Helamani 14

Shenjat e Shpëtimtarit

Ati Qiellor dërgon profetë për t’i ndihmuar fëmijët e Tij të besojnë te Biri i Tij i Dashur, si atëherë kur e udhëzoi Samuel lamanitin t’u profetizonte nefitëve. Si pjesë e profecive të tij, Samueli foli për shenjat që do të lajmëronin lindjen dhe vdekjen e Jezu Krishtit. Ky mësim mund të të ndihmojë ta forcosh besimin tënd te Jezu Krishti ndërsa i kupton shenjat që na ka dhënë Perëndia.

Nxiteni secilin nxënës të japë kontribut në përvojën e të mësuarit. Jepuni nxënësve mundësi të shumta për të marrë pjesë në orën mësimore. Këto mund të përfshijnë vizatimin, shkrimin në tabelë dhe shpjegimin e asaj që kuptojnë ose dhënien e dëshmisë. Pranojini përpjekjet e nxënësve dhe nxitini të gjithë ta mbështetin kontributin e bashkëmoshatarëve të tyre.

Përgatitja e nxënësve: Ftojini nxënësit të përgatiten për të treguar se si drita mund të krahasohet me Jezu Krishtin. Ata mund të mendojnë për elektrikët e dorës në vende të errëta, llambat në një shtëpi ose dritat natyrale si dielli dhe yjet.

Veprimtari të Mundshme të të Mësuarit

Lajmërimet

Mendo për ngjarje në jetën tënde që janë aq të rëndësishme saqë ti do t’ua lajmërosh ato shokëve dhe familjes përpara kohe. Në shumë kultura, lajmërimet zyrtare të diplomimit, martesës, ditëlindjeve për raste të shënuara dhe ngjarjeve të tjera krijohen dhe dërgohen javë ose muaj më përpara.

Merreni parasysh t’u tregoni nxënësve shembuj të lajmërimeve ose t’u tregoni atyre rreth një ngjarjeje në jetën tuaj që u është njoftuar njerëzve të dashur që më përpara.

• Cilat janë disa arsye përse njerëzit do t’i dërgonin këto lajmërime përpara datës së ngjarjes?

• Cilat janë disa ngjarje që Ati Qiellor ka zgjedhur për t’i lajmëruar që më përpara nëpërmjet profetëve të Tij? Si mendon, përse ato ngjarje janë kaq të rëndësishme për t’u bërë të ditura?

Nëpërmjet profecive të Samuel lamanitit, Perëndia u lajmëroi nefitëve ngjarje të ardhshme të rëndësishme dhe shenjat që do t’i shoqëronin ato.

Lexo te Helamani 14:12, duke kërkuar arsyet përse Perëndia e urdhëroi Samuelin të profetizonte për këto shenja.

Ndihmojini nxënësit të përcaktojnë një parim duke i ftuar ta përmbledhin atë që mësuan nga ky varg. Nxënësit mund të përdorin fjalë të ndryshme, por e vërteta që përcaktojnë mund të jetë e ngjashme me sa vijon.

Një e vërtetë që mund të mësojmë është se njohja e shenjave që Perëndia ka dhënë, mund ta vërtetojë besimin tonë te Jezu Krishti.

Si mendon se do të kishte ndikuar tek ti dëshmimi i shenjave që u dhanë nga Samueli për të lajmëruar lindjen dhe vdekjen e Jezu Krishtit? Përsiat se çfarë shenjash ose përvojash të ka dhënë Perëndia për ta pohuar besimin tënd te Shpëtimtari. Këto mund të përfshijnë shenjat që i paraprijnë Ardhjes së Dytë të Shpëtimtarit.

Shenjat e lindjes dhe vdekjes së Shpëtimtarit

Nëse përdorni veprimtarinë vijuese, jepuni nxënësve një afat kohor në mënyrë që të ketë kohë për materialin që mbetet, që u nevojitet nxënësve tuaj. Nxënësit mund të punojnë në grupe të vogla dhe ju mund t’u caktoni grupeve të ndryshme të studiojnë ose lindjen e Krishtit, ose vdekjen e Tij. Kujtojuni nxënësve ta trajtojnë me respekt lindjen dhe vdekjen e Tij ndërsa krijojnë lajmërimet e tyre.

Një mundësi tjetër është që të gjitha grupet të krijojnë lajmërime rreth lindjes së Krishtit dhe të diskutojnë në grupet e tyre se si këto shenja dëshmojnë për Të. Më pas, nxënësit mund t’i studiojnë shenjat e vdekjes së Krishtit si klasë dhe të diskutojnë se si ato shenja dëshmojnë për Të.

Siguroni materiale si bojëra dhjami dhe fleta sipas nevojës. Në vend të fletëve, nxënësit mund të përdorin pajisje digjitale nëse i kanë në dispozicion.

Duke përdorur profecitë vijuese, krijo lajmërime për nefitët në kohën e Samuelit për lindjen dhe vdekjen e Shpëtimtarit. Përpiqu ta përcjellësh emocionin e lindjes së Shpëtimtarit dhe peshën e vdekjes së Tij. Gjithashtu, përfshi se përse njerëzit duhet të përgatiten për këto ngjarje të ardhshme.

