3 Nefi 11:1–11

“Unë Jam Jezu Krishti”

Ndërkohë që nefitët u mblodhën përreth tempullit duke folur rreth shenjave të vdekjes së Jezu Krishtit, Shpëtimtari “zbriti poshtë dhe qëndroi mes tyre” (3 Nefi 11:8). Ai u mësoi atyre për misionin e Tij dhe gjithçka që Ai kishte bërë për ta. Ky mësim mund të të ndihmojë që të të shtohet dashuria dhe mirënjohja për Jezu Krishtin për shkak të faktit se kush është Ai dhe asaj që Ai bëri për ty.

Vlerësimi i të gjithë nxënësve. Kur nxënësit nga prejardhje të ndryshme ndiejnë se i duan dhe i pranojnë, ka më tepër të ngjarë që ata t’i tregojnë pikëpamjet dhe përvojat e tyre në klasë. Përpiquni fort të krijoni një ndjesi përkatësie te secili nxënës. Gjeni mënyra për t’u shprehur dashuri të sinqertë të ngjashme me të Krishtit të gjithë nxënësve, veçanërisht atyre që mund të jenë në vështirësi.

Përgatitja e nxënësve: Ftojini nxënësit të gjejnë një shkrim të shenjtë ose një thënie nga një udhëheqës i Kishës që i ndihmon ata të kuptojnë më shumë rreth asaj që Jezu Krishti ka bërë për ta.

Veprimtari të Mundshme të të Mësuarit

Ky mësim përqendrohet te ngjarjet dhe mësimet e shënuara tek 3 Nefi 11:1–11. Një mësim tjetër do të përqendrohet në përvojat e popullit me Shpëtimtarin siç shënohet tek 3 Nefi 11:12–17. Nëse nuk keni kohë t’i jepni të dyja mësimet më vete, merreni parasysh t’i referoheni mësimit “3 Nefi 11:12–17” për ide që mund t’i bëni pjesë e këtij mësimi.

Të vështruarit përpara

Merreni parasysh të tregoni një përvojë nga fëmijëria ose vitet tuaja të adoleshencës kur mezi e prisnit diçka. Shembujt mund të përfshijnë një ngjarje të rëndësishme kulturore ose sportive ose diçka që ishit i/e emocionuar të merrnit. Ndihmojini nxënësit të kenë ndjesinë se si u ndiet ju gjatë kohës që i paraprinte këtij çasti dhe se si ishte që më në fund ta përjetonit atë. Më pas mund t’i ftoni nxënësit t’u tregojnë shkurtimisht nxënësve të tjerë në klasë rreth rasteve kur kanë pritur diçka.

Në Librin e Mormonit, ne mësojmë se një ngjarje që nefitët e prisnin me padurim prej shumë brezash ishte ardhja e Birit të Perëndisë në tokë. Nga koha kur Lehi dhe Saria i çuan fëmijët në vendin e shkretë jashtë Jerusalemit, ata e dinin se pas 600 vjetësh Perëndia do të dërgonte Birin e Tij si “një Shpëtimtar të botës” (1 Nefi 10:4).

Pasi të tregoni fjalinë e radhës, merreni parasysh të ftoni disa nxënës që me radhë të lexojnë me zë të lartë shkrimet e shenjta që renditen në kllapa.

Ata gjithashtu e kuptonin se Jezu Krishti një ditë do të vinte mes nefitëve në tokën e premtuar (shih te 1 Nefi 12:6; 2 Nefi 26:1; Alma 45:9–10). Tek 3 Nefi 11, mund të lexojmë rreth kësaj shfaqjeje të shumëpritur.

Jo gjithkush mes nefitëve dhe lamanitëve kishte një kuptueshmëri të saktë për Jezu Krishtin. Po ashtu, sot njerëzit kanë koncepte të gabuara rreth Jezu Krishtit dhe disa madje e mohojnë ekzistencën e Tij. Disa besojnë se Jezusi ishte një udhëheqës i shkëlqyer por nuk e pranojnë se Ai ishte Biri i Perëndisë.

