3 Нифай 11:12-17

“Над дээр нааш ирэгтүн”

Есүс Христ гарын шархаа нифай эмэгтэйд үзүүлж буй нь

Тэнгэрлэг Эцэгийн Хайртай Хүү хэмээн танилцуулагдсаны дараа Есүс Христ дэлхийн гэм нүглийн төлөө Өөрийгөө алагдсан гэдгийг гэрчлэхэд хүмүүсийг урьсан. Тэд нэг нэгээрээ Түүнд хүрч, Түүний хавирган дээрх сорви, Түүний гар, хөл дээрх хадаасны ормыг тэмтэрчээ. Энэ хичээл танд Есүс Христ таны төлөө зовж, нас барсан гэдэг гэрчлэлийг олж авахад эсвэл баталгаажуулахад тусална.

Суралцагчдад уншсан зүйлээ төсөөлж зураглахад тусал. Суралцагчид судрын үйл явдлууд, санаануудыг дүрсэлж байвал тэдгээрийг санах магадлал өндөр байдаг. Видео, зураг, бусад хэвлэл мэдээллийн хэрэгслийг ашиглахаас гадна чухал үйл явдлуудыг болон тэнд байсан бол ямар байх байсныг төсөөлөхөд суралцагчдыг урь. Энэ нь Ариун Сүнсийг хичээлдээ урьж, суралцагчдад сурсан зүйлийнхээ үнэн, ач холбогдлыг мэдрэхэд тусалдаг.

Суралцагчийн бэлтгэл: Суралцагчдыг 3 Нифай 11:12–17-г уншиж, Есүс Христтэй биечлэн харилцсан бол тэдэнд ямар санагдахыг төсөөлөн бодоход урь.

Боломжит суралцах үйл ажиллагаа

Гэрчлэлээ хамгаал

Ерөнхийлөгч Рассэлл М.Нэлсоны дараах урилга танд хэрхэн хамаатайг бодоорой.

Ерөнхийлөгч Рассэлл М.Нэлсон

Би та нараас гэрчлэлээ хамгаалаарай хэмээн гуйж байна. Үүний төлөө зүтгэ. Үүндээ хариуцлага хүлээ. Үүнд анхаарал тавь. Гэрчлэл тань хүчирхэгжиж болохын тулд тэтгэ. Үүнийг үнэнээр тэжээ. Гэрчлэл тань суларсныг дараа гайхаж суухгүйн тулд итгэлгүй хүмүүний хуурамч гүн ухаанаар үүнийг бүү булингартуул. (Рассэлл М.Нэлсон, “Мөнхийн сонголтууд” [Залуучуудад зориулсан дэлхий даяарх онцгой цугларалт, 2022 оны 5-р сарын 15], ChurchofJesusChrist.org)

• Хүн бүр гэрчлэлээ “хамгаалах” нь яагаад чухал гэж та бодож байна вэ?

Бидний гэрчилж чадах хамгийн чухал үнэний нэг бол Есүс Христ бол Бурханы Хүү бөгөөд дэлхийн Аврагч мөн гэсэн үнэн юм. Хүмүүсийн Түүний энэ талаар мэдэх хэрэгтэй шалтгааныг тунгаан бод. Та эдгээр шалтгааны заримыг харахын тулд Иохан 14:6 болон Moзая 3:17-г уншиж болно.

Суралцагчдад Есүс Христийн талаарх мэдрэмж, гэрчлэлийг үнэлэхэд нь туслахын тулд дараах зүйлийг хуваалц. Дараах асуултуудыг үзүүлж, суралцагчдад хариултаа судлах тэмдэглэлдээ бичих цаг гаргаж өг.

• Та өөрийгөө Есүс Христийг Бурханы Хүү, дэлхийн Аврагч гэсэн гэрчлэлтэй гэж бодож байна уу?

• Танд Аврагчийн талаар ингэж мэдрэхэд юу нөлөөлсөн бэ?

Өнөөдөр та Есүс Христийн нифайчуудтай харьцсан ариун харилцааг судлах болно. Суралцах явцдаа Есүс Христийн талаарх гэрчлэлээ олж авах эсвэл хүчирхэгжүүлэхийн тулд юу хийж болох талаар бодож үз.

Есүс Христ нифайчуудыг Өөрийн шархны сорвийг тэмтэрч үзэхэд урьсан

Шаардлагатай бол суралцагчдаас 3 Нифай 11:1–11-ийн үйл явдлыг нэгтгэн дүгнэхийг хүсэх замаар өмнө нь сурсан зүйлээ дүгнэхэд урь.