• Shenjat e lindjes së Tij: Helamani 14:2–8

• Shenjat e vdekjes së Tij: Helamani 14:14–15, 20–27

Ftojeni secilin grup t’ia paraqitë lajmërimin e tij një grupi tjetër. Nëse grupe të ndryshme u përqendruan në shenja të ndryshme, ftojini ata t’ia paraqesin një grupi që studioi një shenjë të ndryshme.

Më pas bëni ftesë për një diskutim si klasë rreth Shpëtimtarit duke bërë pyetje si ato në vijim.

• Si mendon, përse shenjat që kanë të bëjnë me dritën dhe errësirën e lajmëruan lindjen dhe vdekjen e Shpëtimtarit?

• Si mund ta ketë vërtetuar të parit e këtyre shenjave besimin e nefitëve te Shpëtimtari?

Nëse do të ishte e dobishme për nxënësit, merreni parasysh t’i ftoni të gjejnë një vend në shkrimet e shenjta ku Shpëtimtari krahasohet me dritën, për shembull te Gjoni 8:12. Merreni parasysh të bëni pyetjen: “Si ka qenë Jezu Krishti një dritë për ju?”

Shenjat e Ardhjes së Dytë

Ashtu si Ati Qiellor përdori shenja për t’i përgatitur nefitët e lashtë për ardhjen e Birit të Tij, Ai përdor shenja në kohën tonë për të na ndihmuar të përgatitemi për Ardhjen e Dytë të Birit të Tij.

Kjo pjesë ka për qëllim t’i ndihmojë nxënësit t’i kuptojnë disa nga shenjat që i paraprijnë Ardhjes së Dytë. Detyra e kontrollit me përputhje më poshtë është një mënyrë për t’i ndihmuar nxënësit ta bëjnë këtë. Mund të përdorni edhe metoda të tjera, të tilla si paraqitja e një liste të shenjave ndërkohë që nxënësit u përgjigjen pyetjeve në fund të mësimit. Ose mund t’i kërkoni secilit nxënës të zgjedhë një referencë për ta lexuar dhe më pas t’ia raportojë klasës shenjën që zbuloi.

Përgjigjet e duhura: 1-d, 2-b, 3-a, 4-c, 5-e

Për të të ndihmuar të familjarizohesh ose kujtosh disa nga shenjat që i paraprijnë Ardhjes së Dytë, lexoji fragmentet vijuese të shkrimeve të shenjta dhe përputhi me përshkrimin e shenjës. Nëse dëshiron të studiosh më shumë shenja, shih “Shenj(a) të Kohërave” tek Udhëzuesi për Shkrimet e Shenjta (scriptures.ChurchofJesusChrist.org).

1 Nefi 14:14	Njerëz nga të gjitha kombet do të vijnë tek tempulli i Perëndisë
2 Nefi 3:6, 11, 15	Një pasardhës i Jozefit nga Egjipti (Jozef Smithi) do të sjellë fjalën e Perëndisë (Librin e Mormonit)
Isaia 2:2–3	Ungjilli do të predikohet në gjithë botën
Mateu 24:14	Njerëzit e Zotit do të gjenden në të gjithë faqen e tokës dhe do të bekohen me fuqinë e Perëndisë
2 Timoteut 3:1–7	Njerëzit do të jenë egoistë dhe mëkatarë dhe do të largohen nga Perëndia

• Si i ke parë të përmbushen disa nga shenjat e Ardhjes së Dytë të Shpëtimtarit?

Pyetja vijuese mund të jetë e rëndësishme për nxënësit për ta përsiatur. Para se të përgjigjen, merreni parasysh t’u jepni atyre kohë për të reflektuar mbi mënyrën se si Kisha e rivendosur e Jezu Krishtit, puna misionare, tempujt, Profeti Jozef Smith dhe Libri i Mormonit kanë ndikuar në besimin e tyre te Shpëtimtari.

• Si e ka vërtetuar përmbushja e këtyre shenjave besimin tënd te Shpëtimtari?

• Sipas vargjeve te Helamani 14:13, 28–29, përse është kaq e rëndësishme që ne të besojmë te Krishti?

• Në ç’mënyra besimi yt te Jezu Krishti ka qenë një bekim për ty?

Merreni parasysh t’i ftoni nxënësit t’i shënojnë në ditarin e tyre të studimit mbresat që marrin për atë sa vijon.

Ndërsa do të studiosh kapitujt te 3 Nefi 1–10 në mësimet e ardhshme, do të lexosh rreth përmbushjes së shenjave që dha Samueli për lindjen dhe vdekjen e Shpëtimtarit. Njerëzit në kohën e Samuelit që i besuan profecitë dhe u përgatitën për ardhjen e Krishtit, patën përvoja shumë të ndryshme nga ata që nuk i bënë ato gjëra.

