3 Нифай 1

“Бошиглогчдын бошиглолууд гүйцэлдэж эхлэв”

Есүс Христийн төрснийг зарласан одыг хүлээж, харах нь ямар байх байсан бол? Итгэгч нифайчууд лемен үндэстэн Самуелын бошиглосон тэмдгүүдийг биелэхийг хүлээж байсан ч (Хиламан 14-ийг үзнэ үү) үл итгэгчид хэрвээ тэмдэг үзэгдэхгүй бол тэднийг хөнөөх болно хэмээн заналхийлэв. Энэ хичээл Их Эзэн бошиглогчдоороо дамжуулан хэлсэн Өөрийн бүх үгээ гүйцэлдүүлэх болно гэдэгт илүү их итгэлтэй болоход тань туслах зорилготой.

Есүс Христийн талаар гэрчлэх нь. Та Есүс Христийн талаарх гэрчлэлээ хуваалцсанаар суралцагчид хүчирхэг болж чадна. Аврагчийн талаарх ямар мэдрэмжтэй байдаг, яагаад түүнийг дагахаар хичээдэг болохоо суралцагчидтай хуваалцах боломжийг эрэлхийл.

Суралцагчийн бэлтгэл: Суралцагчид Есүс Христэд итгэх нь хэн нэгнийг тодорхой бус, хэцүү үед хэрхэн хүчирхэгжүүлж эсвэл яагаад хүчирхэгжүүлж чадах тухай жишээг хуваалцахаар бэлдэж болно.

Боломжит суралцах үйл ажиллагаа

Итгэлээр хүчирхэгжсэн нь

Дараах асуултууд нь суралцагчдад өөрсдийгөө үнэлэхэд нь туслах зорилготой. Суралцагчид хариултаа хуваалцахгүй.

• Тав нь хамгийн хүчтэй гэж үзээд, нэгээс тавын хооронд үнэлбэл та Бурхан бошиглогчдынхоо үгсийг гүйцэлдүүлдэг гэдэгт итгэх итгэл үнэмшлийн түвшнээ хэрхэн үнэлэх вэ? Яагаад?

Лемен үндэстэн Самуел нифайчуудын дунд ирээд, “Дахин таван жил өнгөрөхөд, мөн болгоогтун, тэгэхэд Бурханы Хүү ирэх болно” (Хиламан 14:2) хэмээн бошиглов. Бошиглогчид олон мянган жилийн туршид Есүс Христийн ирэлтийн талаар бошиглосон бөгөөд хүсэн хүлээсэн Түүний төрөх цаг болжээ. 3 Нифай ном нь тэрхүү таван жилийн төгсгөлд эхэлдэг.

• Хэрэв та Самуелд итгэсэн хүмүүсийн нэг байсан бол энэ удаад юу мэдрэх байсан гэж бодож байна вэ?

Та энэ хичээлийг судалж байхдаа 3 Нифай 1 дэх нөхцөл байдал, бидний үеийн нөхцөл байдлын хоорондын ижил төстэй байдлыг олж мэд. Та Бурханд итгэх итгэлийг тань хүчирхэгжүүлэх утга учиртай үгс, хэллэгийг мөн Түүний бошиглогчдын үгсийг тэмдэглэж болно.

Итгэгч нифайчууд

3 Нифай 1-ийн эхэнд бид Хиламаны хүү Нифай нутгаасаа гарч одсон бөгөөд түүний хүү Нифай нь одоо нифайчуудын дунд бошиглогч болсныг ойлгож мэдсэн.

3 Нифай 1:4–9-ийг уншаад, итгэгч нифайчууд энэ удаад ямар сорилттой тулгарсныг олж мэд.

• Зарим хүнд үхлийн аюул заналхийлсэн ч “тууштайгаар ажиглах” (8-р шүлэг) боломжийг юу олгосон гэж та бодож байна вэ?

Суралцагчдыг жижиг бүлгүүдэд хуваарилагдан, дараах асуултуудыг уншаад, хэлэлцэхэд урь. Бүлэг бүрээс нэг суралцагч сүүлийн асуултад хариулсан бүлгийнхээ хариултыг самбарт бичиж болно.

Дараа нь юу тохиолдсоныг сурч мэдэхийн тулд 3 Нифай 1:10–14-ийг унш.

• Та Нифайг Их Эзэний дууг сонсох үедээ ямар мэдрэмж мэдэрсэн гэж төсөөлж байна вэ?

• Их Эзэн Нифайд болон хүмүүст юу ойлгуулахыг хүссэн гэж та бодож байна вэ?

• Эдгээр шүлгээс та ямар ямар үнэнийг тодорхойлж болох вэ?

