3 Nefia 12:1–16

“Hotahiana ianareo”

Te hitahy antsika ny Ray any An-danitra sy i Jesoa Kristy. Afaka mahazo antoka isika fa rehefa arahintsika ny torohevitr’Izy ireo, dia handray ny fitahian’Izy ireo araka ny fotoanan’Izy ireo sy ny fomban’Izy ireo isika. Rehefa nampianatra ny Nefita i Jesoa dia nanambara ny maro amin’ireo fitahiana azontsika raisina Izy. Ity lesona ity dia afaka manampy anao hiomana handray ireo fitahiana noresahin’ny Mpamonjy rehefa miezaka manaraka ny toroheviny ianao.

Mifantoka amin’ny Ray any An-danitra sy i Jesoa Kristy amin’ny maha-loharanon’ny fitahiana antsika Azy ireo. Rehefa mandalina ny soratra masina sy mifanakalo hevitra momba ireo fitahiana nampanantenaina, dia hamafiso fa ny Ray any An-danitra sy i Jesoa Kristy no loharanon’ireo fitahiana ireo.

Fanomanana ny mpianatra: Mba hanampiana amin’ny fanomanana ny fon’ny mpianatra handalina ny toritenin’ny Mpamonjy ao amin’ny 3 Nefia, izay tena mitovitovy amin’ny Toriteniny teo an-tendrombohitra, dia hevero ny hanasa azy ireo hisaintsaina ity teny nambaran’ny Filoha Joseph Fielding Smith (1876–1972) ity. Nilaza izy fa ny toriteny teo an-tendrombohitra no “[toriteny] lehibe indrindra natao hatramin’izay raha ny fahafantarantsika azy” (Teachings of Presidents of the Church: Joseph Fielding Smith [2013], 234).

Sahanasa fianarana azo atao

Sambatra

Mba hanampiana ny mpianatra hieritreritra ny tena dikan’ny hoe sambatra, dia hevero ny hanao sarina fonon-gazetiboky tsotsotra eny amin’ny solaitrabe. Omeo anarana toy ny hoe Gazetibokin’ny fahombiazan’izao tontolo izao ilay gazetiboky ary soraty ho anaran’ny lahatsoratra asongadin’ilay laharana ny hoe “Ny olona dimy voatahy indrindra tamin’ity taona ity.”

Asao ho eny amin’ny solaitrabe ny mpianatra ka hanoratra fitahiana vitsivitsy eo amin’ny fonon’ilay gazetiboky, izay antenain’izy ireo fa hifantohan’ilay lahatsoratra.

Manaova fonon-gazetiboky mitovy amin’izany miaraka amin’ilay lahatsoratra asongadina eo amin’ny ilan’ilay solaitrabe, saingy amin’ity indray mandeha ity dia omeo anarana hoe Liahona ilay gazetiboky. Asao hanoratra fitahiana vitsivitsy izay antenain’izy ireo fa hifantohan’ny lahatsoratr’ilay gazetibokin’ny Fiangonana ny mpianatra.

• Inona no fitahiana manokana antenainao fa hifantohan’ilay lahatsoratra mba ho mason-tsivana amin’ny fisafidianana ireo olona?

Alaovy sary an-tsaina amin’izay ny lahatsoratra iray ao amin’ny gazetiboky Liahona mitovy lohateny amin’izany.

• Inona no fitahiana manokana antenainao fa horesahin’ilay lahatsoratra ho fitahiana lehibe indrindra azon’ny rehetra raisina?

• Nahoana, araka ny eritreritrao, no mampianatra antsika hanome lanja ambony indrindra ireo fitahiana tsy mitovy amin’izay katsahin’ny maro eo amin’izao tontolo izao ny Mpamonjy sy ny Fiangonana?

Ao amin’ny 3 Nefia 12–14 i Jesoa Kristy dia nampianatra ny Nefita toriteny iray tena mitovitovy amin’ny Toriteniny teo an-tendrombohitra ao amin’ny Testamenta Vaovao. Nilaza ny Filoha Joseph Fielding Smith (1876–1972) fa ny toriteny teo an-tendrombohitra no “[toriteny] lehibe indrindra natao hatramin’izay raha ny fahafantarantsika azy” (Teachings of Presidents of the Church: Joseph Fielding Smith [2013], 234).

