3 Nefia 19

“Izy ireo dia heniky ny Fanahy Masina”

mpianatra nivavaka nanodidina an’i Kristy

Tsy nisy zavatra nirin’ny mpianatra Nefita roa ambin’ny folo mihoatra noho ny hanana fiarahana amin’ny Fanahy Masina. Izany no antom-bavak’izy ireo tamin’ny Ray any An-danitra rehefa namarana ny andro voalohan’ny asa fanompoany teo anivon’izy ireo ny Mpamonjy. Inona no tokony hataontsika mba hananana ny Fanahy Masina miaraka amintsika? Ahoana no ahafahantsika misitraka ny fiarahana Aminy eo amin’ny fiainantsika? Ny tanjon’ity lesona ity dia ny hanampy anao hahatakatra tsara kokoa ny fomba fandraisana ireo fitahian’ny Fanahy Masina.

Manampy ny mpianatra mba hampianarin’ny Fanahy Masina. Mba hahatonga ny mpianatra hampianarin’ny Fanahy Masina, dia tokony hisy tontolo ianarana mifanaraka amin’izany. Ny fandaminana ny fipetrahana ao am-pianarana sy ny fifaneraserana tsara anananao amin’ny mpianatra dia afaka mandray anjara amina tontolo izay manasa ny fanatrehan’ny Fanahy Masina.

Fanomanana ny mpianatra: Hevero ny hanasa ny mpianatra handalina ny “Nikatsaka ny fanomezana ny Fanahy Masina ny mpianatr’i Jesoa Kristy” ao amin’ny rindran-damina ho an’ny fandalinana ny 3 Nefia 17–19 ao amin’ny Avia, hanaraka Ahy—Ho an’ny ao an-tokantrano sy ny ao am-piangonana: Bokin’i Môrmôna 2024 ary ho tonga efa vonona hizara ny zavatra nianaran’izy ireo sy tsapan’izy ireo teo am-panaovana izany.

Ireo sahanasa fianarana azo atao

Faniriana marina ao amin’ny tanora

ny Azonao atao ny manome sombin-taratasy ny mpianatra tsirairay mba hitanisan’izy ireo ny valintenin’izy ireo ho solon’ny fametrahana ity fanontaniana manaraka ity sy ny fanasana ny mpianatra hamaly fotsiny Avy eo dia azonao atao ny manangona ny valintenin’izy ireo sy mizara ny vitsivitsy amin’izany amin’ny iray kilasy. Azon’ny mpianatra atao ny mamaly ity fanontaniana ity amin’ny fomba maro.

• Raha hanao fitsapan-kevitra amina zatovo miisa 100 eo amin’ny faritra misy anao ianao, inona araka ny eritreritrao no ho anisan’ny faniriana marina iombonan’izy ireo indrindra?

Saintsaino hoe inona amin’ireo faniriana ireo no mahakasika anao manokana. Rehefa mandalina ny 3 Nefia 19 ianao dia mitadiava fahamarinana izay afaka manampy anao hahatratra ny faniriana marina ao aminao.

Taorian’ny nanompoany, nampianarany, nanasitranany, ary nanomezany tsodrano ny olona, dia “lasana Izy niala teo aminy ary niakatra nankany an-danitra” (3 Nefia 18:39) niaraka tamin’ny fampanantenana fa hiverina Izy ny ampitson’io. Niverina tany an-trano ny olona, ary “nandritra ny alina manontolo dia niely lavitra ny feo momba an’i Jesoa,” “ary maro tokoa no … nilofo fatratra tokoa tamin’izany manontolo alina izany mba hahatongavany eo amin’ny toerana izay hanehoan’i Jesoa ny tenany amin’ny valalabemandry ny ampitso” (3 Nefia 19:3). Ny ampitson’iny, ny mpianatra roa ambin’ny folo izay nofidin’i Jesoa dia namory ny olona sy nampianatra azy ireo ny “teny izay notenenin’i Jesoa”. Avy eo dia nandohalika ny mpianatra ary “nivavaka tamin’ny Ray tamin’ny anaran’i Jesoa” (3 Nefia 19:8).

