3 Nefia 11:1–11

“Izaho no Jesoa Kristy”

Raha mbola nivory nanodidina ny tempoly niresaka momba ireo famantarana ny fahafatesan’i Jesoa kristy ny Nefita, dia “nidina … sy nijoro teo afovoany” (3 Nefia 11:8) ny Mpamonjy. Nampianatra azy ireo ny iraka nampanaovina Azy sy ny zavatra nataony ho azy ireo Izy. Ity lesona ity dia afaka manampy amin’ny fampitomboana ny fitiavanao sy ny fankasitrahanao an’i Jesoa Kristy noho ny maha-Izy Azy na ny zavatra nataony ho anao.

Manome lanja ny mpianatra rehetra. Rehefa mahatsapa ho tiana sy ekena ny mpianatra avy amin’ny foto-piaviana samy hafa, dia azo inoana kokoa ny hizaran’izy ireo ny heviny sy ny zavatra niainan’izy ireo ao an-dakilasy. Miezaha mamorona fahatsapana fananan-toerana ao anatin’ny mpianatra tsirairay. Mitadiava fomba hanehoana fitiavana avy amin’ny fo tahaka ny an’i Kristy amin’ny mpianatra rehetra, indrindra fa ireo izay mety ho sahirana.

Fanomanana ny mpianatra: Asao ny mpianatra hitady soratra masina iray na teny nambara iray avy amina mpitarika ao amin’ny Fiangonana izay manampy azy ireo hahatakatra misimisy kokoa momba ny zavatra nataon’i Jesoa Kristy ho azy ireo.

Sahanasa fianarana azo atao

Ity lesona ity dia mifantoka amin’ireo zava-niseho sy fampianarana voarakitra ao amin’ny 3 Nefia 11:1–11. Hisy lesona iray hafa hifantoka amin’ny zavatra niainan’ny olona niaraka tamin’ny Mpamonjy araka ny voarakitra ao amin’ny 3 Nefia 11:12–17. Raha tsy manana fotoana hampianarana tsirairay ireo lesona roa ireo ianao, dia hevero ny hijery ny “lesona ho an’ny 3 Nefia 11:12–17” mba hahitana hevitra azonao ampidirina ao amin’ity lesona ity.

Mibanjina ny hoavy

Hevero ny hizara zavatra niainana iray tany amin’ny fahazazanao na ny taona naha-zatovo anao tamin’ny fotoana niandrandranao fatratra zavatra iray. Mety ho ohatra amin’izany ny hetsika ara-kolontsaina na ara-panatanjahantena na zavatra nampientanentana anao ny handray azy. Ampio ny mpianatra hahatsapa ny zavatra tsapanao nandritra ny fotoana nialoha izany fotoana izany sy ny hoe nanao ahoana tokoa ny niaina izany nony farany. Avy eo dia azonao atao ny manasa ny mpianatra hizara fohifohy amin’ny mpianatra hafa ao an-dakilasy momba ny fotoana niandrasan’izy ireo zavatra iray.

Ianarantsika ao amin’ny Bokin’i Môrmôna fa trangan-javatra iray izay nandrandrain’ny Nefita fatratra nandritra ny taranaka maro ny fahatongavan’ny Zanak’ Andriamanitra tetỳ an-tany. Hatramin’ny fotoana nitondran’i Lehia sy i Sarià ny zanak’izy ireo ho an-tany foana ivelan’i Jerosalema, dia fantatr’izy ireo fa afaka 600 taona dia handefa ny Zanany ho “Mpamonjy izao tontolo” (1 Nefia 10:4) Andriamanitra.

Rehefa avy mizara ny fehezan-teny manaraka, dia hevero ny hanasa mpianatra vitsivitsy hifandimby hamaky mafy ny soratra masina voatanisa ao anatin’ireo fononteny.

Takatr’izy ireo ihany koa fa indray andro any i Jesoa Kristy dia ho avy eo anivon’ny Nefita ao amin’ilay tany nampanantenaina (jereo ny 1 Nefia 12:6; 2 Nefia 26:1; Almà 45:9–10). Ao amin’ny 3 Nefia 11 isika dia afaka mamaky momba io fisehoana nandrasana hatry ny ela io.

Tsy ny rehetra teo anivon’ny Nefita sy ny Lamanita no nanana fahatakarana marina momba an’i Jesoa Kristy. Tahaka izany ihany, ny olona ankehitriny dia manana fiheveran-diso momba an’i Jesoa Kristy, ary ny sasany aza dia mandà ny fisiany mihitsy. Mino ny sasany fa mpitarika lehibe i Jesoa saingy tsy eken’izy ireo ho Zanak’ Andriamanitra.

• Nahoana, araka ny eritreritrao, no zava-dehibe ny hananantsika fahatakarana marina momba ny hoe iza i Jesoa Kristy?

