Helamani 13, Pjesa 2

“Pendohuni dhe Shpëtoni”

A mendon se shumica e njerëzve e shohin pendimin si një dhuratë nga Perëndia apo si një ndëshkim? Përse? Samuel lamaniti i deshi edhe nefitët e ligj, aq shumë, saqë rrezikoi jetën e tij për t’u dhënë mësimin se pendimi është një dhuratë nga Jezu Krishti që çon në lumturi dhe shpëtim. Ky mësim ka për qëllim të të ndihmojë ta kapërcesh çdo pengesë ndaj pendimit.

Përdorni fjalët e profetëve për të theksuar doktrinën dhe parimet. Profetët dhe apostujt bashkëkohorë i japin mësim, shpjegojnë dhe parashtrojnë doktrinën dhe parimet që jepen mësim në shkrimet e shenjta. Përdorimi i fjalëve profetike mund t’i ndihmojë nxënësit ta kuptojnë dhe ta jetojnë më mirë ungjillin e Jezu Krishtit.

Përgatitja e nxënësve: Ftojini nxënësit të përsiatin se cilat nga fjalët vijuese do të përdornin për të përshkruar pendimin dhe përse: ndëshkim, shpresë, bekim, ndryshim, përparim, mjerim.

Veprimtari të Mundshme të të Mësuarit

Shtegu i saktë

Mund të jetë e dobishme ta filloni mësimin duke i zbuluar pengesat e mundshme ndaj pendimit me të cilat mund të përballen nxënësit. Situatat në vijim ilustrojnë në mënyrë simbolike rëndësinë e pendimit.

Merreni parasysh ta paraqitni këtë figurë të një liqen ndërsa nxënësit përfytyrojnë sa vijon:

Përfytyro sikur disa miq po mundohen të gjejnë një liqen në një mal të lartë për të cilin kanë dëgjuar por nuk e kanë vizituar asnjëherë. Ndërsa udhëtojnë nëpër shkretëtirë, ata takojnë një njeri që thotë se ka vite që jeton në atë zonë. Ai i paralajmëron se shtegu në të cilin ata ndodhen nuk çon te liqeni dhe është i rrezikshëm vende‑vende. Ai i këshillon të kthehen mbrapa dhe të rigjurmojnë hapat e tyre deri në një shteg të ndryshëm që do t’i çojë në mënyrë të sigurt atje.

• Cilat janë disa arsye përse miqtë mund të mos e dëgjojnë këtë njeri?

Ashtu si njeriu në histori, hera-herës profetët mund të na paralajmërojnë për zgjedhje që nuk do të çojnë në lumturi, përparim dhe të na kthejnë tek Ati Qiellor. Ata mund të na nxitin të pendohemi dhe ta ndryshojmë jetën tonë.

Merreni parasysh t’i shkruani përgjigjet e nxënësve për pyetjen vijuese në tabelë:

• Cilat janë disa arsye përse mund të mos pendohemi?

Për t’i ndihmuar nxënësit ta lidhin mësimin me rrethanat e tyre, jepuni atyre kohë për të bërë sa vijon:

Në mësimin e mëparshëm, nëpërmjet mësimeve të Samuel lamanitit për nefitët, mund të kesh mësuar se Zoti e paralajmëron në mënyrë të mëshirshme popullin për pasojat e mëkatit dhe i fal ata që pendohen. Megjithatë, edhe kur e kuptojmë këtë të vërtetë, ne nuk pendohemi gjithmonë. Ndërsa e studion këtë mësim, kërko ndihmën e Zotit për të ditur se si ta kapërcesh çdo pengesë ndaj pendimit tënd.

Pasojat e mëkatit

Nëse do të ishte e dobishme, merreni parasysh të bëni pyetjen: “Çfarë mësuat në mësimin e mëparshëm rreth nevojës sonë për t’u penduar?” Dëgjojini me kujdes përgjigjet e nxënësve dhe përdoreni materialin vijues pasi është i dobishëm.

