3 Nefia 2–5

“Efa niomana … tamin’ny herin’ny Tompo”

ny Nefita nanangona ny olony, ny fananany ary ny biby fiompin’izy ireo rehetra tamina toerana iray mba hiomanana amin’ny ady ho avy

Minerva Teichert (1888-1976), The Answer of Lachoneus [Ny valintenin’i Lakôneo], 1949-1951, hoso-doko an-damba mampiasa menaka apetaka amina masônita, 91.4 sm x 122 sm. Tranom-bakoky ny Zava-kanto ao amin’ny Brigham Young University.

Tahaka ny iatrehantsika ireo olana izay mitarika mankamin’ny fiverenan’ny Mpamonjy, ny Nefita dia niatrika olana tao anatin’ireo taona maro talohan’ny nahatongavany teo amin’izy ireo. Nandrahona ny hamotika ny Nefita ny jirik’i Gadiantôna. Na izany aza, ny Nefita dia “niomana … hifanandrina taminy … tamin’ny herin’ny Tompo” (3 Nefia 4:10). Tahaka ny Nefita, isika dia afaka mandresy ireo olana amin’ny alalan’ny fiomanana. Ity lesona ity dia afaka manampy anao handray ny herin’ny Tompo amin’ny alalan’ny fahavononana ara-panahy sy ara-nofo.

Manasa ny mpianatra hanao asa marina mahomby. Rehefa mandalina ny soratra masina ny mpianatra dia ampio izy ireo hahafantatra ny vokatr’ireo safidy sy zavatra natao voarakitra ao amin’ilay tantara. Amporisiho ny mpianatra hampifandray ireo lesona ireo amin’ny fiainan’izy ireo ary hamantatra ny fomba ahafahan’izy ireo manaraka amim-pahatokiana ny Mpamonjy.

Fanomanana ny mpianatra: Asao ny mpianatra hifanakalo hevitra amin’olona ao amin’ny fianakaviana na ireo mpitarika ao amin’ny Fiangonana momba ireo fitahiana izay tonga avy amin’ny fahavononana ara-nofo na ara-panahy.

Sahanasa fianarana azo atao

Aoka ianao ho vonona.

Ny tanjon’ity sahanasa ity dia ny hanampy ny mpianatra hahita ny maha-zava-dehibe ny hoe niomana. Ampio ny mpianatra hieritreritra toe-javatra iainana izay tokony hiomanan’izy ireo. Hevero ny hizara mombana fotoana iray izay nitahiana anao noho ny fiomananao na fotoana izay nanahirana anao mafy satria tsy niomana ianao.

Mieritrereta fotoana iray teo amin’ny fiainanao izay nahatsapanao ho vonona na tsy vonona.

• Inona no toe-javatra nisy ary nahoana ianao no nahatsapa ho vonona na tsy vonona?

• Raha nahatsapa ho tsy vonona ianao, dia inona no nataonao mba hiomanana tsara kokoa amin’ny hoavy?

• Inona no nataonao mba hiomanana ara-panahy amin’ireo olana atrehinao na mety hatrehinao amin’ny hoavy?

Rehefa mandalina ny 3 Nefia 2–5 ianao dia katsaho ny fitarihan’ny Fanahy mba hahafantarana ny zavatra azonao atao mba hanomanana ara-nofo sy ara-panahy ny tenanao amin’ny hoavy.

Ny fiomanan’i Lakôneo

I Samoela mpaminany dia naminany fa hisy alina tsy misy haizina ho famantarana ny fahaterahan’i Jesoa Kristy. Rehefa tanteraka io faminaniana io (jereo ny 3 Nefia 1:15–19), “ny ankamaroan’ny olona dia nino sy niova fo ho an’ny Tompo” (3 Nefia 1:22). Na izany aza, rehefa afaka taona vitsy, dia nanomboka tsy nino ny sasany.