• Inona no afaka manampy antsika hahatakatra tsara kokoa ny hoe iza i Jesoa Kristy ary inona no nataony ho antsika?

Rehefa niseho tamin’ny Nefita i Jesoa Kristy, Izy sy ny Ray any An-danitra dia samy nanao fanambarana manan-danja momba ny hoe iza Izy. Rehefa mandalina ianao anio, dia jereo tsara ny zavatra tian’ny Ray any An-danitra sy i Jesoa Kristy ho fantatrao momba ny hoe iza ny Mpamonjy ary inona no nataony ho anao.

Tao amin’ny lesona iray tany aloha dia mety nanomboka nanao ny lisitry ny zavatra ianaranao momba an’i Jesoa Kristy amin’ny fandalinanao ny Nefia fahatelo ianao. Raha mbola tsy nanomboka ilay lisitra ianao, dia manomboha manao anankiray ao amin’ny diary fandalinanao, ary mampidira zavatra ao amin’izany mandritra ny lesona.

Ny antsipiriany misimisy kokoa momba ilay lisitra voaresaka ao amin’ny andiam-pehezan-teny teo aloha dia azo jerena ao amin’ny lesona “3 Nefia 8–10.”

Miseho amin’ny Nefita i Jesoa Kristy

Vakio ny 3 Nefia 11:1–11, hitadiavana antsipiriany momba ny fisehoan’i Jesoa Kristy tamina vondron’olona nivondrona teo an-tempoly tao amin’ny tanin’i Soafeno.  ChurchofJesusChrist.org 

• Inona no zavatra nanan-danja taminao avy amin’ny fandalinanao ireo andininy ireo?

• Raha nanatrika teo ianao dia inona avy no teny mety ho nampiasainao mba hamaritana ny zavatra mety ho noeritreretinao na tsapanao? Nahoana?

Ny Loholona Jeffrey R. Holland ao amin’ny Kôlejin’ny Apôstôly Roambinifolo dia namariparitra ny fisehoan’i Jesoa Kristy sy ny zavatra nolazainy tamin’ny olona toy izao:

Io fisehoana io sy io fanambarana io no ivo sy fotoana faratampony ao amin’ny tantara manontolo ao amin’ny Bokin’i Môrmôna. …

Niresaka momba Azy avokoa ny rehetra, nihira momba Azy, nanofy Azy, ary nivavaka mba hisehoany—fa teto dia tena niseho tokoa Izy. Ilay andro lehibe indrindra! Tonga ilay Andriamanitra izay mamadika ny alina maizina rehetra ho hazavan’ny maraina. (Jeffrey R. Holland, Christ and the New Covenant: The Messianic Message of the Book of Mormon [1997], 250–51)

Ny tenin’i Jesoa Kristy voalohany notenenina tamin’ny Nefita dia manampy antsika hahatakatra ny hoe iza Izy ary inona no nataony ho antsika.

Vakio indray ny 3 Nefia 11:10–11 ka jereo tsara ireo teny sy andian-teny nampiasain’i Jesoa Kristy hamaritana ny tenany sy ny zavatra nataony ho antsika. Aza hadinoina ny mampiditra ireo fahamarinana ireo ao amin’ilay lisitra ao amin’ny diary fandalinanao.

Ny 3 Nefia 11:10–11 dia andalan-tsoratra masina fifehezana fotopampianarana. Hevero ny hanisy marika ireo andalan-tsoratra masina fifehezana fotopampianarana amina fomba miavaka mba hahafahanao mahita azy ireny mora foana. Ao amin’ny lesona manaraka ianao dia hanana fahafahana hizatra hampihatra ny fotopampianarana nampianarina tao amin’io andininy io amina fanontaniana na toe-java-misy iray.

• Inona no fahamarinana nianaranao momba an’i Jesoa Kristy?

• Iza amin’ireo fahamarinana ireo no hitanao ho manan-danja indrindra? Nahoana?

Nanao ny sitrapon’ny Ray i Jesoa Kristy

Isan’ireo fahamarinana azontsika ianarana avy amin’ireo andininy ireo ny hoe i Jesoa Kristy dia nanao ny sitrapon’ny Ray tamin’ny fitondrany teo Aminy ny fahotan’izao tontolo izao.

Azontsika atao ny mampitombo ny fahatakarantsika io fahamarinana io amin’ny alalan’ny fijerena akaiky kokoa ireo andian-teny nampiasain’i Jesoa Kristy hamaritana ny zavatra nataony. Adikao ao amin’ny diary fandalinanao ireto andian-teny manaraka avy amin’ny 3 Nefia 11:11 ireto, ary asio toerana malalaka eo akaikiny na eo ambaniny mba hanoratana.