Vakio ny 3 Nefia 19:9 mba hahitana ny zavatra nirin’izy ireo indrindra rehefa nivavaka izy ireo.

Hevero ny hampiseho ireto fanontaniana manaraka ireto. Rehefa avy mahazo minitra vitsy hiraketana an-tsoratra ny valintenin’izy ireo ao amin’ny diary fandalinany ny mpianatra, dia azonao atao ny mandamina ny mpianatra ho vondrona kely hifanakalo hevitra momba ny valiny hitan’izy ireo.

• Nahoana, araka ny eritreritrao, no naniry mafy tokoa ny Fanahy Masina izy ireo?

• Inona avy no toe-javatra sasantsasany mety hatrehinao any amin’ny hoavy ka tianao hahafantarana sy hahatakarana ny bitsiky ny Fanahy Masina?

Saintsaino raha maniry marina ny Fanahy Masina eo amin’ny fiainanao ianao ary ny mety hampiova ny fiainanao raha maniry tsy tapaka kokoa ny hery mitarika ananany ianao.

Mikatsaka ny Fanahy Masina

Vakio ny 3 Nefia 19:10–23, ary mitadiava fomba azonao amenoana ity fanambarana manaraka ity:

• Afaka ny ho heniky ny Fanahy Masina isika rehefa …

Hevero ny hanasa ny mpianatra hanoratra eny amin’ny solaitrabe ny fomba hamenoan’izy ireo ilay fanambarana. Ireto manaraka ireto dia fomba roa azo hamenoana ilay fanambarana.

• … maniry sy mivavaka amin-kitsimpo mba hanana ny fiarahana Aminy.

• … mandray anjara amin’ireo ôrdônansin’ny filazantsara.

Ny sahanasa A sy B dia afaka manampy ny mpianatra hahatakatra ny zavatra azon’izy ireo atao mba ho heniky ny Fanahy Masina. Azo atao miaraka amin’ny iray kilasy ireo sahanasa ireo. Azon’ny mpianatra atao ihany koa ny mamita ny iray na izy roa amin’ireo sahanasa anatina vondrona kely ary manao tatitra ny zavatra ianaran’izy ireo.

Asao hizara hevi-baovao na soratra masina manokana izay hitan’izy ireo ny mpianatra. Asao hizara zavatra niainan’izy ireo manokana momba ny faniriana sy ny fivavahana mba hahazo ny Fanahy Masina na ny fandraisana anjara amina ôrdônansy ny mpianatra.

Ankoatra ny sahanasa A sy B, dia azonareo ifanakalozan-kevitra ihany koa ny fomba anampian’ny finoana an’i Jesoa Kristy sy ny tenin’ny mpanompony amin’ny famenoana antsika amin’ny Fanahy Masina.

Sahanasa A: Afaka ny ho heniky ny Fanahy Masina isika rehefa maniry sy mivavaka amin-kitsimpo mba hanana fiarahana Aminy.

• Ahoana no ahafahan’ny faniriantsika sy ny vavaka ataontsika manampy antsika ho heniky ny Fanahy Masina?

Ny Loholona David A. Bednar ao amin’ny Kôlejin’ny Apôstôly Roambinifolo dia nanazava ny fomba ahafahan’ny faniriana sy ny vavaka manampy antsika hanana ny Fanahy miaraka amintsika.

Loholona David A. Bednar

Moa ve isika mahatsiaro … ny mivavaka am-pahavitrihana sy tsy tapaka ho an’izay tokony iriantsika indrindra dia tsy inona fa ny Fanahy Masina? Sa voarebirebin’ny fiahiana izao tontolo izao isika sy ny fahazaran’ny fiainana andavanandro ary mihevitra ho mandeha ho azy na koa manamaivana aza izay sarobidy indrindra amin’ny fanomezana rehetra? Ny fandraisana ny Fanahy Masina dia manomboka amin’ny faniriantsika amin-kitsimpo sy tsy tapaka ny fiarahany eo amin’ny fiainantsika. (David A. Bednar, “Raiso ny Fanahy Masina,” Liahona, nôv. 2010)

 ChurchofJesusChrist.org

• Oviana no nanampian’ny faniriana sy ny vavaka feno fahamarinana tao aminao anao mba hahatsapa ny fitarihan’ny Fanahy Masina?

