3 Нифай 2–5

“Бэлтгэгдсэн байв … Их Эзэний хүч чадлаар”

Минэрва Тэйчэрт (1888-1976), Лаконеусын хариулт 1949-1951, масонайт дээр наасан зотон дээр тосон будгаар, 36 x 48 инч Бригам Янгийн Их Сургуулийн Уран зургийн музей.

Бид Аврагчийг эргэн ирэхэд хүргэдэг сорилтуудтай тулгардаг шиг нифайчууд ч мөн адил Түүнийг тэдэн дээр ирэхээс өмнөх жилүүдэд сорилтуудтай нүүр тулгарсан. Гадиантоны дээрэмчид нифайчуудыг устгахаар заналхийлэв. Хэдий тийм ч нифайчууд “тэдэнтэй тулгарахад бэлтгэгдсэн байв … Их Эзэний хүч чадлаар” (3 Нифай 4:10). Нифайчуудын адилаар бид ч гэсэн бэлтгэлтэй байх замаар сорилтуудыг даван туулж чадна. Энэ хичээл сүнслэг болон материаллаг байдлын хувьд бэлтгэгдсэнээр Их Эзэний хүчийг хүлээн авахад тань тусална.

Суралцагчдыг үр дүнтэй, зөв шударга үйлдэл хийхэд урь. Суралцагчдыг судруудыг судалж байхад нь тэдэнд сонголтуудын үр дагаврыг болон цэдэгт өгүүлсэн үйлдлүүдийг танин мэдэхэд тусал. Суралцагчдыг эдгээр хичээлийг амьдралтайгаа хамаатуулж, хэрхэн Аврагчийг үнэнч дагаж болохоо тодорхойлоход нь урамшуулан дэмж.

Суралцагчийн бэлтгэл: Суралцагчдыг сүнслэг болон материаллаг байдлын хувьд бэлтгэгдсэнээр ирдэг адислалын тухай эцэг эхтэйгээ эсвэл Сүмийн удирдагчтайгаа ярилцахад урь.

Боломжит суралцах үйл ажиллагаа

Бэлтгэлтэй бай

Энэ үйл ажиллагааны зорилго нь суралцагчдад бэлтгэлтэй байхын ач холбогдлыг ойлгоход туслах явдал юм. Суралцагчдад тэдний хувьд бэлтгэлтэй байх хэрэгтэй нөхцөл байдлын талаар бодоход тусал. Бэлтгэлтэй байснаар адислагдсан эсвэл бэлтгэлгүй байсны улмаас хэцүү байсан үеийнхээ талаар хуваалц.

Амьдралдаа бэлтгэлтэй эсвэл бэлтгэлгүй санагдсан үеийнхээ талаар бод.

• Нөхцөл байдал ямар байсан, танд яагаад бэлтгэлтэй эсвэл бэлтгэлгүй гэж санагдсан бэ?

• Хэрэв танд бэлтгэлгүй санагдсан бол та ирээдүйдээ илүү сайн бэлтгэхийн тулд юу хийсэн бэ?

• Та одоо тулгарч буй эсвэл ирээдүйд тулгарч болох сорилтод сүнслэг байдлаар бэлтгэхийн тулд юу хийсэн бэ?

Та 3 Нифай 2–5-ыг судалж байхдаа ирээдүйд өөрийгөө сүнслэг болон материаллаг байдлын хувьд бэлтгэхийн тулд юу хийж чадахаа мэдэхийн тулд Сүнсний удирдамжийг эрэлхийл.

Лаконеусын бэлтгэл

Бошиглогч Самуел Есүс Христийн төрөлтийн тэмдэг болгож, нэгэн шөнө харанхуй болохгүй гэж бошиглов. Бошиглол гүйцэлдэх үед (3 Нифай 1:15–19-ийг үзнэ үү) “хүмүүсийн ихэнх хэсэг нь итгэж, мөн Их Эзэнд хөрвүүлэгдэв” (3 Нифай 1:22). Гэвч хэдхэн жилийн дараа зарим хүн итгэхээ больж эхлэв.