• Si mendon, përse është e rëndësishme që ne të kemi një kuptueshmëri të saktë për faktin se kush është Jezu Krishti?

• Çfarë mund të na ndihmojë ta kuptojmë më mirë se kush është Jezu Krishti dhe çfarë ka bërë Ai për ne?

Kur Jezu Krishti iu shfaq nefitëve, të dy, Ai dhe Ati Qiellor, bënë deklarata të rëndësishme rreth faktit se kush ishte Ai. Ndërsa studion sot, kushtoji vëmendje asaj që Ati Qiellor dhe Jezu Krishti duan që ti të dish rreth faktit se kush është Shpëtimtari dhe asaj që Ai ka bërë për ty.

Në një mësim të mëparshëm mund të kesh filluar të krijosh një listë me gjërat që po mëson rreth Jezu Krishtit gjatë studimit tënd të librit të tretë të Nefit. Nëse nuk e ke filluar ende një listë, filloje një në ditarin tënd të studimit dhe shto gjëra në të gjatë gjithë mësimit.

Më shumë hollësi rreth listës së përmendur në paragrafin e mëparshëm mund të gjenden në mësimin “3 Nefi 8–10”.

Jezu Krishti u shfaqet nefitëve

Lexo tek 3 Nefi 11:1–11, duke kërkuar hollësi rreth shfaqjes së Jezu Krishtit para një grupi njerëzish të mbledhur në tokën e Begatisë. Mund të shikosh gjithashtu materialin filmik “Jezu Krishti Shfaqet në Kontinentin e Lashtë Amerikan” nga kodi kohor 11:19–13:29. Ky material filmik është në dispozicion në ChurchofJesusChrist.org. 

• Çfarë të bëri përshtypje nga studimi i këtyre vargjeve?

• Po të kishe qenë atje, çfarë fjalësh do të përdorje për të përshkruar atë që do të ishe duke menduar ose ndier? Përse?

Plaku Xhefri R. Holland, i Kuorumit të Dymbëdhjetë Apostujve, e përshkroi shfaqjen e Jezu Krishtit dhe atë që Ai u tha njerëzve në këtë mënyrë:

“Ajo shfaqje dhe ai deklarim përbëjnë pikën qendrore, çastin më të madhërishëm, në të gjithë historinë e Librit të Mormonit. …

Kushdo kishte folur për Të, kishte kënduar për Të, kishte ëndërruar për Të dhe ishte lutur për shfaqjen e Tij – por në të vërtetë ja tek ishte. Dita e ditëve! Perëndia i cili e kthen çdo natë të errët në dritë mëngjesi, kishte ardhur.” (Jeffrey R. Holland, Christ and the New Covenant: The Messianic Message of the Book of Mormon [1997], f. 250–251)

Fjalët e para që u tha Jezu Krishti nefitëve na ndihmojnë të kuptojmë se kush është Ai dhe çfarë ka bërë Ai për ne.

Lexo tek 3 Nefi 11:10–11 përsëri, duke u kushtuar vëmendje fjalëve dhe frazave që përdori Jezu Krishti për të përshkruar Veten dhe atë që Ai bëri për ne. Sigurohu që t’i shtosh këto të vërteta në listën në ditarin tënd të studimit.

3 Nefi 11:10–11 është një fragment i zotërimit doktrinor. Merre parasysh t’i shenjosh fragmentet e zotërimit doktrinor në mënyrë të dallueshme që të mund t’i gjesh me lehtësi. Do të kesh mundësi në mësimin e ardhshëm që ta ushtrosh zbatimin e doktrinës që jepet mësim në këtë fragment, për një pyetje ose situatë.

• Çfarë të vërtetash mësove për Jezu Krishtin?

• Cila nga këto të vërteta të duket veçanërisht më domethënëse? Përse?

Jezu Krishti bëri vullnetin e Atit

Një nga të vërtetat që mund të mësojmë nga këto vargje është se Jezu Krishti bëri vullnetin e Atit duke marrë mbi Vete mëkatet e botës.

