3 Nefia 8–10

Ny feon’ny Mpamonjy tao amin’ny haizina

fianakaviana miaraka amina ankizivavy iray jamba izay sambany no nahatsapa ny masoandro hatramin’ireo telo andron’ny haizina taorian’ny fanomboana an’i Jesoa Kristy

Tany Amerika fahiny dia faharavana faratampony sy haizina no nanamarika ny fanomboana ny Mpamonjy tamin’ny hazofijaliana. Nisy fotoana tao anatin’ireo telo andro nisian’ny haizi-mikitroka tsy nandairana hazavana dia niresaka tamin’ny olona i Jesoa Kristy. Tamin’izany sy amin’izao fotoana izao, ny loza voajanahary, ny fijaliana, ary ny fizahan-toetra dia afaka ny ho lala-misokatra hianarana momba an’i Jesoa Kristy sy hitodihana Aminy. Ity lesona ity dia hamantarana ny toetran’i Jesoa Kristy izay afaka manampy anao hahatsapa fitiavana sy fahatokiana Azy lehibe kokoa.

Amporisiho ny mpianatra hifantoka amin’i Jesoa Kristy. Ampio ny mpianatra hampifantoka ny fianaran’izy ireo ny filazantsara amin’i Jesoa Kristy mba hahafahan’ny Fanahy Masina manatanjaka ny fahatakaran’izy ireo sy ny fankasitrahan’izy ireo Azy. Fomba iray hanaovana izany ny fametrahana fanontaniana izay hanampy ny mpianatra hitady ny porofon’ny heriny, ny famindram-pony ary ny iraka fanavotana nataony.

Fanomanana ny mpianatra: Asao ny mpianatra hamaky ny 3 Nefia 8, ka haka sary an-tsaina ny hoe mety ho nanao ahoana re izany hoe teo nandritra ireo zavatra niseho ireo.

Sahanasa fianarana azo atao

“Oram-baratra lehibe”

rambon-danitra goavana mitety ny saha

oram-baratra

Namely ny tanana iray ny orana sy ny rivotra nentin’ny rivo-doza

Anontanio ny mpianatra raha efa nisy tratrana oram-baratra mahery vaika mampatahotra na niaina karazana loza voajanahary hafa. Manasà iray na roa hizara ny hoe nanao ahoana ny zavatra niainan’izy ireo, na azonao atao ny mizara zavatra niainanao.

Rehefa nohomboana tany Jerosalema i Jesoa Kristy dia nisy oram-baratra sy horohoron-tany nahatsiravina izay niteraka faharavana lehibe tany Amerika fahiny. Ireny zava-niseho ireny dia nanatanteraka ny faminanian’i Samoela ilay Lamanita momba ireo famantarana ny fahafatesan’ny Mpamonjy (jereo ny Helamàna 14:20–27).

Mba hahalalana ny antsipiriany momba ireny zava-niseho nandravarava ireny, dia vakio ny 3 Nefia 8:5–22.  ChurchofJesusChrist.org

• Inona no mety ho noeritreretinao na tsapanao raha niaina ireo zavatra ireo ianao?

Tamin’ireo taona nialoha io faharavana io dia niala tamin’ny Tompo ny ankamaroan’ny Nefita ary nandroaka ireo mpaminany nalefan’ Andriamanitra hitory tamin’izy ireo (jereo ny 3 Nefia 7:7–8, 14, 21).

Vakio ny 3 Nefia 8:23–25, hitadiavana ny fihetsika nasehon’ireo izay tafavoaka velona taorian’ny niainan’izy ireo ireny zava-niseho nandravarava ireny.

• Ahoana no hamaritanao ny fahatsapan’izy ireo?

Fahamarinana momba an’i Jesoa Kristy

Rehefa nitomany tao amin’ny haizina ny olona, dia naheno ny feon’i Jesoa Kristy niteny tamin’izy ireo. Nanonona anaran-tanàna maro Izy ary nanazava fa ireo tanàna ireo sy ny olona tao dia rava noho ny faharatsian’izy ireo. Avy eo Izy dia nampianatra ny olona fahamarinana manan-danja maro momba ny tenany.

Ankoatra ny fanasana ny mpianatra hamorona ilay lisitra voafaritra ao amin’ity andiam-pehezan-teny manaraka ity, dia hevero ihany koa ny hamorona lisitra izay azo aseho miharihary ho an’ny kilasinao mandritra ny fandalinanareo ny 3 Nefia. Azonao atao ny mampiasa tabilao lehibe fasiana afisy na taratasy hanoratana ny lohateny voalaza eo ambany amin’ny soramandry. Soraty manodidina izany ny zavatra hitan’ny mpianatra momba an’i Jesoa Kristy nandritra ny lesona sy ao amin’ny lesona manaraka.