Ankehitriny, rehefa mandalina ny ampahany amin’ny toritenin’ny Mpamonjy nantsoina hoe Fahasambarana ianao, dia hanana fahafahana hahafantatra ireo fomba irìn’ny Ray any An-danitra sy i Jesoa Kristy hitahiana anao. Ny Filoha Harold B. Lee (1899–1973) dia niresaka ireo Fahasambarana nozarain’ny Mpamonjy ho “lalàm-panorenana hahazoana fiainana tonga lafatra” ary nanazava fa “tamin’ny toriteniny teo an-tendrombohitra ny Tompo dia nanome antsika karazana fanambarana ny toetrany manokana, izay tonga lafatra, … ary tamin’ny fanaovana izany dia nanome antsika drafitra ho an’ny fiainantsika manokana” (Decisions for Successful Living [1973], 56–57). Rehefa mandalina ianao, dia saintsaino hoe nahoana ireo fitahiana atolotr’i Kristy ao amin’io toriteny io no manan-danja lehibe kokoa noho ireo fitahiana rehetra azon’izao tontolo izao omena.

Ireo Fahasambarana nambara tany Amerika fahiny

Vakio ny 3 Nefia 12:1–12 ary asio marika ny teny hoe “sambatra” sy ny fitahiana rehetra hitanao notanisain’ny Mpamonjy ao amin’ireo andininy ireo. Mariho fa ny teny hoe “sambatra” ao amin’ireo andininy ireo dia midika hoe faran’izay manam-bitana na mahita fitia amin’ Andriamanitra.

Hevero ny hanasa ny mpianatra hanisa hoe impiry izy ireo no nahita ny teny hoe “sambatra” ary hizara ireo fitahiana hitan’izy ireo.

• Rehefa dinihina ireo fitahiana rehetra notanisain’ny Mpamonjy ao amin’ireo andininy ireo dia inona no lazain’izany aminao momba Azy na ny Rainy?

Fahamarinana iray azontsika ianarana amin’io andalan-tsoratra masina io ny hoe ny Ray any An-danitra sy i Jesoa dia faly tokoa mitahy antsika rehefa miezaka manaraka ny torohevitr’Izy ireo isika.

Vakio ny 3 Nefia 12:1–2 ary hevero ny hanisy marika ny zavatra angatahin’ny Mpamonjy hataontsika raha mikatsaka ireo fitahiana atolotr’Izy sy ny Rainy antsika isika.

Hevero ny hanasa ny mpianatra hamaly ireto fanontaniana manaraka ireto ao amin’ny diary fandalinan’izy ireo alohan’ny hanasana mpianatra manolo-tena hizara ny valintenin’izy ireo amin’ny iray kilasy. Azon’ny mpianatra atao ihany koa ny mizara amina namana iray na amina vondrona kely.

• Nahoana, araka ny eritreritrao, no mitahy ireo izay “mampandry sofina amin’ny tenin’[ireo] roa ambin’ny folo izay nosafidi[ny]” Andriamanitra? (3 Nefia 12:1).

• Ahoana no nitahian’ Andriamanitra anao na ny olon-kafa fantatrao noho ny fihainoana ny tenin’ny mpaminany sy ny Apôstôly?

Raha misy fotoana, dia asao ny mpianatra hijery lahateny tamina fihaonamben’ny Fiangonana maneran-tany vao haingana nataona mpikambana ao amin’ny Fiadidiana Voalohany na ny Kôlejin’ny Apôstôly Roambinifolo ary hizara ireo fomba izay heverin’izy ireo fa itahiana antsika noho ny fihainoana ireo fampianarana manokana izay hitan’izy ireo.

Mikatsaka fitahiana

Alohan’ny hamakian’ny mpianatra ireto andininy manaraka ireto, dia hevero ny hanao tsanganana roa eny amin’ny solaitrabe ahitana ireo fitahiana avy amin’ireo andininy voatanisa ao amin’ny tsanganana iray ary ireo asa na fepetra izay mitarika amin’ny fahazoana ireo fitahiana voatanisa amina filaharana kianjoanjo ao amin’ilay tsanganana hafa ireo. Asao ny mpianatra hiezaka hampifandray ireo fitahiana amin’ireo asa na toe-javatra misy azy ireo tsirairay avy. Avy eo dia azon’izy ireo ampiasaina ny 3 Nefia 12:3–12 mba hanamarinana ny valintenin’izy ireo.

Vakio indray ny 3 Nefia 12:3–12 ka amin’ity indray mandeha ity izany dia hitadiavana ny hoe inona no fepetra nampifandraisin’ny Mpamonjy tamin’ny fitahiana tsirairay. Hevero ny hanisy marika ireo fepetra ireo amin’ny fomba hafa noho ny nanisianao marika ireo fitahiana, toy ny fampiasana loko hafa na ny fanisiana faribolana fa tsy fanasongadinana.

Mba hahitana hevitra hafa amin’ny fampianarana ny Fahasambarana, dia jereo ny sahanasa “tabilaon’ny Fahasambarana” hita ao amin’ny “Sahanasa fianarana fanampiny” ao amin’ity lesona ity.

