3 Nephi 24

Ang Batas ng Ikapu ng Panginoon

Ano ang ipinangako sa atin ng Panginoon kung magbabayad tayo ng ikapu? Ginamit ng Tagapagligtas ang mga salita ni Malakias para ituro sa mga Nephita ang tungkol sa batas ng ikapu at sa mga pagpapala ng pagsunod sa kautusang ito. Layunin ng lesson na ito na tulungan kang makadama ng hangaring magbayad ng ikapu.

Pagtuturo ng mga banal na kasulatan nang may pananalig at layunin. Ang ilang katotohanan ng ebanghelyo ay tila mahirap maunawaan at maipamuhay ng mga estudyante. Tulungan ang mga estudyante na makita ang kaugnayan ng mga turong ito. Ibahagi ang iyong patotoo sa katotohanan ng mga alituntuning ito at ang mga pagpapalang ipinagkakaloob ng Panginoon sa mga kumikilos nang may pananampalataya.

Paghahanda ng estudyante: Sabihin sa mga estudyante na basahin ang 3 Nephi 24:8–10 at isipin ang mga karanasan nila o ng iba sa batas ng ikapu ng Panginoon.

Mga Posibleng Aktibidad sa Pag-aaral

Ang iyong mga karanasan

Ang mga sumusunod na sitwasyon ay naglalayong tulungan ang mga estudyante na pag-isipan ang kanilang mga karanasan sa batas ng ikapu ng Panginoon. Huwag mag-atubiling iangkop ang mga ito kung ang iba ay mas nauugnay sa iyong mga estudyante.

Bilang alternatibo, magpakita ng isang tithing slip o barya at itanong sa mga estudyante ang kanilang nauunawaan, mga karanasan, at mga tanong tungkol sa ikapu.

Basahin ang mga sumusunod na sitwasyon, at hanapin ang yaong sa palagay mo ay pinakanauugnay sa iyo o sa mga kabataan sa iyong lugar:

• Nag-iipon ng pera si Carlos para makabili ng telepono. Hindi niya naisip na magbayad ng ikapu.

• Palaging nagbabayad si Sita ng ikapu noong bata pa siya, ngunit ngayong may trabaho na siya at kumikita ng mas maraming pera, naging mas mahirap itong gawin.

• Ibinibigay ni Oneka ang lahat ng perang kita niya para tulungan ang kanyang pamilya. Inisip niya kung kinakailangan niyang magbayad ng ikapu gayong kailangan ng kanyang pamilya ang pera.

• Hindi kumikita ng pera si Anjum, kaya iniisip niya kung paano o kung angkop sa kanya ang batas ng ikapu.

• Sa iyong palagay, aling mga sitwasyon ang pinakakaugnay-ugnay? Bakit?

Maaari mong isulat sa pisara ang mga sagot ng mga estudyante sa susunod na tanong.

• Anong mga tanong o alalahanin ang maaaring mayroon ang mga kabataan tungkol sa ikapu?

Maaaring pag-isipan o sagutin ng mga estudyante ang mga sumusunod na tanong sa kanilang study journal. Dahil personal ang mga tanong na ito, huwag ipabahagi sa mga estudyante ang kanilang mga sagot.

Isipin ang sarili mong mga karanasan at naunawaan tungkol sa ikapu. Nagbabayad ka ba ng ikapu, o handa ka bang magbayad ng ikapu? Bakit oo o bakit hindi? Ano ang natutuhan mo mula sa mga karanasan mo sa ikapu? Habang pinag-aaralan mo ang lesson na ito, hingin ang patnubay ng Espiritu Santo para matulungan kang sundin ang batas na ito.

Ang batas ng ikapu ng Panginoon

Habang nagtuturo sa mga Nephita, iniutos ni Jesus sa kanila na isulat ang mga salitang isinulat ni Malakias humigit-kumulang 400 taon na ang nakararaan. Ipinropesiya ni Malakias ang Ikalawang Pagparito ni Jesucristo at ang tungkulin ng Tagapagligtas sa paghatol sa masasama (tingnan sa 3 Nephi 24:1–6).