Lexo te Helamani 13:21–23, duke kërkuar disa nga qëndrimet dhe veprimet për të cilat Samueli tha se populli duhej të pendohej. Mund të jetë e dobishme të dish se një mallkim “sjell gjykime dhe pasojat e tyre mbi një send, njeri ose popull, kryesisht për shkak të padrejtësisë së tyre” (Udhëzuesi për Shkrimet e Shenjta, “Mallkoj, Mallkim”, scriptures.ChurchofJesusChrist.org).

Ftojini nxënësit ta tregojnë atë që gjetën.

• Krahas pasurive, cilat janë disa gjëra të tjera që mund të tundohemi t’i “vë[m]ë zemrat [tona]” dhe t’i “kujto[jmë] gjithmonë” më shumë sesa Zotin?

Merreni parasysh të pyesni nëse nxënësit kanë menduar për ndonjë arsye shtesë përse njerëzit mund të mos i dëgjojnë këto paralajmërime dhe pendohen.

Te vargjet 24–30, edhe Samueli i paralajmëroi njerëzit rreth refuzimit të profetëve nga ana e tyre.

Lexo te Helamani 13:31–38 dhe plotësoje parimin vijues me fjalët e tua: Nëse i refuzojmë vazhdimisht ftesat e profetëve për t’u penduar …

Ftojini nxënësit ta plotësojnë parimin në tabelë. Një nga mënyrat se si mund ta plotësojnë parimin është ne përballemi me shkatërrim dhe do të ndiejmë keqardhje dhe trishtim. Merreni parasysh të bëni pyetje për ndjekjen e ecurisë që i ndihmojnë nxënësit ta thellojnë kuptueshmërinë e tyre. Disa nga këto pyetje mund të përfshijnë sa vijon: Përse mëkatet për të cilat nuk pendohemi çojnë përfundimisht në keqardhje? Si mund të ndikojë kuptueshmëria për këtë parim në dëshirën tonë për t’u penduar?

Një dhuratë nga Perëndia

Siç u dëshmoi Samueli nefitëve, “asgjë nuk mund t[ë na] shpëtojë … veçse pendimi dhe besimi në Zotin Jezu Krisht” (Helamani 13:6). Për shkak të Shlyerjes së Shpëtimtarit për ne, “në qoftë se [ne] pendohemi dhe kthehe[m]i te Zoti, Perëndia [ynë], [Ai] do ta largoj[ë] zemërimin [e Tij]” (Helamani 13:11).

Ndërsa e lexon thënien vijuese nga Presidenti Rasëll M. Nelson, kërko të vërtetat që ai dha mësim që mund të na ndihmojnë t’i kapërcejmë pengesat ndaj pendimit.

Merreni parasysh t’i ndani nxënësit në grupe me nga tre veta dhe t’i jepni secilit nxënës një kopje të thënies vijuese. Ftojeni secilin nxënës të nënvizojë diçka në paragrafin e parë që mund ta ndihmojë dikë të kapërcejë një pengesë ndaj pendimit dhe të shkruajë pranë paragrafit një shpjegim të mënyrës se si mendon se ajo mund të ndihmojë.

Më pas vërini t’ia kalojnë fletën një nxënësi tjetër dhe ta përsëritin procesin për paragrafin e dytë dhe sërish për paragrafin e tretë.

Në fund, ftojini nxënësit të lexojnë gjithçka që nxënësit e tjerë nënvizuan dhe shkruan.

“Shumë njerëz e konsiderojnë pendimin si ndëshkim – diçka që duhet shmangur përveçse në rrethanat më të rënda. Por kjo ndjenjë e të qenit i ndëshkuar shkaktohet nga Satani. Ai përpiqet të na e pengojë vështrimin drejt Jezu Krishtit, i cili qëndron krahëhapur, duke shpresuar dhe i gatshëm të na shërojë, falë, pastrojë, forcojë, të na bëjë të kulluar dhe të na shenjtërojë. …

Asgjë nuk është më çliruese, më fisnikëruese ose më e rëndësishme për përparimin tonë individual sesa një përqendrim i rregullt, i përditshëm te pendimi. Pendimi nuk është një ngjarje; është një proces. Është kyçi drejt lumturisë dhe paqes së mendjes. Kur ndërthuret me besimin, pendimi na jep të drejtën për të përdorur fuqinë e Shlyerjes së Jezu Krishtit. …