Asehoy eny amin’ny solaitrabe ireto teny nambara sy lisitry ny toko sy andinin-tsoratra masina manaraka ireto. Azonao atao ny mametraka ny mpianatra ho ao anatina vondrona kely ary manendry azy ireo handalina vitsivitsy amin’ireo toko sy andinin-tsoratra masina voatanisa. Azon’izy ireo atao ny mirakitra an-tsoratra ao amin’ny diary fandalinan’izy ireo sy mifanakalo hevitra momba ny fomba ampitomboan’ireo andininy nohalalinin’izy ireo ny fahatakaran’izy ireo ny andian-teny iray na maromaro avy ao amin’ny 3 Nefia 11:11.

• Nisotro tamin’ilay kapoaka mangidy izay efa nomen’ny Ray Ahy Aho.

• Nankalaza ny Ray tamin’ny nitondrako teo Amiko ny fahotan’izao tontolo izao [Aho].

• Efa niaretako ny sitrapon’ny Ray tamin’ny zava-drehetra hatrany am-piandohana.

• Lioka 22:42–44

• Môzià 3:7

• Môzià 15:5–7

• Almà 7:11–12

• Fotopampianarana sy Fanekempihavanana 19:16–19

• Fotopampianarana sy Fanekempihavanana 45:3–4

• Mosesy 4:1–2

Avelao ny mpianatra hifanakalo hevitra momba ny zava-baovao hitan’izy ireo avy amin’ity sahanasa fandalinana ity ho an’ny andian-teny tsirairay.

Aorian’io fifanakalozan-kevitra io dia hevero ny hampiseho ireto fanontaniana manaraka ireto sy hanasa ny mpianatra hirakitra an-tsoratra ny valintenin’izy ireo amin’ny iray na ny maromaro amin’izany ao amin’ny diary fandalinan’izy ireo.

• Inona no tianao holazaina amin’ny olona momba an’i Jesoa Kristy miainga amin’ny zavatra tsapanao androany?

• Inona no tianao hatao eo amin’ny fiainanao noho ny zavatra takatrao na tsapanao momba an’i Jesoa Kristy?

• Nahoana no zavatra mendrika hatao ny fanarahan-dia an’i Jesoa Kristy mandritra ny fiainanao?

Hevero ny hanasa mpianatra vonona vitsivitsy hizara ny valintenin’izy ireo amin’ireo fanontaniana ireo. Mijoroa ho vavolombelona momba ireo fahamarinana noresahinareo momba an’i Jesoa Kristy androany.

Fanazavana sy fampahalalana avy amin’ny zava-miseho

3 Nefia 10:18. Moa ve misy famantarana momba ny fotoana nahatongavan’ny Mpamonjy tany Amerika fahiny mifandray amin’ny fotoana nanomboana Azy?

Nolazaina antsika fa ny faharavana tany Amerika tamin’ny fotoana nahafatesan’ny Mpamonjy dia nitranga tamin’ny andro fahefatry ny volana voalohany tamin’ny taona fahefatra ambin’ny telopolo (3 Nefia 8:5), ary ilay Tompo Nitsangana tamin’ny maty dia niseho tamin’ny Nefita tamin’ny “fiafaran’ny taona fahefatra amby telopolo” (3 Nefia 10:18). Midika izany fa ny fisehoan’ny Tompo Nitsangana tamin’ny maty tamin’ny Nefita dia nitranga volana maro taorian’ny nahafatesany sy ny Fitsanganany tamin’ny maty (Jereo ny Bruce R. McConkie, The Mortal Messiah: From Bethlehem to Calvary, 4 vols. [1981], 4:307).

3 Nefia 11:11. Ahoana no ahafahan’ny ohatra nasehon’i Jesoa Kristy tamin’ny fisotroana ny kapoaka mangidy manampy ahy?

Namporisika toy izao ny Loholona Jeffrey R. Holland ao amin’ny Kôlejin’ny Apôstôly Roambinifolo:

Mandraisa ny fanasan’ny Tompo isan-kerinandro, ary mifikira amin’ireo fampanantenan’ny Sorompanavotan’i Jesoa Kristy izay mahatonga antsika ho tanteraka. Minoa ireo fahagagana. Efa nahita maro tamin’izany aho rehefa maneho ireo fambara rehetra fa very ny fanantenana. Tsy very na oviana na oviana ny fanantenana. Raha toa ka tsy tonga vetivety ireo fahagagana ireo, na tsy tonga manontolo na toa tsy tonga mihitsy, dia tsarovy ilay ohatry ny fijalian’ny Mpamonjy manokana: raha tsy telina ilay kapoaka mangidy, dia sotroy ary mahereza, matokia an’ireo andro maha-sambatra kokoa izay ho avy. (Jeffrey R. Holland, “Tahaka ny vilany ariana,” Liahona, nôv. 2013, 41)

Nahoana no sitrapon’ny Ray any An-danitra ho an’i Jesoa Kristy ny hitondra teo Aminy ny fahotan’izao tontolo izao?

