferencës së përgjithshme nga profeti. Mendo për Zotin dhe shqetësimet e Tij për ty. Përpiqu ta lexosh bisedën sikur të jetë një mesazh nga Zoti. Përgatite njërën nga sa vijon:

• Gjej një frazë ose mësim të caktuar që ti beson se është frymëzuar nga Zoti. Trego arsyen përse.

• Përshkruaj se çfarë mund të bësh për të marrë një dëshmi vetjake se një mesazh nga profeti është nga Zoti.

Veprimtaria B: Nefitët u përgjigjen profetëve

Lexo te Helamani 13:24–29; 14:10, duke kërkuar qëndrimin e nefitëve ndaj profetëve.

• Çfarë të vërtetash mund të përcaktosh në këto vargje rreth profetëve?

Mund të kesh përcaktuar një të vërtetë të ngjashme me atë në vijim: profetët e Zotit nuk gëzojnë popullaritet tek të ligjtë. Nëse dëshiron, mund ta mbash shënim këtë të vërtetë pranë këtyre vargjeve.

• Në ç’mënyra e sheh këtë të vërtetë në kohën tonë?

• Si mund të jenë ata që i kritikojnë dhe i kundërshtojnë profetët “drejtues të marrë dhe të verbër”? (Helamani 13:29.)

• Nëse nuk vijmë te Shpëtimtari për t’u penduar dhe përmirësuar, si mund të jetë të zgjedhësh “errësirën në vend të dritës”? (Helamani 13:29.)

Presidenti Spenser W. Kimball (1895–1985) dha mësim:

“Profetët … nuk mund ta ndryshojnë mesazhin e Zotit thjesht për t’i bërë njerëzit të ndihen rehat. Ata janë tepër dashamirës për të qenë kaq mizorë. Jam shumë mirënjohës që profetët nuk e dëshirojnë popullaritetin.” (Spencer W. Kimball, “Listen to the Prophets”, Ensign, maj 1978, f. 77)

Përfytyro dikë që beson se duhet të jetë në gjendje të “bë[jë] çdo gjë që [i] do zemra” (Helamani 13:27). Si rezultat, ai mërzitet kur profetët e ftojnë atë të pendohet. Bazuar në atë që ke mësuar, përgatit një përgjigje ndaj këtij shqetësimi ose kësaj kritike.

Merreni parasysh t’i ftoni nxënësit t’ia tregojnë një pjesë të përgjigjes së tyre klasës. Më pas pyetini se kush mund t’i shtojë diçka asaj përgjigjeje. Vazhdoni derisa klasa të besojë se ka ndihmuar me shqetësimin.

Veprimtaria C: Zoti e ruan Samuelin

Merreni parasysh të paraqitni një figurë të Samuel lamanitit duke folur nga muri, që gjendet në fillim të mësimit.

Shikoje me kujdes figurën nga fillimi i mësimit. Ajo paraqet se çfarë ndodhi në fund të predikimit të Samuelit.

Lexo te Helamani 16:1–8, duke kërkuar dhe shenjuar provën e të vërtetës që fuqia e Perëndisë është me profetët e Tij. (Merre parasysh ta shtosh këtë të vërtetë në listën tënde.)

• Çfarë prove pe që Perëndia ishte me Samuelin?

Ndonëse jo të gjithë profetët janë të mbrojtur në këtë mënyrë, Perëndia i mbron profetët e Tij derisa ta përfundojnë punën e tyre (shih te Mosia 13:1–4; Doktrina e Besëlidhje 122:9).

Nëse po e bëni këtë veprimtari si klasë, merreni parasysh t’i paraqitni figurat vijuese. Nëse është e nevojshme, shpjegojini shkurtimisht historitë që i shoqërojnë ato.

Zgjidh një profet nga shkrimet e shenjta ose historia e Kishës. Renditi provat që Perëndia ishte me atë profet. Merre parasysh t’u referohesh shembujve vijues të Noeut, Moisiut, Pjetrit dhe Jozef Smithit.

(shih te Zanafilla 7:7, 10–13, 17, 23)

(shih tek Eksodi 14:21–30)

(shih te Veprat e Apostujve 12:4–11)

(shih te Joseph Smith – Historia 1:15–25)

Tani rendit provat se Perëndia është edhe me profetët e Tij bashkëkohorë. Shembujt mund të përfshijnë se si mësimet ose ftesat e profetëve bashkëkohorë na kanë ndihmuar të përballemi me vështirësitë e kohës sonë.

Nëse nevojitet, merreni parasysh të jepni njërin ose më shumë nga shembujt vijues:

• Proklamata mbi familjen doli përpara se shumë vetë ta shihnin si një nevojë.

• Presidenti Rasëll M. Nelson zbatoi programin mësimor Eja, Më Ndiq, që paraqiti një model të përqendruar te shtëpia, të përkrahur nga Kisha për studimin e shkrimeve të shenjta, në tetor 2018, përpara se pandemia COVID-19 t’i detyronte shumë vetë të adhuronin nga shtëpia për periudha kohore të zgjatura.

• Përse mund të jetë e dobishme t’i kujtosh këto prova?

