3 Nefia 11:12–17

“Mankanesa aty Amiko”

Rehefa avy nampahafantarina amin’ny maha-Zanaka Malalan’ny Ray any An-danitra Azy i Jesoa Kristy, dia nanasa ny vahoaka Izy hanatri-maso fa efa novonoina noho ny fahotan’izao tontolo izao Izy. Nanatona Azy tsirairay izy ireo ary nitsapa ny holatra teo amin’ny lanivoany sy ny diam-pantsika teo amin’ny tanany sy ny tongony. Ity lesona ity dia afaka manampy anao hahazo na hanatanjaka ny fijoroana ho vavolombelona anananao fa nijaly sy maty ho anao i Jesoa Kristy.

Manampy ny mpianatra haka sary an-tsaina ny zavatra vakin’izy ireo. Rehefa mahazo sary an-tsaina ireo zavatra nitranga sy ireo hevitra ao amin’ny soratra masina ny mpianatra, dia azo inoana kokoa ny hahatsiarovan’izy ireo izany. Ankoatra ny fampiasana horonan-tsary, sary ary haino vaky jery hafa, dia hevero ny hanasa ny mpianatra haka sary an-tsaina ireo trangan-javatra manan-danja sy ny hoe mety ho nanao ahoana ny nanatrika izany. Izany dia afaka manasa ny Fanahy Masina handray anjara amin’ny fandalinan’izy ireo ary manampy ny mpianatra hahatsapa ny fahamarinana sy ny lanjan’ny zavatra ianaran’izy ireo.

Fanomanana ny mpianatra: Asao ny mpianatra hamaky ny 3 Nefia 11:12–17 ary haka sary an-tsaina ny zavatra mety ho tsapan’izy ireo raha manana io fifaneraserana manokana amin’i Jesoa Kristy io izy ireo.

Sahanasa fianarana azo atao

Raiso an-tanana ny fijoroana ho vavolombelona anananao

Eritrereto ny fomba iharan’ity fanasana manaraka avy amin’ny Filoha Russell M. Nelson ity aminao.

Miangavy anareo aho mba handray an-tanana ny fanananareo fijoroana ho vavolombelona. Miasà ho an’izany. Mandraisa andraikitra mahakasika izany. Karakarao izany. Kolokoloy izany mba hitomboany. Fahano fahamarinana izany. Aza mandoto izany amin’ny filôzôfia sandoka ataon’ny lehilahy sy vehivavy tsy mino ary avy eo manontany tena hoe nahoana no mihalefy ny fijoroana ho vavolombelona ao anatinareo. (Russell M. Nelson, “Safidy ho an’ny Mandrakizay” [fampaherezam-panahy maneran-tany ho an’ny tanora tokan-tena sy mpivady vao herotrerony, 15 mey, 2022], ChurchofJesusChrist.org)

• Nahoana, araka ny eritreritrao, no manan-danja amin’ny olona tsirairay ny “mandray an-tanana” ny fijoroana ho vavolombelona ananany?

Iray amin’ireo fahamarinana manan-danja indrindra azontsika ananana fijoroana ho vavolombelona ny hoe i Jesoa Kristy no Zanak’ Andriamanatra sy Mpamonjy izao tontolo izao. Saintsaino hoe nahoana no mila mahafantatra izany momba Azy ny olona. Azonao atao ny mandalina ny Jaona 14:6 sy ny Môzià 3:17 mba hanampy anao hahita ny sasany amin’ireo antony ireo.

Zarao izao manaraka izao mba hanampiana ny mpianatra hanombana ny fahatsapan’izy ireo momba an’i Jesoa Kristy sy ny fijoroana ho vavolombelona ananan’izy ireo momba Azy. Asehoy ireo fanontaniana ary omeo fotoana hiraketan’izy ireo an-tsoratra ao amin’ny diary fandalinan’izy ireo ny valintenin’izy ireo ny mpianatra.