Kur zgjedhim të pendohemi, ne zgjedhim të ndryshojmë! Ne e lejojmë Shpëtimtarin që të na shndërrojë në variantin më të mirë të vetes sonë. Ne zgjedhim të rritemi shpirtërisht dhe të marrim gëzim – gëzimin e shëlbimit tek Ai. Kur zgjedhim të pendohemi, ne zgjedhim të bëhemi më shumë si Jezu Krishti!” (Rasëll M. Nelson, “Ne Mund të Bëjmë më Mirë dhe të Jemi më të Mirë”, Liahona, maj 2019, f. 67)

Ftojini nxënësit ta tregojnë atë që mësuan nga studimi i tyre ose studimi i të tjerëve. Nëse është e dobishme, bëni disa nga pyetjet vijuese.

• Si mund ta ndihmojë thënia e Presidentit Nelson dikë t’i kapërcejë pengesat ndaj pendimit?

• Cilat rezultate të pendimit të përmendura nga Presidenti Nelson i dëshiron më shumë? Përse?

• Çfarë dha mësim Presidenti Nelson rreth Shpëtimtarit që mund ta ndihmojë dikë ngurrues të pendohet?

Pendimi

Mund të ketë pengesa të tjera ndaj pendimit që Presidenti Nelson nuk i trajtoi, ose për të cilat mund të na duhet ndihmë ose përgjigje shtesë. Shpenzo disa minuta për të studiuar dhuratën e pendimit, duke kërkuar përgjigje ndaj pyetjeve që mund të kesh ose për të vërtetat që mund të të ndihmojnë t’i kapërcesh pengesat ndaj pendimit me të cilat përballesh. Burimet që mund të të ndihmojnë përfshijnë zërin “Pendohem, Pendim” tek Udhëzuesi për Shkrimet e Shenjta dhe mësimin “Jezu Krishti do t’ju ndihmojë” te Për Forcën e Rinisë: Një Udhëzues për Bërjen e Zgjedhjeve (broshurë, 2022).

• Çfarë mësove që ishte e dobishme për ty?

• Si mund të na ndihmojë Shpëtimtari gjatë gjithë procesit të pendimit?

Ftojini nxënësit të tregojnë atë që mësuan. Nëse nxënësit kanë më shumë pyetje, ftojeni klasën të përpiqet t’u përgjigjet atyre me shkrimet e shenjta dhe mësimet që studioi ose duke treguar përvojat e duhura. Tregoni edhe idetë tuaja.

Lexoje ftesën vijuese nga Presidenti Nelson:

“Me lutje kërkoni të kuptoni se çfarë qëndron si pengesë në udhën e pendimit tuaj. Përcaktojeni atë gjë që ju ndalon të pendoheni. Dhe më pas, ndryshoni! Pendohuni! Ne të gjithë mund të bëjmë më mirë dhe të jemi më të mirë se kurrë më parë.” (Rasëll M. Nelson, “Ne Mund të Bëjmë më Mirë dhe të Jemi më të Mirë”, Liahona, maj 2019, f. 68)

Shpenzo ca kohë për të përsiatur dhe lutur dhe për të shkruar se çfarë ndien ti se do të donte Ati Qiellor të bëje për t’u penduar.

Dëshmo për bekimet që ua ofron Shpëtimtari atyre që e pranojnë ftesën e Tij për t’u penduar.

Komente dhe Informacion për Rrethanat

Po sikur të ndiej se jam endur shumë larg në shtegun e gabuar për t’u kthyer pas?

