“3 Нифай 11:1-11: ‘Би бол Есүс Христ,’” Мормоны Номын багшийн гарын авлага (2024)
“3 Нифай 11:1-11,” Мормоны Номын багшийн гарын авлага
3 Нифай 11:1-11
“Би бол Есүс Христ”
Нифайчуудыг сүмийн эргэн тойронд цугларч, Есүс Христийн үхлийн тэмдгүүдийн талаар ярьж байх хооронд мөн Аврагч “бууж ирээд мөн тэдний дунд зогсов” 3 Нифай 11:8). Тэрээр тэдэнд Өөрийн үүрэг, зорилго, тэдний төлөө хийсэн бүхий л зүйлийнхээ талаар заасан. Энэ хичээл Есүс Христийн хэн болох, таны төлөө хийсэн зүйлийнх нь төлөө Түүнийг хайрлах хайр, талархлаа нэмэгдүүлэхэд тань туслах болно.
Бүх суралцагчийг үнэлж хүндэтгэх нь Өөр өөр гарал түүхтэй суралцагчид хайрлагдаж, хүлээн зөвшөөрөгдөж байгаагаа мэдрэх үед тэд өөрсдийн үзэл бодол, туршлагыг ангидаа хуваалцах магадлал өндөр байх болно. Суралцагч бүрд харьяалагдаж буй мэдрэмжийг бий болгохыг хичээ. Бүх суралцагчид, ялангуяа бэрхшээлтэй тулгарч байж магадгүй суралцагчдад Христийнхтэй адил чин сэтгэлийн хайраа илэрхийлэх арга замыг ол.
Суралцагчийн бэлтгэл: Есүс Христ тэдний төлөө юу хийсэн талаар илүү ихийг ойлгоход туслах судрыг эсвэл Сүмийн удирдагчийн мэдэгдлийг олоход суралцагчдыг урь.
Боломжит суралцах үйл ажиллагаа
Энэ хичээл 3 Нифай 11:1–11-д цэдэглэгдсэн үйл явдлууд, сургаал дээр төвлөрөх болно. Нэмэлт хичээл нь 3 Нифай 11:12–17-д цэдэглэгдсэн Аврагчтай холбоотой хүмүүсийн туршлагад төвлөрөх болно. Хэрэв танд хоёр хичээлийг тусад нь заах цаг байхгүй бол энэ хичээлд тусгаж болох санаануудыг “3 Нифай 11:12–17” хичээл-ээс авна уу.
Ирээдүйгээ өөдрөг харах
Та өөрийн ямар нэг зүйлийг маш их хүлээж байсан хүүхэд нас, өсвөр насныхаа туршлагаас хуваалцах талаар бод. Жишээ нь соёлын болон спортын чухал арга хэмжээ эсвэл таны хүлээн авахдаа баяртай байсан зүйл байж болно. Суралцагчдад энэ мөч хүртэл ямар мэдрэмж төрж, эцэст нь үүнийг мэдрэхэд ямар байсныг мэдрэхэд тусал. Дараа нь та суралцагчдыг ангийн бусад суралцагчтай ямар нэг зүйл хүлээж байсан үеийнхээ талаар товчхон хуваалцахад урьж болно.
Мормоны Номоос бид нифайчуудын олон үеийн турш тэсэн ядан хүлээж байсан үйл явдал бол Бурханы Хүү дэлхий дээр ирэх явдал байсан гэдгийг мэдэж авсан. Лихай, Сариа хоёр хүүхдүүдээ Иерусалимаас явж, аглаг буйд руу авч явах үеэс л 600 жилийн дараа Бурхан Хүүгээ “дэлхийн нэгэн Аврагч” болгон илгээнэ гэдгийг мэдэж байсан (1 Нифай 10:4).
Дараагийн өгүүлбэрийг хуваалцсаны дараа хэд хэдэн суралцагчийг хаалтад жагсаасан судруудыг ээлжлэн чанга уншихад урь.