Amin’ity sahanasa manaraka ity dia azonao atao ny mizara ny kilasy ho roa misasaka tsara na mampiaraka ny mpianatra ho tsiroaroa. Azon’ny antsasaky ny mpianatra atao ny mamaky ny iray amin’ireto andininy manaraka ireto sy mitatitra ny zavatra hitan’izy ireo amin’ny iray kilasy na ny naman’izy ireo.

Vakio ny 3 Nefia 1:27–30 sy ny 3 Nefia 2:1–3, hitadiavana ireo antony nahatonga ny olona sasany niala tamin’ny Tompo.

• Inona avy no lesona azontsika ianarana avy amin’ireo andininy ireo ka afaka manampy antsika hitoetra ho mahatoky amin’ny Tompo amin’izao androntsika izao?

Nitombo isa ny jirik’i Gadiantôna ary niady tamin’ny Nefita. Ho setrin’izany, “ny Lamanita rehetra izay efa nanjary niova fo ho an’ny Tompo dia nitambatra tamin’ny Nefita rahalahiny” (3 Nefia 2:12). I Gidiania mpitarika ny jirik’i Gadiantôna dia nanoratra taratasy ho an’i Lakôneo, ilay lohan’ny mpitsaran’ny Nefita. Tao anatin’izany dia nandrahona ny handringana ny Nefita izy raha tsy mitolo-batana izy ireo (jereo ny 3 Nefia 3:1–10).

Vakio ny 3 Nefia 3:11–12, mba hitadiavana ny zavatra nataon’i Lakôneo ho setrin’izany.

• Inona no porofo hitanao momba ny finoan’i Lakôneo ny Tompo?

Soraty eo amin’ny solaitrabe ny hoe Fiomanan’ny Nefita. Hevero ny hanome ireto andalan-tsoratra masina manaraka ireto mba hosahanin’ny mpianatra na ny vondrona samihafa. Asao ny mpianatra hanoratra eny amin’ny solaitrabe ny zavatra nataon’ny olona mba hiomanana ara-nofo sy ara-panahy.

• 3 Nefia 3:13–16

• 3 Nefia 3:17–21

• 3 Nefia 3:22–26

• 3 Nefia 4:3–4

Mba hanampiana ny mpianatra hahafantatra ireo fiomanana ara-nofo, dia azonao atao ny manazava ny fomba nanorenan’ny Nefita manda, nametrahany mpiambina ary nanangonan’izy ireo vatsy sy sakafo. Ho an’ny fiomanana ara-panahy, dia azonao atao ny manazava ny fomba nibebahan’izy ireo sy nivavahan’izy hahazoana fanafahana.

• Inona no fiomanana heverinao fa nanampy indrindra? Nahoana?

• Ahoana, araka ny eritreritrao, no nanampian’ireo fiomanana ireo azy ireo hiantehitra amin’ny Tompo?

Vakio ny 3 Nefia 4:7–12, hitadiavana ny fomba nitahiana ny Nefita noho ny fiomanan’izy ireo ara-panahy sy ara-nofo.

• Inona avy no fitsipika azontsika ianarana avy amin’io tantara io? (Jereo ny 3 Nefia 4:10.)

isan’ireo fitsipika azontsika ianarana avy amin’io tantara io ny hoe rehefa miomana ara-panahy sy ara-nofo isika, dia hampatanjaka antsika handresy na hiaritra zava-tsarotra ny Tompo.

Fiomanana amin’izao androntsika izao

Soraty eny amin’ny solaitrabe ny hoe Zavatra maoderina mifanindran-dalana amin’izany ary ampio ny mpianatra hanao lisitry ny fiomanana azontsika atao amin’izao androntsika izao. Izany dia mety ho fiomanana mitovy amin’ny an’ny Nefita na fiomanana hafa nasain’ny mpaminany hataontsika. Mifanakaloza hevitra momba ireo olana voafaritra mazava tsara izay atrehintsika amin’izao androntsika izao sy ny fomba ahafahan’izany fiomanana izany manampy antsika ho vonona amin’ny herin’ny Tompo. Mba hanampiana ny mpianatra hieritreritra hevitra, dia hevero ny handefa ilay horonan-tsary “Documentation pour la préparation temporelle” (3:09), hita ao amin’ny ChurchofJesusChrist.org.