Mba hanampiana anao handamina ireo fahamarinana ireo, dia mamoròna lohateny ao amin’ny diary fandalinanao hoe: Mianatra momba an’i Jesoa Kristy ao amin’ny 3 Nefia. Azonao atao ny manokana pejy maro ao amin’ny diary fandalinanao mba hahafahanao mampiditra fahamarinana ao amin’io lisitra io mandritra ny fandalinanao ny asa fanompoan’ny Mpamonjy teo anivon’ny Nefita ao anatin’ireo herinandro vitsivitsy manaraka.

Alaovy antoka fa omena fotoana ampy ny mpianatra mba hiainan’izy ireo zavatra manan-danja amin’ny fandalinana ny tenin’ny Mpamonjy ao amin’ireto andininy manaraka ireto. Mety hitondra vokatsoa ny fandefasana feon-kira maneho fanajana sy ny famelana azy ireo handalina isam-batan’olona.

Azonao atao ihany koa ny mizara ny mpianatra ho vondrona kely mromaro ary manendry ny vondrona tsirairay handalina sy hifanakalo hevitra momba ny iray amin’ireto andinin-tsoratra masina manaraka ireto: 3 Nefia 9:13–18; 3 Nefia 9:19–22; 3 Nefia 10:4–7; ary ny 3 Nefia 10:8–12. Azo asaina ny olona ao amin’ny vondrona tsirairay hizara ny zavatra nianaran’izy ireo momba an’i Jesoa Kristy avy amin’ireo andininy nohalalinin’izy ireo.

Vakio ny 3 Nefia 9:13–22 sy ny 10:4–12, hitadiavana ny zavatra nampianarin’i Jesoa Kristy ireo olona ireo momba Azy. Soraty eo ambanin’ny lohateny ao amin’ny diary fandalinanao ireo fahamarinana ireo.

Rehefa avy nomena fotoana ampy handalinana ny mpianatra, dia ifanakalozy hevitra ny zavatra nohalalinin’izy ireo. Omeo fahafahana hizara ny hevi-baovao azon’izy ireo sy ny fahatsapan’izy ireo momba an’i Jesoa Kristy ny mpianatra maromaro. Mampiasà fanontaniana toy ireto manaraka ireto mba hanampiana amin’ny fitarihana io fifanakalozan-kevitra io.

• Inona no zavatra nampianarin’ny Mpamonjy momba ny tenany ka nanan-danja indrindra taminao? Nahoana?

  Azon’ny mpianatra atao ny mitady fahamarinana maro momba an’i Jesoa Kristy. Mety ilainao ny maka antoka fa tsikaritry ny mpianatra ireto manaraka ireto: Mitsotra amintsika ny sandrin’ny famindram-pon’i Jesoa Kristy (3 Nefia 9:14); I Jesoa Kristy no fahazavana sy fiainan’izao tontolo izao (3 Nefia 9:18); I Jesoa Kristy dia mangataka ny hanolorantsika fo torotoro sy ny fanahy manenina (3 Nefia 9:20); Maniry ny hanangona sy hiaro antsika i Jesoa Kristy (3 Nefia 10:4–7).

  Hevero ny hanoratra ireo fahamarinana ireo eny amin’ny solaitrabe. Azonao atao ny manasa ny mpianatra hitady tantara hafa ao amin’ny soratra masina izay anehoan’i Jesoa Kristy ny iray na ny maromaro amin’ireo fahamarinana hitan’izy ireo momba Azy.

  Mba hahitana hevitra amin’ny fomba mety hahafahanao mandany fotoana misimisy kokoa amin’ny sasany amin’ireo fampianarana manokan’ny Mpamonjy avy ao amin’ireo andininy ireo, dia jereo ny fizaràna hoe “Sahanasa fianarana fanampiny”.

• Inona no mety ho fiantraikan’ireo fahamarinana nianaranao momba an’i Jesoa Kristy amin’ny fitiavanao sy ny fahatokianao Azy?

• Inona avy no toe-java-nisy efa niainanao na mety hiainanao ka ho zava-dehibe amin’izay fotoana izay ny fahatsiarovana ny iray na maromaro amin’ireo fahamarinana ireo?

Mijoroa ho vavolombelona momba ireo fahamarinana noresahinareo androany. Amporisiho hanohy hitady fahamarinana manan-danja momba an’i Jesoa Kristy ny mpianatra rehefa manohy mandalina ny asa fanompoany teo anivon’ny Nefita.

Fanazavana sy fampahalalana avy amin’ny zava-miseho

Tena hamela ahy tokoa ve i Jesoa Kristy raha nahavita fahadisoana goavana aho?