Sahanasa B: Afaka ny ho heniky ny Fanahy Masina isika rehefa mandray anjara amin’ireo ôrdônansin’ny filazantsara.

Vakio ny 3 Nefia 18:7, 11; 27:20, hitadiavana ny fomba ahafahan’ireo ôrdônansy manampy antsika ho heniky ny Fanahy Masina.

Nampianatra toy izao ny Mpaminany Joseph Smith (1805–44):

ny Mpaminany Joseph Smith

Ny batisa dia ôrdônansy masina hiomanana amin’ny fandraisana ny Fanahy Masina. Io no fantsona sy fanalahidy entina hanomezana ny Fanahy Masina. Ny fanomezana ny Fanahy Masina amin’ny alalan’ny fametrahan-tanana dia tsy afaka raisina amin’ny alalan’ny fitsipika hafa ankoatra ny fitsipiky ny fahamarinana. (Teachings of Presidents of the Church: Joseph Smith [2007], 95–96.)

• Inona no nianaranao momba ny anjara asan’ireo ôrdônansy (toy ny batisa sy ny fanasan’ny Tompo) amin’ny fanampiana antsika ho heniky ny Fanahy Masina?

• Oviana ianao no heniky ny Fanahy Masina rehefa nandray anjara tamina ôrdônansin’ny filazantsara?

Fampiharana amin’ny tena manokana

Hevero ny hizara zavatra niainana manokana momba ny zavatra nataonao mba hikatsahana ny Fanahy Masina.

Eritrereto ny filanao manokana ny Fanahy Masina sy ny antony anirianao ny fitarihany eo amin’ny fiainanao. Mitadiava zavatra iray tsapanao fa tokony hataonao mba hihazonana ny Fanahy Masina miaraka aminao. Miezaha mafy hahatontosa hatramin’ny farany izany fahatsapana izany.

Fanamarihana sy fampahalalana avy amin’ny zava-miseho

Ahoana no ahafahan’ny Fanahy Masina ho namantsika lalandava?

Nampianatra toy izao ny Loholona David A. Bednar ao amin’ny Kôlejin’ny Apôstôly Roambinifolo:

Loholona David A. Bednar

Raha miezaka ny ho tsara sy ho tonga tsara isika—tsy tonga lafatra izao dia izao fa mihatsara tsikelikely—raha manome haja ny fanekempihavantsika isika, mikatsaka ny fiarahana amin’ny Fanahy Masina, mandray ny fanasan’ny Tompo amim-pahamendrehana sy mihazona ny famelana ny fahotantsika, ary mibosesika mandroso, dia afaka manana ny finamanana lalandava amin’ny Fanahy Masina isika. Tsy “miomana handray fanambarana isika”; fa efa “miaina ao amin’ny fanambarana isika”. (David A. Bednar, The Spirit of Revelation [2021], 7)

Ny Fotopampianarana sy Fanekempihavanana 121:45–46 dia mampianatra ihany koa ny fomba ahafahantsika manana ny Fanahy Masina ho namantsika lalandava.

3 Nefia 19:23. Ahoana no ahafahan’ny Fanahy Masina manampy antsika hiray amin’ny Ray sy ny Zanaka?

Nanazava toy izao ny Loholona D. Todd Christofferson ao amin’ny Kôlejin’ny Apôstôly Roambinifolo:

Loholona D. Todd Christofferson

Azo antoka fa tsy ho iray miaraka amin’ Andriamanitra sy i Kristy isika raha tsy ny sitrapon’ Izy Ireo sy ny zavatra manan-danja amin’ IzyIreo no iriantsika indrindra. Tsy ho azo ao anatin’ny indray andro ny fanoavana toy izany, saingy amin’ny alalan’ny Fanahy Masina, dia hitantana sy hampianatra antsika ny Tompo raha toa isika ka manaiky, mandrapahazoana miteny marina, rehefa mandeha ny fotoana, fa ao amintsika Izy tahaka ny maha ao Aminy ny Ray. Indraindray aho dia mangovitra rehefa mieritreritra ny zavatra mety hotakina, saingy fantatro fa ao anatin’io fikambanana ho iray tena lafatra io ihany no ahitana ny fahafenoan’ny fifaliana. (D. Todd Christofferson, “That They May Be One in Us,” Liahona, Nov. 2002, 73)