Ashtu si populli i Nefit, ne kemi fuqinë të zgjedhim nëse do t’i pranojmë mësimet e profetit ose do të reagojmë me kritikë dhe zemërim. Në ditarin tënd të studimit, mbaje shënim atë që mësove rreth profetëve dhe se si ndihesh rreth tyre. Ndërsa vazhdon ta studiosh atë që Samuel lamaniti dha mësim këtë javë, kërko me lutje të mësosh nga mësimet e tij të frymëzuara dhe t’i zbatosh ato.

Dëshmoni për Zotin dhe profetët e Tij. Merreni parasysh t’i ftoni nxënësit e gatshëm t’i japin gjithashtu dëshmitë e tyre.

Komente dhe Informacion për Rrethanat

Si flet Zoti nëpërmjet profetëve të Tij dhe të tjerëve sot?

Plaku Nil L. Andersen, i Kuorumit të Dymbëdhjetë Apostujve, dha dëshminë vijuese:

“Ju jap dëshminë time që Jezusi është Krishti, që Ai i drejton punët e kësaj vepre të shenjtë dhe që konferenca e përgjithshme është një nga rastet shumë të rëndësishme kur Ai i jep drejtim Kishës së Tij dhe neve personalisht.

… Ne marrim pjesë duke dëgjuar ‘vullneti[n e] Zotit, … mendj[en] e Zotit, … zëri[n e] Zotit dhe fuqi[në] e Perëndisë për shpëtim’ (Doktrina e Besëlidhje 68:4). Ne besojmë në premtimin e Zotit: ‘Qoftë nëpërmjet zërit tim apo nëpërmjet zërit të shërbëtorëve të mi, është njësoj’ (Doktrina e Besëlidhje 1:38). …

Ju premtoj se kur e përgatitni shpirtin tuaj dhe vini me pritshmërinë se do ta dëgjoni zërin e Zotit, mendime dhe ndjenja do të vijnë në mendjen tuaj që janë përshtatur veçanërisht për ju.” (Neil L. Andersen, “Hearing the Voice of the Lord at General Conference” [artikull vetëm në formatin digjital], Liahona, mars 2019, ChurchofJesusChrist.org)

Plaku Robert D. Hejls (1932–2017), i Kuorumit të Dymbëdhjetë Apostujve, foli rreth fjalëve të Samuelit dhe i krahasoi ato me fjalët e profetëve të gjallë.

Përse është e rrezikshme të mos i pranosh fjalët e profetëve?

Presidenti Henri B. Ajring, i Presidencës së Parë, dha mësim:

“Kur hedhim poshtë këshillën që vjen nga Perëndia, ne nuk zgjedhim të jemi të pavarur nga ndikimi i jashtëm. Ne zgjedhim një tjetër ndikim. Ne hedhim poshtë mbrojtjen e një Ati përsosurisht të dashur, të gjithëfuqishëm, të gjithëditur në Qiell, gjithë qëllimi i të cilit, ashtu si ai i Birit të Tij të Dashur, është të na japë jetën e përjetshme, të na japë gjithçka që Ai ka dhe të na sjellë përsëri në shtëpi si familje, në krahët e dashurisë së Tij. Kur hedhim poshtë këshillën e Tij, ne zgjedhim ndikimin e një fuqie tjetër, qëllimi i së cilës është të na mjerojë dhe motivi i së cilës është urrejtja.” (Henry B. Eyring, “Finding Safety in Counsel”, Ensign, maj 1997, f. 25)

Veprimtari Plotësuese të të Mësuarit

Një veprimtari shtesë

Nëse do të ishte e dobishme për klasën tuaj, merreni parasysh të përfshini veprimtarinë vijuese:

Veprimtaria D: Shumë nefitë nuk i pranojnë fjalët e profetëve

Një mënyrë tjetër për t’i trajtuar dyshimet ose kritikat për profetët është të përsiatni se ku mund të çojnë ato. Pavarësisht nga mësimi dhe dëshmia e fuqishme e Samuel lamanitit, shumë nuk besuan. Lexojini vargjet vijuese dhe përgjigjuni për pyetjet e tyre shoqëruese për të zbuluar se çfarë ndodhi pasi u largua Samueli:

• Helamani 16:13–14. Cilat janë dy gjëra që filluan të përmbusheshin?

• Helamani 16:15–20. Përse nuk besoi populli në profecitë e profetëve të Jezu Krishtit?

• Helamani 16:21–23. Ku çoi mosbesimi i tyre?

Një parim që mund të mësojmë është se kur nuk i pranojmë dëshmitarët e Zotit, ne e lejojmë Satanin të ketë ndikim mbi zemrën tonë.

Për ta kuptuar këtë parim, lexojeni thënien nga Presidenti Henri B. Ajring te “Komente dhe Informacion për Rrethanat”.

Krijoni dy skenarë. Në njërin, shkruani rreth dikujt që vendos me zell dhe sinqeritet t’i ndjekë fjalët e profetëve. Në tjetrin, shkruani rreth dikujt që merr vendime për të mos i pranuar fjalët e profetëve. Përfshini se ku mendoni se do t’i çojnë individët këto zgjedhje.