3 Nefia 17

“Manana fangorahana anareo Aho”

I Kristy manasitrana vehivavy iray

Efa lava tamin’ny vahoaka Nefita ny andro vao nanambara ny Mpamonjy fa tonga ny fotoana tokony handehanany. Na izany aza, nikasika ny fony ny ranomaso sy fanirian’ny vahoaka ny hijanonany elaela kokoa. Tamina fihetsika mahafinaritra naneho fangorahana no nanasitranany azy ireo, nivavahany ho azy ireo ary nanomezany tsodrano tsirairay ny zanak’izy ireo. Ity lesona ity dia afaka manampy anao hahatsapa ny fangorahan’i Jesoa Kristy anao.

Mampiasa ny horonantsary momba ny Bokin’i Môrmôna. Ny horonantsary momba ny Bokin’i Môrmôna dia natao hanampiana ny mpianatra hiaina zavatra manan-danja amin’ilay lahatsoratra. Ireo horonantsary ireo dia tsy natao hanoloana ny famakiana ny soratra masina. Farito am-pahendrena ny hoe oviana ary amin’ny fomba ahoana no hanatsarana ny zavatra iainan’ny mpianatra amin’ny soratra masina.

Fanomanana ny mpianatra: Asao ny mpianatra hieritreritra fotoana nahatsapan’izy ireo famindram-po, fangorahana, na fitiavana avy amin’ Andriamanitra. Afaka miomana hizara ny fomba niantraikan’ireo zavatra niainana ireo tamin’ny fifandraisan’izy ireo Taminy ny mpianatra.

Ireo sahanasa fianarana azo atao

Ny fahatsapan’ny Mpamonjy

Alaivo sary an-tsaina hoe vao avy nandany andro iray niaraka tamin’ny Mpamonjy ianao ary nanambara Izy fa tonga ny fotoana tokony handehanany.

• Ahoana no mety ho fahatsapanao eo anatrehan’izany toe-javatra izany?

Ampio hahatsiaro ny zavatra nianaran’izy ireo momba ny Mpamonjy tao amin’ny 3 Nefia 11–16 ny mpianatra. Azon’izy ireo atao ny mamerina mijery ny zavatra nosoratan’izy ireo ao amin’ny diarin’izy ireo eo ambanin’ny hoe “Fianarana momba an’i Jesoa Kristy ao amin’ny 3 Nefia”.

Alohan’ny hamalian’izy ireo ity fanontaniana manaraka ity dia mety hanampy raha angatahina hanao lisitra eny amin’ny solaitrabe ny matoanteny mamaritra ny zavatra nataon’ny Mpamonjy ny mpianatra.

• Ahoana no nanehoan’ny zavatra nataon’ny Mpamonjy ny fitiavany ny Nefita?

Anio ianao dia hamaky misimisy kokoa momba ny fomba nanehoan’ny Mpamonjy ny fangorahany feno fitiavany teo anivon’ny Nefita. Rehefa mandalina ianao dia eritrereto hoe inona no ampianarin’ny zavatra nataony momba ny toetrany. Ifantohy tsara ny fahatsapanao momba Azy.

Mety hanampy ny fahalalana fa ny zava-niseho rehetra voarakitra ao amin’ny 3 Nefia 11–17 dia nitranga tao anatin’ny indray andro.

Vakio ny 3 Nefia 17:1–6 hitadiavana ny zavatra azonao ianarana momba an’i Jesoa Kristy avy amin’ny teniny sy ny zavatra nataony.

• Inona avy no hitanao tao amin’ireo andininy ireo?

Mety hahita fitsipika mitovitovy amin’ity manaraka ity ny mpianatra: Amin’ny alalan’ny fisaintsainana sy fivavahana amin’ny Ray, isika dia manomana ny saintsika handray fahatakarana lehibe kokoa.

Raha te hanao zavatra misimisy kokoa amin’io fitsipika io ianao, dia jereo ny fizarana hoe “Sahanasa fianarana fanampiny”.

