3 Nefi 8–10

Zëri i Shpëtimtarit në Errësirë

Në kontinentin amerikan, kryqëzimi i Shpëtimtarit u shenjua nga shkatërrimi i skajshëm dhe errësira. Në një çast gjatë tri ditëve të errësirës përshkuese, Jezu Krishti i foli popullit. Atëherë dhe tani, katastrofat natyrore, vuajtja dhe sprovat mund të jenë mundësi për të mësuar rreth Jezu Krishtit dhe për t’iu drejtuar Atij. Ky mësim do të përcaktojë karakteristikat e Jezu Krishtit që mund të të ndihmojnë të ndiesh dashuri më të madhe për Të dhe mirëbesim më të madh tek Ai.

Inkurajojiini nxënësit të përqendrohen te Jezu Krishti. Ndihmojini nxënësit ta qendërzojnë të mësuarit e ungjillit te Jezu Krishti në mënyrë që Fryma e Shenjtë të mund ta forcojë kuptueshmërinë dhe vlerësimin e tyre për Të. Një mënyrë për ta bërë këtë është të bëni pyetje që do t’i ndihmojnë nxënësit të kërkojnë prova për fuqinë, mëshirën dhe misionin e Tij shlyes.

Përgatitja e nxënësve: Ftojini nxënësit të lexojnë tek 3 Nefi 8, duke përfytyruar se si do të kishte qenë po të ishin të pranishëm gjatë këtyre ngjarjeve.

Veprimtari të Mundshme të të Mësuarit

“Një stuhi e madhe”

Pyetini nxënësit a ka qenë ndonjëri prej tyre në një stuhi të frikshme, të egër ose a ka përjetuar ndonjë lloj tjetër katastrofe natyrore. Ftoni një ose dy të tregojnë se si ishin përvojat e tyre, ose mund të tregoni ju një përvojë që keni pasur.

Kur Jezu Krishti u kryqëzua në Jerusalem, një stuhi dhe tërmet i tmerrshëm në kontinentin amerikan shkaktuan shkatërrim të madh. Këto ngjarje përmbushën profecitë e Samuel lamanitit rreth shenjave të vdekjes së Shpëtimtarit (shih te Helamani 14:20–27).

Për të mësuar rreth hollësive të këtyre ngjarjeve shkatërrimtare, lexo tek 3 Nefi 8:5–22. Mund të shikosh gjithashtu materialin filmik “Jezu Krishti Shfaqet në Kontinentin e Lashtë Amerikan” nga kodi kohor 0:00–3:19. Ky material filmik është në dispozicion në ChurchofJesusChrist.org.

• Çfarë mund të kishe menduar ose ndier po t’i kishe përjetuar këto gjëra?

Në vitet që i paraprinë këtij shkatërrimi, shumica e nefitëve qenë larguar nga Zoti dhe i kishin dëbuar profetët që Perëndia kishte dërguar për t’iu predikuar (shih tek 3 Nefi 7:7–8, 14, 21).

Lexo tek 3 Nefi 8:23–25, duke kërkuar se si reaguan të mbijetuarit pasi përjetuan këto ngjarje shkatërrimtare.

• Si do t’i përshkruaje ndjenjat e tyre?

Të Vërteta rreth Jezu Krishtit

Teksa njerëzit vajtonin në errësirë, ata dëgjuan zërin e Jezu Krishtit që po u fliste. Ai përmendi emrat e shumë qyteteve dhe shpjegoi se ato qytete dhe njerëz qenë shkatërruar për shkak të ligësisë së tyre. Ai më pas u mësoi njerëzve shumë të vërteta të rëndësishme rreth Vetvetes.

Krahas vënies së nxënësve që të krijojnë listën e përshkruar në paragrafin vijues, merreni parasysh gjithashtu të krijoni një listë që mund të paraqitet në një vend të dukshëm për klasën tuaj gjatë gjithë studimit tuaj të librit 3 Nefi. Mund të përdorni një tabelë për afishe të mëdha ose një copë letre të madhe për të shkruar titullin e renditur më poshtë me shkrim të pjerrët. Përreth saj, shënoni zbulimet që gjetën nxënësit rreth Jezu Krishtit gjatë këtij mësimi dhe në mësimet pasuese.