Дараах үйл ажиллагааг хийхийн тулд та ангийг хоёр хэсэг болгох эсвэл хоёр хоёроор нь хос болгон хуваарилж болно. Суралцагчдын тал нь дараах хэсгүүдийн нэгийг уншаад, олж мэдсэн зүйлээ ангийнхандаа эсвэл хамтрагчдаа мэдээлж болно.

3 Нифай 1:27–30, 3 Нифай 2:1–3-ыг уншаад, зарим хүний Их Эзэнээс холдсон шалтгаануудыг олж мэд.

• Эдгээр шүлгээс бид өнөө үед Их Эзэнд үнэнч үлдэхэд бидэнд тусалж чадах ямар хичээлийг мэдэж авч болох вэ?

Гадиантоны дээрэмчдийн тоо нэмэгдэж, нифайчуудын эсрэг тулалдав. Хариуд нь “Их Эзэнд хөрвүүлэгдсэн бүх леменчүүд өөрсдийн ахан дүүс болох нифайчуудтай нэгдэв” (3 Нифай 2:12). Гадиантоны дээрэмчдийн удирдагч Гидианхай нифайчуудын ерөнхий шүүгч Лаконеуст захиа бичив. Тэрээр захиандаа нифайчуудыг бууж өгөхгүй бол устгах болно хэмээн заналхийлэв (3 Нифай 3:1–10-ыг үзнэ үү).

3 Нифай 3:11–12-ыг уншаад, Лаконеус хэрхэн хариулсныг олж мэд.

• Та Их Эзэнд итгэх Лаконеусын итгэлээс ямар нотолгоог харж байна вэ?

Нифайчуудын бэлтгэл гэж самбар дээр бич. Дараах хэсгүүдийг ангийн өөр өөр хүүхдүүдэд оноо эсвэл бүлгүүдэд хуваарил. Суралцагчдыг хүмүүс сүнслэг болон материаллаг байдлын хувьд бэлтгэхээр юу хийснийг самбар дээр жагсааж бичихэд урь.

• 3 Нифай 3:13–16

• 3 Нифай 3:17–21

• 3 Нифай 3:22–26

• 3 Нифай 4:3–4

Суралцагчдад материаллаг бэлтгэлийг танин мэдэхэд туслахын тулд та нифайчууд хэрхэн бэхлэлт барьж, харуулуудыг байрлуулж, хангамж, хоол хүнс цуглуулж байсныг онцолж болно. Сүнслэг бэлтгэлийн хувьд та тэд хэрхэн наманчилж, чөлөөлөлтийн төлөө залбирч байсныг онцолж болно.

• Аль бэлтгэл нь илүү их тус болсон гэж та бодож байна вэ? Яагаад?

• Эдгээр бэлтгэл нь тэднийг Их Эзэнд найдахад хэрхэн тусалсан гэж та бодож байна вэ?

3 Нифай 4:7–12-ыг уншаад, нифайчууд хэрхэн сүнслэг болон материаллаг байдлын хувьд бэлтгэлтэй байснаар адислагдсан болохыг хайж ол.

• Бид энэ түүхээс ямар зарчим мэдэж авч болох вэ? (3 Нифай 4:10-ыг үзнэ үү.)

Бид өөрсдийгөө сүнслэг болон материаллаг байдлын хувьд бэлтгэвэл Их Эзэн биднийг сорилтоо давахад хүчирхэгжүүлдэг гэсэн нэг зарчмыг бид энэ түүхээс мэдэж авч болно.

Өнөө үеийн бэлтгэл

Орчин үеийн жишээ гэж самбар дээр бичээд, суралцагчдад өнөө цаг үед бидний хийж чадах бэлтгэлийн жагсаалтыг үүсгэхэд тусал. Тэдгээр нь нифайчуудын хийсэнтэй ижил бэлтгэл эсвэл бошиглогчдын бидэнд хийхийг зөвлөсөн бусад бэлтгэл байж болно. Өнөө цаг үед бидэнд тулгарч буй тодорхой сорилтын талаар мөн эдгээр бэлтгэл нь Их Эзэний хүчинд бэлэн болоход бидэнд хэрхэн туслах талаар хэлэлц.  