• Tsapanao ve fa manana fijoroana ho vavolombelona momba an’i Jesoa Kristy amin’ny maha Zanak’ Andriamanitra sy Mpamonjy izao tontolo izao Azy ianao?

• Inona no nanampy anao mba hahatsapa ny zavatra tsapanao momba ny Mpamonjy?

Anio ianao dia handalina fifaneraserana masina nananan’i Jesoa Kristy tamin’ny Nefita. Rehefa mandalina ianao, dia eritrereto ny zavatra azonao atao mba hahazoana na hanatanjahana ny fijoroana ho vavolombelona anananao momba an’i Jesoa Kristy.

Nanasa ny Nefita hitsapa ny holatry ny ratrany i Jesoa Kristy

Raha ilaina dia asao ny mpianatra hamerina hijery ny zavatra nianaran’izy ireo tany aloha, amin’ny alalan’ny fangatahana azy ireo hamintina ireo trangan-javatra ao amin’ny 3 Nefia 11:1–11.

Tsarovy fa raha mbola niangona tany amin’ny tanin’i Soafeno ny andiana Nefita, dia nidina avy any an-danitra ilay Tompo efa Nitsangana tamin’ny maty. Nambarany fa Izy no Jesoa Kristy ary nanome voninahitra ny Ray tamin’ny alalan’ny fijaliany noho ny fahotan’izao tontolo izao Izy (jereo ny 3 Nefia 11:1–11). Ny vahoaka dia nahitana lehilahy sy vehivavy ary ankizy, niisa teo ho eo amin’ny olona 2500 teo (jereo ny 3 Nefia 17:25).

Vakio ny 3 Nefia 11:12–15, hitadiavana ny fanasana voalohany nataon’ny Tompo efa Nitsangana tamin’ny maty tamin’ny olona.  ChurchofJesusChrist.org

Rehefa mandalina ianao, dia miezaha maka sary an-tsaina ny tenanao hoe isan’ireo vahoaka. Ny fakana sary an-tsaina ireo trangan-javatra na hevitra avy ao amin’ny soratra masina dia afaka manasa ny Fanahy Masina ho eo amin’ny fandalinanao. Raketo an-tsoratra ny eritreritra sy fahatsapana rehetra izay tonga aminao rehefa mandalina sy misaintsaina ary maka sary an-tsaina ianao.

Omeo fotoana sahaza handalinana, hakana sary an-tsaina ary hiraketana an-tsoratra ny eritreritr’izy ireo ny mpianatra. Ny fanontaniana toy ireto manaraka ireto dia afaka manampy ny mpianatra hahita fahombiazana amin’ny fakana sary an-tsaina:

• Eo am-pieritreretanao ny tenanao ao amin’ny tempoly any Soafeno dia toy ny ahoana no fahazoanao an-tsaina ny manodidina anao rehefa maheno ny feon’i Jesoa Kristy manambara hoe “Mankanesa aty Amiko” ianao? (3 Nefia 11:14).

• Azonao an-tsaina ho toy ny ahoana ny zavatra misoritra eny amin’ny endriky ny Mpamonjy rehefa mandinika ny diam-pantsika eo amin’ny tanany sy ny tongony ianao?

• Inona, araka ny eritreritrao, no zavatra tsapan’ny olona rehefa nahita ny Mpamonjy izy ireo ary nifanerasera “tsirairay” Taminy? (3 Nefia 11:15).

• Ampahany inona tamin’io tantara io no nosafidinao halaina sary an-tsaina? Inona no eritreritra sy fahatsapana vitsivitsy tonga tao aminao rehefa nanao izany ianao?

• Inona no ampianarin’ireo andininy ireo anao momba ny fanirian’ny Mpamonjy ho an’ny tsirairay amintsika?

Ity manaraka ity dia fitsipika iray azontsika ianarana avy amin’io tantara masina io: I Jesoa Kristy dia manasa ahy handray fijoroana ho vavolombelona an’ny tenako manokana fa Izy no Mpamonjy izao tontolo izao. Hevero ny hirakitra an-tsoratra io fitsipika io ao amin’ny soratra masinao na ao amin’ny diary fandalinanao.