Për të të ndihmuar t’i organizosh këto të vërteta, krijo një kre në ditarin tënd të studimit me titull: Të Mësuarit rreth Jezu Krishtit tek 3 Nefi. Nëse do, mund të lësh shumë faqe në ditarin tënd të studimit që të mund të shtosh të vërteta në këtë listë gjatë studimit tënd për shërbesën e Shpëtimtarit mes nefitëve gjatë disa javëve të ardhshme.

Sigurohuni që t’u jepni nxënësve kohë të mjaftueshme për të pasur një përvojë kuptimplotë me studimin e fjalëve të Shpëtimtarit në vargjet vijuese. Mund të jetë dobiprurëse të vini muzikë instrumentale nderuese dhe t’i lejoni ata të studiojnë individualisht.

Mund edhe t’i ndani nxënësit në grupe të vogla dhe t’i caktoni secilit grup të studiojë dhe diskutojë një nga fragmentet vijuese të shkrimeve të shenjta: 3 Nefi 9:13–18; 3 Nefi 9:19–22; 3 Nefi 10:4–7 dhe 3 Nefi 10:8–12. Anëtarë nga secili grup mund të ftohen të tregojnë atë që mësuan rreth Jezu Krishtit nga vargjet që studiuan.

Lexo tek 3 Nefi 9:13–22 dhe 10:4–12, duke kërkuar atë që u mësoi Jezu Krishti këtyre njerëzve rreth Vetes. Shkruaji këto të vërteta nën kreun në ditarin tënd të studimit.

Pasi nxënësit të kenë pasur kohë të mjaftueshme për të studiuar, diskutojeni atë që mësuan ata. Jepuni shumë nxënësve një mundësi për të shprehur idetë dhe ndjenjat e tyre rreth Jezu Krishtit. Përdorni pyetje si ato në vijim që t’ju ndihmojnë ta udhërrëfeni këtë diskutim.

• Çfarë dha mësim Shpëtimtari rreth Vetes që ishte veçanërisht domethënëse për ty? Përse?

  Nxënësit mund të përcaktojnë shumë të vërteta rreth Jezu Krishtit. Nëse doni, mund të siguroheni që nxënësit të vënë re sa vijon: krahu i mëshirës së Jezu Krishti shtrihet drejt nesh (3 Nefi 9:14); Jezu Krishti është drita dhe jeta e botës (3 Nefi 9:18); Jezu Krishti kërkon që t’i ofrojmë Atij një zemër të thyer dhe një shpirt të penduar (3 Nefi 9:20); Jezu Krishti dëshiron të na mbledhë e të na mbrojë (3 Nefi 10:4–7).

  Merreni parasysh t’i shkruani këto të vërteta në tabelë. Mund t’i ftoni nxënësit të gjejnë tregime të tjera në shkrimet e shenjta në të cilat Jezu Krishti dëfton një ose më shumë nga të vërtetat që ata kanë përcaktuar rreth Tij.

  Për ide se si mund të shpenzoni më tepër kohë me disa nga mësimet specifike të Shpëtimtarit nga këto vargje, shihni pjesën “Veprimtari Plotësuese të të Mësuarit”.

• Si mund të ndikojnë të vërtetat që ke mësuar rreth Jezu Krishtit te dashuria jote për Të dhe te mirëbesimi yt tek Ai?

• Në çfarë situatash ke qenë ose mund të jesh, ku të kujtuarit e një ose më shumë prej këtyre të vërtetave do të ishte ose do të jetë e rëndësishme?

Dëshmoni për të vërtetat që keni diskutuar sot. Inkurajojini nxënësit të vazhdojnë të kërkojnë të vërteta të rëndësishme rreth Jezu Krishtit teksa vazhdojnë të studiojnë për shërbesën e Tij mes nefitëve.

Komente dhe Informacion për Rrethanat

A do të më falë Jezu Krishti vërtet kur të kem bërë gabime të mëdha?