Në ditarin tënd të studimit, shkruaj rreth besimit tënd te Shpëtimtari dhe përvojat që të çuan në të. Mund të përfshish gjithashtu se si mund ta forcosh atë besim (për shembull, duke vijuar me studimin e Librit të Mormonit ose duke marrë pjesë në tempull).

Komente dhe Informacion për Rrethanat

Në ç’mënyrë përfaqësohet Jezu Krishti nga drita?

Presidenti Dallin H. Ouks, i Presidencës së Parë, shpjegoi:

“Jezu Krishti është drita e botës sepse Ai është burimi i dritës që e zgjon kuptueshmërinë tonë, për shkak se mësimet e Tij dhe shembulli i Tij e ndriçojnë shtegun tonë dhe për shkak se fuqia e Tij na bind për të bërë mirë”. (Dallin H. Oaks, “The Light and Life of the World”, Ensign, nëntor 1987, f. 64)

Çfarë janë shenjat nga Perëndia dhe përse na i jep Ai ato?

“Shenjat janë ngjarje ose përvoja që tregojnë fuqinë e Perëndisë. Ato janë shpesh të mrekullueshme. Ato përcaktojnë dhe lajmërojnë ngjarje të mëdha, të tilla si lindja, vdekja dhe Ardhja e Dytë e Shpëtimtarit. …

Disa njerëz pretendojnë se do të besonin te Perëndia ose puna e Tij nëse do të ishin në gjendje të merrnin një shenjë. Por besimi nuk vjen nga shenjat; ai vjen nëpërmjet Frymës së Shenjtë ndërsa individët i studiojnë shkrimet e shenjta dhe kërkojnë me lutje ta mësojnë planin e Perëndisë. … Shenja të tilla u jepen atyre që janë besnikë dhe të bindur, për t’i forcuar ata në besimin e tyre dhe për t’i ndihmuar ta përmbushin vullnetin e Perëndisë” (Gospel Topics [Tema të Ungjillit], “Signs”, topics.ChurchofJesusChrist.org). (Shihni edhe te Doktrina e Besëlidhje 63:7–10.)

Si duhet të ndikojë njohuria jonë për Ardhjen e Dytë të Jezu Krishtit në jetën tonë?

Presidenti Dallin H. Ouks, i Presidencës së Parë, dha mësim:

“Po sikur dita e ardhjes së Tij të ishte nesër? Sikur ta dinim që do ta takonim Zotin nesër – nëpërmjet vdekjes sonë të parakohshme ose nëpërmjet ardhjes së papritur të Tij – çfarë do të bënim ne sot? Çfarë rrëfimesh do të bënim? Çfarë praktikash do të ndërpritnim? Cilat llogari do të shlyenim? Çfarë faljesh do të jepnim? Çfarë dëshmish do të jepnim?

Nëse do t’i bënim ato gjëra atëherë, përse jo tani? Përse të mos kërkojmë paqe, ndërkohë që paqja mund të fitohet?” (Dallin H. Oaks, “Preparation for the Second Coming”, Liahona, maj 2004, f. 9)

Veprimtari Plotësuese të të Mësuarit

Përmbushja e profecive të Samuelit

Nëse do t’i ndihmonte nxënësit ta mbajnë shënim përmbushjen e profecive të Samuelit, ftojini ata të bëjnë referencën‑kryq ose të lidhin vargjet te 3 Nefi 1:15–21 me vargjet te Helamani 14:2–7 dhe te 3 Nefi 8:17–23 me ato te Helamani 14:20–27.

Jezu Krishti është Drita e Botës

Pas studimit të shenjave të lindjes dhe vdekjes së Jezusit, merreni parasysh t’i fikni dritat në dhomë. Kërkojuni nxënësve të diskutojnë se si jeta pa Shpëtimtarin mund të përfaqësohet nga errësira. Më pas ndizini dritat sërish dhe pyetini nxënësit se si Shpëtimtari është si një dritë për ne.

Mund të shfaqni edhe materialin filmik “Look to the Light” [“Shikoni nga Drita”] (4:28) për të parë shembuj të individëve që dikur ishin në errësirë shpirtërore derisa gjetën dritën që ofron Krishti.

Helamani 14:13–19. Jezu Krishti e mposhti vdekjen fizike dhe shpirtërore

Ndihmojini nxënësit të kuptojnë se fjala vdekje mund të përkufizohet si “ndarje”.

Vdekja fizike është ndarja e shpirtit tonë nga trupi ynë. Vdekja shpirtërore është ndarja e shpirtit tonë nga Perëndia dhe gjërat që i përkasin drejtësisë (shihni tek Alma 12:16, 32).

Merreni parasysh të paraqitni figurën vijuese dhe t’i ftoni nxënësit t’i studiojnë pjesët sipas rendit numerik.

Kur nxënësit të mbarojnë së studiuari, ftoni vullnetarë t’ia shpjegojnë klasës se si Jezu Krishti na shpëtoi nga vdekja fizike dhe nga vdekja e parë shpirtërore. Më pas ftojini ata të shpjegojnë se si Ai bëri të mundur që ne të shpëtojmë nga vdekja e dytë shpirtërore.