3 Nephi 23

Masigasig na Saliksikin ang mga Banal na Kasulatan

Si Cristo at ang mga tao sa Amerika na tinitingnan ang mga laminang ginto

Kumusta na ang iyong personal na pag-aaral ng banal na kasulatan? Ano ang kaibhang nagagawa nito sa iyong buhay? Sa 3 Nephi 23, binigyang-diin ni Jesus ang kahalagahan ng pag-iingat at pag-aaral ng mga banal na kasulatan at ng mga salita ng mga propeta. Ang lesson na ito ay naglalayong tulungan ka na mas masigasig na pag-aralan ang mga salita ng Panginoon.

Pagtulong sa mga estudyante na magkaroon ng mga kasanayan sa pag-aaral. Upang matulungan ang mga estudyante na maging mas matagumpay sa kanilang pag-aaral ng mga banal na kasulatan, tulungan sila na magkaroon ng iba’t ibang kasanayan sa pag-aaral ng mga banal na kasulatan. Ang mga kasanayang ito ay dapat nakatuon sa pagtulong sa mga estudyante na anyayahan ang Espiritu sa kanilang pag-aaral, mas maunawaan ang mga banal na kasulatan, at matuklasan at maipamuhay ang doktrina at mga alituntunin ng ebanghelyo.

Paghahanda ng estudyante: Sabihin sa mga estudyante na maglaan ng oras sa pag-aaral ng mga banal na kasulatan bago ang lesson na ito, at bigyang-pansin lalo na ang ginagawa nila para maging mas makabuluhan ang kanilang pag-aaral. Hikayatin silang suriin ang kahalagahan at kalidad ng kanilang pag-aaral at ang epekto ng paggawa o hindi paggawa nito sa kanilang buhay.

Mga Posibleng Aktibidad sa Pag-aaral

Ang iyong personal na pag-aaral ng mga banal na kasulatan

Bago magklase, maaari kang magtago ng iba’t ibang bagay sa iba’t ibang bahagi ng silid. Isulat ang salitang “saliksikin” sa pisara. Sabihin sa mga estudyante kung ano ang hahanapin nila, at sabihin sa kanila na maghanap ng maraming item hangga’t maaari.

• Ano ang ibig sabihin ng maghanap o magsaliksik?

• Ano ang interesante o kapana-panabik tungkol sa paghahanap o pagsasaliksik?

• Ano ang maaaring maging mahirap o nakapanghihina ng loob tungkol dito?

Ang paanyaya ng Tagapagligtas

Basahin ang 3 Nephi 23:1–5, at alamin ang iniutos sa atin ng Tagapagligtas na saliksikin at ang mga dahilan kung bakit.

Sabihin sa mga estudyante na ibahagi ang nalaman nila.

Sa mga nakaraang kabanata, madalas banggitin ng Tagapagligtas ang mga salita ni Isaias upang tulungan at pagpalain ang mga Nephita. (Tingnan sa 3 Nephi 16:18–20; 20:32, 34–45; 21:8; 22:1–17.)

• Anong mga dahilan ang ibinigay ng Panginoon para saliksikin natin ang mga salita ni Isaias? (tingnan sa 3 Nephi 23:1–3).

  Maaari kang maglaan ng ilang oras sa klase para talakayin ang kahalagahan ng mga turo ni Isaias. Halimbawa, maaari mong sabihin sa mga estudyante na ibahagi ang nadarama nila tungkol sa mga salita ni Isaias. Maaari nilang basahin at pagnilayan ang mga talata mula sa Isaias at pag-isipan kung bakit mahalagang pag-aralan ang mga ito. Maaaring kabilang sa mga halimbawa ang Isaias 7:14; 9:6–7; 41:10; 49:13–16; 53:1–5; 55:1–3; 61:1–3.

• Ayon sa 3 Nephi 23:5, bakit dapat tayong makinig sa mga salita ng Panginoon at sa mga salita ng mga propeta?

Pakinggang mabuti ang mga sagot ng mga estudyante at maaari mong isulat ang mga ito sa pisara.