Presidenti Bojd K. Paker (1924–2015), i Kuorumit të Dymbëdhjetë Apostujve, theksoi:

“Letra vijnë prej atyre që kanë bërë gabime tragjike. Ata pyesin: ‘A mund të falem ndonjëherë?’

Përgjigjja është po!

Ungjilli na mëson se ai lehtësim nga mundimi dhe faji mund të fitohet nëpërmjet pendimit. Përveç atyre të paktëve që zgjedhin të ndjekin humbjen e shpirtit pasi kanë njohur një plotësi, nuk ka zakon, nuk ka varësi, nuk ka rebelim, nuk ka shkelje, nuk ka kundërvajtje që të përjashtohet nga premtimi për falje tërësore.” (Boyd K. Packer, “The Brilliant Morning of Forgiveness”, Ensign, nëntor 1995, f. 19)

Plaku Xhefri R. Holland, i Kuorumit të Dymbëdhjetë Apostujve, dha mësim:

“Perëndisë nuk i intereson aq shumë se ku ke qenë sa i intereson se ku je dhe, me ndihmën e Tij, ku je i gatshëm të shkosh”. (Jeffrey R. Holland, “The Best Is Yet to Be”, [takim shpirtëror në Universitetin “Brigam Jang”, 13 janar 2009], f. 27, speeches.byu.edu)

3 Nefi 9:20. Çfarë do të thotë të kesh një zemër të thyer dhe një shpirt të penduar?

Presidenti Ezra Taft Benson (1899–1994) dha mësim sa vijon rreth një zemre të thyer dhe një shpirti të penduar:

“Pendimi i vërtetë përfshin një ndryshim të zemrës dhe jo vetëm një ndryshim të sjelljes (shih tek Alma 5:13). Pjesë e këtij ndryshimi të madh të zemrës është të ndiejmë keqardhje të perëndishme për mëkatet tona. Kjo është ajo që nënkuptohet me një zemër të thyer dhe një shpirt të penduar. Dhuratat e Perëndisë janë të mjaftueshme për të na ndihmuar të kapërcejmë çdo mëkat dhe dobësi por veç nëse i drejtohemi Atij për ndihmë. Më së shumti, pendimi nuk përfshin ndryshime të jashtëzakonshme apo dramatike, por më tepër është një lëvizje hap pas hapi, e vazhdueshme dhe e qëndrueshme drejt perëndishmërisë.” (The Teachings of Ezra Taft Benson [1988], f. 71.)

Plaku Brus D. Porter (1952–2016), i Të Shtatëdhjetëve, shpjegoi:

“Nënshtrimi i përsosur i Shpëtimtarit ndaj Atit të Përjetshëm është pikërisht thelbi i një zemre të thyer dhe një shpirti të penduar. Shembulli i Krishtit na mëson se një zemër e thyer është një tipar i përjetshëm i perëndishmërisë. Kur zemrat tona janë të thyera, ne jemi krejtësisht të hapur ndaj Shpirtit të Perëndisë dhe e dallojmë vartësinë tonë ndaj Tij për gjithçka që kemi dhe gjithçka që jemi. Sakrifica që kërkohet është një sakrificë e krenarisë në të gjitha format e saj. Si argjila e farkëtueshme në duart e një poçari të zotë, zemërthyeri mund të modelohet dhe formohet në duart e Mësuesit. …

… Ata që kanë një zemër të thyer dhe një shpirt të penduar, janë të gatshëm të bëjnë çfarëdo dhe gjithçka që u kërkon Perëndia, pa qëndresë ose keqardhje. Ne ndalojmë së bëri gjërat sipas mënyrës sonë dhe, në vend të kësaj, mësojmë që t’i bëjmë sipas mënyrës së Perëndisë.” (Brus D. Porter, “Një Zemër të Thyer dhe një Shpirt të Penduar”, Liahona, nëntor 2007, f. 32)