Rehefa niresaka momba ny fanasana sy asa fanompoana manokan’ny Mpamonjy teo anivon’ny Nefita ny Eveka Gérald Caussé ao amin’ny Episkôpà Mpiahy, dia nampianatra hoe:

Io no tranga faratampony sy manan-danja indrindra ao amin’ny Bokin’i Môrmôna. Ny “vaovao mahafali[n’]” ny filazantsara manontolo dia voafintina ao amin’izany sarin’ny Mpamonjy maninjitra amim-pitiavana ny “sandrin’ny famindram-po[ny]” [Almà 5:33] izany, mba hanasana ny olona tsirairay hanatona Azy ary handray ireo fitahian’ny Sorompanavotany. …

… Tahaka ny nanasan’i Jesoa ny mpianatra Nefita tsirairay hitsapa ny feriny, no nahafatesany ho antsika tsirairay avy, ny isam-batan’olona, toy ny hoe izaho na ianao irery no hany olona eto an-tany. Manome fanasana manokana ho antsika Izy hanatona Azy ary hampiasa ireo fitahiana mahatalanjon’ny Sorompanavotana nataony. (Gerald Causse, “Vavolombelona velona an’ilay Kristy velona,” Liahona, mey 2020, 39–40)

Asao ny mpianatra hanome valinteny maro amin’ity fanontaniana manaraka ity. Azon’ny mpianatra atao ihany koa ny mizara ny zavatra nanampy azy ireo hahazo fijoroana ho vavolombelona momba an’i Jesoa Kristy. Hevero ihany koa ny hizara ny zavatra nanampy anao hahazo fijoroana ho vavolombelona.

• Inona avy no fomba sasantsasany ahafahantsika mahazo ny fijoroantsika ho vavolombelona fa i Jesoa Kristy no Mpamonjy izao tontolo izao?

Raha ilaina dia mizarà tantara iray avy amin’ny soratra masina na lahateny tamina fihaonamben’ny Fiangonana maneran-tany izay maneho ny fomba nahazoan’ny isam-batan’olona fijoroana ho vavolombelona momba ny Mpamonjy. Mety ho isan’ireo ohatra ao amin’ny soratra masina ihany koa ilay vehivavy Samaritana teo amin’ny fantsakana (Jaona 4:1–29), ny rain’i Lamônia Mpanjaka (Almà 22:1–18), na i Almà Zanany (Almà 36:5–23).

“Hosana!”

Nisy fiantraikany lalina tamin’ny Nefita ny fifaneraseran’izy ireo manokana tamin’ny Mpamonjy.

Vakio ny 3 Nefia 11:16–17, hitadiavana ny fihetsika nasetrin’ny vahoaka taorian’ny zavatra niainan’izy ireo niaraka tamin’ny Tompo efa Nitsangana tamin’ny maty.

Mety hanampy ny fahafantarana fa ny hoe hosana dia teny hebreo midika hoe “vonjeo re” na “vonjeo re izahay.” Ampiasaina manerana ny soratra masina izany mba ho fanehoana fiderana sy fitalahoana ary zary fankalazana ny Mesia tamin’ny taona rehetra (jereo ny Torolalana ho an’ny soratra masina, “Hosana,”scriptures.ChurchofJesusChrist.org.

Ireto manaraka ireto dia hanampy anao haka fotoana haneho ny fahatsapanao momba ny Mpamonjy na handalina momba ny hafa izay nizara ny fijoroan’izy ireo ho vavolombelona momba Azy.

Ireto sahanasa manaraka ireto dia natao hanampy ny mpianatra haneho ny fijoroana ho vavolombelona manokana ananan’izy ireo momba an’i Jesoa Kristy na hianatra avy amin’ny fijoroana ho vavolombelona ananan’ny hafa. Asehoy ireo safidy mba hahafahan’ny mpianatra mijery izany mandritra ny sahanasa. Aza misalasala manamboatra ireo safidy mba hifanaraka tsara kokoa amin’ny filan’ny mpianatrao.