Тэд мөн Есүс Христ хэзээ нэгэн цагт амлагдсан нутагт нифайчуудын дунд ирнэ гэдгийг ойлгосон байв (1 Нифай 12:6; 2 Нифай 26:1; Алма 45:9–10-ыг үзнэ үү). 3 Нифай 11-ээс бид ийн удаан хүлээсэн талаар уншиж болно.
Нифайчууд, леменчүүдийн дунд хүн бүр Есүс Христийн талаар зөв ойлголттой байгаагүй. Үүний нэгэн адил өнөөдөр хүмүүс Есүс Христийн талаар буруу ойлголттой болж, зарим нь бүр Түүний оршин байгааг үгүйсгэдэг. Зарим хүн Есүсийг агуу удирдагч байсан гэдэгт итгэдэг ч Түүнийг Бурханы Хүү гэдгийг хүлээн зөвшөөрдөггүй.
-
Есүс Христ гэж хэн болох талаар зөв ойлголттой байх нь бидэнд яагаад чухал гэж та нар бодож байна вэ?
-
Есүс Христ гэж хэн бэ, Тэр бидний төлөө юу хийснийг илүү сайн ойлгоход бидэнд юу туслах вэ?
Есүс Христ нифайчуудад үзэгдэхдээ Тэр болон Тэнгэрлэг Эцэг хоёулаа Түүнийг хэн болох талаар чухал тунхаглалыг тунхагласан. Өнөөдөр та судлах явцдаа Тэнгэрлэг Эцэг, Есүс Христ хоёр Аврагч гэж хэн бэ, Тэр таны төлөө юу хийсэн талаар таныг мэдээсэй гэж хүсэж байгаа зүйлд анхаарлаа хандуул.
Өмнөх хичээл дээр та гурав дахь Нифайг судлахдаа Есүс Христийн талаар сурч байгаа зүйлсийнхээ жагсаалтыг гаргаж эхэлсэн байж магадгүй юм. Хэрэв та жагсаалтаа хараахан эхлээгүй байгаа бол судлах тэмдэглэл дээрээ нэг жагсаалт эхлүүлж, хичээлийн турш түүндээ сурч мэдсэн зүйлсээ нэмж оруул.
Өмнөх догол мөрөнд дурдсан жагсаалтын талаарх дэлгэрэнгүйг “3 Нифай 8–10” хичээлээс олж болно.
Есүс Христ нифайчуудад үзэгдсэн нь
3 Нифай 11:1–11-ийг уншиж, Өгөөмөр нутгийн ариун сүмд цугларсан бүлэг хүмүүст Есүс Христийн дүр төрх хэрхэн харагдсан тухай дэлгэрэнгүйг олж мэд. Та мөн “Jesus Christ Appears in the Ancient Americas (Есүс Христ Эртний Америкт үзэгдэв)” видеог цагийн код 11:19 -13:29 хүртэл үзэж болно. Энэ видеог ChurchofJesusChrist.org вебсайтаас үзэх боломжтой.
-
Эдгээр шүлгийг судалснаар юу нь танд онцгой санагдсан бэ?
-
Хэрэв та тэр үед байсан бол юу бодож, мэдэрч байгаагаа дүрслэхдээ ямар үгс ашиглах байсан бэ? Яагаад?
Арван хоёр төлөөлөгчийн чуулгын ахлагч Жэффри Р.Холланд Есүс Христийн дүр төрхийг болон хүмүүст юу хэлснийг нь ийн дүрсэлсэн:
Тэрхүү үзэгдэл болон тунхаг нь Мормоны Номын бүхий л түүхэн дэх хамгийн сүрлэг мөч болох гол санааг илэрхийлдэг. …
Бүгд Түүний тухай ярьж, дуулж, мөрөөдөн, Түүнийг ирээсэй хэмээн залбирч байсан бөгөөд эцэст нь Тэр үнэхээр ирсэн байлаа. Тэр өдөр тийнхүү хүрээд ирэх нь тэр! Харанхуй шөнө бүрийг өглөөний гэрэл болгодог Бурхан ирсэн байв. (Jeffrey R. Holland, Christ and the New Covenant: The Messianic Message of the Book of Mormon [1997], 250–51)
Есүс Христийн нифайчуудад хэлсэн анхны үгс нь Түүний хэн болох, бидний төлөө юу хийснийг нь ойлгоход бидэнд тусалдаг.