Ny Loholona Ulisses Soares ao amin’ny Kôlejin’ny Apôstôly Roambinifolo dia nampianatra hoe:

Nanatanteraka tamim-panajana ny sitrapon’ny Ray i Kristy tamin’ny alalan’ilay sorompanavotana tsy manam-petra sy feno famindram-po nataony. Nandresy ny fanindronan’ny fahafatesana ara-batana sy ara-panahy Izy, izay tafiditra teto amin’izao tontolo izao tamin’ny alalan’ny Fahalavoana, ka manolotra fahafahana be voninahitra ho antsika ny hahazo famonjena mandrakizay.

I Jesoa irery ihany no Olona afaka nanatanteraka io sorona mandrakizay sy tonga lafatra io ho antsika rehetra. Voafidy sy notendrena mialoha Izy tao amin’ilay Filankevitra lehibe tany an-danitra, talohan’ny namoronana izao tontolo izao mihitsy aza. (Ulisses Soares, “I Jesoa Kristy: ilay mpikarakara ny fanahintsika,” Liahona, apr. 2021, 82)

Sahanasa fianarana fanampiny

3 Nefia 11:3. “Nandre feo [izy ireo]”

Mety hitondra vokatsoa ho an’ny mpianatra ny fifanakalozan-kevitra momba ny fianarana ny fomba fihainoana ny feon’ Andriamanitra amin’ny alalan’ny Fanahy Masina. Angamba mety ho azonao atao ny manomboka ny fotoam-pianarana amin’ny alalan’ny fitenenana moramora kely ka noho izany dia mila mifantoka ny mpianatra vao maheno ny zavatra lazainao. Mety hanampy ny mpianatra ihany koa ny famantarana ireo sakana amin’ny fandrenesana ny feon’ Andriamanitra miteny amin’izy ireo. Ny 3 Nefia 11:1–7 dia mamaritra ny zavatra nilain’ny Nefita natao mba handrenesana an’ Andriamanitra nampahafantatra an’i Jesoa Kristy. Asao ny mpianatra hitady ireo fitsipika izay mety hanampy azy ireo rehefa miezaka mandre an’ Andriamanitra miteny amin’izy ireo izy ireo. Hevero ny hampiasa ny lahatenin’ny Filoha Nelson hoe “Henoy Izy” (Liahona, apr. 2020) na ny iray na ny maromaro amin’ireo fijoroana ho vavolombelona avy amina mpitarika hafa ao amin’ny Fiangonana avy ao amin’ireo amboarana horonan-tsary “Comment je l’écoute”, izay hita ao amin’ny ChurchofJesusChrist.org.

3 Nefia 11:11. Lesona ampiasana zavatra azo tsapain-tanana mba hampianarana fa nisotro ny kapoaka mangidy i Jesoa Kristy

Asao ny mpianatra hitanisa ny fangaro izay azo ampiarahana mba hanaovana ny zava-pisotro “mangidy” indrindra azon’izy ireo eritreretina. Hevero ny hanisy fangaro vitsivitsy eo mba hahafahan’ny mpianatra mameno kaopy iray amin’izany. Ampio ny mpianatra hampitaha io kaopy io amin’ny kapoaka mangidy nosotroin’i Jesoa Kristy, ny fijaliany ary fahafatesany. Asao izy ireo hifanakalo hevitra momba ny antony ieritreretan’izy ireo fa nampiasaina hampianarana antsika momba ny sorompanavotan’i Jesoa Kristy io sarinteny io.

3 Nefia 11:11. Lesona ampiasana zavatra azo tsapain-tanana mba hampianarana fa nanao ny sitrapon’ny Ray tamin’ny zavatra rehetra i Jesoa Kristy

Hevero ny hanome toromarika mandeha tsikelikely amina tetikasa fanaovana zava-kanto amin’ny alalan’ny famoretana taratasy sy hifanakalo hevitra momba ny maha-zava-dehibe ny dingana tsirairay mba hahatratrarana ny tanjona farany. Azonao atao ny manasa ny mpianatra hifanakalo hevitra momba ny antony mahatonga ny fankatoavan’i Jesoa Kristy ny sitrapon’ny Ray any An-danitra “tamin’ny zava-drehetra” ho nanan-danja. Azonao atao ihany koa ny mampiasa ny teny nambaran’ny Loholona Ulisses Soares ao amin’ny fizaràna hoe “Fanazavana sy fampahalalana avy amin’ny zava-miseho” mba hanampiana ny mpianatra hahatsapa fankasitrahana ny fankatoavana tonga lafatr’i Jesoa Kristy.