3 Nefi 11:12–17

“Ejani tek Unë”

Jezu Krishti i tregon plagët në duart e Tij një gruaje nefite

Pasi u paraqit si Biri i Dashur i Atit Qiellor, Jezu Krishti i ftoi njerëzit të dëshmonin personalisht se Ai ishte vrarë për mëkatet e botës. Një nga një ata u afruan tek Ai dhe e prekën plagën në anën e Tij dhe gjurmët e gozhdëve në duart dhe këmbët e Tij. Ky mësim mund të të ndihmojë të marrësh ose forcosh dëshminë tënde që Jezu Krishti vuajti dhe vdiq për ty.

Ndihma ndaj nxënësve që ata ta përfytyrojnë atë që lexojnë. Kur nxënësit kanë një imazh pamor të ngjarjeve në shkrimet e shenjta dhe ideve, ata kanë më shumë të ngjarë që t’i mbajnë mend ato. Krahas përdorimit të materialeve filmike, figurave dhe mjeteve të tjera pamore, merreni parasysh t’i ftoni nxënësit të përfytyrojnë ngjarje domethënëse dhe se si mund të kishte qenë të ishe atje. Kjo mund ta ftojë Frymën e Shenjtë në studimin e tyre dhe t’i ndihmojë nxënësit ta ndiejnë të vërtetën dhe rëndësinë e asaj që po mësojnë.

Përgatitja e nxënësve: Ftojini nxënësit të lexojnë tek 3 Nefi 11:12–17 dhe të imagjinojnë si do të ishin ndier po të kishin pasur këtë ndërveprim vetjak me Jezu Krishtin.

Veprimtari të Mundshme të të Mësuarit

Merr mbi vete përgjegjësi për dëshminë tënde

Mendo rreth mënyrës se si ftesa vijuese nga Presidenti Rasëll M. Nelson gjen zbatim për ty.

Presidenti Rasëll M. Nelson

“Ju përgjërohem që ta merrni mbi vete përgjegjësinë për dëshminë tuaj. Punoni për të. Zotërojeni atë. Kujdesuni për të. Kultivojeni me qëllim që ajo të rritet. Ushqejeni me të vërtetën. Mos e ndotni me filozofitë e rreme të burrave dhe grave mosbesuese dhe më pas të pyetni veten përse dëshmia juaj po zbehet.” (Rasëll M. Nelson, “Zgjedhjet për Përjetësinë” [takim shpirtëror mbarëbotëror për të rinjtë e të rejat në moshë madhore, 15 maj 2022], ChurchofJesusChrist.org)

• Si mendon, pse është e rëndësishme që çdo person të “m[arrë] mbi vete përgjegjësinë për” dëshminë e vet?

Një nga të vërtetat më të rëndësishme për të cilat mund të kemi një dëshmi është ajo që Jezu Krishti është Biri i Perëndisë dhe Shpëtimtari i botës. Përsiat pse njerëzit kanë nevojë ta dinë këtë rreth Tij. Mund të studiosh te Gjoni 14:6 dhe Mosia 3:17 për të të ndihmuar t’i kuptosh disa nga këto arsye.

Tregojeni sa vijon për t’i ndihmuar nxënësit të vlerësojnë ndjenjat dhe dëshminë e tyre për Jezu Krishtin. Paraqitini pyetjet dhe jepuni nxënësve kohë për t’i mbajtur shënim përgjigjet e tyre në ditarët e tyre të studimit.

• A ndien se ke një dëshmi për Jezu Krishtin si Biri i Perëndisë dhe Shpëtimtari i botës?

• Çfarë ka kontribuar që ti të ndihesh ashtu siç ndihesh rreth Shpëtimtarit?

Sot do të studiosh një ndërveprim të shenjtë që Jezu Krishti pati me nefitët. Ndërsa studion, mendo rreth asaj që mund të bësh për të marrë ose forcuar dëshminë tënde për Jezu Krishtin.

Jezu Krishti i fton nefitët të prekin shenjat e plagëve të Tij

Nëse është nevoja, ftojini nxënësit ta përsëritin atë që mësuan më parë duke u kërkuar t’i përmbledhin ngjarjet tek 3 Nefi 11:1–11.

