3 Nefia 18:1–14

“Ho fahatsiarovana Ahy”

Manana fahafahana tsy tapaka handray ny fanasan’ny Tompo isika. Ao amin’ny 3 Nefia 18, i Jesoa Kristy dia nampianatra ny fomba ahafahan’ny fandraisana ny fanasan’ny Tompo mitahy ny fiainantsika sy nampianatra ny fomba fanatanterahana io ôrdônansy io. Ity lesona ity dia afaka manampy anao hiaina zavatra manan-danja amin’ny fahatsiarovana ny Mpamonjy rehefa mandray fanasan’ny Tompo ianao.

Manampy ny mpianatra hahita ny lanjan’ireo fahamarinan’ny filazantsara. Mety manana olana amin’ny fahitana ny fifandraisan’ny filazantsara amin’ny fiainan’izy ireo isan’andro ny mpianatra sasany. Katsaho am-bavaka ny fomba hanampiana ny mpianatra hahatsapa fa ny zavatra ianaran’izy ireo dia manan-danja sy ilaina amin’ny toe-javatra misy azy ireo sy nyfanontanian’izy ireo ary ny zavatra ilain’izy ireo manokana.

Fanomanana ny mpianatra: Asao hisaintsaina ny lanjan’ny zavatra iainan’izy ireo amin’ny fandraisana ny fanasan’ny Tompo ny mpianatra. Amporisiho ny mpianatra hisaintsaina izay azon’izy ireo atao mba hanatsarana izany.

Ireo sahanasa fianarana azo atao

Fifandraisana matanjaka

Ity hevitra manaraka ity dia afaka manampy ny mpianatra hieritreritra momba ny hoe miorina amin’ny inona ny fifandraisana matanjaka. Io dingam-pieritreretana io dia afaka manampy ny mpianatra hisaintsaina ny fifandraisan’izy ireo amin’ny Mpamonjy sy handinika ireo fomba hanakaikezana Azy kokoa. Ny fomba iray anaovana izany dia amin’ny alalan’ny fandraisana ny fanasan’ny Tompo.

Mieritrereta olona maromaro izay tsapanao fa tena akaiky anao sy anananao fifandraisana matanjaka.

• Inona no nataonao na nataon’izy ireo mba hanatanjahana ireny fifandraisana ireny?

Eritrereto amin’izay hoe ahoana ny fahatsapanao ny hoe akaiky ny Mpamonjy.

• Inona araka ny eritreritrao no afaka manampy anao hanatanjaka ny fifandraisanao amin’ny Mpamonjy?

Rehefa mandalina ianao anio, dia asao ny Fanahy Masina hampianatra anao ny fomba hanakaikezana kokoa ny Mpamonjy sy hanatanjahana ny fifandraisanao Aminy.

Nanorina ny fanasan’ny Tompo i Jesoa Kristy

Feno fangorahana ny olona ny Mpamonjy rehefa tsapany ny fanirian’izy ireo mba hijanonany elaela kokoa miaraka amin’izy ireo (jereo ny 3 Nefia 17:1–6). Rehefa avy nitsodrano ny ankizy sy ny marary ary ny ory ny Mpamonjy, dia nanome fomba iray ahafahan’ny olona manana mandrakariva ny Fanahiny miaraka amin’izy ireo Izy.

Vakio ny 3 Nefia 18:1–11 ary tadiavo ny zavatra nataon’ny Mpamonjy.

Manasà vondrona mpianatra iray hamaky ny 3 Nefia 18:1–7 ary vondrona iray hafa hamaky ny 3 Nefia 18:8–11. Asao hieritreritra fanontaniana ananan’izy ireo momba ny hevitr’ireo andininy novakin’izy ireo na ny ôrdônansin’ny fanasan’ny Tompo ny mpianatra.  topics.ChurchofJesusChrist.org

Ireto fanontaniana manaraka ireto dia afaka manampy amin’ny fifanakalozan-kevitra: Inona, araka ny eritreritrao, no tsapan’ireo olona rehefa nandray ny fanasan’ny Tompo izy ireo? Nahoana? Mety hampiova ny zavatra hiainanao toy ny ahoana raha ny Mpamonjy no nikarakara ny fanasan’ny Tompo ho anao?

• Inona no nianaranao momba ny fandraisana ny fanasan’ny Tompo avy amin’ireo fampianaran’ny Mpamonjy?