Misafidiana fitahiana iray avy amin’ireo andininy ireo izay tianao ho azo. Mariho ilay asa na fepetra izay mitarika mankany amin’izany fitahiana izany. Halalino izany asa na fepetra izany, amin’ny alalan’ny fampiasana ireo loharanom-pitaovana misy toy ny Torolalana ho an’ny Soratra Masina, ny application Médiatheque de l’évangile, na ireo fanovozan-kevitra eny ambanin’ny pejy.

Hevero ny hanasa ny mpianatra handehandeha eran’ny trano sy hitady ireo olona hafa izay nandalina andalan-tsoratra masina hafa ary hizara ny valintenin’izy ireo amin’ireto fanontaniana manaraka ireto.

• Inona no nianaranao momba ny zavatra takina amin’ireo izay maniry ireo fitahiana nohalalininao?

• Ahoana no nanehoan’ny Mpamonjy izany asa na fepetra izany? Ahoana no ahafahan’ny ohatra nasehony manampy anao hahatakatra tsara kokoa ny fomba ahafahanao mikatsaka izany fitahiana izany?

Tsarovy fa noho ny fitiavan’ny Ray any An-danitra antsika, dia hitahy antsika araka ny fotoany sy amin’ny fombany Izy. (Jereo ny Fotopampianarana sy Fanekempihavanana 88:64.)

Raha tsapanao fa afaka mampiasa fampaherezana fanampiny mba hahatokiana ny Tompo sy ny fotoanany ny mpianatrao, dia mety ho azonao atao ny mizara ny teny nambaran’ny Filoha Dallin H. Oaks ao amin’ny fizaràna hoe “Fanazavana sy fampahalalana avy amin’ny zava-miseho”.

Rehefa avy nahita fitahiana iray irìnao ianao ary nandalina ny fomba hampidirana izany ho eo amin’ny fiainanao, dia manaova drafitra mikasika ny fomba ahafahanao mikatsaka izany fitahiana izany. Mety hanampy ireto fanontaniana manaraka ireto:

• Inona no zavatra voafaritra tsara azonao atao mba hikatsahana izany fitahiana izany?

• Rahoviana ianao no mikasa hanomboka?

• Inona avy no sakana mety hisy ary ahoana no ahafahanao mandresy azy ireny?

Mety hanampy raha zaraina ny fomba nahitanao ireo fitahiana ireo teo amin’ny fiainanao sy ny fijoroana ho vavolombelona anananao momba ny fanirian’ny Mpamonjy hitahy antsika.

Fanazavana sy fampahalalana avy amin’ny zava-miseho

Nahoana no tsy amin’ny fomba iandrasantsika azy foana no ahatongavan’ireo fitahian’ Andriamanitra?

Nampianatra toy izao ny Filoha Dallin H. Oaks ao amin’ny Fiadidiana Voalohany:

Ny finoana dia midika hoe fahatokiana—fahatokiana ny sitrapon’ Andriamanitra, fahatokiana ny fomba fanaovany zavatra, ary fahatokiana ny fandaharam-potoany. …

Tsy afaka ny hanana finoana marina ny Tompo isika raha tsy manana fahatokisana tanteraka koa ny sitrapon’ny Tompo sy ny fotoany. (Dallin H. Oaks, “Timing,” Ensign, Oct. 2003, 12)

Inona no afaka manampy ahy hahatakatra tsara kokoa ny Fahasambarana?