Mety nahita fahamarinana mitovitovy amin’ity manaraka ity ianao: Feno fangorahana ahy i Jesoa Kristy. Hevero ny hirakitra an-tsoratra io fahamarinana io eo akaikin’ny andininy 6.

Ny Loholona Ulisses Soares ao amin’ny Kôlejin’ny Apôstôly Roambinifolo dia nampianatra hoe:

Loholona Ulisses Soares

Manan-danja ny mahita fa ireo asa nentanim-pangorahana nataon’i Jesoa dia tsy hoe tsindraindray na noterena, arakaraka ny lisitry ny asa mila vitaina, fa fanehoana amin’ny andavanandrom-piainana ny fisian’ny fitiavany madio ho an’ Andriamanitra sy ireo zanany ary ny faniriany tsy manam-petra ny hanampy azy ireo. (Ulisses Soares, “Ny fangorahana tsy manam-petran’ny Mpamonjy,” Liahona, nôv. 2021)

• Amin’ny teninao manokana, inona no ampinarin’ny Loholona Soares momba ny fangorahan’ny Mpamonjy?

Ny fangorahan’ny Mpamonjy

Ny ambin’ny 3 Nefia 17 dia maneho ny toetra mangoraka ananan’ny Mpamonjy. Tsarovy fa ny zavatra nataon’i Jesoa Kristy ao amin’ny 3 Nefia 17 dia nitranga satria tsapany ny faniriana marina nananan’ny Nefita ary tena te hiaraka amin’izy ireo sy hitahy azy ireo Izy.

Ny tanjon’ity sahanasa manaraka ity dia ny hanampy ny mpianatra hampivelatra fitiavana lehibe kokoa ny Mpamonjy amin’ny alalan’ny fakana sary an-tsaina ny toetra mangoraka ananany. Mety ho efa nampihatra io fahaiza-manao io ny mpianatra teo am-pandalinana ny 3 Nefia 11. Ny famerenana io fahaiza-manao io dia afaka manampy ny mpianatra hampitombo ny fahaizan’izy ireo manao izany.

Asehoy ireto fanontaniana sy andalan-tsoratra masina manaraka ireto. Asao hifantina ny andalan-tsoratra masina tian’izy ireo hohalalinina ny mpianatra, ary eo am-pandalinana dia angataho hisaintsaina ireo fanontaniana izy ireo. Azon’ny mpianatra atao ny mamaly ireo fanontaniana ireo ao amin’ny diary fandalinan’izy ireo eo ambanin’ny hoe “Fianarana momba an’i Jesoa Kristy ao amin’ny 3 Nefia”.

Hevero ny hamela ny mpianatra hisafidy ny handalina samirery na handalina mangina miaraka amina namana iray.

• Fotoana inona no mety ho niavaka indrindra taminao? Nahoana?

• Inona no nanaitra anao momba ny fomba nanompoan’i Jesoa?

• Ahoana no iantraikan’ny teniny sy ny zavatra nataony amin’ny fahatsapanao momba Azy?

• 3 Nefia 17:7–10: Nanasitrana ny marary sy ny ory teo anivon’izy ireo

• 3 Nefia 17:13–20: Nivavaka niaraka tamin’izy ireo sy ho an’izy ireo

• 3 Nefia 17:11–12, 21–25: Nitsodrano ny ankizy

Hevero ny hampiseho ireto fanontaniana manaraka ireto sy hanome fotoana ny mpianatra hieritreritra izany alohan’ny hamaliana.

• Raha teo ianao, dia inona no mety ho fiantraikan’io zavatra niainanao io teo amin’ny fifandraisanao amin’i Jesoa Kristy Mpamonjy anao?

• Ahoana araka ny eritreritrao no anehoan’i Jesoa Kristy fangorahana amintsika ankehitriny?

• Voatosika hanao inona ianao mba hanehoana ny fitiavanao an’i Jesoa Kristy?

Raha misy fotoana dia hevero ny hihira hira ao amin’ny fihirana momba ny fitiavana sy fangorahan’ny Mpamonjy. Ohatra amin’izany ny “O Jésus, quand je pense à toi” (Cantiques, no. 76), sy ny “Divin amour” (Cantiques, no. 59).