Isa sa mahahalagang alituntunin na natutuhan natin sa lesson na ito ay iniuutos sa atin ng Tagapagligtas na sundin ang Kanyang mga salita at masigasig na saliksikin ang mga salita ng mga propeta.

• Ano sa palagay mo ang ibig sabihin ng masigasig na saliksikin ang mga banal na kasulatan?

Pag-isipan sandali ang iyong pag-aaral ng mga banal na kasulatan. Maaaring kabilang dito ang personal na pag-aaral at pag-aaral ng pamilya gayundin ang pag-aaral sa simbahan at seminary. Sa palagay mo ba ay masigasig mong sinasaliksik ang mga banal na kasulatan? Bakit oo o bakit hindi?

• Ano ang ilang dahilan kung bakit maaaring maging mahirap na masigasig na saliksikin ang mga banal na kasulatan?

  Habang nagbabahagi ang mga estudyante, maaari mong isulat sa kabilang bahagi ng pisara ang kanilang mga sagot. Kung naaangkop, maaari mong banggitin ang aktibidad sa paghahanap sa simula ng lesson. Para makapag-isip ng maaaring maging problema, maaaring ihambing ng mga estudyante ang pagsasaliksik sa mga banal na kasulatan sa paghahanap ng mga bagay sa aktibidad.

  Ang isang sagot ay maaaring mahirap maglaan ng oras na saliksikin ang mga banal na kasulatan kapag hindi natin nadarama na may nakikita tayong anumang mahalaga. O maaaring ito ay mahirap unawain o nakakatamad. Ang isa sa pinakamaiinam na mga paraan para madaig ang marami sa mga problemang ito ay ang malaman kung paano maghanap ng mga ideya o katotohanan na makatutulong sa ating buhay.

• Sa kabila ng mga problemang ito, ano ang ilang bagay na nagawa mo na, o magagawa mo, para magkaroon ng makabuluhang karanasan sa pag-aaral ng banal na kasulatan?

Habang sumasagot ang mga estudyante, gumawa ng listahan sa kabilang bahagi ng pisara. Kung kapaki-pakinabang, idagdag ang alinman sa mga sumusunod na halimbawa.

Narito ang ilang halimbawa:

• Manalangin bago ka mag-aral.

• Markahan ang mahahalagang salita at parirala, lalo na ang mga salita at pariralang tumutulong sa iyo na mas makilala ang Tagapagligtas.

• Hanapin ang kahulugan ng mga salita o pariralang mahirap maunawaan.

• Huminto at ibuod ang nabasa mo.

• Gumamit ng mga cross-reference para mas maunawaan ang isang paksa o doktrina.

kinakausap ni Cristo si Nephi tungkol sa mga talaan

Para masanay sa paggawa ng dalawa sa mga kasanayang ito, basahin ang 3 Nephi 23:6–14 at gawin ang mga sumusunod:

• Ibuod ang nabasa mo gamit ang sarili mong mga salita.

• Markahan ang anumang salita o parirala na tumutulong sa iyo na mas maunawaan ang Tagapagligtas.

  Sabihin sa mga estudyante na ibahagi ang nahanap nila. Para magawa ito, maaari silang gumawa nang magkakapartner, kung saan ibinubuod ng isang estudyante ang mga talata at ipinapaliwanag ng kanyang kapartner ang mga salita o parirala na tumutulong sa kanila na maunawaan ang Tagapagligtas.

  Kung nahihirapan ang mga estudyante na ibuod ang nabasa nila, maaari mong ipaliwanag na hiniling ng Tagapagligtas na makita ang mga talaan ng mga Nephita. Binigyang-diin Niya na ang propesiya ni Samuel tungkol sa mga banal na nabuhay na mag-uli na nagpakita sa marami (tingnan sa Helaman 14:25) ay natupad, ngunit ang katuparang iyon ay hindi naisulat sa mga talaan. Iniutos ng Tagapagligtas sa mga Nephita na isulat ang salaysay na ito.

• Anong mga salita ang naglilinaw na mahalaga sa Tagapagligtas kung ano ang nakasulat sa banal na kasulatan?

• Paano maaaring makaapekto ang kaalamang ito tungkol sa Tagapagligtas sa pag-aaral mo ng mga banal na kasulatan?