Sahanasa fianarana fanampiny

3 Nefia 19:1–15. Hiaraka amintsika ny Mpamonjy raha manompo sy mizara ny teniny amin’ny hafa isika

Ny mpianatra dia afaka ny ho voatahy amin’ny alalan’ny fahatakarana sy fahatsapana fa hiaraka amintsika ny Mpamonjy raha manompo ny hafa sy mizara ny teniny amin’izy ireo isika. Ity sahanasa manaraka ity dia afaka manampy amin’ny fanatontosana izany.

Asao ny mpianatra hizara momba ny olona iray fantatr’izy ireo izay ohatra iray naneho ny fanarahana an’i Kristy tamin’izy ireo. Angataho hanazava ny fomba nitaoman’io olona io azy ireo ho amin’ny tsara kokoa izy ireo. Asao handalina ny 3 Nefia 19:1–15 izy ireo, ka hitady ny zavatra nataon’ny mpianatra hanarahana ny ohatry ny Mpamonjy sy ny vokatr’izany. Asao izy hiezaka mafy hanompo ny hafa sy hizara ny tenin’i Kristy amin’izy ireo araka ny ho nataony.

3 Nefia 19:19–23, 27–30. Ny fitaomana manadion’ny Fanahy Masina

Raha toa ka mety hahazo tombony amin’ny fahatakarana tsara kokoa ny fitaomana manadio afaka hoentin’ny Fanahy Masina eo amin’izy ireo ny mpianatra, dia hevero ny hanao ity manaraka ity:

Hazavao amin’ny mpianatra fa ny hoe manadio zavatra dia midika hoe manafaka amina singa tsy tiana (jereo ny Merriam-Webster.com Dictionary, “purify”). Asao hizara zavatra mety ho tian’izy ireo hodiovina (toy ny vilia, trano, akanjo, na vatana) ny mpianatra. Inona no hampiasain’izy ireo mba hanaovana izany?

Asao hikaroka ao amin’ny 3 Nefia 19:19–23, 27–30 ny mpianatra mba hahitana ny zavatra nomen’ny Tompo mba hanampiana antsika ho tonga madio kokoa. Raha ilaina dia azon’izy ireo atao ihany koa ny mijery ny Môzià 3:19; 4:1–3.

Asao hifanakalo hevitra momba ireo zavatra izay azontsika atao mba handraisana io fitahiana io izy ireo. Amporisiho izy ireo hanao zavatra amin’ireo fahatsapana rehetra azony.

3 Nefia 19:23. Lasa miray amin’ny Ray any An-danitra sy i Jesoa Kristy

Ity manaraka ity dia afaka manampy ny mpianatra hanamafy orina ny fifandraisan’izy ireo amin’ny Ray any An-danitra sy i Jesoa Kristy.

Asao handalina ny 3 Nefia 19:23 sy ny teny nambaran’ny Loholona Christofferson ao amin’ny fizarana hoe “Fanamarihana sy fampahalalana avy amin’ny zava-miseho” ny mpianatra. Asao hizara ny zavatra ianaran’izy ireo ny mpianatra. Ny vavaky ny Mpamonjy ho an’ny mpianany sy ny hafa ao amin’ny Jaona 17:11–23 dia mety hanampy ny mpianatra hahatakatra io fotopampianarana manan-danja io ihany koa.

Eo am-pandalinan’izy ireo, dia asao ny mpianatra hifanakalo hevitra momba ny fiantraikan’ny fahatakarana ny maha Iray Ny Andriamanitra amin’ireo fahatsapana ananan’ny mpianatra momba ny Fanahy Masina. Azonareo ifanakalozana hevitra ihany koa ny mety ho fiantraikan’io fahatakarana io amin’ny zavatra ataontsika.