Raha mety ny hanaovana izany, dia manasà mpianatra hizara ny zavatra tsapan’izy ireo nandritra ny leson’ny androany. Amporisiho izy ireo hanohy hitady porofon’ny fangorahan’ny Mpamonjy eo amin’ny fiainan’izy ireo.

Fanamarihana sy fampahalalana avy amin’ny zava-miseho

Inona avy no karazana fahoriana nanasitranan’ny Mpamonjy ny olona?

Nampianatra toy izao ny Filoha Dallin H. Oaks ao amin’ny Fiadidiana Voalohany:

Filoha Dallin H. Oaks

Rehefa niseho tamin’ny olo-marina tany amin’ny Tontolo Vaovao ny Mpamonjy, dia niantso olona handroso Izy, izay nandringa na jamba na nanana aretina ara-batana hafa. Nanolotra izany fanasana izany tamin’ireo “izay ory na manao ahoana na manao ahoana” Izy (3 Nefia 17:7). “Ento aty izy,” hoy Izy, “dia hositraniko” (and. 7). Ny Bokin’i Môrmôna dia milaza ny fomba nitondran’ny vahoaka “ireo izay nijaly na manao ahoana na manao ahoana” (and. 9). Izany dia tsy maintsy nahitana olona izay nanana fahoriana ara-batana na ara-pihetseham-po na ara-tsaina tamin’ny karazany rehetra, ary ny soratra masina dia mijoro ho vavolombelona fa i Jesoa dia “nanasitrana ny tsirairay avy taminy” (and. 9). (Dallin H. Oaks, “He Heals the Heavy Laden,” Liahona, Nov. 2006, 6)

Ny Rahavavy Bonnie H. Cordon, Filohan’ny Fiadidian’ny Zatovovavy maneran-tany, dia nampianatra ihany koa ao amin’ity horonantsary manaraka ity momba ny fahaizan’ny Mpamonjy sy ny fahavononany hanasitrana.

Ahoana no ahafahako mitombo amin’ny fangorahana tahaka ny an’i Kristy?

Ny Loholona Ulisses Soares ao amin’ny Kôlejin’ny Apôstôly Roambinifolo dia nizara hoe:

Loholona Ulisses Soares

Ny toetra feno fangorahana ananan’i Jesoa dia mifototra amin’ireo fahatsapana feno fiantrana ananany, fa indrindra indrindra amin’ny fitiavany madio sy tonga lafatra, izay votoatin’ny sorona fanavotana nataony. Ny fangorahana dia toetra fototra an’ireo izay milofo ho amin’ny fahamasinana, ary mifamatotra amin’ireo toetra Kristianina hafa toy ny fiaraha-miory amin’ireo izay ory sy ny fahaizana miombona fihetseham-po, ny famindram-po, ary ny hatsaram-panahy. Ny fanehoana fangorahana ho an’ny hafa, raha ny marina, no fototry ny filazantsaran’i Jesoa Kristy ary porofo mivaingana amin’ny maha-akaiky antsika ara-panahy sy ara-pihetseham-po amin’ny Mpamonjy. Ambonin’izany, izany dia maneho hoe hatraiza ny fitaomana ananany eo amin’ny fomba fiainantsika ary mampibaribary ny hery ananan’ny fanahintsika. (Ulisses Soares, “Ny fangorahana tsy manam-petran’ny Mpamonjy,” Liahona, nôv. 2021)

Sahanasa fianarana fanampiny

3 Nefia 17:1–3. “Saintsaino ny zavatra izay efa nolazaiko”

Ireto manaraka ireto dia afaka manampy ny mpianatra hisaintsaina ny soratra masina.

Ny Filoha Henry B. Eyring ao amin’ny Fiadidiana Voalohany dia nampianatra fa “tsy mitovy ny atao hoe mamaky, sy ny mandalina ary ny misaintsaina. Mamaky teny isika dia mety hahita hevitra. Mandalina isika ary mety hahita modely arahina sy fifandraisana eo amin’ny soratra masina. Fa rehefa misaintsaina kosa isika, dia manasa ny fanambaran’ny Fanahy. Amiko ny misaintsaina dia ny fieritreretana sy ny vavaka ataoko aorian’ny famakiako sy ny fandalinako am-pitandremana ny soratra masina” (Henry B. Eyring, “Manompo miaraka amin’ny Fanahy,” Liahona, nôv. 2010, 60).