• Makà fiomanana iray na mihoatra izany avy ao amin’ny lisitra nataonao. Ahoana no ahafahan’izany manampy antsika handresy ireo olana manokana izay atrehintsika amin’izao androntsika izao?

• Mamela ny Tompo hanatanjaka antsika amin’ny fomba ahoana, araka ny eritreritrao, ny fiomanana ataontsika?

Nanao fahirano izay tsy nahomby ny jirik’i Gandiantôna satria ny Nefita dia nahazo fanampiana avy amin’ Andriamanitra tamin’ny fiomanana nataon’izy ireo. Tamin’ny farany dia nihemotra ny jirik’i Gandiantôna. Nosarahin’ny miaramila Nefita izy ireo ary nitolo-batana ho babo na novonoina (jereo ny 3 Nefia 4:16–27).

Vakio ny 3 Nefia 4:30–33; 5:1–4, hitadiavana ny fihetsika nasehon’ny olona rehefa nohatanjahin’ny Tompo izy ireo.

• Naneho ny finoan’izy ireo an’Andriamanitra tamin’ny fomba ahoana ny fihetsika nasetrin’izy ireo?

Azonao atao ny mampiseho ity fanasana manaraka mba hisaintsaina ity ary ihany koa ilay teny nambaran’ny Filoha Nelson mba hosaintsainin’ny mpianatra.

Misaintsaina fotoana iray mety nahatsapanao ny herin’ny Tompo tamin’ny alalan’ny fiomanana ara-nofo sy ara-panahy.

Ny Filoha Russell M. Nelson dia nijoro ho vavolombelona momba ireo fitahiana avy amin’ny fahavononana:

Ny Filoha Russell M. Nelson

Tsy mitsahatra manafika ny fahavalo. Ka noho izany dia tsy afaka mitsahatra miomana mihitsy isika! Arakaraka ny mampizaka tena antsika, ara-nofo sy ara-pihetseham-po ary ara-panahy, no maha vonona kokoa antsika hanohitra ny fanafihana tsy an-kiato ataon’i Satana. …

Tsy milaza akory aho hoe ho mora ireo andro izay miandry, saingy mampanantena anareo aho fa ho feno voninahitra ny hoavy ho an’ireo izay vonona sy manohy miomana mba ho fitaovana eo am-pelantanan’ny Tompo. (Russell M. Nelson, “Raiso amim-pinoana ny hoavy,” Liahona, nôv. 2020, 75–76)

Raha ilaina dia mizarà ohatra amin’ny zavatra mety hilain’ny mpianatra mba hiomanana—ohatra, fanompoan’ny misiônera, làla-misokatra ara-pianarana, asa atao, loza voajanahary, na ny fahatongavan’ny Mpamonjy.

Mieritrereta zava-tsarotra, toe-javatra misy, na zava-miseho tsy maintsy iomananao. Saintsaino ny fahatsapanao ny fahavononanao ankehitriny. Katsaho ny fitarihan’ny Fanahy rehefa mamaly ireo fanontaniana ireo ianao.

• Inona no asa manokana azonao atao mba hiomanana?

• Ahoana no ahafahanao mampandray anjara ny Tompo amin’ny fiomananao?

Ijoroy ho vavolombelona ireo fitahiana izay tonga avy amin’ny fahavononana. Amporisiho ny mpianatra hiresaka amin’ny fianakavian’izy ireo momba ireo olana mety hatrehin’izy ireo sy ny fomba hiomanana ara-nofo sy ara-panahy.

Fanazavana sy fampahalalana avy amin’ny zava-miseho

Ahoana no ahafahantsika miomana?