• Жагсаалтаасаа нэг эсвэл олон бэлтгэл сонго. Энэ нь өнөө цаг үед бидэнд тулгарч буй тодорхой сорилтыг даван туулахад хэрхэн туслах вэ?

• Та бидний бэлтгэл ямар арга замаар Их Эзэнд биднийг хүчирхэгжүүлэх боломж олгодог гэж бодож байна вэ?

Гадиантоны дээрэмчид бүслэлт байгуулсан ч нифайчуудын бэлтгэлд бурханлаг тусламж байсан тул тэр нь бүтэлгүйтэв. Яваандаа Гадиантоны дээрэмчид ухарчээ. Нифайчуудын арми тэднийг салгаж, нифайчуудад өөрсдийгөө хоригдлууд болгон бууж өгч мөн алагдсан билээ (3 Нифай 4:16–27-г үзнэ үү).

3 Нифай 4:30–33; 5:1–4-ийг уншаад, хүмүүс Их Эзэнээр хүчирхэгжсэн байдлыг хэрхэн хүлээж авсныг олж мэд.

• Тэдний хариу үйлдэл Бурханд итгэх итгэлийг нь хэрхэн харуулсан бэ?

Та суралцагчдад тунгааж, эргэцүүлэн бодоход зориулж ерөнхийлөгч Нэлсоны хэлсэн үгийн хамт дараах урилгыг харуулж болно.

Сүнслэг болон материаллаг байдлын хувьд бэлтгэж байхдаа Их Эзэний хүчийг мэдэрсэн байж болох үеэ эргэцүүлэн бод.

Ерөнхийлөгч Рассэлл М.Нэлсон бэлтгэлтэй байхын адислалуудыг ийн гэрчилсэн:

Дайсан хэзээ ч дайралтаа зогсоохгүй. Тиймээс бид ч гэсэн хэзээ ч бэлтгэлээ зогсоож болохгүй. Бид материаллаг болон сэтгэл санаа, сүнслэг байдлын хувьд хэдий чинээ сайн биеэ даасан байна, Сатаны зогсолтгүй дайрах дайралтыг сөрөн зогсоход төдий чинээ сайн бэлтгэгдсэн байна. …

Ирэх өдрүүд амар хялбар байна гэж би хэлэх гээгүй ч бэлтгэгдсэн хүмүүсийг болон Их Эзэний мутарт зэмсэг байхаар цаашид ч өөрсдийгөө үргэлжлүүлэн бэлдэх хүмүүсийг гайхалтай ирээдүй хүлээж байгааг би амлаж байна. (Рассэлл М.Нэлсон, “Ирээдүйгээ итгэлээр хүлээн ав,” 2020 оны 10-р сарын Ерөнхий чуулган, 79)

Шаардлагатай бол суралцагчдын юунд бэлтгэх хэрэгтэй байж болох жишээнүүдийг хуваалц—жишээлбэл номлолын үйлчилгээ, боловсролын салбарын боломжууд, карьер, байгалийн гамшиг эсвэл Аврагчийн ирэлт.

Таны бэлтгэх ёстой сорилт бэрхшээл, нөхцөл байдал, үйл явдлын талаар бод. Өнөөдөр хэр бэлтгэлтэй байгаа талаараа эргэцүүлэн бод. Эдгээр асуултад хариулахдаа Ариун Сүнсний удирдамжийг эрэлхийл.

• Та бэлтгэхийн тулд ямар тодорхой үйлдэл хийх вэ?

• Та бэлтгэлдээ Их Эзэнийг хэрхэн багтаах вэ?

Бэлтгэлтэй байснаар ирэх адислалуудын тухай гэрчил. Суралцагчдыг тэдэнд тулгарч болох сорилтуудын талаар болон хэрхэн сүнслэг болоод материаллаг байдлын хувьд бэлтгэх талаар гэр бүлийнхэнтэйгээ ярилцахад урамшуулан дэмж.

Тайлбар ба нөхцөл байдлын талаарх мэдээлэл

Бид үүнд хэрхэн бэлтгэж болох вэ?