Azonao atao ny manasa ny mpianatra handalina ny 3 Nefia 17:1–3 ka hitady ireo toromarika nomen’ny Tompo ny Nefita mba hahafahan’izy ireo “manomana ny sain’[izy ireo] ho amin’ny ampitso.” Avy eo dia azon’izy ireo atao ny mitady fahamarinana toy ny hoe amin’ny alalan’ny fisaintsainana sy fivavahana amin’ny Ray isika dia manomana ny saintsika handray fahatakarana lehibe kokoa.

Zarao ilay teny nambaran’ny Filoha Eyring, ary asao ny mpianatra hifanakalo hevitra momba ny fomba ahafahan’ny fandalinana sy ny fivavahana ary ny fisaintsainana miara-miasa mba hanomana ny saintsika handray fahatakarana lehibe kokoa. Avy eo dia azon’ny mpianatra atao ny mampihatra ny zavatra nianaran’izy ireo momba ny fisaintsainana rehefa mandalina ny ambin’ny 3 Nefia 17 izy ireo. Ohatra, azon’izy ireo atao ny maka sary an-tsaina ireo zava-niseho tao amin’ny soratra masina na mieritreritra ny fomba mety ho nitondran’ny Mpamonjy azy ireo manokana. Aorian’izay dia ifanakalozy hevitra ny hoe tamin’ny fomba ahoana ny fisaintsainany no nampitombo ho lalina kokoa ny fahatakarany ny soratra masina sy ny fitiavany ho an’ny Tompo

3 Nefia 17:5. “Nanopy ny masony manodidina indray tany amin’ny valalabemandry Izy”

Iray amin’ireo toetra maha-Andriamanitra ny Mpamonjy ny fahaizany mamantatra sy mahatsapa ny filan’ny hafa ary avy eo dia misahana izany filana izany am-pitiavana sy amin’ny fahatsaram-panahy.

Asao handalina ny 3 Nefia 17:5 ny mpianatra, hitadiavana ny fomba nanehoan’i Jesoa Kristy ny fahaizany mahatsapa ny zavatra ilain’ny hafa. Hevero ny handefa ilay horonantsarin’ny Filoha Bonnie H. Cordon ao amin’ny fizarana hoe “Fanamarihana sy fampahalalana avy amin’ny zava-miseho”. Eo am-pijeren’ny mpianatra izany dia asao izy ireo hieritreritra ny fomba hahafahan’izy ireo manatsara ny fahaizan’izy ireo mahatsapa ny zavatra ilain’ny hafa sy misahana izany tahaka ny ho nataon’ny Mpamonjy.

Hevero ny hihira na hamaky ny tonon’ilay hoe “Miezaka aho ho toa an’i Jesoa” (Bokin-kiran’ny ankizy, 40).

Ifanakalozy hevitra ny fomba ahafahantsika manaraka ny ohatra nasehon’ny Mpamonjy amin’ny alalan’ny fijerena ny zavatra ilain’ny hafa dia ny fanampiana azy ireo.

3 Nefia 17:12. “Nijoro teo afovoany i Jesoa”

Mba hanampiana ny mpianatra hahatsapa fa akaiky azy ireo ny Mpamonjy, dia asao izy ireo handalina ny 3 Nefia 11:8; 3 Nefia 20:22; 3 Nefia 27:2; Fotopampianarana sy Fanekempihavanana 38:7; 88:13; ary ny Abrahama 3:22–23, ka hitady ny fomba itovitovian’ireo andininy ireo amin’ny 3 Nefia 17:12. Azon’ny mpianatra atao ny mampirohy ireo andininy ireo. Avy eo dia hifanakalozy hevitra ny zavatra hitan’ny mpianatra momba ny Mpamonjy sy ny fifandraisany amintsika.