• Inona no ampanantenain’ny Mpamonjy ao amin’ny vavaky ny fanasan’ny Tompo raha mahatsiaro Azy mandrakariva isika?

Mety ho azonao heverina ny hanisy marika ny fitsipika ao amin’ny 3 Nefia 18:7, 11 fa rehefa mandray ny fanasan’ny Tompo sy mahatsiaro mandrakariva ny Mpamonjy isika, dia hanana ny Fanahiny miaraka amintsika.

Rehefa milaza ny fananantsika ny Fanahiny miaraka amintsika i Jesoa Kristy dia ny fanomezana ny Fanahy Masina no tiany lazaina izay.

• Inona avy ireo fomba sasantsasany ahafahantsika mahatsiaro mandrakariva ny Mpamonjy eo amin’ny fiainantsika isan’andro? Ahoana no ahafahan’ny fahatsiarovana mandrakariva ny Mpamonjy manampy antsika hanana ny Fanahy Masina miaraka amintsika?

• Ahoana no ahafahan’ny fananana ny Fanahy Masina miaraka aminao mitahy ny fiainanao amin’izao fotoana izao?

Ny zavatra iainantsika amin’ny fanasan’ny Tompo

Hevero ny hanoratra ireto fanontaniana ireto amina tsapan-kevitra eny amin’ny solaitrabe na amina ravin-taratasy mitokana. Azon’ny mpianatra atao ny mamaly ilay tsapan-kevitra ao amin’ny diariny; tsy hozaraina ny valintenin’izy ireo.

Eritrereto ny fomba ahafahan’ny fifandraisanao amin’ny Mpamonjy mihamatanjaka raha miaina zavatra manan-danja kokoa amin’ny fandraisana ny fanasan’ny Tompo ianao. Valio amin’ny hoe “mandrakariva”, “indraindray”, “mahalana” na “tsia mihitsy” ny fanambarana tsirairay.

1. Maka fotoana hiomanana amin’ny fandraisana ny fanasan’ny Tompo alohan’ny fotoam-piangonana aho.

2. Mandritra ny fanasan’ny Tompo dia miezaka mahatsiaro an’i Jesoa Kristy aho.

3. Ny zavatra iainako amin’ny fandraisana ny fanasan’ny Tompo dia miantraika amin’ny fomba anaovako zavatra mandritra ny herinandro.

Ity sahanasa manaraka ity dia afaka manampy ny zatovo hamorona fomba manan-danja hahatsiarovana an’i Kristy mandritra ny fanasan’ny Tompo. Apetraho eny amin’ny solaitrabe ity tabilao ity ary asao ny mpianatra hanoratra valiny eo amin’izany. Mety efa manana hevitra amin’ny zavatra manampy azy ireo hahatsiaro ny Mpamonjy ny mpianatra. Angataho ny mpianatra hizara ny zavatra izay efa ataon’izy ireo mba hanampiana amin’ny famoronan-kevitra.

Azon’ny mpianatra atao ihany koa ny mameno tabilao iray ho an’ny tenany manokana ao amin’ny diary fandalinany. Azon’izy ireo atao ny maka sary ny tabilaon’izy ireo rehefa avy eo ho fampahatsiahivana ho azy ireo aminny fotoana handraisan’izy ireo ny fanasan’ny Tompo manaraka.

Zavatra iainana manan-danja kokoa mandritra ny fanasan’ny Tompo

• Inona no tiako hotsaroana momba an’i Jesoa Kristy?

  Diniho ireto manaraka ireto:

  • Ny zavatra niaretany

  • Ny zavatra nataony ho ahy sy ny olona hafa fantatro

• Ahoana no ahafahako miomana ho amin’ny fandraisana ny fanasan’ny Tompo?

• Inona no azoko atao mandritra ny fanasan’ny Tompo mba hahatsiarovana an’i Jesoa Kristy?

Ireo fampanantenana amin’ny fandraisana ny fanasan’ny Tompo

Vakio ny 3 Nefia 18:12–14, ary tadiavo ny zavatra nampanantenain’ny Mpamonjy ireo izay mahatsiaro Azy sy mandray ny fanasan’ny Tompo.

• Inona araka ny eritreritrao no dikan’ny hoe miorina eo ambonin’ny vatolampin’ny Mpamonjy?

