3 Nefia 20–22

“Izaho hanangona ny oloko”

Afaka mieritreritra fotoana teo amin’ny fiainanao nanampian’ny hoe niaraka tamin’olon-kafa ve ianao? Nahoana araka ny eritreritrao no namerimberina nanome toromarika ny olony mba hiangona ara-batana sy ara-panahy ny Tompo? Nandritra ny asa fanompoan’ny Mpamonjy teo amin’ny Nefita, dia nanambara Izy fa ny Ray any An-dantra dia hahatsiaro ny fanekempihavanany hanangona an’i Isiraely niely patrana. Nanambara famantarana Izy mba hanampiana antsika hahafantatra hoe oviana no nanombohan’ny fanangonan’ny andro farany. Afaka manampy anao handray anjara amin’ny fanangonana an’i Isiraely ity lesona ity.

Manampy ny mpianatra hahatsapa ho omen-danja. Mitadiava fomba tsara hankasitrahana ny anjara birikin’ny mpianatra. Manehoa fankasitrahana rehefa mandray anjara amin’ny dingan’ny fianarana ny mpianatra, ary ampio hahatsapa ho tsy misy atahorana ny mpianatra rehetra rehefa mizara ny eritreritra sy fahatsapan’izy ireo.

Fanomanana ny mpianatra: Asao ny mpianatra hieritreritra mandritra ny famakian’izy ireo soratra masina isan’andro ny fomba nanampian’ny Bokin’i Môrmôna azy ireo hanakaiky kokoa an’i Jesoa Kristy.

Ireo sahanasa fianarana azo atao

Angonina

Hanombohana azy, mihazòna rantsankazo, na tahona gilasy na fisokira-nify iray. Omeo toromarika hanao izao manaraka izao ny mpianatra.

Makà fotoana hieritreretana toe-javatra nahatsapanao na ny olona fantatrao ho irery, na tsy voaro, na toy ny hoe tsy manana ny toeranao ianao.

Ampiaraho amin’ireo zavatra mitovy aminy ilay rantsankazo na ilay tahona gilasy na koa ilay fisokira-nify.

• Ahoana no mety hanampian’ny maha-ao anaty vondrona amin’ireo olana ireo?

  Hevero ny haneho ny maha mora tapaka ny hazokely na fisokira-nify mandeha irery, saingy sarotra tapahina kokoa rahamaromaro ireo.

  Mba hanehoana an-tsary ny fanontaniana manaraka, dia mampidira hazo matevina iray, na fantsika lehibe iray, na bolongam-by iray ho ao amin’ilay vondrona.

• Inona avy no tombontsoan’ny hoe ao anatina vondrona iray miaraka amin’ny Tompo sy ireo izay manara-dia Azy?

  Hevero ny hampiseho ireto fanambarana manaraka ireto sy hanome fotoana kely mangina ny mpianatra hisaintsainana sy hanombanan-tena.

Saintsaino ireto fanambarana manaraka ireto. Omeo naoty ny fampiharanao ireto fanambarana ireto amin’ny alalan’ny fampiasana ny teny hoe “matetika,” “indraindray,” na “mahalana”.

• Tsapako fa manana fifandraisana amin’ny Tompo aho ary miaro sy manavotra ary tia ahy Izy.

• Fantatro ny fomba anasan’ny Tompo ahy hanatona Azy sy handray ireo fitahiana ireo.

• Mikatsaka ny hanangonana ny hafa ho ao amin’ny Tompo aho ary mahatsapa ho tsy misy atahorana sy manana ny toerako.

Rehefa mandalina ity lesona ity ianao, dia mihevera fomba ikatsahan’ny Tompo hanangona soa aman-tsara anao sy ny hafa ho ao Aminy sy ny Fiangonany. Saintsaino ny fomba ahafahanao manampy ny Tompo amin’ny asa fanangonany masina.