Basahin ang 3 Nephi 24:7, at alamin ang problemang kinaharap ng mga tao sa panahon ni Malakias.

• Paano kaya natutulad ang mga Nephita sa mga tao sa panahon ni Malakias?

• Ano ang ipinangako ng Panginoon sa mga tao kung babalik sila sa Kanya?

Upang mahikayat ang mga tao na bumalik sa Panginoon at maghanda para sa Kanyang pagparito, ang Panginoon, sa pamamagitan ni Malakias, ay nagturo tungkol sa ikapu.

Basahin ang 3 Nephi 24:8–12 at maaari mong markahan ang itinuro ng Panginoon tungkol sa batas ng ikapu. Tandaan na “ang maninila” (talata 11) ay maaaring tumukoy sa mga peste, tagtuyot o pagbaha, at maging kay Satanas.

• Ano ang pinakamahalaga para sa iyo mula sa mga talatang ito?

  Pasalamatan ang mga estudyante para sa ibinahagi nila. Maaari mong hilingin sa kanila na ipaliwanag kung bakit pinakamahalaga para sa kanila ang mga bagay na ibinahagi nila.

• Paano maaaring maging katulad ng pagnanakaw sa Diyos ang pagtangging magbayad ng ikapu?

  Maaari mong i-display ang sumusunod na hindi kumpletong pangungusap.

• Paano mo tatapusin ang sumusunod na pangungusap: “Kung susundin natin ang batas ng ikapu ng Panginoon …”?

Narito ang isang paraan na maaaring kumumpleto sa pangungusap: Kung susundin natin ang batas ng ikapu ng Panginoon, ibubuhos Niya ang mga pagpapala sa atin.

Sa panahon ni Malakias at sa panahon ng mga Nephita, malamang na nagbayad ang mga Banal ng ikapu sa pamamagitan ng pagbibigay ng ikasampung bahagi ng kanilang pagkain o ari-arian. Ngayon, “ibinibigay ng mga miyembro ng Simbahan ang ikasampung bahagi ng kanilang kita sa Panginoon sa pamamagitan ng Kanyang Simbahan. Ang mga pondong ito ay ginagamit upang maitatag ang Simbahan at maisulong ang gawain ng Panginoon sa iba’t ibang panig ng mundo” (Mga Paksa ng Ebanghelyo “Ikapu,” topics.ChurchofJesusChrist.org). Kung walang kinikita ang isang tao, hindi niya kailangang magbayad ng ikapu, bagama’t dapat maging handa siya sa hinaharap.

Ginamit ng Panginoon ang mga nakapupukaw at malinaw na parirala kapag nagsasalita Siya tungkol sa ikapu: “Subukin ninyo ako … kung hindi ko bubuksan sa inyo ang mga durungawan ng langit, at ibubuhos sa inyo ang isang pagpapala na walang sapat na lugar na mapaglalagyan nito” (3 Nephi 24:10).

• Ano sa palagay mo ang binibigyang-diin ng Panginoon sa mga salita at pariralang ginamit Niya? Ano ang natututuhan mo tungkol sa Kanya?

Magdrowing sa pisara ng isang malaking bintana at anyayahan ang mga estudyante na isulat dito ang mga pagpapala ng pagsunod sa batas ng ikapu. Maaaring kopyahin ng mga estudyante ang bintana at ang nakalistang mga pagpapala sa kanilang journal. Ang sumusunod ay makatutulong sa mga estudyante na mag-isip o maghanap ng mga ideya:

• Basahin ang Doktrina at mga Tipan 64:23.

• Basahin ang mga talata sa ilalim ng heading na “Aral Bilang 1—Mahalaga ngunit Hindi Napapansing mga Pagpapala” sa mensahe ni Elder David A. Bednar na “Mga Dungawan sa Langit” (Liahona, Nob. 2013, 17–20).