Pagsasagawa ng epektibong pag-aaral ng mga banal na kasulatan

Maglaan ng ilang minuto na masigasig na saliksikin ang mga banal na kasulatan. Maaari mong piliing pag-aralan ang isang kabanata o saliksikin ang mga talata tungkol sa isang paksang gusto mo pang malaman. Gumamit ng kahit isang kasanayan sa pag-aaral ng mga banal na kasulatan na naisip o natuklasan mo sa listahan sa itaas.

Bigyan ng sapat na oras ang mga estudyante para magbasa at magnilay. Sabihin sa mga estudyante na magbahagi ng isang bagay na napag-aralan nila na makabuluhan sa kanila at kung anong mga kasanayan ang ginamit nila. Ang mga sumusunod na tanong ay naglalayong tumulong sa talakayan.

• Anong paraan sa pag-aaral ang ginamit mo? Bakit maaaring makatulong ito sa iyo para mas masigasig kang mag-aral?

• Ano ang natutuhan mo tungkol sa Tagapagligtas na hindi mo pa naunawaan noon?

• Alin sa mga kasanayang ito ang gagamitin mo sa iyong pag-aaral ng mga banal na kasulatan sa hinaharap? Paano mo ito gagawin?

Sa darating na linggo, pagnilayan ang natutuhan mo ngayon sa araw na ito. Pumili ng isang paraan na mapagsisikapan mong mas masigasig na saliksikin ang mga banal na kasulatan. Isipin kung paano ito makatutulong sa iyo sa buhay mo.

Komentaryo at Impormasyon ng Konteksto

Ano ang ilang pagpapala na maaaring magmula sa pag-aaral ng mga banal na kasulatan?

Itinuro ni Elder Richard G. Scott (1928–2015) ng Korum ng Labindalawang Apostol:

Elder Richard G. Scott

Ang pagninilay sa isang talata ay susi sa paghahayag at patnubay at inspirasyon ng Espiritu Santo. Kayang panatagin ng banal na kasulatan ang balisang kaluluwa, at magdulot ng kapayapaan, pag-asa, at pagbabalik ng tiwala ng isang tao sa kanyang kakayahang labanan ang mga hamon ng buhay. May kapangyarihan itong panatagin ang mga nasaktang damdamin kapag mayroong pananampalataya sa Tagapagligtas. Mapabibilis nito ang pisikal na paggaling. (Richard G. Scott, “Ang Bisa ng Banal na Kasulatan,” Liahona, Nob. 2011, 6)

Paano makatutulong sa pamilya ko ang pagbabasa ng Aklat ni Mormon?

Itinuro ni Pangulong Henry B. Eyring ng Unang Panguluhan:

Pangulong Henry B. Eyring

Sa pamamagitan ng Aklat ni Mormon matuturuan din tayo ng Panginoon tungkol sa pagsama at paglilingkod sa mga tao. Ang aklat na ito ay naghahayag ng kalooban ng Panginoon para sa buhay may-pamilya sa paraang hindi natalakay sa iba pang mga banal na kasulatan. Naniniwala ako na iyan ay dahil sa nakalulugod na istruktura nito. Ito ay tungkol sa mga pamilya; ito ay tungkol sa mga ugnayan ng mga tao. Nagsisimula ito sa mga pamilya, nagtatapos ito sa pamilya, at natututo tayong mahalin ang mga pamilyang ito. (Henry B. Eyring, “A Discussion on Scripture Study,” Liahona, Hulyo 2005, 22)

Paano ko mapagbubuti ang sarili kong pag-aaral ng mga banal na kasulatan?

Itinuro ni Elder David A. Bednar ng Korum ng Labindalawang Apostol:

Elder David A. Bednar

Ang isa sa pinakamainam na mga paraan para mapalapit sa Kanya at kapwa matuto at maging higit na katulad ng Panginoong Jesucristo ay ang laging pag-aralan ang mga banal na kasulatan—na araw-araw na “magpakabusog … sa mga salita ni Cristo” (2 Ne. 32:3).