“Hanangona aho”

Tamin’ny andro faharoa tamin’ny fitsidihan’ny Mpamonjy an’i Amerika, rehefa avy nivavaka ho an’ny olona sy nitsodrano azy ireo ny Mpamonjy, dia nampandray ny fanasan’ny Tompo azy ireo tamin’ny fomba mahagaga Izy. Avy eo dia naminany momba ny olon’ny fanekempihavanany amin’ny andro farany Izy. Mba hahatakarana ny faminaniany, dia zava-dehibe ny mahatsiaro ireto manaraka ireto:

• Tany aloha ny Tompo dia nampanantena an’i Abrahama sy ny taranany, tao anatin’izany i Jakoba (izay nantsoina ihany koa hoe Isiraely), fa izy ireo dia hahazo ny fitahian’ny filazantsara sy ny fisoronana rehetra (jereo ny Abrahama 2:6–11).

• Ny taranak’i Isiraely, ao anatin’izany ny Nefita, dia niely patrana nanerana izao tontolo izao. Nampanantena ny hanangona azy ireo indray mba handray ireo fitahian’ny filazantsara ny Tompo.

• Izay rehetra miditra ao amin’ny Fiangonana ka tsy taranak’i Isiraely ara-bakiteny, dia atsangana ho zanak’i Isiraely ary afaka mahazo ireny fitahiana rehetra ireny.

Vakio ny 3 Nefia 20:11–13, 18, 22 hitadiavana ny zavatra nampanantenain’ny Tompo fa hataony. Mety hanampy ny fahafantarana ireto manaraka ireto:

• Ny amboara (3 Nefia 20:18) dia antontam-boa nojinjaina.

• Amin’ny andro farany, ny Tompo dia handringana amin’ny fahamarinany ny ratsy fanahy izay tsy hibebaka (jereo ny 3 Nefia 20:15–17, 19–20), ary ny Olomasina dia hiangona ao amin’ny toerana iray antsoina hoe Jerosalema Vaovao any Amerika (jereo ny Fanekem-pinoana 1:10).

• Inona no hitanao?

Henoy tsara ny mpianatra. Rehefa mizara izy ireo, dia asao izy ireo hanasongadina izay andianteny na fahamarinana rehetra nanan-danja tamin’izy ireo.

Fahamarinana iray azontsika ianarana avy amin’ireo andininy ireo ny hoe hanatanteraka ny fanekempihavanany hanangona ny mpianakavin’i Isiraely amin’ny andro farany Andriamanitra.

Hevero am-bavaka ny fomba mety hahafahanao manampy ny mpianatrao hahafantatra ny ezaka ataon’ny Tompo hanangona azy ireo. Hevero ny hampiseho ilay sary any am-piandohan’ny lesona, ary mametraha fanontaniana toy ireto manaraka ireto:

• Inona avy no fomba sasantsasany itondran’ny Tompo antsika “amin’ny fahalalana ny Tompo … izay nanavotra [antsika]”? (3 Nefia 20:13).

• Na dia ho tanteraka amin’ny Arivotaona aza ireo faminaniana momba ny Jerosalema Vaovao, dia ahoana no ananan’ireo izay manara-dia ny Mpamonjy “ny herin’ny lanitra … eo afovoan’[izy ireo]” amin’izao fotoana izao? (3 Nefia 20:22). Amin’ny fomba ahoana no ahafahantsika manana ny Tompo “eo afovoantsika”? (3 Nefia 20:22).

• Ahoana no ahafahan’ireo fitahiana ireo manampy antsika eo amin’ny fiainantsika (ao anatin’izany ny hoe rehefa mahatsapa ho irery, na tsy voaro, na toy ny hoe tsy manana ny toerantsika isika)?

Ireo famantarana ny fanangonan’ny andro farany

Ny Tompo dia nampanantena famantarana amin’izao androntsika izao hilazana fa efa nanomboka ny fanangonana ny olony Izy.

Hevero ny hampiseho na hanome ny mpianatra tahadika iray amin’ity sahanasa fampifandraisana manaraka ity. Asao hiasa tsiroaroa sy anatina vondrona kely ny mpianatra mba hamita izany. Ny valiny dia 1-d, 2-b, 3-a.

3 Nefia 20:25–27	Ny “asa lehibe sy mahagaga” na ny Famerenana tamin’ny laoniny ny Fiangonan’i Kristy tamin’ny alalan’i Joseph Smith mpanompony, dia famantarana ny fanangonana.
3 Nefia 21:1–2, 7	Ny fahatongavan’ny Bokin’i Môrmôna, “ireo zavatra izay [nambaran’ny Tompo],” dia famantarana fa manangona ny mpianakavin’i Isiraely ny Tompo.
3 Nefia 21:9–11	Amin’ny alalan’ireo izay nanao fanekempihavana tamin’ny Tompo, “hotahiana ny firenena rehetra amin’ny tany”.