Krishti duke iu shfaqur nefitëve në tempullin e Begatisë

Sill ndër mend se ndërkohë që një grup nefitësh qe mbledhur në tokën e Begatisë, Zoti i Ringjallur zbriti nga qielli. Ai deklaroi se ishte Jezu Krishti dhe se Ai i kishte dhënë lavdi Atit duke vuajtur për mëkatet e botës (shih tek 3 Nefi 11:1–11). Turma përbëhej nga burra, gra dhe fëmijë duke numëruar rreth 2500 njerëz (shih tek 3 Nefi 17:25).

Lexo te 3 Nefi 11:12–15, duke kërkuar ftesën e parë të Zotit të Ringjallur drejtuar popullit. Mund të shikosh edhe materialin filmik “Jezu Krishti Shfaqet në Kontinentin e Lashtë Amerika”, në dispozicion në ChurchofJesusChrist.org, nga kodi kohor 13:29 deri në 16:03.

Ndërsa studion, përpiqu ta përfytyrosh veten si pjesë të turmës. Përfytyrimi i ngjarjeve ose ideve nga shkrimet e shenjta mund ta ftojë Frymën e Shenjtë në studimin tënd. Shëno çdo mendim ose ndjenjë që të vjen ndërkohë që studion, përsiat dhe përfytyron.

Jepuni nxënësve kohë të përshtatshme për të studiuar, përfytyruar dhe për t’i shënuar mendimet e tyre. Pyetjet si ato në vijim mund t’i ndihmojnë nxënësit të përfytyrojnë me sukses:

• Ndërsa e mendon veten në tempullin e Begatisë, si e përfytyron mjedisin që të rrethon teksa dëgjon zërin e Jezu Krishtit të deklarojë “Ejani tek unë”? (3 Nefi 11:14.)

• Çfarë shprehie përfytyron në fytyrën e Shpëtimtarit ndërsa i shqyrton shenjat e gozhdëve në duart dhe këmbët e Tij?

dikush duke prekur duart e Shpëtimtarit

• Si mendon se u ndien njerëzit teksa e panë Shpëtimtarin dhe ndërvepruan me Të “një nga një”? (3 Nefi 11:15.)

• Cilat pjesë të këtij tregimi zgjodhe të përfytyrosh? Cilat ishin disa nga mendimet dhe ndjenjat e tua ndërsa e bëre këtë?

• Çfarë të mësojnë këto vargje rreth dëshirës së Shpëtimtarit për secilin prej nesh?

Sa vijon është një parim që mund të mësojmë nga ky tregim i shenjtë: Jezu Krishti më fton të marr dëshmi vetjake që Ai është Shpëtimtari i botës. Merre parasysh ta shënosh këtë parim në shkrimet e tua të shenjta ose në ditarin tënd të studimit.

Duke folur për ftesën vetjake të Shpëtimtarit dhe shërbesën mes nefitëve, Peshkopi Zherald Kosé, i Peshkopatës Kryesuese, dha mësim:

Peshkopi Zherald Kosé

“Kjo ngjarje sublime është pika kulmore në Librin e Mormonit. I gjithë ‘lajmi i mirë’ i ungjillit përmbahet në këtë imazh të Shpëtimtarit, që i zgjat përzemërsisht ‘krahët e [Tij të] mëshirës’ [Alma 5:33] për ta ftuar çdo individ që të vijë tek Ai dhe të marrë bekimet e Shlyerjes së Tij. …

… Ashtu sikurse Jezusi e ftoi secilin dishepull nefit që t’ia prekte plagët e Tij, ashtu Ai vdiq për secilin prej nesh, personalisht, sikur ju dhe unë të ishim njerëzit e vetëm mbi tokë. Ai na bën një ftesë vetjake që të vijmë tek Ai dhe t’i vëmë në përdorim të gjitha bekimet e mrekullueshme të Shlyerjes së Tij.” (Zherald Kosé, “Një Dëshmitar i Gjallë i Krishtit të Gjallë””, Liahona, maj 2020, f. 39, 40)

Ftoni përgjigje të shumta për pyetjen vijuese. Nxënësit mund të tregojnë edhe se çfarë i ka ndihmuar të marrin një dëshmi për Jezu Krishtin. Merreni parasysh të tregoni edhe se çfarë ju ndihmoi ju të merrni një dëshmi.

• Cilat janë disa mënyra se si mund të marrim dëshminë tonë vetjake se Jezu Krishti është Shpëtimtari i botës?