Ny Fahasambarana

Toko sy andininy	Toetra
Toko sy andininy 3 Nefia 12:3	Toetra Ory am-panahy. Manetry tena, na “miaiky amim-pankasitrahana ny fiankinan’ny [tena] amin’ny Tompo—mahatakatra fa mila ny fanohanany tsy tapaka [ny tena]. Ny fanetrentena dia fanekena fa fanomezana avy amin’ Andriamanitra ireo talentan[tsika] sy ny fahaiza-manao ananan[tsika]” (True to the Faith: A Gospel Reference [2004], 86).
Toko sy andininy 3 Nefia 12:4	Toetra Mitoloko. Mahatsapa sy maneho alahelo mikasika ny zavatra anankiray. Ny olona anankiray dia mety ho ory noho ireo fitsapana eto amin’ny fiainana an-tany izay iainany na iainan’ny hafa. Mety ho ory ihany koa ny olona iray noho ny alahelo vokatry ny fahotana.
Toko sy andininy 3 Nefia 12:5	Toetra Malemy fanahy. “Matahotra an’ Andriamanitra, marin-toetra, manetry tena, azo ampianarina, ary manam-paharetana amin’ny fahoriana” (Torolalana ho an’ny Soratra Masina, “Halemem-panahy,” scriptures.ChurchofJesusChrist.org).
Toko sy andininy 3 Nefia 12:6	Toetra Noana sy mangetaheta ny fahamarinana. Manana hetaheta lehibe hahafantatra sy hanao ny sitrapon’ Andriamanitra.
Toko sy andininy 3 Nefia 12:7	Toetra Miantra. “Mangoraka, manaja, mamela heloka, malemy fanahy, ary manana faharetana, na dia fantatsika aza ny fahalemen’ny hafa” (Miorim-paka ao amin’ny Finoana, 103).
Toko sy andininy 3 Nefia 12:8	Toetra Madio am-po. Anisan’ireo izay “tia ny Tompo, sy mikatsaka ny hanaraka Azy sy ny hitandrina ny didiny, ary miezaka miaina fiainana mendrika sy maharitra amim-pahatokiana hatramin’ny farany. Ny madio am-po dia ireo izay mahafehy ny eritreriny mba tsy hampirona azy amin’ny fihevitra sy fihetsika tsy mendrika” (Sheldon F. Child, “Words of Jesus: Chastity,” Liahona, Jan. 2003, 44).
Toko sy andininy 3 Nefia 12:9	Toetra Mpampihavana. “[M]anampy ny olona hahita marimaritra iraisana raha ny hafa kosa mahita fahasamihafana” (Henry B. Eyring, “Mianatra ao amin’ny fisoronana,” Liahona, mey 2011, 63).
Toko sy andininy 3 Nefia 12:10–12	Toetra Enjehina noho ny anaran’i Kristy. Vonona hankatò sy hiaro an’i Jesoa Kristy sy ny fampianarany, na dia mety hesoesoina na hatao tsinontsinona noho ny fanaovana izany aza isika.

Sahanasa fianarana fanampiny

“Sambatra ny mpampihavana”

Mba hanampiana ny mpianatra hahatakatra tsara kokoa ny dikan’ny hoe mpampihavana, dia hevero ny hanome azy ireo dimy minitra handalinana ny lahateny hoe “Manaraka an’i Jesoa: mpampihavana“ Nataon’ny Loholona Neil L. Andersen ao amin’ny Kôlejin’ny Apôstôly Roambinifolo. Avy eo dia asao hizara ny zavatra ianaran’izy ireo momba ny maha-mpampihavana izy ireo.

Tabilaon’ny Fahasambarana

Omeo tahadikan’ny tabilaon’ny Fahasambarana hita ao amin’ny fizaràna hoe “Fanazavana sy fampahalalana avy amin’ny zava-miseho” ao amin’ity lesona ity ny mpianatra tsirairay. Zarao ho vondrona kely ny mpianatra ary asaovy misahana ny iray na ny roa amin’ireo Fahasambarana hita ao amin’ny tabilao. Asao hanomana famelabelarana fohy momba ny Fahasambarana nasaina nosahaniny ny mpianatra. Ny famelabelarana ataon’izy ireo dia mety hahitana ireo andininy nasaina nosahaniny, fampahalalana avy amin’ilay tabilao, ary hevi-baovao hafa azon’izy ireo rehefa mandalina sy misaintsaina ny Fahasambarana nasaina nosahaniny izy ireo. Azon’ny mpianatra atao ihany koa ny mizara ohatra avy amin’ny fiainan’ny Mpamonjy mahakasika ny fepetra sy ny toetra voafaritra ao amin’ny andininy nomena azy ireo.

“Aoka ny fahazavanareo hamiratra”

Mampisehoa sarin-tsira sy tanàna ary labozia mirehitra. Anontanio ny mpianatra ny ifandraisan’ny tsirairay amin’ireo amin’ny mpikamban’ny Fiangonana. Asao hamaky ny 3 Nefia 12:13–16 ny mpianatra mba hahitana valiny iray.

Apetraho amin’ny mpianatra ireto fanontaniana manaraka ireto: Iza amin’ireo fampitahana ireo no manan-danja indrindra aminao? Oviana no nanampy anao hitia sy haniry hahafantatra kokoa ny Rainao any An-danitra ny fahitana ny asa tsaran’ny olona iray?

Mba hanampiana ny mpianatra hahatakatra feno kokoa ny hoe inona ilay fahazavana izay tokony havelan’izy ireo hamiratra, dia asao izy ireo hampifandray ny andininy 16 amin’ny 3 Nefia 18:24 sy hizara ny zavatra ampitomboan’izany andininy izany ny fahatakaran’izy ireo momba ny fahazavantsika.