Христ Өгөөмөр нутагт нифайчуудад үзэгдсэн нь

Бүлэг нифайчуудыг Өгөөмөр нутагт цуглаж байх үед Амилсан Их Эзэн тэнгэрээс бууж ирснийг сана. Тэрээр Өөрийгөө Есүс Христ бөгөөд дэлхийнхний нүглийн төлөө зовж шаналан, Эцэгийг алдаршуулсан гэдгээ тунхагласан (3 Нифай 11:1–11-ийг үзнэ үү). Олон тооны эрэгтэй, эмэгтэй, хүүхдүүдээс бүрдсэн 2500 орчим хүн байв (3 Нифай 17:25-ыг үзнэ үү).

3 Нифай 11:12–15-ыг уншаад, амилсан Их Эзэний хүмүүст зориулсан анхны урилгыг олж мэд. Та мөн ChurchofJesusChrist.org дээрх “Jesus Christ Appears in the Ancient Americas (Есүс Христ эртний Америкт үзэгдэв)” видеог цагийн код 13:29-16:03 хүртэл үзэх боломжтой.

Судалж байхдаа та өөрийгөө олны дунд байсан гэдгээр төсөөл. Судруудын үйл явдлуудыг эсвэл санаануудыг дүрслэн бодсоноор Ариун Сүнсийг хичээлдээ урих боломжтой. Суралцаж, тунгаан бодож, төсөөлж байхдаа өөртөө ирж буй бодол, мэдрэмжээ тэмдэглэ.

Суралцагчдад бодол санаагаа судлах, төсөөлөх, бичихэд хангалттай хугацаа өг. Дараахтай адил асуултууд нь сурагчдад амжилттай төсөөлөн бодоход тусална:

• Та Өгөөмөр нутгийн ариун сүмд өөрийгөө байна хэмээн бодож байхдаа Есүс Христийн “Надад ирэгтүн” гэж тунхаглах дуу хоолойг сонсох үеийн талаар хэрхэн төсөөлж байна вэ? (3 Нифай 11:14).

• Та Аврагчийн гар, хөл дээрх хадаасны ул мөрийг үзэж байхдаа Түүний царайд юу илэрч байсан гэдгээр төсөөлж байна вэ?

Аврагчийн гарт хэн нэгэн хүрч буй нь

• Хүмүүс Аврагчийг хараад, Түүнтэй “нэг нэгээрээ” харилцаж байхдаа юу мэдэрч байсан гэж та бодож байна вэ? (3 Нифай 11:15).

• Энэ цэдгийн ямар хэсгийг та төсөөлөхөөр сонгосон бэ? Үүнийг хийж байхад танд ямар бодол, мэдрэмж төрсөн бэ?

• Эдгээр шүлэг Аврагчийн бидний хүн нэг бүрийн төлөөх хүслийн талаар танд юу зааж байна вэ?

Энэ ариун цэдгээс бидний сурч мэдэх нэг зарчим бол: Есүс Христ Өөрийгөө дэлхийн Аврагч гэсэн хувийн гэрчлэлийг хүлээн авахад намайг урьж байна. Энэ зарчмыг та судар эсвэл судлах тэмдэглэл дээрээ бичих талаар бодож үз.

Тэргүүлэх бишопын зөвлөлийн бишоп Жэралд Коссэй Аврагчийн хувийн урилга, Түүний нифайчуудын дунд хийсэн тохинууллын талаар ярихдаа дараах зүйлийг заажээ:

Бишоп Жэралд Коссэй

Энэ гайхамшигт үйл явдал бол Мормоны Номын хамгийн оргил хэсэг билээ. Сайн мэдээний бүх “сайхан мэдээ” хүн бүрийг Аврагчид ирж, Түүний Цагаатгалын адислалуудыг хүлээн авахад урихаар “нигүүлслийн мутраа” [Алма 5:33] энэрэнгүйгээр сунгах Түүний энэ дүр төрхөд агуулагддаг.

… Есүс нифай үндэстний шавь бүрийг Өөрийн шархан дээр хүрч үзэхэд урьсан шиг, хүн нэг бүрийн төлөө таныг эсвэл намайг дэлхий дээрх цорын ганц хүн юм шиг бидний төлөө үхсэн билээ. Тэрээр биднийг Өөр дээр нь ирж, Цагаатгалынх нь гайхамшигт адислалуудаас хүртэх урилгыг өгдөг. (Жэралд Коссэй, “Амьд Христийн амьд гэрч,” 2020 оны 4-р сарын Ерөнхий чуулган)

Дараах асуултад хэд хэдэн хариулт урь. Суралцагчид мөн Есүс Христийн тухай гэрчлэлтэй болоход юу тусалсан талаар хуваалцаж болно. Мөн гэрчлэлтэй болоход юу тусалсан тухай хуваалцах талаар бодож үз.

• Бидэнд Есүс Христ бол дэлхийн Аврагч гэсэн гэрчлэлээ олж авах ямар ямар арга зам байна вэ?