Nëse nevojitet, thoni një tregim nga shkrimet e shenjta ose nga një fjalim nga konferenca e përgjithshme që ilustron se si individët morën një dëshmi për Shpëtimtarin. Shembujt në shkrimet e shenjta mund të përfshijnë gruan samaritane te pusi (Gjoni 4:1–29), të atin e mbretit Lamoni (Alma 22:1–18) ose Alma të Riun (Alma 36:5–23).

“Hosana!”

Nefitët u ndikuan thellë nga ndërveprimet e tyre vetjake me Shpëtimtarin.

Lexo tek 3 Nefi 11:16–17, duke kërkuar se si reagoi turma pas përvojës së vet me Zotin e Ringjallur.

Mund të të ndihmojë të dish se hosana është një fjalë në hebraisht që do të thotë “shpëto tani” ose “të lutem, na shpëto”. Ajo përdoret kudo në shkrimet e shenjta si një shprehje lavdërimi dhe përgjërimi dhe është bërë një kremtim i Mesias në të gjitha epokat (shih tek Udhëzuesi për Shkrimet e Shenjta, “Hosana”, scriptures.ChurchofJesusChrist.org).

Sa vijon do të të ndihmojë të shpenzosh kohë për të shprehur ndjenjat e tua për Shpëtimtarin ose për të studiuar rreth të tjerëve që kanë dhënë dëshmitë e veta për Të.

Veprimtaritë vijuese kanë për qëllim t’i ndihmojnë nxënësit të shprehin dëshmitë e veta për Jezu Krishtin ose të mësojnë nga dëshmitë e tyre. Paraqitini mundësitë që nxënësit të mund t’iu referohen gjatë veprimtarisë. Ndihuni i/e lirë t’i përshtatni mundësitë për t’i plotësuar më mirë nevojat e nxënësve tuaj.

1. Jep dëshminë tënde vetjake për Jezu Krishtin duke i shkruar një letër dikujt që ndien se mund të ketë dobi prej saj.

2. Zgjidh një varg në shkrimet e shenjta ose një himn që i përshkruan ndjenjat e tua rreth faktit se kush është Jezu Krishti dhe asaj që Ai ka bërë për ty. Shkruaj një shpjegim të shkurtër të arsyes pse ky varg ose himn është kuptimplotë për ty.

3. Shkruaj një poezi ose tekstin e një kënge që përshkruan ndjenjat e tua për Jezu Krishtin.

4. Studio dëshminë e dikujt tjetër për Jezu Krishtin. Përmblidhe atë që studiove dhe se si të bëri të ndihesh ai tregim. Shembujt mund të përfshijnë vargjet tek Alma 26:1–16, 35–37 ose dokumentin “Krishti i Gjallë: Dëshmia e Apostujve” (ChurchofJesusChrist.org).

Ftojini disa nxënës të gatshëm të tregojnë se çfarë bënë për veprimtarinë e mëparshme. Falënderojini ata për gatishmërinë e tyre për të marrë pjesë. Dëshmoni për të vërtetat që keni diskutuar dhe inkurajojini nxënësit të vazhdojnë të bëjnë përpjekje për të marrë ose për ta forcuar dëshminë e tyre për Jezu Krishtin.

Komente dhe Informacion për Rrethanat

3 Nefi 11:14. Si mund të “[vij] tek” Shpëtimtari?

Presidenti Rasëll M. Nelson dha mësim:

Presidenti Rasëll M. Nelson

“Zgjedhja për të ardhur te Krishti nuk është një çështje vendndodhjeje fizike; ajo është një çështje zotimi vetjak. Të gjithë anëtarët e Kishës kanë të drejtë tʼi përdorin doktrinën, ordinancat, çelësat e priftërisë dhe bekimet e ungjillit pavarësisht nga vendndodhja e tyre.” (Rasëll M. Nelson, “E Ardhmja e Kishës: Përgatitja e Botës për Ardhjen e Dytë të Shpëtimtarit”, Liahona, prill 2020, f. 9)

Si mund të ndikojë dëshmia vetjake për Jezu Krishtin në jetën time?