Ny Filoha Boyd K. Packer (1924–2015) tao amin’ny Kôlejin’ny Apôstôly Roambinifolo dia nanantitrantitra toy izao:

Ny Filoha Boyd K. Packer

Misy taratasy azo avy amin’ireo izay nanao fahadisoana goavana. Manontany izy ireo hoe: “Afaka ny ho mbola voavela heloka ihany ve aho?”

Ny valiny dia eny!

Mampianatra antsika ny filazantsara fa afaka ny ho azo amin’ ny alalan’ny fibebahana ny fanamaivanana ny fijaliana sy ny fahatsapana ho meloka. Ankoatra ireo—tena vitsy—izay lasa any amin’ ny fahaverezana rehefa nahafantatra ny fahafenoana, dia tsy misy fahazaran-dratsy, na fiankinan-doha, na fikomiana, na tsy fankatoavana na fandikan-dalàna, na kely izany na lehibe izay tsy hahazo anjara amin’ilay fampanantenana famelan-keloka tanteraka. (Boyd K. Packer, “The Brilliant Morning of Forgiveness,” Ensign, Nov. 1995, 19)

Nampianatra toy izao ny Loholona Jeffrey R. Holland ao amin’ny Kôlejin’ny Apôstôly Roambinifolo:

Ny Loholona Jeffrey R. Holland

Tsy miraharaha loatra ny toerana izay nisy anao Andriamanitra raha ampitahaina amin’ny firaharahiany ny toerana misy anao amin’izao sy izay tianao haleha amin’ny alalan’ny fanampiany. (Jeffrey R. Holland, “Le meilleur est encore à venir,” [Brigham Young University devotional, Jan. 13, 2009], 27, speeches.byu.edu)

3 Nefia 9:20. Inona no dikan’ny hoe manana fo torotoro sy fanahy manenina?

Ny Filoha Ezra Taft Benson (1899–1994) dia nampianatra izao manaraka izao momba ny fo torotoro sy fanahy manenina:

Ny Filoha Ezra Taft Benson

Ny fibebahana marina dia ahitana fiovam-po fa tsy fiovana eo amin’ny fitondran-tena fotsiny (jereo ny Almà 5:13). Ampahany amin’io fiovana mahery vaika io ny fahatsapana alahelo araka an’ Andriamanitra noho ny fahotantsika. Izany no tiana holazaina amin’ny hoe fo torotoro sy fanahy manenina. Ny fanomezam-pahasoavana avy amin’ Andriamanitra dia ampy hanampiana antsika handresy ny fahotana sy ny fahalemena rehetra raha toa isika ka mitodika mitady fanampiana Aminy. Ny ankamaroan’ny fibebahana dia tsy ahitana fiovana manaitra be na miavaka fa fihetsehana tsikelikely, tsy tapaka ary tsy miovaova mankany amin’ny maha-araka an’ Andriamanitra. (Teachings of Ezra Taft Benson [1988], 71.)

Nanazava toy izao ny Loholona Bruce D. Porter (1952–2016) tao amin’ny Fitopololahy:

Ny Loholona Bruce D. Porter

Ny fanoavana tonga lafatra nataon’ny Mpamonjy tamin’ny Ray Mandrakizay no tena mamaritra ny atao hoe fo torotoro sy fanahy manenina. Mampianatra antsika ny ohatr’i Kristy fa toetra araka an’ Andriamanitra ny fo torotoro. Rehefa torotoro ny fontsika dia vonona tanteraka ny handray ny Fanahin’ Andriamanitra ary manaiky ny fiankinantsika Aminy amin’ireo zava-drehetra ananantsika sy ny maha-izy antsika rehetra. Ny fahafoizana takina ao anatin’izany dia ny fahafoizana ny avonavona amin’ny endriny rehetra. Toy ireny tanimanga azo volavolaina eny an-tanan’ny mpanao vilany tanimanga tena mahay ireny no ahafahana mamolavola sy manome endrika eny an-tanan’ny Tompo ireo torotoro fo. …

… Ireo izay manana fo torotoro sy fanahy manenina dia vonona hanao na inona na inona sy ny zava-drehetra takin’ Andriamanitra amin’izy ireo, tsy amim-panoherana sy tsy amin’ny lonilony. Manatsahatra ny fanaovana zavatra araka ny fombantsika isika ary mianatra manao azy ireny kosa araka ny fomban’ Andriamanitra. (Bruce D. Porter, “A Broken Heart and a Contrite Spirit,” Liahona, Nov. 2007, 32)