  Raha mila fanampiana amin’ny fahatakarana ny dikan’ny hoe miorina eo ambonin’ny vatolampin’ny Mpamonjy ny mpianatra, dia azonao atao ny manazava fa izany dia midika hoe manao fanekempihavanana Aminy sy mitandrina izany isika, mikatsaka ny hanaraka ny ohatra nasehony ary, vokatr’izany, mianoka ireo fitahian’ny famindram-pony sy ny heriny.

• Ahoana no ahafahan’ny fandraisana ny fanasan’ny Tompo manampy antsika hiorina eo amin’ny vatolampin’ny Mpamonjy?

• Inona no azonao atao mba hahatonga ny fandraisana ny fanasan’ny Tompo hanan-danja kokoa isan-kerinandro?

Mijoroa ho vavolombelona momba ny fomba ahafahan’ny fanasan’ny Tompo manampy antsika hanorina ny fiainantsika eo ambonin’ny vatolampin’ny Mpamonjy. Hevero ny hizara zavatra iray ataonao mba hahatonga ny fandraisana ny fanasan’ny Tompo hanan-danja aminao? Angataho ny mpianatra hisaintsaina sy hizara ny hoe inona avy no fitahiana mety horaisin’izy ireo raha mahatsiaro ny Mpamonjy eo am-piomanana ny handray ny fanasan’ny Tompo sy eo am-pandraisana izany izy ireo.

Fanamarihana sy fampahalalana avy amin’ny zava-miseho

3 Nefia 18:7, 11. Inona no afaka hampitombo ny lanjan’ny zavatra iainako mandritra ny fandraisako ny fanasan’ny Tompo?

Nampianatra toy izao ny Loholona Peter F. Meurs ao amin’ny Fitopololahy:

Manasa antsika rehetra aho mba hisaintsaina fomba dimy mba hampitomboana ny hery sy ny fiantraikan’ny fandraisana anjara tsy tapaka amin’ireo ôrdônansy masin’ny fanasan’ny Tompo, dia ôrdônansy iray izay afaka manampy antsika ho tonga masina.

1. Miomàna mialoha. …

2. Tongava mialoha. …

3. Hirao sy hianaro ireo tonon-kira ao amin’ny hira ho an’ny fanasan’ny Tompo. …

4. Mandraisa anjara ara-panahy amin’ireo vavaky ny fanasan’ny Tompo. …

5. Saintsaino sy tsarovy Izy rehefa zaraina ireo tandindon’ny fanasan’ny Tompo. …

Mijoro ho vavolombelona aho momba ireo fitahiana sesehena ho antsika rehefa mampitombo ny fiomanantsika sy ny fandraisantsika anjara ara-panahy amin’ny ôrdônansin’ny fanasan’ny Tompo isika. (Peter F. Meurs, “Afaka manampy antsika ho tonga masina ny fanasan’ny Tompo,” Liahona, nôv. 2016)

Mba hahafantarana ny fahafahan’ireo fomba dimy ireo hampahatanjaka kokoa ny zavatra iainako mandritra ny fandraisako ny fanasan’ny Tompo dia vakio na jereo ny “Afaka manampy antsika ho tonga masina ny fanasan’ny Tompo,” izay hita ao amin’ny ChurchofJesusChrist.org.

3 Nefia 18:28–29. Inona no azoko atao raha mahatsapa ho tsy mendrika ny handray ny fanasan’ny Tompo aho?

“Zava-dehibe ny mahatsiaro fa -tsy voatery ho tonga lafatra ianao vao afaka mandray ny fanasan’ny Tompo, saingy tokony hanana toetra manetry tena sy vonona hibebaka ao am-ponao ianao- (True to the Faith [2004], 148). Amin’ny ankapobeny, ankoatra ny fahotana goavana, raha nandinika ny fitondrantenanao ianao ary maniry amim-panetrentena sy amin-kitsimpo ny hibebaka sy hanaraka ny Mpamonjy, dia tokony handray ny fanasan’ny Tompo ianao. Avy eo ianao dia afaka miaina ny vokatra manadion’io ôrdônansy io sy manavao ny fanekempihavananao mba hitondranao eo aminao ny anaran’i Jesoa Kristy sy hitandremanao ny didiny. Raha manana fanontaniana ianao, dia miresaha amin’ny evekanao” (“When Should I Not Partake of the Sacrament?,” New Era, nôv. 2017, 48).