Шаардлагатай бол хүмүүс хэрхэн Аврагчийн тухай гэрчлэлтэй болсныг харуулсан судраас эсвэл ерөнхий чуулганы үгээс хуваалц. Худаг дээрх самари бүсгүй (Иохан 4:1–29), Лемонай хааны эцэг (Алма 22:1–18), Залуу Алма (Алма 36:5–23) зэргийг оруулсан судруудын жишээ.

“Хосанна!”

Нифайчуудад Аврагчтай хийсэн хувийн харилцаа нь гүнзгий нөлөөлсөн.

3 Нифай 11:16-17-ийг уншаад, амилсан Их Эзэнд тохиосон туршлагынхаа тухай олон түмэн хэрхэн хариулсныг олж мэд.

Хосанна гэдэг нь “одоо авраач”,“биднийг аварна уу” гэсэн утгатай еврей үг гэдгийг мэдэх нь тустай байж болно. Энэ нь сударт магтаал, гуйлтын илэрхийлэл болгон хэрэглэгддэг бөгөөд бүх цаг үед Мессиагийн баяр болж ирсэн (Библийн толь бичиг, “Хосанна”; Судруудын удирдамж, “Хосанна,” scriptures.ChurchofJesusChrist.org үзнэ үү).

Дараах нь танд Аврагчийн талаарх сэтгэгдлээ илэрхийлэх эсвэл Түүний тухай гэрчлэлээ хуваалцсан бусад хүний талаар судлах цаг гаргахад тусална.

Дараах үйл ажиллагаа нь суралцагчдад Есүс Христийн тухай гэрчлэлээ илэрхийлэх эсвэл бусдын гэрчлэлээс суралцахад нь туслах зорилготой юм. Суралцагчдад үйл ажиллагааны явцад тэдгээрт хандах боломжтой сонголтуудыг харуул. Суралцагчдын хэрэгцээг илүү сайн хангахын тулд сонголтуудыг тохируулж болно.

1. Есүс Христийн тухай хувийн гэрчлэлээ хуваалцаж, үүнээс тус болно гэж бодож байгаа хүндээ захидал бич.

2. Есүс Христ гэж хэн бэ, Тэр чиний төлөө юу хийсэн тухай өөрийн мэдрэмжийг дүрсэлсэн судрын шүлгийг эсвэл дууллыг сонго. Энэ шүлэг эсвэл дуулал яагаад таны хувьд утга учиртай болîõ талаар товч тайлбар бич.

3. Есүс Христийн талаарх өөрийн мэдрэмжийг дүрсэлсэн шүлэг эсвэл дууны үг бич.

4. Есүс Христийн тухай өөр хүний гэрчлэлийг судал. Юу судалсан, тэр цэдэг танд ямар сэтгэгдэл төрүүлснийг дүгнэ. Жишээнд Алма 26:1–16, 35–37-г эсвэл “Амьд Христ: Төлөөлөгчдийн гэрчлэл” (ChurchofJesusChrist.org)-ийг оруулж болно.

Өмнөх үйл ажиллагаанд хийсэн зүйлээ хуваалцахад бэлэн цөөн хэдэн суралцагчийг урь. Тэднийг оролцох хүсэлтэй байгаагийнх нь төлөө таларх. Ярилцсан үнэнийхээ талаар гэрчилж, суралцагчдыг Есүс Христийн талаарх гэрчлэлээ олж авах эсвэл бэхжүүлэхийн тулд үргэлжлүүлэн хүчин чармайлт гаргахад урамшуулан дэмж.

Тайлбар ба нөхцөл байдлын талаарх мэдээлэл

3 Нифай 11:14 Би хэрхэн Аврагч “дээр ирэх” вэ?

Ерөнхийлөгч Рассэлл М.Нэлсон ийн заасан:

Ерөнхийлөгч Рассэлл М.Нэлсон

Христэд ирэх сонголт нь хаана амьдардгаас хамаардаггүй бөгөөд энэ нь хувь хүний амлалтын асуудал юм. Сүмийн бүх гишүүн хаана байгаагаасаа үл хамааран сургаал, ёслол, санваарын түлхүүр, сайн мэдээний адислалуудаас хүртэх боломжтой. (Russell M. Nelson, “The Future of the Church: Preparing the World for the Savior’s Second Coming,” Ensign, Apr. 2020, 15)

Есүс Христийн талаарх хувийн гэрчлэл миний амьдралд хэрхэн нөлөөлж чадах вэ?

Арван хоёр төлөөлөгчийн чуулгын ерөнхийлөгч М.Рассэлл Баллард ийн заасан.