Бошиглогчдын үгс гүйцэлдэх болно

Эдгээр шүлгээс олсон хэд хэдэн үнэний дундаас бид Их Эзэн бошиглогчдоороо дамжуулан ярьсан бүх үгээ гүйцэлдүүлэх болно гэдгийг сурч мэднэ. Та 13-р шүлэг дээрх энэ үнэнийг тэмдэглэж болно.

Их Эзэн бусдын төлөө бидний залбирлыг сонсох болно эсвэл Есүс Христ Эцэгийн хүслийг биелүүлэхээр ирсэн зэрэг нэмэлт үнэнүүдийг суралцагчид олж тодорхойлж болох юм.

Суралцагчдыг хоёр, хоёроор нь хуваарилж, дараахыг уншуул.

3 Нифай 1:15–22-ыг уншаад, бошиглол гүйцэлдэх үед хүмүүс хэрхэн хүлээж авсныг олж мэд.

Та суралцагчдад судруудыг өөрсдийнх нь амьдралтай холбоход туслахын тулд дараах асуултуудыг (эсвэл бодолд тань орж ирсэн) хэлэлцэж болно.

• Хүмүүс яагаад өөр өөр байдлаар хүлээж авсан гэж та бодож байна вэ?

• Энэ үйл явдал тохиох үед итгэгчид хэрхэн хүчирхэгжсэн бэ?

• Энэ үйл явдал Их Эзэний танд зориулсан амьдралын төлөвлөгөөнд итгэх итгэлийг тань ямар арга замаар нэмэгдүүлэх вэ?

Таны туршлага

3 Нифай 1 дахь нифайчууд шиг бид ирээдүй нь тодорхойгүй зүйлсээр дүүрсэн мэт санагдах цаг хугацаанд амьдарч байна. Яагаад бид Их Эзэнд болон бошиглогчдоороо дамжуулан өгсөн Түүний үгэнд итгэлтэй байж болох вэ?

Арван хоёр төлөөлөгчийн чуулгын ахлагч Дэвид А.Бэднар ийн заасан:

Итгэлтэй байх нь мунхаглал эсвэл хэт улайран шүтэх явдал биш. Харин энэ нь Есүс Христэд Аврагчийнх нь хувьд болон Түүний нэрэнд мөн Түүний амлалтуудад итгэж, найдахыг хэлнэ. Бид “найдварын төгс гэрэлтэйгээр, мөн Бурханыг болон бүх хүмүүнийг хайрлах хайрыг агуулан Христэд тууштайгаар итгэн урагш тэмүүлснээр” [2 Нифай 31:20] бидний мөнх бус амьдралын хязгаарлагдмал чадавхаас хамаагүй өргөн хүрээг хамардаг мөнхийн төлөвлөгөө болон алсын хараагаар адислагддаг. Ингэснээр бид “хамтдаа цуглаж, мөн ариун газрууд дээр зогсож,” [Сургаал ба Гэрээ 101:22] түүнчлэн “Их Эзэний өдөр ирэх хүртэл шилжин нүүлгэгдэхгүй” [Сургаал ба Гэрээ 87:8] байх боломжтой болно. (Дэвид А.Бэднар, “Үүгээр бид тэднийг нотлох болно,” 2020 оны 10-р сарын Ерөнхий чуулган, 5)

Суралцагчдад дараахыг тунгаан бодох хангалттай хугацаа өг. Шаардлагатай бол бичсэн нөхцөл байдлын жагсаалтаас заримыг нь хуваалц. Суралцагчид судлах тэмдэглэлдээ бодлоо бичиж авах нь тэдэнд тустай байж болох юм. Зарим суралцагч өөрсдийн сорилтыг бодож байхдаа сэтгэл нь хөдөлж болохыг анхаар. Та тэднийг Аврагч руу чиглүүлэхийг эрэлхийлэх үедээ Сүнсний өдөөлтийг дага.

Та яагаад Бурханд итгэх мөн амьдралынхаа талаар тодорхой бус байдал эсвэл айдас мэдрэх хоёрын хооронд эргэлздэг байж болох талаар бод. Эдгээр шалтгаан нь хувь хүн бүрд хувийн шинжтэй ч дараахыг багтааж болно:

• Есүс Христэд итгэдэг итгэлийнхээ төлөө тохуурхагдах, дайралтад өртөх

• Гэр бүл салалтын улмаас эцэг эх нь тусдаа байдаг зэрэг гэр бүлийн харилцааны асуудалтай байх

• Сэтгэлийн түгшүүрт эсвэл сэтгэл гутралд орох

• Ижил хүйстэндээ татагдаж буй хайртай хүмүүсийнхээ төлөө санаа зовох

• Донтолтоос болж зовж шаналж буй эсвэл хортой зуршлыг ялан дийлэхээр тэмцэх

• Сайн мэдээний адислалд хүрч чадахгүй гэдгээс айх

• Үнэ цэнгүй эсвэл уучлагдашгүй гэсэн мэдрэмж төрөх

Иoхан 16:33-т Есүс Христ “ертөнцөд та нар зовлонтой байна. Гэвч зоригтой байгтун. Би ертөнцийг ялсан” хэмээн айлдсан.