• Nahoana araka ny hevitrao no tian’ny Tompo hahafantatra ireo famantarana ny fanangonany isika?

Ahoana no nanangonana anao?

• Ahoana no nanampian’ny iray amin’ireto manaraka ireto anao ho voangona ao amin’ny Tompo sy hisitraka ireo fitahiana atolony?

  • Mpikamban’ny Fiangonana izay mitandrina ny fanekempihavanan’izy ireo

  • Ny Bokin’i Môrmôna

  • Ny Fiangonana

Amporisiho hizara ny eritreritr’izy ireo sy ny zavatra niainan’izy ireo ny mpianatra. Hevero ihany koa ny hizara ny anao.

“Hotahiana ny firenena rehetra amin’ny tany”

Amin’ny maha-mpikamban’ny Fiangonana nanao fanekempihavanana antsika, dia anjarantsika ny manampy “ny firenena rehetra amin’ny tany mba hotahina” amin’ny alalan’ny filazantsaran’i Jesoa Kristy (3 Nefia 20:27). Ireto sahanasa manaraka ireto dia afaka manampy anao hisaintsaina ny fomba anampiana ny Tompo amin’ny fanangonany.

1. Mamakia mandritra ny minitra maromaro ao amin’ny Bokin’i Môrmôna, ka mitadiava andininy na andianteny izay manampy anao hanatona ny Tompo, hahatsapa ny fitiavany, ary hahazo ireo fitahiana atolony. Raketo an-tsoratra ao amin’ny diary fandalinanao ny toko sy andininy na andianteny manan-danja. Mieritrereta fomba mety hahafahanao mizara ireo andininy ireo amin’ny hafa.

2. Omano ny zavatra mety holazainao na hosoratanao mba hizaràna ny Bokin’i Môrmôna amin’ny olona iray. Ampidiro ny fahatsapanao momba ilay boky sy ny fomba heverinao fa ahafahan’izany manampy azy ireo hanakaiky kokoa ny Mpamonjy.

3. Omano ny zavatra azonao lazaina mba hanasana ny olona iray hanatrika fotoam-piangonana na fiarahamientana ao am-piangonana miaraka aminao. Ampidiro ny eritreritrao momba ny fomba ahafahan’izany manampy azy ireo, indrindra fa ny fomba ahafahan’izany manampy azy ireo hanakaiky kokoa ny Tompo.

Rehefa mandalina ianao amin’ity herinandro ity, dia fanteno am-bavaka ny fomba iray ahafahanao manampy amin’ny fanangonana an’i Isiraely. Hatolotra ao amin’ny lesona manaraka ny hevitra hafa. Katsaho ny fitarihan’ny Tompo mba hahalalana ny hoe inona no zavatra tsara indrindra azonao atao.

Fanazavana sy fampahalalana avy amin’ny zava-miseho

Ahoana no ahafahako manampy ny Tompo amin’ny fanangonana an’i Isiraely?

Nampianatra toy izao ny Filoha Russell M. Nelson:

Andraikitsika ny manao izay ahatanteraka ny fanekempihavanan’i Abrahama. Ny taranatsika no ireo taranaka voatendry mialoha sy nomanina mba hitahy ny olona rehetra maneran-tany. Izany no mahatonga ny asa fitoriana ho tafiditra ao anatin’ny adidin’ny fisoronana. Rehefa vita ny 4.000 taona nitsinjovana sy nanomanana, dia izao ilay fotoana voatondro hitondrana ny filazantsara amin’ny olona rehetra maneran-tany. Izao no fotoanan’ilay fanangonana an’i Isiraely nampanantenaina. Ary dia afaka mandray anjara amin’izany isika! Tsy mampientanentana ve izany? Ny Tompo dia miantehitra amintsika sy amin’[ireo] izay manompo amim-pahamendrehana manao asa fitoriana amin’izao fotoana lehibe fanangonana an’i Isiraely izao. (Russell M. Nelson, “Fanekempihavanana,” Liahona, nôv. 2011, 88)

Mba hahitana hevi-baovao hafa, dia hevero ny hamaky na hijery ilay lahateny hoe “Devenir missionnaire” nataon’ny Loholona David A. Bednar ao amin’ny Kôlejin’ny Apôstôly Roambinifolo (Liahona, nov. 2005, 44–47).