Mapapansin ninyong ginamit ko ang salitang pag-aralan at hindi ang salitang basahin. Ang pag-aaral at pagpapakabusog ay nagpapahiwatig ng pagtutuong mabuti at marubdob na pagsisikap at hindi lang kaswal o mabilisang pagbabasa. Ang pag-aaral at pagpapakabusog, na [sinundan] ng taimtim na panalangin at matibay na pamumuhay ng mga katotohanan at alituntuning natutuhan natin, ang nagiging batayan ng personal na desisyon, espirituwal na katapatan, at maningning na liwanag ng patotoo. Ang pag-aaral, pagkatuto, pagdarasal, at angkop na pamumuhay ng mga katotohanan ng ebanghelyo ay pawang mga pangunahing elemento sa proseso ng paglapit sa Tagapagligtas. (David A. Bednar, “Dahil Nasa Harapan Natin ang mga Ito,” Liahona, Abr. 2006, 16)

Mga Karagdagang Aktibidad sa Pag-aaral

3 Nephi 23:1. “Dakila ang mga salita ni Isaias”

Ang aktibidad na ito ay makahihikayat sa mga estudyante na pag-aralan ang mga salita ni Isaias. Maaaring basahin ng mga estudyante ang 3 Nephi 20:11; 23:1, kung saan iniutos sa atin ng Tagapagligtas na saliksikin ang mga salita ni Isaias. Maaari ding basahin ng mga estudyante ang 1 Nephi 19:23; 2 Nephi 6:5; 25:7–8, at alamin ang mga karagdagang dahilan para pag-aralan ang Isaias.

Pagkatapos ay sabihin sa mga estudyante na saliksikin ang mga turo ni Isaias para sa mga kaalamang mahalaga sa kanila. Ang ilang halimbawa ay Isaias 1:18; 9:6; 26:3–4; 40:31; 41:10; 48:17; 53:3–5; 55:1, 8–9.

Pagbibigay-diin sa seminary

Habang tinatalakay ng mga estudyante kung paano masigasig na saliksikin ang mga banal na kasulatan, kilalanin ang kanilang pagdalo sa seminary at pag-aaral ng mga banal na kasulatan sa klase. Ang isa sa mga layunin ng seminary ay tulungan ang kabataan na mas mapalapit sa Tagapagligtas sa pamamagitan ng mga banal na kasulatan. Maaari mong itanong, “Paano nakatulong sa iyo ang seminary na mas masigasig na saliksikin ang mga banal na kasulatan?”

Pagsusulat ng mga espirituwal na karanasan

Kung makatutulong na magtuon sa pagsusulat ng mga espirituwal na karanasan, magdala ng isang journal, o magpakita ng mga larawan o video ng mga alaala mula sa iyong buhay. Maaari mo ring sabihin sa mga estudyante na dalhin sa klase ang sarili nilang journal, mga larawan, o video para ipakita ang mga ito. Itanong kung bakit mahalaga ang pagsusulat ng mga karanasan.

Sabihin sa mga estudyante na basahin ang 3 Nephi 23:6–13, at alamin ang karanasan ng mga Nephita na hindi nila naisulat. Tulungan ang mga estudyante na matukoy ang katotohanan na ang pagsusulat ng mga espirituwal na karanasan ay makatutulong para mapalakas ang ating pananampalataya at pananampalataya ng iba.

Maaari mong ibahagi ang karanasan ni Pangulong Henry B. Eyring sa pagsusulat ng mga espirituwal na karanasan na ibinahagi niya sa kanyang mensaheng “O Tandaan, Tandaan” (Liahona, Nob. 2007, 66–69). O magbahagi ng isang halimbawa mula sa “Mga Alaala na Espirituwal na Nagpapatibay” ni Elder Neil L. Anderson (Liahona, Mayo 2020, 18–22) at basahin ang huling dalawang talata ng mensahe.

Bigyan ng oras ang mga estudyante na isulat ang sarili nilang mga espirituwal na karanasan. Tulungan silang maunawaan na ang mga espirituwal na karanasan ay maaaring hindi matindi o pambihira, ngunit simple at napakahalaga rin. Sabihin sa mga estudyante na ibahagi kung bakit ang pagsusulat ng mga personal na espirituwal na karanasan ay makapagpapalakas sa ating pananampalataya at sa pananampalataya ng iba.