• Бошиглогчид Есүс Христэд итгэх итгэлийг хадгалахад тань урамшуулан дэмжиж чадах Түүний талаар ямар зүйлийг илчилсэн бэ? (Та Алма 7:11–13; Ифер 12:27; Исаиа 25:8–9-ийг уншиж болно.) Таны нөхцөл байдалд Тэрээр танд хэрхэн тусална гэж бодож байна вэ?

• Их Эзэнд итгэх итгэл эсвэл Түүний бошиглогчдын үгс хэзээ таныг эсвэл таны мэддэг хүнийг тодорхой бус эсвэл айдастай цаг үед хүчирхэгжүүлсэн бэ? Энэ туршлагыг санаж байх нь хэрхэн таны амьдралд Түүний тусламжийг танин мэдэхэд тусалж болох вэ?

Сүнсний өдөөлтөөр та суралцагчдаас өнөөдөр тэдний анхаарлыг юу татсан талаар хуваалцахыг хүсэж болно. Есүс Христийн тухай гэрчлэлээ мөн бошиглолын үгэнд итгэх итгэлээ мөн Түүний тухай бошиглолуудын талаар хуваалц.

Та өнөөдөр сурч мэдсэн зүйлийнхээ талаарх мэдрэмжээ тэмдэглэн бичиж болно. Үүнд та хийхээр өдөөгдсөн үйлдлээ эсвэл Бурхан бошиглогчдоороо дамжуулан хэлсэн үг бүрээ гүйцэлдүүлэх болно гэдгийг ойлгосноор хэрхэн хүчирхэгжиж болохыг багтааж болно.

Тайлбар ба нөхцөл байдлын талаарх мэдээлэл

Есүс Христэд итгэх итгэл үнэмшил минь сорилттой тулгарах үед хүчтэй байхын тулд би юу хийж чадах вэ?

Тэргүүлэх бишопын зөвлөлийн нэгдүгээр зөвлөх асан бишоп Ричард К.Эжли ийн заасан:

Өнөө үед дэлхий дээр тулгарч буй зөрчил бэрхшээлүүдийг давахад хүн бүхэнд тохирсон амар амгалан болон аюулгүй байдал болох нэгэн сонголтыг хийхийг би санал болгомоор байна. Тэр сонголт нь итгэл. … Эргэлзээний оронд итгэлийг сонго, айдсын оронд итгэлийг сонго, тодорхойгүй, үзэгдэхгүй зүйлсийн оронд итгэлийг сонго, гутралын оронд итгэлийг сонго. …

Логик, учир шалтгаан эсвэл хувийн чинь оюуны чадавх ариун нандин заадаг зүйлс болон сургаалтай зөрчилдөхөд аль эсвэл зөрчилдөөнтэй мэдээлэл нь та нарын итгэл бишрэлийг галт сумаар дайран довтлох үед итгэлгүй байдлын улмаас өөрийн зүрх сэтгэлээсээ тэрхүү үрийг хөөн гаргахгүй байхыг … сонгоорой [Алма 32:28-ыг үзнэ үү]. Бид итгэлийнхээ сорилтын дарааг хүртэл гэрчийг хүлээж авахгүй гэдгийг санаарай (Ифер 12:6-г үзнэ үү). (Ричард К.Эжли, “Итгэл—сонголт нь та нарынх юм,” , 36–38)

3 Нифай 1:14. Христ яагаад Эцэг, Хүүгийн аль алины хүслийг биелүүлж чадах вэ?

Арван хоёр төлөөлөгчийн чуулгын ахлагч Брүс Р.Макконки (1915–85) ийн заасан:

[Есүс Христ] бие махбодтой учир Хүү гэдэг нь тодорхой бөгөөд дэлхийд бусад мөнх бус хүнтэй адил төрсөн гэсэн үг юм. Тэрээр бие махбодтой бөгөөд мөнх бус эмэгтэйн хэвлийд бойжиж, төрсөн. Өөрөөсөө болж өөрөө хэрхэн Эцэг байсныг нь төсөөлөхөд бүр ч хэцүү. Үүнийг зөвхөн Түүнд Эцэгийн хүч байсан тул тэрээр [Аврагч] Эцэг байсан, Түүний хүсэл Эцэгийн хүсэлд захирагдсан; Тэрээр Дээд Нэгнээс өвлөн авсан учир бүх зүйлийг хийж чадна гэсэн үг гэж ойлгож болно. …

Христ бол Бурхан бөгөөд тэрбээр өөрийн хүмүүсийг гэтэлгэхээр дэлхийд ирэх болно. Тэр бол Хүү юм, учир нь тэрээр мөнх бус амьдралд төрсөн билээ. Тэр бол Эцэг юм, учир нь тэрээр Эцэгээсээ бүхнийг чадагч бүх хүчийг өвлөн авсан бөгөөд түүний хэлсэн зүйл, түүний хийсэн үйлдэл нь түүний нэрийг авч явдаг нэгний үг, үйлс болон хувирдаг. (Bruce R. McConkie, The Promised Messiah: The First Coming of Christ [1978], 371–73)

3 Нифай 1:22. Өнөө цагт Сатаны тарааж буй худал хуурмагт унахаас би хэрхэн зайлсхийж чадах вэ?