Inona no anjara asan’ny Bokin’i Môrmôna amin’ny fanangonana an’i Isiraely?

Nampianatra toy izao ny Filoha Russell M. Nelson:

Ny Bokin’i Môrmôna no ivon’ity asa ity. Manambara ny fotopampianaran’ny fanangonana izy io. Izy io dia mahatonga ny olona hianatra momba an’i Jesoa Kristy sy hino ny filazantsarany ary hikambana ao amin’ny Fiangonany. Raha ny tena marina, raha tsy nisy ny Bokin’i Môrmôna, dia tsy ho nitranga ny fanangonana an’i Isiraely izay efa nampanantenaina. (Russell M. Nelson, “The Gathering of Scattered Israel,” , nov. 2006, 80)

Mila miangona ho ao amin’ny tany iray ve isika ao anatin’ilay fanangonana? (3 Nefia 20:29–33)

Nampianatra toy izao ny Filoha Spencer W. Kimball (1895–1985):

Ny fanangonana an’i Isiraely dia ny fidirana ho mpikambana ao amin’ny fiangonana marina sy ny fahafantarana ilay Andriamanitra marina. … Na iza na iza, noho izany, no nanaiky ny filazantsara naverina tamin’ny laoniny, ary mikatsaka ny hitsaoka ny Tompo amin’ny fiteniny manokana sy miaraka amin’ireo Olomasina any amin’ny firenena misy azy amin’izao fotoana izao, dia efa nanaraka ny lalàn’ny fanangonana an’i Isiraely ary izy dia mpandova ireo fitahiana nampanantenaina an’ireo Olomasina amin’izao andro farany izao. (The Teachings of Spencer W. Kimball, ed. Edward L. Kimball [1982], 439)

Sahanasa fianarana fanampiny

3 Nefia 22:2. Mpikambana ao amin’ Ny Fiangonan’i Jesoa Kristy ho an’ny Olomasin’ny Andro Farany

Raha mety hahazo tombony amin’ny fianarana momba ny fomba itahian’ny Mpamonjy antsika amin’ny alalan’ny maha-mpikamban’ny Fiangonana ny mpianatra, dia hevero ny hanao sarina trano lay eny amin’ny solaitrabe sy hamaky ny 3 Nefia 22:2 miaraka amin’ny mpianatra. Ifanakalozy hevitra ny tombontsoa avy amin’ny trano lay iray rehefa matory any an-tany foana, ary mametraha fanontaniana toy ireto manaraka ireto:

• Ahoana no nanomezan’ny Mpamonjy sy ny Fiangonany anao fiadanana sy fiarovana ary fahatsapana ho manana toerana ny toeranao?

• Nahoana no tian’ny Tompo hitarina sy hatanjahina ny “trano lay” amin’ny andro farany?

• Ahoana no ahafahantsika manasa ny hafa hitady fialofana ao amin’ny Fiangonan’ny Mpamonjy?

3 Nefia 22:7–10. Ny “hatsaram-po maharitra mandrakizain’”ny Tompo

Raha mahasoa ny mpianatra ny mifanakalo hevitra momba ny fotoana andavan’ny olona ny filazantsara, dia angataho hizara ny antony mety hivilian’ny olona hiala amin’ny filazantsara izy ireo. Vakio ny 3 Nefia 22:7–10, hitadiavana ny zavatra nampanantenain’ny Tompo ny olony. Hevero ny hametraka fanontaniana toy ireto manaraka ireto:

• Inona no ianaranao momba ny Tompo avy amin’ireo andininy ireo?

• Tamin’ny fomba ahoana no nahitanao ny “famindram-po” sy “hatsaram-po maharitra mandrakizain’”ny Tompo? (3 Nefia 22:8).

• Ahoana no mety hahafahan’ireo andininy ireo mandrisika anao na olona iray akaiky ny fonao hanaiky na hiverina amin’ny Tompo?