Presidenti M. Rasëll Ballard, i Kuorumit të Dymbëdhjetë Apostujve, na mësoi:

Presidenti M. Rasëll Ballard

“E thënë thjesht, dëshmia – dëshmia e vërtetë, e lindur nga Shpirti dhe e konfirmuar nga Fryma e Shenjtë – ndryshon jetën. Ajo e ndryshon mënyrën si mendoni dhe atë që bëni. Ndryshon atë që thoni. Ajo ndikon në çdo përparësi që vendosni dhe në çdo zgjedhje që bëni. Të keni një dëshmi të vërtetë dhe të qëndrueshme për ungjillin e Jezu Krishtit është të jeni të ‘lindur shpirtërisht nëpërmjet Perëndisë’ për të ‘marrë shëmbëlltyrën e tij në pamjen tuaj’ dhe për të përjetuar ‘një ndryshim të madh në zemrat tuaja’ (Alma 5:14).” (M. Rasëll Ballard, “Dëshmi e Kulluar”, Liahona, nëntor 2004, f. 40; Konferenca e Përgjithshme, tetor 2004, f. 57)

Çfarë ka domethënëse te plagët dhe shenjat në trupin e ringjallur të Shpëtimtarit?

Plaku Gerit W. Gong, i Kuorumit të Dymbëdhjetë Apostujve, dha mësim:

Plaku Gerit W. Gong

“Shpëtimtari ynë na fton që gjithmonë ta kujtojmë Atë siç Ai përherë na kujton ne.

Në Botën e Re, Shpëtimtari ynë i ringjallur i ftoi ata që ishin të pranishëm që të vinin, një e nga një, të vinin duart e tyre në anën e Tij dhe t’i ndienin gjurmët e gozhdëve në duart e Tij dhe në këmbët e Tij.

… Ju lutem, merrni parasysh se si ndodh që trupi i përsosur dhe i ringjallur i Shpëtimtarit tonë i ka ende plagët në anë të Tij dhe gjurmët e gozhdëve në duart dhe këmbët e Tij.

Nganjëherë nga historia, njerëz të vdekshëm janë ekzekutuar me kryqëzim. Por vetëm Shpëtimtari ynë, Jezu Krishti, na përqafon duke mbajtur akoma shenjat e dashurisë së Tij të pastër. Vetëm Ai e përmbush profecinë e të ngriturit në kryq, që Ai të mund ta tërheqë secilin nga ne, me emër, drejt Vetes [shih tek 3 Nefi 27:14].

Shpëtimtari ynë shpall:

‘Po, ata mund të harrojnë, por unë nuk do të të harroj.

Ja, unë të kam gdhendur mbi pëllëmbët e duarve të mia’ [Isaia 49:15–16].” (Gerit W. Gong, “Gjithmonë Kujtojeni Atë”, Liahona, maj 2016, f. 110)

Veprimtari Plotësuese të të Mësuarit

Dhënia e shërbesës ndaj individit

Ndërkohë që studioni tek 3 Nefi 11:12–15, merrni parasysh ta theksoni shembullin e dhënies së shërbesës nga Shpëtimtari te njerëzit një e nga një. Mund t’i ftoni nxënësit të mendojnë për tregime të tjera nga shkrimet e shenjta për Jezusin që jep shërbesë në një mënyrë vetjake. Kërkojuni nxënësve të mendojnë për mënyrën se si Jezu Krishti vazhdon të na japë shërbesë një e nga një sot. Inkurajojini nxënësit të ndjekin shembullin e Shpëtimtarit për ndihmën ndaj atyre që janë në nevojë një e nga një.

“E Di, Jeton Shëlbuesi Im”

Ndërsa diskutoni rëndësinë e marrjes së një dëshmie vetjake për Jezu Krishtin, mund të jetë e dobishme të këndoni ose dëgjoni himnin “E Di, Jeton Shëlbuesi Im” (Himne, nr. 74). Mund të thoni tregimin vijues që përshkruan disa përvoja të Samuel Medlit, i cili shkroi tekstin e këtij himni.

Ndërkohë që shërbente në Marinën Britanike në vitin 1759, këmba e Samuelit qe plagosur rëndë. Një doktor tha se duhej ta prisnin. Samueli, i cili nuk kishte qenë një njeri fetar, e kaloi natën duke përsiatur mësimet rreth Jezu Krishtit dhe duke u lutur që jeta dhe këmba e tij të kurseheshin. Mëngjesin e nesërm, këmba e Samuelit qe përmirësuar aq shumë saqë nuk kishte më nevojë ta prisnin. Samueli e kaloi pjesën tjetër të jetës si një i krishterë besnik (shih tek “I Know That My Redeemer Lives”, What’s New with The Tabernacle Choir [ditar në internet], 12 shkurt 2014, thetabernaclechoir.org).