Nampianatra toy izao ny Loholona John H. Groberg tao amin’ny Fitopololahy:

Inona no dikan’ny hoe mandray ny fanasan’ny Tompo amim-pahamendrehana? Na ahoana no ahafantarantsika raha toa ka tsy mendrika isika?

Raha toa isika maniry ny hivoatra (izany hoe hibebaka) ka tsy iharan’ny famerana avy amin’ny fisoronana, dia mendrika isika, araka ny hevitro. Kanefa, raha tsy maniry ny hivoatra isika, raha tsy manana faniriana ny hanaraka ny torolalan’ny Fanahy, dia mila manontany tena hoe: Mendrika ny handray ve isika, sa manaraby fotsiny ny tena tanjon’ny fanasan’ny Tompo, izay zavatra manosika ho amin’ny fibebahan’ny tena manokana sy fomba enti-mivoatra? (John H. Groberg, “The Beauty and Importance of the Sacrament,” Ensign, May 1989, 38)

Sahanasa fianarana fanampiny

3 Nefia 18:1–2. Miomàna handray ny fanasan’ny Tompo

Ireto manaraka ireto dia afaka manampy ny mpianatra hiomana handray ny fanasan’ny Tompo.

Ao amin’ny 3 Nefia 18:1–2 isika dia mahita fa ny Mpamonjy dia nanao ezaka hanomanana ny olona handray ny fanasan’ny Tompo. Nanasa ny vahoaka hipetraka Izy aloha. Raha te hiresadresaka momba ity hevitra ity misimisy kokoa ianareo, dia mety hanampy raha ampahatsiahivina ny mpianatra fa afaka miomana amin’ny fanasan’ny Tompo ny alahady amin’ny alalan’ny fanaovan-javatra amin’ny sabotsy izy ireo. Apetraho amin’ny mpianatra ny fanontaniana tahaka ireto manaraka ireto:

“Inona avy no fiomanana sasantsasany mety ho azonao atao ny sabotsy mba hahatonga ny alahady hifantoka kokoa amin’i Kristy?”

“Inona avy no fanovana azonao atao eo amin’ny zavatra fanaonao alohan’ny fotoam-piangonana mba hanampy anao ho vonona hahatsiaro ny Mpamonjy mandritra ny fanasan’ny Tompo?”

Hira ao amin’ny fihirana momba ny fanasan’ny Tompo

Mba hanampiana ny mpianatra hahatakatra ny fomba ahafahan’ny hira amin’ny fihirana momba ny fanasan’ny Tompo manampy azy ireo hahatsiaro ny Mpamonjy, dia asao hitady hira ao amin’ny fihirana momba ny fanasan’ny Tompo izay manan-danja amin’izy ireo ny mpianatra. Ifanakalozy hevitra ny maha-zava-dehibe ny hira ao amin’ny fihirana momba ny fanasan’ny Tompo sy ny fomba ahafahan’izany manampy antsika hahatsiaro ny Mpamonjy. Amporisiho hihira ny hira ao amin’ny fihirana momba ny fanasan’ny Tompo mandritra ny fotoam-piangonana ny mpianatra.

Hahatsiaro mandrakariva Izy

Ity manaraka ity dia afaka manampy ny mpianatra hamorona hevitra momba ny zavatra tokony hotsaroana momba ny Mpamonjy.

Ifanakalozy hevitra ny zavatra ezahin’ny mpianatra tadidiana momba ny Mpamonjy rehefa mandray ny fanasan’ny Tompo izy ireo. Azonareo atao ihany koa ny mifanakalo hevitra ny amin’ny fomba ahafahan’ny mpianatra mahatsiaro ihany koa ny zavatra nataon’ny Mpamonjy ho azy ireo manokana.

3 Nefia 18:12–14. Miorina eo ambonin’ny vatolampy

Hevero ny hampifandray ny 3 Nefia 18:12–14 amin’ny Helamàna 5:12. Asao hamaky mafy ny Helamàna 5:12 ny mpianatra ary ifanakalozy hevitra ny zavatra itovian’ireo andinin-tsoratra masina roa ireo. Ifanakalozy hevitra ny hoe manampy ny mpianatra hanana ny Mpamonjy ho fototry ny fiainan’izy ireo amin’ny fomba ahoana ny fandraisana ny fanasan’ny Tompo isan-kerinandro.