Sahanasa fianarana fanampiny

3 Nefia 9:14. “Ny sandrin’ny famindram-poko dia mitsotra aminareo”

Hevero ny hanasa ny mpianatra hieritreritra ny fahatsapana diso mety hananan’ny olona izay niala tamin’ Andriamanitra momba Azy sy ny zavatra tsapan’Andriamanitra momba azy ireo. Azo tanisaina eny amin’ny solaitrabe ny valintenin’ny mpianatra. Avy eo dia asao ny mpianatra hamaky ny 3 Nefia 9:13–14, 22, ka hitady ireo teny nolazain’ny Mpamonjy izay afaka manampy amin’ny fanitsiana ireny fahatsapana na hevitra diso ireny. Azo soratana eny amin’ny solaitrabe ihany koa izany teny na andian-teny izany. Asao ny mpianatra hifanakalo hevitra momba ny fomba ahafahan’ny fahatakarana ny tenin’ny Mpamonjy ao amin’ireo andininy ireo manova ny fitondrantenan’izy ireo rehefa avy manao fahadisoana izy ireo.

3 Nefia 9:18. “Izaho no fahazavana sy fiainan’izao tontolo izao”

Rehefa manasa ny mpianatra ianao hamaky ny tenin’ny Mpamonjy ao amin’ny 3 Nefia 9:18, dia asao izy ireo hieritreritra ny antony mety ho nampanan-danja indrindra ny hafany tamin’ny Nefita tao amin’ny tontolo azo tsapain-tanana nisy azy ireo. Azonareo atao ihany koa ny mifanakalo hevitra momba ny antony maha anaram-boninahitra mifanaraka amin’i Jesoa Kristy ny hoe Fahazavan’izao tontolo izao. Hevero ny hanasa ny mpianatra handalina ny sasany na ny rehetra amin’ireto soratra masina manaraka ireto mba hampitomboana ny fahatakaran’izy ireo io fahamarinana io: Jaona 8:12; 3 Nefia 18:16, 24; Fotopampianarana sy Fanekempihavanana 6:21; 88:7–13.

3 Nefia 9:20. “Fo torotoro sy fanahy manenina”

Mety hanampy raha ampahatsiahivina ny mpianatra fa talohan’ny nahatongavan’ny Mpamonjy tetỳ an-tany dia nodidiana ireo mpanara-dia Azy mba hanao sorona biby tao anatin’ny lalàn’i Mosesy. Ireny sorona ireny dia tandindon’ny sorona izay hataon’ny Zanak’ Andriamanitra amin’ny hoavy (jereo ny Mosesy 5:5–8).

Asao ny mpianatra hamaky ny 3 Nefia 9:19–20, ka hitady didy vaovao izay nomen’ny Mpamonjy mahakasika ny sorona. Mba hanampiana ny mpianatra hahatakatra ny andian-teny hoe “haterinareo ho sorona ho Ahy ny fo torotoro sy ny fanahy manenina” (3 Nefia 9:20), dia hevero ny hampiasa ny teny nambaran’ny Loholona Bruce D. Porter ao amin’ny fizaràna hoe “Fanazavana sy fampahalalana avy amin’ny zava-miseho”.

Ifanakalozy hevitra ny antony izay heverin’ny mpianatra fa angatahan’ny Mpamonjy antsika hanolotra Azy fo torotoro sy fanahy manenina ho sorona. Amporisiho izy ireo hieritreritra zavatra niainan’izy ireo ka nahatsapan’izy ireo fo torotoro sy fanahy manenina sy ny zavatra nanampy azy ireo hanana izany fahatsapana izany. Mety hanampy ihany koa ny fizaràna ny ohatra momba anao manokana.

Ity teny nambaran’ny Loholona Neal A. Maxwell (1926–2004) tao amin’ny Kôlejin’ny Apôstôly Roambinifolo manaraka ity dia azo ampiasaina ao anatin’ny io fifanakalozan-kevitra io:

“Ny tena sorona ataon’ny tena manokana dia tsy ny mametraka biby eo ambony alitara. Izany kosa dia ny finiavantsika hametraka izay biby ao anatintsika [ilay olona araka ny nofo] eo ambony alitara ka hamela izany ho may!” (Neal A. Maxwell, “Deny Yourselves of All Ungodliness,” Ensign, May 1995, 68).

3 Nefia 10:6. “Impiry Aho no hanangona anareo”

Hevero ny hampiseho ity sary manaraka ity sy hanasa ny mpianatra hijery azy io rehefa mandalina ny 3 Nefia 10:4–7 izy ireo. Inona araka ny eritreritrao no fahamarinana antenain’i Jesoa Kristy ho takatry ny olona sy ho tsapan’izy ireo momba Azy avy amin’ireo andininy ireo? Nahoana no mety hanan-danja aminao ireo fahamarinana ireo rehefa mandalo fotoan-tsarotra ianao?

How Many Times [Impiry], nataon’i Liz Lemon Swindle