• Isipin ang sarili mong mga karanasan at ang mga karanasan ng mga taong kilala mo sa pagbabayad ng ikapu.

• I-text ang isang magulang o lider ng Simbahan para tanungin kung anong mga pagpapala ang naranasan niya sa pagbabayad ng kanyang ikapu.

Kung kailangan ng mga estudyante ng tulong sa pagtukoy ng mga pagpapala, maaaring makatulong ang bahaging “Komentaryo at Impormasyon ng Konteksto” o ang “Mga Karagdagang Aktibidad sa Pag-aaral” ng lesson na ito.

Sabihin sa ilang estudyante na bilugan sa pisara ang isang pagpapala na makabuluhan sa kanila o gugustuhin nila sa kanilang buhay. Anyayahan silang ibahagi kung bakit.

• Paano naiimpluwensyahan ng mga pagpapalang ito ang hangarin mong magbayad ng ikapu?

• Sa iyong palagay, bakit iniutos ng Panginoon sa Kanyang mga tao na magbayad ng ikapu?

• Paano nakatutulong sa atin ang pagsunod sa batas ng ikapu na “makabalik” (3 Nephi 24:7) o maging mas malapit sa Panginoon?

Personal na pagsasabuhay

Isipin ang natutuhan at nadama mo ngayon habang binabasa mo ang sumusunod na pahayag ni Elder David A. Bednar ng Korum ng Labindalawang Apostol:

Ang tapat na pagbabayad ng ikapu ay higit pa sa tungkulin; ito ay mahalagang hakbang sa pagpapabanal ng sarili. Kayo na nagbabayad ng ikapu, pinupuri ko kayo.

At kayo na hindi sumusunod sa batas ng ikapu sa kasalukuyan, inaanyayahan ko kayo na pag-isipan ang inyong ginagawa at magsisi. Pinatototohanan ko na sa pagsunod ninyo sa batas na ito ng Panginoon, ang mga dungawan sa langit ay mabubuksan sa inyo. (David A. Bednar, “Mga Dungawan sa Langit,” Liahona, Nob. 2013, 20)

Ipaalala sa mga estudyante ang simula ng lesson at ang maaaring mga tanong ng mga kabataan tungkol sa ikapu. Itanong sa mga estudyante kung may anumang napag-aralan sila na nakatulong sa mga tanong na binanggit nila. O maaari mong anyayahan ang mga estudyante na isulat ang nadarama nila tungkol sa ikapu.

Isulat sa iyong study journal ang nadarama mo tungkol sa ikapu at bakit. Kung sa palagay mo ay mahirap o magiging mahirap para sa iyo ang pagbabayad ng ikapu, isama ang magagawa mo para maanyayahan ang Panginoon na sagutin ang iyong mga tanong at tugunin ang iyong mga alalahanin.

Komentaryo at Impormasyon ng Konteksto

Saan ko pa matututuhan ang tungkol sa batas ng ikapu?

Para mas maunawaan pa ang tungkol sa ikapu, maaari mong pag-aralan ang sumusunod na resources:

• Mga Paksa ng Ebanghelyo, “Ikapu,” topics.ChurchofJesusChrist.org

• Doktrina at mga Tipan 119–120

• Gabay sa mga Banal na Kasulatan, “Ikapu,” scriptures.ChurchofJesusChrist.org

Ano ang ilang pagpapalang natatanggap natin dahil sa pagbabayad ng ating ikapu?