Ne mund ta thellojmë kuptueshmërinë tonë për këtë të vërtetë duke i parë më mirë frazat që Jezu Krishti përdori për të përshkruar atë që bëri. Kopjoji frazat vijuese nga 3 Nefi 11:11 në ditarin tënd të studimit me hapësirë në krah të tyre ose poshtë tyre për të shkruar.

Paraqitini pohimet vijuese dhe listën e referencave të shkrimeve të shenjta në tabelë. Mund t’i vendosni nxënësit në grupe të vogla dhe t’u caktoni atyre të studiojnë disa nga referencat e shkrimeve të shenjta që janë renditur. Ata mund ta shënojnë në ditarët e tyre të studimit dhe të diskutojnë se si vargjet që studiuan e thellojnë kuptueshmërinë e tyre për një ose më shumë nga frazat tek 3 Nefi 11:11.

• Unë kam pirë nga ajo kupë e hidhur që Ati më dha.

• [Unë] … [e] kam lartësuar Atin, duke marrë përsipër mëkatet e botës.

• Unë kam plotësuar vullnetin e Atit në të gjitha gjërat që nga fillimi.

• Lluka 22:42–44

• Mosia 3:7

• Mosia 15:5–7

• Alma 7:11–12

• Doktrina e Besëlidhje 19:16–19

• Doktrina e Besëlidhje 45:3–4

• Mosia 4:1–2

Lejojini nxënësit t’i diskutojnë idetë e tyre nga kjo veprimtari studimi për secilën frazë.

Pas këtij diskutimi, merreni parasysh të paraqitni pyetjet e mëposhtme dhe t’i ftoni nxënësit të shkruajnë përgjigjet e veta për dy ose më shumë prej tyre në ditarët e tyre të studimit.

• Çfarë do t’u thuash njerëzve rreth Jezu Krishtit në bazë të asaj që ke ndier sot?

• Çfarë dëshiron të bësh në jetën tënde për shkak të asaj që kupton ose ndien për Jezu Krishtin?

• Pse do t’ia vlente ta ndiqje Jezu Krishtin gjatë gjithë jetës sate?

Merreni parasysh t’i ftoni disa nxënës të gatshëm të japin përgjigjet e tyre për këto pyetje. Dëshmoni për të vërtetat që keni diskutuar rreth Jezu Krishtit sot.

Komente dhe Informacion për Rrethanat

3 Nefi 10:18. A ka ndonjë tregues rreth kohës kur Shpëtimtari erdhi në kontinentin amerikan në lidhje me kohën kur Ai u kryqëzua?

Thuhet se shkatërrimet në Amerikë në kohën e vdekjes së Shpëtimtarit ndodhën ditën e katërt të muajit të parë të vitit të tridhjetë e katërt (3 Nefi 8:5) dhe se Zoti i Ringjallur iu shfaq nefitëve “në mbarim të vitit të tridhjetekatërt” (3 Nefi 10:18). Kjo do të thotë se shfaqja e Zotit të Ringjallur para nefitëve ndodhi disa muaj pas vdekjes dhe Ringjalljes së Tij (Shih Bruce R. McConkie, The Mortal Messiah: From Bethlehem to Calvary, 4 vëll. [1981], 4:307).

3 Nefi 11:11. Si mund të më ndihmojë shembulli i pirjes së kupës së hidhur nga Jezu Krishti?

Plaku Xhefri R. Holland, i Kuorumit të Dymbëdhjetë Apostujve, na inkurajoi:

“Merreni sakramentin çdo javë dhe mbahuni fort te premtimet e përsosura të Shlyerjes së Jezu Krishtit. Besoni te mrekullitë. Kam parë shumë prej tyre të vijnë kur çdo tregues tjetër do të thoshte se shpresa ishte humbur. Shpresa nuk humbet kurrë. Nëse ato mrekulli nuk vijnë shpejt ose plotësisht, apo duket s’e nuk vijnë aspak, kujtoni shembullin e pikëlluar të vetë Shpëtimtarit: nëse kupa e hidhur nuk hiqet, pijeni atë dhe jini të fortë, duke patur besim për ditë më të mira përpara.” (Xhefri R. Holland, “Si një Vazo e Thyer”, Liahona, nëntor 2013, f. 41)

Pse ishte vullneti i Atit Qiellor që Jezu Krishti të merrte mbi Vete mëkatet e botës?