3 Нифай 11:10–11-ийг дахин уншиж, Есүс Христийн Өөрийгөө болон бидний төлөө юу хийснээ дүрсэлсэн үг, хэллэгт анхаарлаа хандуул. Эдгээр үнэнийг судлах тэмдэглэлийнхээ жагсаалтад нэмж оруулахаа мартуузай.
3 Нифай 11:10-11 бол төгс эзэмших судрын хэсэг юм. Төгс эзэмших сургаалын судрын хэсгүүдийг дараа хялбар олохын тулд онцгойлон тэмдэглэ. Та дараагийн хичээл дээр энэ хэсэгт заасан сургаалыг асуултад хариулахад эсвэл нөхцөл байдалд хэрэгжүүлэх дадлага хийх боломжтой болно.
-
Та Есүс Христийн талаар ямар үнэнийг мэдэж авсан бэ?
-
Эдгээр үнэний аль нь танд онцгой ач холбогдолтой санагдаж байна вэ? Яагаад?
Есүс Христ Эцэгийн хүслийг биелүүлсэн
Эдгээр шүлгээс бидний сурч болох үнэнүүдийн нэг бол Есүс Христ дэлхийн нүглийг Өөртөө үүрэхдээ Эцэгийн хүслийг биелүүлсэн явдал юм.
Бид Есүс Христийн хийсэн зүйлийг дүрслэхдээ ашигласан хэллэгүүдийг илүү анхааралтай ажигласнаар энэ үнэний талаарх ойлголтоо гүнзгийрүүлж чадна. 3 Нифай 11:11-ээс дараах хэллэгийг судлах тэмдэглэлдээ хажууд нь эсвэл доор нь зай үлдээн хуулж бичнэ үү.
Дараах мэдэгдлүүд, судрын эшлэлүүдийн жагсаалтыг самбарт харуул. Та суралцагчдыг жижиг бүлгүүдэд хуваарилан, жагсаасан судрын цөөн хэдэн эшлэлийг судлуулахаар томилж болно. Тэд судлах тэмдэглэлдээ бичиж тэмдэглэсэн, тэдний судалсан шүлгүүд 3 Нифай 11:11-ээс нэг буюу хэд хэдэн хэллэгийн талаарх ойлголтыг нь хэрхэн гүнзгийрүүлсэн талаар хэлэлц.
-
Мөн би Эцэгийн надад өгсөн гашуун аяганаас ууж.
-
[Би] дэлхийнхний нүглүүдийг өөр дээрээ авснаар Эцэгийг алдаршуулсан билээ.
-
Би эхлэлээс бүх зүйлийн хувьд Эцэгийн тааллыг хүлцсэн.
Суралцагчдад энэхүү судлах үйл ажиллагааны талаарх ойлголтоо үг хэллэг бүрээр нь ярилцахыг зөвшөөр.
Энэ хэлэлцүүлгийн дараа дараах асуултуудыг үзүүлж, суралцагчдыг нэг юм уу хэд хэдэн асуултад өгсөн хариултаа судлах тэмдэглэлдээ бичиж тэмдэглэхэд урь.
-
Та өнөөдөр мэдэрсэн зүйл дээрээ үндэслэн Есүс Христийн талаар хүмүүст юу хэлэхийг хүсэж байна вэ?
-
Та Есүс Христийн талаар юу ойлгож, мэдэрч байгаагаасаа шалтгаалан амьдралдаа юу хийхийг хүсдэг вэ?
-
Насан туршдаа Есүс Христийг дагах нь яагаад үнэ цэнтэй вэ?
Эдгээр асуултын хариултыг хуваалцах хүсэлтэй цөөн хэдэн суралцагчийг урь. Өнөөдөр Есүс Христийн тухай ярьсан үнэнүүдийнхээ талаар гэрчил.