Itinuro ni Elder David A. Bednar ng Korum ng Labindalawang Apostol:

Sa mga dungawan ng gusali pumapasok ang natural na liwanag. Sa gayon ding paraan, ang pagkaunawa at kaalamang espirituwal ay ibinubuhos sa ating buhay mula sa mga dungawan sa langit kapag sinunod natin ang batas ng ikapu. (David A. Bednar, “Mga Dungawan sa Langit,” Liahona, Nob. 2013, 18)

Binigyang-diin din ni Elder Bednar ang sumusunod tungkol sa mga pagpapala ng batas ng ikapu ng Panginoon:

Madalas kapag itinuturo [at pinatototohanan] natin ang batas ng ikapu, binibigyang-diin natin ang mga daglian, malalaki at madaling napapansing temporal na pagpapala sa atin. At talaga namang ibinibigay ang gayong mga pagpapala. Gayunpaman ang ilan sa maraming pagpapala na natatamo natin kapag sinunod natin ang kautusang ito ay mahalaga ngunit hindi napapansin. Ang gayong pagpapala ay mahihiwatigan lamang kung tayo ay espirituwal na nakatuon at mapagmasid (tingnan sa 1 Corinto 2:14). …

Halimbawa, ang hindi napapansin ngunit mahalagang pagpapalang natatanggap natin ay ang espirituwal na kaloob na pasasalamat sa kung ano ang mayroon tayo at pagpipigil na maghangad ng gusto lamang natin. (David A. Bednar, “Mga Dungawan sa Langit,” Liahona, Nob. 2013, 17–18)

Para sa karagdagang partikular na mga halimbawa ng “mahalaga ngunit hindi napapansin” na mga pagpapala, tingnan ang buong mensahe ni Elder Bednar na (“Mga Dungawan sa Langit,” Liahona, Nob. 2013, 17–20).

Mga Karagdagang Aktibidad sa Pag-aaral

3 Nephi 24:1–6. Paghahanda para sa Ikalawang Pagparito

Magpakita ng isang paglalarawan ng Ikalawang Pagparito ng Tagapagligtas at anyayahan ang mga estudyante na magbahagi ng mga paraan na makapaghahanda sila para dito. Sabihin sa mga estudyante na basahin ang 3 Nephi 24:1–6, at alamin (1) ang natutuhan nila tungkol kay Jesucristo at sa Kanyang Ikalawang Pagparito at (2) mga parirala na makatutulong sa kanila na maghanda para sa Ikalawang Pagparito.

Tulungan ang mga estudyante na maunawaan ang sumusunod:

• Ang sugo sa talata 1 ay maaaring tumutukoy kay Juan na Tagapagbautismo at kay Joseph Smith (tingnan sa Bruce R. McConkie, A New Witness for the Articles of Faith [1985], 629). Sa makabagong paghahayag, nakikita rin natin na ang pagpapanumbalik ng ebanghelyo mismo ay isang sugong ipinadala bago ang Ikalawang Pagparito ng Tagapagligtas (tingnan sa Doktrina at mga Tipan 45:9).

• Ang isang maglalantay ay gumagamit ng apoy upang painitin ang isang metal at alisin ang karumihan nito.

• Ang tagapagpaputi ay naglilinis o nagpapaputi ng mga kasuotan gamit ang sabon.

Ang isang alituntunin na matututuhan ng mga estudyante ay ipinadala ng Panginoon si Joseph Smith upang ihanda ang mundo para sa Ikalawang Pagparito ni Jesucristo. Maaaring ilista ng mga estudyante ang mga paraan na tumulong si Joseph Smith sa paghahanda ng mundo para sa Ikalawang Pagparito.

3 Nephi 24:8. Mga Handog

Kung kailangan ng mga estudyante ng tulong para maunawaan ang pagkakaiba ng “mga ikapu at mga handog,” maaari mo silang anyayahang pag-aralan ang Gabay sa mga Banal na Kasulatan, “Ayuno, Pag-aayuno,” “Pag-aalay,” “Ikapu,”scriptures.ChurchofJesusChrist.org. Pagkatapos ay maaaring talakayin ng mga estudyante kung paano nagkakatulad ang mga ikapu at mga handog, kung paano nagkakaiba ang mga ito, at ang mga ipinangakong pagpapala ng bawat isa.