Veprimtari Plotësuese të të Mësuarit

3 Nefi 9:14. “Krahu im i mëshirës është shtrirë drejt jush”

Merreni parasysh t’i ftoni nxënësit të mendojnë rreth perceptimeve të rreme që njerëzit të cilat janë larguar nga Perëndia mund të kenë rreth Tij ose rreth ndjenjave të Tij kundrejt tyre. Përgjigjet e nxënësve mund të renditen në tabelë. Më pas ftojini nxënësit të lexojnë tek 3 Nefi 9:13–14, 22, duke kërkuar fjalë nga Shpëtimtari që mund të ndihmojnë të korrigjohen këto perceptime ose ide të rreme. Këto fjalë ose fraza mund të shkruhen gjithashtu në tabelë. Ftojini nxënësit të diskutojnë se si kuptueshmëria për fjalët e Shpëtimtarit në këto vargje mund të ndikojë te sjellja e tyre pasi të kenë bërë gabime.

3 Nefi 9:18. “Unë jam drita dhe jeta e botës”

Teksa i ftoni nxënësit të lexojnë fjalët e Shpëtimtarit tek 3 Nefi 9:18, ftojini ata të mendojnë rreth arsyes pse mesazhi i Tij do të ketë qenë veçanërisht kuptimplotë për nefitët në mjedisin fizik ku ndodheshin. Mund të diskutoni edhe arsyen pse Drita e Botës është një titull i përshtatshëm për Jezu Krishtin. Merreni parasysh t’i ftoni nxënësit të studiojnë disa ose të gjitha shkrimet e shenjta vijuese për ta thelluar kuptueshmërinë e tyre për këtë të vërtetë: Gjoni 8:12; 3 Nefi 18:16, 24; Doktrina e Besëlidhje 6:21; 88:7–13.

3 Nefi 9:20. “Një zemër [e] thyer dhe një shpirt [i] penduar”

Mund të jetë e dobishme t’u kujtoni nxënësve që përpara se të vinte Shpëtimtari në tokë, ndjekësit e Tij u urdhëruan të flijonin kafshë si pjesë e ligjit të Moisiut. Këto flijime qenë simbolikë për flijimin e ardhshëm të Birit të Perëndisë (shihni te Moisiu 5:5–8).

Ftojini nxënësit të lexojnë tek 3 Nefi 9:19–20, duke kërkuar për një urdhërim të ri që dha Shpëtimtari në lidhje me flijimin. Për t’i ndihmuar nxënësit të kuptojë frazën “ju do të më ofroni për fli një zemër të thyer dhe një shpirt të penduar” (3 Nefi 9:20), merreni parasysh të përdorni thënien nga Plaku Brus D. Porter në pjesën “Komente dhe Informacion për Rrethanat”.

Diskutoni pse nxënësit mendojnë se Shpëtimtari do të na kërkonte të ofronim një zemër të thyer dhe një shpirt të penduar ndaj Tij si fli. Inkurajojini ata të mendojnë për përvoja që kanë pasur ku kanë ndier një zemër të thyer dhe një shpirt të penduar dhe çfarë i ka ndihmuar të ndiheshin ashtu. Mund të jetë e dobishme të jepni shembujt tuaj vetjakë gjithashtu.

Thënia vijuese nga Plaku Nil A. Maksuell (1926–2004), i Kuorumit të Dymbëdhjetë Apostujve, mund të përdoret si pjesë e këtij diskutimi:

“Flijimi i vërtetë, vetjak nuk ishte kurrë vendosja e një kafshe mbi altar. Në vend të kësaj, ajo është gatishmëria për ta vendosur kafshën që kemi brenda vetes [njeriun e natyrshëm] mbi altar dhe ta lëmë atë të digjet!” (Neal A. Maxwell, “Deny Yourselves of All Ungodliness”, Ensign, maj 1995, f. 68.)

3 Nefi 10:6. “Sa herë do të të mbledh”

Merreni parasysh të paraqitni figurën vijuese dhe t’i ftoni nxënësit ta vështrojnë ndërsa studiojnë vargjet tek 3 Nefi 10:4–7. Çfarë të vërtetash mendon se po shpreson Jezu Krishti që njerëzit të kuptojnë dhe ndiejnë rreth Tij nga këto vargje? Pse këto të vërteta mund të jenë kuptimplota për ty kur përjeton kohë vështirësie?