Тэргүүн зөвлөлийн ерөнхийлөгч асан Дийтр Ф.Угдорф ийн заасан:

Бидний дайсан Сатан биднийг ялагдаасай гэж хүсдэг. Тэрээр бидний итгэлийг устгахын тулд худал хуурмагийг тараадаг. Тэрээр аливаа зүйлд итгэдэггүй, эргэлздэг, зайгаа барьдаг хүмүүсийг боловсорсон, ухаалаг хэмээн харагдуулахыг хичээж, харин Бурханд болон Түүний гайхамшгуудад итгэдэг хүмүүсийг гэнэн, харалган эсвэл тархиа угаалгасан хүмүүс гэж харагдуулан, зальдахыг хичээдэг. Сүнслэг бэлгүүд, үнэн бошиглогчдын заавруудад эргэлзэх нь сайн гэж Сатан зааварладаг.

Бид мэддэггүй зүйлсийн улмаас бус, бүх зүрх сэтгэл, оюун ухаанаараа мэддэг зүйлсийнхээ ачаар Бурханд итгэдэг хэмээх энгийн бодит үнэнийг хүн бүрд ойлгуулахад нь би туслах юм сан. Бидний сүнслэг туршлага заримдаа дэлхийн үгсээр тайлбарлахад дэндүү ариун боловч энэ нь бодит бус гэсэн үг биш юм. (Дийтр Ф.Угдорф, “Бүү ай, зөвхөн итгэ,” 2015 оны 10-р сарын Ерөнхий чуулган, 72)

Нэмэлт суралцах үйл ажиллагаа

3 Нифай 1:22-26. Бид Сатаны худал хуурмагтай нүүр тулахдаа Есүс Христэд итгэж, хөрвөгдөхийг сонгож чадна.

Та суралцагчдад 3 Нифай 1 дээрх үйл явдлууд, Есүс Христийн Хоёр дахь ирэлтээс өмнөх бидний өнөөгийн амьдрал хоёрын хоорондын хамаарлыг олж харахад нь тусалж болно. Суралцагчдыг тэдний итгэл үнэмшилд тулгарч буй сорилтын талаар болон залуу хүмүүс хэрхэн хүлээн авч буй тухай бодоход урь. 3 Нифай 1:22–26-г уншаад, итгэгч нифайчууд хэрхэн хүлээж авсныг олж мэд. Cуралцагчид дараах зарчмыг тодорхойлж болно: Бид Сатаны худал хуурмагтай нүүр тулахдаа Есүс Христэд итгэж, хөрвөгдөхийг сонгож чадна.

Та дараахтай ижил асуултуудыг хэлэлцэж болно:

• Өнөөдөр Сатаны ямар худал хуурмаг өсвөр үеийнхэнд тулгарч байна вэ?

• Есүс Христэд итгэх таны итгэл Сатаны худал хуурмагаас зайлсхийж, үл тооход тань хэрхэн тусалсан бэ?

• Есүс Христэд итгэж, дагахаар сонгосон нь таныг илүү хөрвөхөд хэрхэн тусалсан бэ?

Хожмын үеийн бошиглогчдын үгнүүдэд итгэж найдах нь

Хичээлийн “Таны туршлага” хэсгийн үеэр та суралцагчдыг одоогийн бошиглогч, төлөөлөгчдийн сүүлийн үед хэлсэн үгсийг судлахад урьж болно. Та Тэнгэрлэг Эцэгт болон Есүс Христэд итгэх итгэлийг нь үе тэнгийнхэн нь шоолж, тохуурхаж буй өсвөр насны хүүхдийн тухай товчхон жишээг хуваалцаад, дараах асуултуудыг асууж болно.

• Та Их Эзэн Өөрийн бошиглогчдоороо дамжуулан ярьдаг үгсээ гүйцэлдүүлдэг гэдгийг мэдсэнээр хэрхэн тэсэж, хүчирхэгжсэн бэ?

• Та сорилттой тулгарсан үед итгэл үнэмшлээрээ амьдрахыг эрэлхийлэхдээ илүү утга учиртай санагдсан сүүлийн үеийн бошиглогчдын үгс юу вэ?