Nampianatra toy izao ny Filoha Russell M. Nelson:

Ny Filoha Russell M. Nelson

Nampanantenaina isika fa “raha efa miomana [isika] dia tsy hatahotra” [Fotopampianarana sy Fanekempihavanana 38:30]. Misy dikany lalina io fanomezan-toky io amin’izao fotoana izao. Nanambara ny Tompo fa na dia eo aza ireo fanamby tsy manam-paharoan’izao andro izao, dia tsy mila mikoa eo anatrehan’ireo fanahiana amin’izao vanim-potoana izao ireo izay manorina ny fotony eo amin’i Jesoa Kristy, sy nianatra ny fomba fisintonana ny heriny. Russell M. Nelson, “Ny tempoly sy ny fototra ara-panahinao,” Liahona, nôv. 2021, 94)

Nanambara toy izao ny Filoha Dallin H. Oaks ao amin’ny Fiadidiana Voalohany:

Ny Filoha Dallin H. Oaks

Mila manao fiomanana ara-nofo sy ara-panahy amin’ireo trangan-javatra amin’ny fotoanan’ny Fiaviana Fanindroany isika. Ary ny fiomanana izay mety hatao tsinontsinona indrindra dia ilay iray tsy dia hita sy sarotra kokoa—ilay ara-panahy. (Dallin H. Oaks, “Preparation for the Second Coming,” Liahona, mey 2004, 9)

Nanazava toy izao ny Loholona David A. Bednar ao amin’ny Kôlejin’ny Apôstôly Roambinifolo:

Ny Loholona David A. Bednar

Ny ezaka ataontsika hiomanana amin’ireo zavatra iainana eto an-tany izay misedra antsika dia tokony hanaraka ny ohatry ny Mpamonjy izay “nitombo saina sy tena tsikelikely sady nandroso fitia tamin’ Andriamanitra sy ny olona” [Lioka 2:52]—izay fitambarana fahavononana ara-tsaina, ara-batana, ara-panahy, ary ara-piarahamonina mifandanja tsara. (David A. Bednar, “Dia hosedraintsika amin’izany izy ireo,” Liahona, nôv. 2020, 9)

Nampianatra toy izao ny Loholona Quentin L. Cook ao amin’ny Kôlejin’ny Apôstôly Roambinifolo:

Ny Loholona Quentin L. Cook

Ireo fitsapana sy fakam-panahy amin’ity fiainana ity dia matetika tsy ampoizina. Fa izao no fantatsika: tsy maintsy ho avy izy ireny! Mba handresena ny zava-tsarotra sy ny fakam-panahy izay tsy maintsy atrehintsika, dia ilaina ny fiomanana amim-pahamarinana sy ny fampiasana ireo fiarovana nomen’ Andriamanitra. Tsy maintsy miezaka ny ho mendrika ho any amin’ny tempoly isika. Raha efa miomana isika dia tsy hatahotra. (Quentin L. Cook, “Milamina sy manaraka fomba eto Bristol: Aoka ianao ho mendrika ny ho any amin’ny tempoly—amin’ireo fotoana milamina sy fotoan-tsarotra,” Liahona, nôv. 2015, 39)

3 Nefia 2:15. Inona no dikan’ny hoe “nesorina taminy ny ozony”?

Ilay ozona tonga teo amin’ny Lamanita tamin’ny vaninandron’i Nefia dia ny hoe “nesorina teo anatreha[n’ny Tompo] … noho ny helony” izy ireo (2 Nefia 5:20–21). Ny faharetan’ilay ozona dia nandritra ny fotoana naha ratsy fanahy an’ilay vahoaka ihany. Tatỳ aoriana, rehefa nanaiky ny filazantsaran’i Jesoa Kristy ireo Lamanita, “ny ozon’ Andriamanitra dia tsy nomba azy ireo intsony.” (Almà 23:18). Ao amin’ny 3 Nefia 2, ilay ozona dia nesorina tamin’ny Lamanita izay niova fo ho an’ny Tompo (jereo ny 3 Nefia 2:12, 15).