Ерөнхийлөгч Рассэлл М.Нэлсон ийн заасан:

Бидэнд “хэрэв [бид] бэлтгэгдэх аваас [бид] эмээх нь үгүй” [Сургаал ба Гэрээ 38:30] хэмээн амласан. Энэхүү баталгаа өнөөдөр гүн гүнзгий утга учрыг агуулдаг. Урьд өмнө тохиож байгаагүй өнөөдрийн сорилт бэрхшээлийг үл харгалзан Есүс Христ дээр сууриа тавьдаг, Түүний хүчээр хэрхэн зэвсэглэхээ мэддэг хүмүүс энэ эрин үеийн өвөрмөц түгшүүрт эрсдэх нь үгүй хэмээн Их Эзэн тунхаглажээ. (Рассэлл М.Нэлсон, “Ариун сүм ба таны сүнслэг байдлын суурь,” 2021 оны 10-р сарын Ерөнхий чуулган)

Тэргүүн Зөвлөлийн ерөнхийлөгч Даллин Х.Өүкс ийн тунхагласан:

Бид Хоёр дахь ирэлтийн үед болно хэмээн бошиглосон үйл явдлуудад материаллаг болон сүнслэг байдлын хувьд бэлтгэх хэрэгтэй. Үл анзаарагдам болон илүү хүнд хэцүү зүйлсээс зайлсхийх бэлтгэл бол сүнслэг байдал юм. (Dallin H. Oaks, “Preparation for the Second Coming,” Liahona, May 2004, 9)

Арван хоёр төлөөлөгчийн чуулгын ахлагч Дэвид А.Бэднар ийн тайлбарласан:

Мөнх бус байдлын биднийг сорьсон туршлагуудад бэлтгэх хүчин чармайлт маань “мэргэн ухаан, бие хаа өссөөр байсан агаад, Бурханы хийгээд хүмүүний таалалд байсан” [Лук 2:52] мөн оюун ухаан, бие бялдрын мөн сүнслэг болоод нийгмийн бэлэн байдлын нийлмэл тэнцвэрийг хангаж өгсөн Аврагчийн жишээг дагах ёстой. (Дэвид А.Бэднар, “Үүгээр бид тэднийг нотлох болно,” 2020 оны 10-р сарын Ерөнхий чуулган, 5)

Арван хоёр төлөөлөгчийн чуулгын ахлагч Квинтин Л.Күк ийн заасан:

Амьдралд тохиолдох шуурга, уруу таталтыг урьдчилан тооцоолох боломжгүй билээ. Гэхдээ бид “тэдгээр нь тохиолдоно!” гэдгийг мэднэ. Бидний хүн бүрд зайлшгүй тулгарах бэрхшээл, уруу таталтыг даван гарахад зөв шударга бэлтгэл, бурханлаг хамгаалалт хэрэгтэй. Бидэнд юу ч тохиолдсон бай бид ариун сүмд ороход зохистой байх ёстой. Хэрэв бид бэлтгэгдэх аваас эмээх нь үгүй. (Квинтин Л. Күк, “Нямбай, Бристоль маягаар: Сайн, муу ямар ч үед ариун сүмд орох зохистой бай,”2015 оны 10-р сарын Ерөнхий чуулган, 23–27)

3 Нифай 2:15. “Тэдний зүхэл тэднээс авагдаж” гэдэг нь юу гэсэн үг вэ?

Нифайн өдрүүдэд леменчүүд зүхэгдсэнээр “тэд Их Эзэний дэргэдээс тусгаарлагдах болно …[энэ нь] тэдний алдсын улмаас бөлгөө” (2 Нифай 5:20–21). Энэхүү зүхэл тэднийг ёс бус хэвээр байсан цагт үргэлжилсээр байв. Леменчүүдийг наманчилж, сайн мэдээгээр амьдарсан үед “Бурханы зүхэл тэднийг цаашид дагасангүй” (Алма 23:18). 3 Нифай 2-д Их Эзэнд хөрвөгдсөн леменчүүдээс зүхэл авагдав (3 Нифай 2:12, 15-ыг үзнэ үү).