1. Zarao amin’ny alalan’ny fanoratana taratasy any amin’ny olona iray tsapanao fa hahazo tombony amin’izany ny fijoroana ho vavolombelona manokana anananao momba an’i Jesoa Kristy.

2. Misafidiana andininy iray ao amin’ny soratra masina na hira anaty fihirana iray izay mamaritra ny fahatsapanao momba ny hoe iza i Jesoa Kristy ary inona no nataony ho anao. Manorata fanazavana fohy momba ny antony mahatonga io andininy na hira anaty fihirana io manan-danja aminao.

3. Manorata tononkalo na tononkira ho an’ny hira iray izay mamaritra ny fahatsapanao momba an’i Jesoa Kristy.

4. Halalino ny fijoroana ho vavolombelona ananan’ny olona iray hafa momba an’i Jesoa Kristy. Fintino ny zavatra nohalalininao sy ny fahatsapana tonga tao aminao avy amin’izany tantara izany. Mety ho ohatra amin’izany ny Almà 26:1–16, 35–37 na ny “Ilay Kristy Velona: Tenivavolombelon’ny Apôstôly” (ChurchofJesusChrist.org).

Manasà mpianatra vonona vitsivitsy hizara ny zavatra nataon’izy ireo tamin’ny sahanasa teo aloha. Isaory izy ireo amin’ny fahavononany handray anjara. Mijoroa ho vavolombelon’ny fahamarinana izay noresahinareo ary amporisiho ny mpianatra hanohy hanao ezaka hahazoana na hanatanjahana ny fijoroana ho vavolombelona ananan’izy ireo momba an’i Jesoa Kristy.

Fanazavana sy fampahalalana avy amin’ny zava-miseho

3 Nefia 11:14. Ahoana no ahafahako mankany amin’ny Mpamonjy?

Nampianatra toy izao ny Filoha Russell M. Nelson:

Ny safidy mba hanatona an’i Kristy dia tsy resaka toerana fa resaka fanolorantena manokana. Ny mpikambana rehetra ao amin’ny Fiangonana dia afaka mianoka ny fotopampianarana, ny ôrdônansy, ny fanalahidin’ny fisoronana, ary ireo fitahian’ny filazantsara, na aiza na aiza toerana misy azy. (Russell M. Nelson, “Ny hoavin’ny Fiangonana: Manomana izao tontolo izao amin’ny Fiavian’ny Mpamonjy fanindroany,” Liahona, apr. 2020)

Ahoana no ahafahan’ny fijoroana ho vavolombelona iray momba an’i Jesoa Kristy manova ny fiainako?

Nampianatra toy izao ny Filoha M. Russell Ballard ao amin’ny Kôlejin’ny Apôstôly Roambinifolo:

Raha lazaina amin’ny fomba tsotra, ny fijoroana ho vavolombelona—ny tena fijoroana ho vavolombelona, izay nateraky ny Fanahy ary namafisin’ny Fanahy Masina—dia manova fiainana. Manova ny fomba fisainanao sy ny zavatra ataonao izany. Manova ny zavatra lazainao izany. Miantraika amin’ny laharam-pahamehana apetrakao rehetra sy ny safidy ataonao rehetra izany. Ny hoe manana fijoroana ho vavolombelona tena izy sy maharitra momba ny filazantsaran’i Jesoa Kristy dia “naterak’ Andriamanitra … araka ny fanahy,” “[mandray] ny endriny … [eo] amin’ny [tarehy],” ary miaina “fiovana mahery vaika [ao am-ponao]” (Almà 5:14). (M. Russell Ballard, “Pure Testimony,” Liahona, Nov. 2004, 40)

Inona no manan-danja mikasika ny ratra sy holatra teo amin’ny vatan’ny Mpamonjy efa nitsangana tamin’ny maty?