Ерөнхийлөгч М.Рассэлл Баллард

Энгийнээр хэлбэл, “Гэрчлэл--жинхэнэ гэрчлэл бол Сүнснээс төрж, Ариун Сүнсээр баталгаажиж, хүмүүсийн амьдралыг өөрчилдөг юм.” Энэ нь таныг хэрхэн бодох, юу хийхийг өөрчилдөг. Энэ нь таны хэлдэг зүйлийг өөрчилдөг. Энэ нь таны тавьсан гол чиглэл, хийх сонголт бүрд нөлөөлдөг. Есүс Христийн сайн мэдээний талаар бодитой, мөнхийн гэрчлэлтэй байх нь “сүнслэг байдлаараа Бурханаас төр[өх],…“түүний дүр төрхийг царай төрхөндөө хүлээж ав[ах]” мөн “хүчит өөрчлөлтийг зүрх сэтгэлдээ мэдрэх явдал юм (Алма 5:14). (M. Russell Ballard, “Pure Testimony,” Liahona, Nov. 2004, 40)

Аврагчийн амилсан бие дэх шарх, сорви нь юугаараа чухал вэ?

Арван хоёр төлөөлөгчийн чуулгын ахлагч Гэррит В.Гонг ийн заасан.

Ахлагч Гэррит В.Гонг

Аврагч маань биднийг үргэлж санадаг шиг Өөрийг нь санахыг бидэнд уриалдаг.

Шинэ тивд амилсан Аврагч маань тэнд байсан хүмүүсийг нэг нэгээрээ ирж, хавирган тал руу нь гараа хийж, гар, хөлөн дэх хадаасны ормуудаа тэмтэрч үзэхэд урьсан.

… Аврагчийн төгс, амилсан биед хажууг нь хатгасан шарх, мөн гар, хөлөн дэх хадаасны ором яагаад байгааг бодож үзээрэй.

Түүхийн зарим цаг үед хүмүүсийг цовдолж цаазалдаг байсан. Гэвч бидний Аврагч, Есүс Христ л зөвхөн цэвэр хайрын сорвио хадгалан, биднийг тэвэрдэг. Зөвхөн Тэр л загалмайд өргөгдсөнөөр бид бүгдийг нэрээр нь дуудан Өөртөө авчрах бошиглолыг биелүүлдэг [3 Нифай 27:14-ийг үзнэ үү].

Аврагч маань:

“Тийм ээ, тэд мартаж болох юм, гэвч би чамайг мартах нь үгүй.”

Болгоогтун, би та нарыг гарынхаа алган дээр сийлсэн” (Исаиа 49:15). (Гэррит В.Гонг, “Түүнийг үргэлж сана,” 2016 оны 4-р сарын Ерөнхий чуулган)

Нэмэлт суралцах үйл ажиллагаа

Нэг нэгээр нь номлох

3 Нифай 11:12–15-ыг судалж байхдаа хүмүүст нэг нэгээр нь тохинуулж байсан Аврагчийн жишээг онцлон авч үз. Та суралцагчдыг Есүсийн хувьчлан тохинуулсан тухай судрын нэмэлт цэдгийн талаар бодоход урьж болно. Суралцагчдаас Есүс Христ өнөөдөр бидэнд хэрхэн нэг нэгээр нь үргэлжлүүлэн тохинуулж байгаа талаар бодохыг хүс. Суралцагчдыг тусламж хэрэгтэй хүмүүст нэг нэгээр нь туслах Аврагчийн жишээг дагахад урамшуул.

“Гэтэлгэгч минь амьдыг би мэднэ”

Та Есүс Христийн тухай хувийн гэрчлэлтэй болохын ач холбогдлын талаар ярилцахдаа “Гэтэлгэгч минь амьдыг би мэднэ” (Дуулал, д. 136) дууллыг дуулах эсвэл сонсох нь тустай байж болох юм. Та энэ дууллын үгийг бичсэн Самуел Медлигийн туршлагыг дүрсэлсэн дараах түүхийг хуваалцаж болно.

1759 онд Самуэл Британийн Тэнгисийн цэргийн хүчинд алба хааж байхдаа хөлөө хүнд шархдуулжээ. Эмч хөлийг нь тайрах шаардлагатай гэж хэлэв. Шашин шүтдэггүй байсан Самуел шөнөжингөө Есүс Христийн тухай сургаалыг тунгаан бодож, амь нас, хөлийг нь аврахын төлөө залбирчээ. Маргааш өглөө нь Самуелын хөл маш их сайжирсан тул тайрах шаардлагагүй болсон байв. Самуел амьдралынхаа үлдсэн хугацааг Христэд үнэнч итгэгчийн хувиар өнгөрүүлсэн (“Гэтэлгэгч минь амьдыг би мэднэ,” What’s New with The Tabernacle Choir [blog], Feb. 12, 2014, thetabernaclechoir.org-г үзнэ үү).