Нэмэлт суралцах үйл ажиллагаа

Аврагчийн хэрхэн бэлтгэсэн жишээ

Суралцагчдад Аврагчийн хэрхэн бэлтгэсэн жишээг харах нь тустай байж болох юм. Тэд Лук 2:52-ыг мөн “Тайлбар ба нөхцөл байдлын талаарх мэдээлэл” хэсэг дэх ахлагч Дэвид А.Бэднарын мэдэгдлийг уншиж болно. Суралцагчдын эдгээр талбарт бэлтгэж болох арга замуудыг ярилц. Мөн та суралцагчдын тавьсан байж болох Хүүхэд, өсвөр үеийнхний хувь хүний хөгжлийн зорилтуудыг дурдахад тэднийг урьж болно.

3 Нифай 2:1–3. Сүнслэг туршлагуудыг сана

Сүнслэг туршлагуудаа санах нь чухал болох талаар ярилц. 3 Нифай 2:1–3-ыг уншиж дууссаныхаа дараа та хэрэв бид өөрсдийн туулсан сүнслэг туршлагаа мартвал юу болох талаар ярилцаж болно. Та суралцагчдыг сүнслэг үнэний гэрчлэлээ санаж, шинэчлэхийн тулд юу хийж байгаагаа хуваалцахад урь. Тэд өмнөх сүнслэг туршлагаа судлах тэмдэглэлдээ бичиж болох юм.

Энэ сэдвээр дэлгэрэнгүй мэдээлэл хэрэгтэй бол дараахыг харна уу:

• Henry B. Eyring, “O Remember, Remember,” Liahona, Nov. 2007, 66–69

• Роналд А.Расбанд, “Та мартахгүйн тулд,” 2016 оны 10-р сарын Ерөнхий чуулган, 110

• Нийл Л.Андэрсэн, “Амьдралыг тодорхойлогч сүнслэг дурсамжууд, 2020 оны 4-р сарын Ерөнхий чуулган, 18, 22

3 Нифай 3:2–12. Гидианхай Лаконеусыг уруу татав

Энэ үйл ажиллагаа нь Cатан болон түүний дагалдагчид хэрхэн хүмүүсийг замаа алдахад удирдахдаа ихэвчлэн зусар, хуурамч амлалт, заналхийллийг ашигладгийг харахад суралцагчдад тусална. 3 Нифай 3:2–10-ыг уншаад, Гидианхайн Лаконеусын итгэлийг ганхуулахыг хичээхдээ ашигласан аргуудыг харуулсан үг хэллэгүүдийг олж мэд. Өнөө цагт өсвөр үеийнхний эсрэг ашиглагдаж буй аргуудтай хэрхэн ижил төстэй байгааг хэлэлц. Дараа нь 3 Нифай 3:11–12-ыг уншаад, Лаконеус хэрхэн хариулсныг олж мэд. Зөв шударга эрэгтэй, эмэгтэйчүүд хэрхэн хилэнцтээс мөн айдастаа бууж өгөх хэрэггүй гэдгийг ярилц.

3 Нифай 5:23–26. Израилын цугларалт

Суралцагчид 3 Нифай 3–4 дахь нифайчуудын цугларалтыг Израилын цугларалттай адилтгаж болно. 3 Нифай 5:23–26-г уншаад, Израилын цугларалтын талаар хэлэлц. Суралцагчдад хүмүүс “тэдний Гэтэлгэгч нь Есүс Христ гэдгийг мэдэх” (3 Нифай 5:26)-ийн хэрээр Израил цуглардаг гэдгийг олж мэдэхэд тусал.

Рассэлл М.Нэлсон, Вэнди В.Нэлсон, “Израилын найдвар” (дэлхий даяарх өсвөр үеийнхэнд зориулсан онцгой цугларалт, 2018 оны 6-р сарын 3), Ensign сэтгүүлийн хавсралтыг ChurchofJesusChrist.org -аас үзнэ үү. Нэвтрүүлгийн видеог цагийн код 29:50-иас 33:36 хүртэл мөн 38:18-аас 45:09 хүртэл үзэх нь тустай байж болох юм.