Nampianatra toy izao ny Loholona Gerrit W. Gong ao amin’ny Kôlejin’ny Apôstôly Roambinifolo:

Manasa antsika ny Mpamonjy hahatsiaro Azy mandrakariva, tahaka ny hahatsiarovany antsika mandrakariva.

Tany amin’ny Tontolo Vaovao dia nasain’ny Mpamonjy efa tafatsangana tamin’ny maty ireo izay nanatrika teo hanatona tsirairay ka hampitehaka ny tanany amin’ny lanivoany ary hitsapa ny diam-pantsika amin’ny tanany sy ny tongony.

… Diniho hoe nahoana ny vatan’ny Mpamonjy tonga lafatra efa nitsangana tamin’ny maty no mbola ahitana ireo ratra teo amin’ny lanivoany sy ireo diam-pantsika amin’ny tanany sy ny tongony.

Ombieny ombieny teo amin’ny tantara no nahitana olombelona noheloina ho faty tamin’ny hazofijaliana. Saingy Jesoa Kristy Mpamonjy antsika ihany no mamihana antsika ka mbola mitondra ireo mariky ny fitiavany madio. Izy ihany no mahatanteraka ilay faminaniana hoe hasandratra eo amin’ny hazofijaliana mba hahafahany misintona antsika tsirairay, amin’ny anarantsika, hankany Aminy [jereo ny 3 Nefia 27:14].

Milaza ny Mpamonjintsika hoe:

“Eny, mety manadino izy kanefa Izaho tsy hanadino anao.

“Indro, efa vitako tombo-kavatsa eo am-pelatanako hianao” [Isaia 49:15–16]. (Gerrit W. Gong, “Tsarovy mandrakariva Izy,” Liahona, mey 2016, 110)

Sahanasa fianarana fanampiny

Manompo ny iray

Eo am-pandalinana ny 3 Nefia 11:12–15, dia hevero ny hanasongadina ny ohatra nasehon’ny Mpamonjy tamin’ny fanompoana ny olona tsirairay. Azonao atao ny manasa ny mpianatra hieritreritra tantara fanampiny avy ao amin’ny soratra masina momba an’i Jesoa manompo olona mivantana. Asao hieritreritra ny fomba anohizan’i Jesoa Kristy manompo antsika tsirairay ankehitriny ny mpianatra. Amporisiho ny mpianatra hanaraka ny ohatra nasehon’ny Mpamonjy amin’ny fanampiana tsirairay ireo izay sahirana.

“Velona ilay Mpanavotra ahy”

Rehefa mifanakalo hevitra momba ny maha-zava-dehibe ny fahazoana fijoroana ho vavolombelona an’ny tena manokana momba an’i Jesoa Kristy ianareo, dia mety hanampy ny fihirana na ny fihainoana ilay hira anaty fihirana hoe“Velona ilay Mpanavotra ahy” (Fihirana sy hiran’ny ankizy, lah. 76). Azonao atao ny mizara ity tantara manaraka ity, izay milazalaza ny zavatra sasany niainan’i Samuel Medley, izay nanoratra ny tonon’io hira anaty fihirana io.

Raha mbola nanompo tao amin’ny Tafika an-dranomasina Britanika i Samuel tamin’ny 1759, dia naratra mafy ny tongony. Nilaza ny dokotera iray fa mila tapahina izany. I Samuel, izay tsy olona mpivavaka, dia nandany ny alina nisaintsainana ireo fampianarana momba an’i Jesoa Kristy ary nivavaka mba hitsimbinana ny ainy sy ny tongony. Ny ampitso marainan’iny dia nihatsara be ny tongotr’i Samuel ka tsy nila notapahina intsony. Nandany ny androm-piainany sisa tamin’ny maha Kristiana nahatoky azy i Samuel (jereo ny “I Know That My Redeemer Lives,” What’s New with The Tabernacle Choir [blog], 12 feb, 2014, thetabernaclechoir.org).