Plaku Xhefri R. Holland, i Kuorumit të Dymbëdhjetë Apostujve, dha mësim:

Plaku Diter F. Uhtdorf, i Kuorumit të Dymbëdhjetë Apostujve, dha mësim:

“Satani do që të mendojmë se kur kemi mëkatuar[,] ne kemi [shkuar përtej] ‘pikë[s] pa kthim’ – [që] është tepër vonë për [ta] ndryshuar [drejtimin tonë]. …

Krishti erdhi për të na shpëtuar. Nëse kemi marrë [drejtim] të gabuar, Shlyerja e Jezu Krishtit mund të na japë sigurinë se mëkati nuk është një pikë pa kthim. Një kthim i sigurt është i mund[ur] nëse do të ndjekim planin e Perëndisë për shpëtimin tonë.” (Diter F. Uhtdorf, “Pikë Kthimi të Sigurt”, Liahona, maj 2007, f. 99; Konferenca e Përgjithshme, prill 2007, f. 123)

Përse janë profetët kaq të guximshëm për t’i ftuar njerëzve të pendohen?

Presidenti Bojd K. Paker (1924–2015), i Kuorumit të Dymbëdhjetë Apostujve, shpjegoi:

“Ka raste kur prindërit dhe ne që drejtojmë Kishën duhet të japim dashuri me ashpërsi kur pamundësia për të dhënë mësim, paralajmëruar dhe disiplinuar do të thotë të shkatërrosh.

Nuk i kemi bërë ne rregullat; ato na u zbuluan si urdhërime. Ne nuk i shkaktojmë dhe as nuk mund t’i pengojmë pasojat nëse ju nuk u bindeni ligjeve morale (shihni te Doktrina e Besëlidhje 101:78). Pavarësisht kritikës ose kundërshtimit, ne duhet të japim mësim dhe të paralajmërojmë.” (Boyd K. Packer, “Ye Are the Temple of God”, Ensign, nëntor 2000, f. 74)

Plaku D. Tod Kristoferson, i Kuorumit të Dymbëdhjetë Apostujve, dha mësim:

“A mundem thjesht të pres dhe të pendohem më vonë në jetë?”

Presidenti Henri B. Ajring, i Presidencës së Parë, dha mësim:

“Kjo është shumë e pamatur. Më lejoni t’ju tregoj përse. Së pari, njerëzve që e shtyjnë për më vonë pendimin mund t’u mbarojë koha. Dhe së dyti, ata do të gjejnë më shumë mjerim në më shumë mëkate, jo lumturinë që shpresojnë por që nuk mund ta gjejnë.” (To Draw Closer to God: A Collection of Discourses [1997], f. 65)

Lexoni dhe përsiatni vargjet tek Alma 34:32–34.

Veprimtari Plotësuese të të Mësuarit

Ligësia nuk çon në lumturi

Vizatoni shtigje të ndryshme në tabelë që çojnë në drejtime të ndryshme. Emërtojeni fundin e njërit prej shtigjeve lumturia e përjetshme dhe fundin e secilit prej shtigjeve të tjera keqardhje dhe trishtim.

Ftojini nxënësit të lexojnë te Helamani 13:32–39 ndërkohë që mendojnë rreth shtigjeve në tabelë. Informojini ata se këto vargje janë një profeci e dhënë nga Samueli për mënyrën se si do të ndiheshin nefitët një ditë po të vazhdonin në shtigjet e tyre të liga aktuale. Ndihmojini nxënësit të përcaktojnë një të vërtetë nga vargu 38 si për shembull ne nuk mund ta fitojmë lumturinë duke ndjekur paudhësinë. Nxënësit mund të bëjnë referenca‑kryq ose ta lidhin vargun 38 me vargun tek Alma 41:10.

Ftojini nxënësit të tregojnë mënyra se si njerëzit në kohën tonë kërkojnë pa sukses lumturi duke ndjekur paudhësinë. Duke përdorur komentet e nxënësve, emërtojini shtigjet e ndryshme në tabelë që çojnë në keqardhje dhe trishtim. Më pas ftojini nxënësit të lexojnë te Fjalët e Urta 16:20 dhe te Mosia 2:41, duke kërkuar se çfarë të çon në lumturi. Duke përdorur atë që gjetën, emërtojeni shtegun në tabelë si lumturia e përjetshme. Nxënësit mund të tregojnë më pas mënyrat se si kanë mirëbesuar te Zoti ose i kanë zbatuar urdhërimet e Tij dhe se si ato zgjedhje kanë çuar në lumturi në jetën e tyre.