Sahanasa fianarana fanampiny

Ny ohatry ny Mpamonjy amin’ny fiomanana

Mety hahazoan’ny mpianatra tombony ny fahitana ny ohatry ny Mpamonjy amin’ny fiomanana. Azon’izy ireo atao ny mamaky ny Lioka 2:52 sy ny teny nambaran’ny Loholona David A Bednar ao amin’ny fizaràna hoe “Fanazavana sy fampahalalana avy amin’ny zava-miseho”. Ifanakalozy hevitra ny fomba ahafahan’ny mpianatra miomana amin’ireo sehatra ireo. Azonao atao ihany koa ny manasa ny mpianatra hijery ireo tanjona momba ny fampivoaran’ny Ankizy sy ny Zatovo ny tenan’izy ireo manokana mety efa napetrak’izy ireo.

3 Nefia 2:1–3. Tadidio ireo zavatra niainana ara-panahy

Hevero ny hifanakalo hevitra mikasika ny maha-zava-dehibe ny fahatsiarovana ny zavatra niainantsika ara-panahy. Rehefa avy mamaky ny 3 Nefia 2:1–3 ianareo, dia azonareo atao ny mifanakalo hevitra momba ny zavatra miseho raha manadino ireo zavatra niainantsika ara-panahy isika. Avy eo dia asao ny mpianatra hizara ny zavatra ataon’izy ireo mba hahatsiarovana sy hanavaozana ny fijoroana ho vavolombelona ananan’izy ireo momba ireo fahamarinana ara-panahy. Azon’izy ireo atao ihany koa ny mirakitra an-tsoratra ao amin’ny diary fandalinan’izy ireo ny zavatra niainana ara-panahy tany aloha.

Mba hahazoana fampahalalana hafa momba io lohahevitra io, dia jereo ireto manaraka ireto:

• Ronald A. Rasband, “Fandrao hadinoinao,” Liahona, nôv. 2016, 113–115

• Neil L. Andersen, “Fahatsiarovana ara-panahy nanamarika ny fiainana,” Liahona, mey 2020, 18–22

3 Nefia 3:2–12. Maka fanahy an’i Lakôneo i Gidiania

Ity sahanasa ity dia afaka manampy ny mpianatra hahita ny fomba ampiasan’i Satana sy ireo mpanara-dia azy fandokafana sy fampanantenana poakaty ary fampitahorana matetika mba hampiviliana lalana ny olona. Vakio ny 3 Nefia 3:2–10, ka tadiavo ireo teny na andian-teny izay maneho ireo paik’ady nampiasain’i Gidiania mba hamparefo ny finoan’i Lakôneo. Ifanakalozy hevitra ny fomba ampiasana izany paik’ady izany anoherana ny zatovo ankehitriny. Avy eo dia vakio ny 3 Nefia 3:11–12, hitadiavana ny fomba namalian’i Lakôneo. Ifanakalozy hevitra ny tsy ilan’ny lehilahy sy ny vehivavy marina matahotra ny ratsy fanahy na milefitra amin’ny fampitahoran’izy ireo.

3 Nefia 5:23–26. Ny fanangonana an’i Isiraely

Azon’ny mpianatra atao ny mampitaha ny fanangonana ny Nefita ao amin’ny 3 Nefia 3–4 amin’ny fanangonana an’i Isiraely. Vakio ny 3 Nefia 5:23–26 ary ifanakalozy hevitra ny fanangonana an’i Isiraely. Ampio ny mpianatra hahatakatra fa voangona i Isiraely rehefa tonga amin’ny “[fahafantarana] ny Mpanavotra azy, dia i Jesoa Kristy”, ny olona (3 Nefia 5:26).

Jereo ihany koa ny Russell M. Nelson sy Wendy W. Nelson, “Fanantenana ho an’i Isiraely” (fampaherezam-panahy maneran-tany ho an’ny zatovo, 3 jona, 2018), fanampin’ny New Era sy ny Ensign, ChurchofJesusChrist.org. Mety hanampy raha jerena manomboka eo amin’ny kaodim-potoana 29:50 hatramin’ny 33:36 sy ny 38:18 hatramin’ny 45:09 ilay horonan-tsarin’ny fampitana.