Plaku Ulises Soares, i Kuorumit të Dymbëdhjetë Apostujve, dha mësim:

“Krishti e përmbushi plot hir vullnetin e Atit nëpërmjet flijimit të Tij të pafundmë dhe të mëshirshëm. Ai mposhti thumbin e vdekjes fizike dhe shpirtërore, iu paraqit botës nëpërmjet Rënies, duke na ofruar mundësinë e lavdishme për shpëtim të përjetshëm.

Jezusi ishte e vetmja Qenie e aftë për ta realizuar këtë flijim të përjetshëm dhe të përsosur për të gjithë ne. Ai u zgjodh dhe u parashugurua në Këshillin e Madh në Qiell, madje përpara se bota të formohej.” (Ulises Soares, “Jezu Krishti: Kujdestari i Shpirtit Tonë”, Liahona, maj 2021, f. 82)

Veprimtari Plotësuese të të Mësuarit

3 Nefi 11:3. “Ata dëgjuan një zë”

Nxënësit mund të kenë dobi nga një diskutim rreth të mësuarit se si ta dëgjojnë zërin e Perëndisë nëpërmjet Frymës së Shenjtë. Ndoshta mund ta filloni orën mësimore duke folur me zë shumë të ulët në mënyrë që nxënësit të kenë nevojë të përqendrohen për ta dëgjuar atë që po thoni. Mund të jetë gjithashtu e dobishme që nxënësit të përcaktojnë pengesa ndaj të dëgjuarit të zërit të Perëndisë që u flet atyre. 3 Nefi 11:1–7 përshkruan se çfarë iu desh nefitëve për ta dëgjuar zërin e Perëndisë teksa paraqiste Jezu Krishtin. Ftojini nxënësit të kërkojnë parime që mund t’i ndihmojnë ata ndërsa përpiqen ta dëgjojnë Perëndinë t’u flasë atyre. Merreni parasysh të përdorni bisedën e Presidentit Nelson “Dëgjojeni Atë” (Liahona, prill 2020) apo një ose më shumë nga dëshmitë prej udhëheqësve të tjerë të Kishës nga koleksioni i materialeve filmike “Dëgjojeni Atë”, në dispozicion në ChurchofJesusChrist.org.

3 Nefi 11:11. Mësim me sende për të dhënë mësim se Jezu Krishti piu kupën e hidhur

Ftojini nxënësit të renditin përbërës që mund të trazohen së bashku për të bërë pijen më të “hidhur” që mund t’iu shkojë ndër mend. Merreni parasysh t’i keni disa përbërës në dispozicion që nxënësit të mbushin një gotë. Ndihmojini nxënësit ta krahasojnë këtë gotë me kupën e hidhur që piu Jezu Krishti, me vuajtjen dhe vdekjen e Tij. Ftojini ata të diskutojnë pse mendojnë se u përdor kjo shëmbëlltyrë për të na mësuar rreth flijimit shlyes të Jezu Krishtit.

3 Nefi 11:11. Mësim me sende për të dhënë mësim se Jezu Krishti bëri vullnetin e Atit në të gjitha gjërat

Merreni parasysh të jepni udhëzime hap pas hapi për një projekt me origami dhe të diskutoni rëndësinë e secilit hap për të arritur synimin përfundimtar. Mund t’i ftoni nxënësit të diskutojnë pse ishte jetike që Jezu Krishti të ishte i bindur ndaj vullnetit të Atit Qiellor “në të gjitha gjërat”. Mund të përdorni thënien nga Plaku Ulises Soares në pjesën “Komente dhe Informacion për Rrethanat” për t’i ndihmuar nxënësit të ndiejnë mirënjohje për bindjen e përkryer të Jezu Krishtit.