3 Nephi 27, Bahagi 1

“Nakatayo sa Aking Ebanghelyo”

binatilyong nagbibigay ng mensahe sa sacrament meeting

Ano ang ilan sa pinakamahahalagang katangian ng Simbahan ng Tagapagligtas? Itinuro ni Jesucristo sa Kanyang mga Nephitang disipulo na ang Kanyang Simbahan ay dapat tawagin alinsunod sa Kanyang pangalan at itayo sa Kanyang ebanghelyo. Ang lesson na ito ay makatutulong sa iyo na maunawaan kung ano ang ebanghelyo ng Tagapagligtas at ang kahalagahan ng pangalan ng Simbahan.

Ihanda ang iyong sarili na maging instrumento ng Espiritu Santo. Itinuro ng Panginoon, “at kung hindi ninyo natanggap ang Espiritu kayo ay hindi magtuturo” (Doktrina at mga Tipan 42:14). Kapag nagsisikap kang tularan ang halimbawa ng pagsunod ng Tagapagligtas at ipinamumuhay mo ang ebanghelyo nang buong puso mo, tutulungan ka ng Espiritu na ituro ang ebanghelyo ni Jesucristo.

Paghahanda ng estudyante: Maaaring anyayahan ang mga estudyante na basahin ang 3 Nephi 27:1–10 at tuklasin ang itinuro ng Tagapagligtas sa Kanyang mga Nephitang disipulo tungkol sa Kanyang Simbahan.

Mga Posibleng Aktibidad sa Pag-aaral

Ano ang isasagot mo?

Ibahagi ang sumusunod na sitwasyon sa mga estudyante. Maaari mo ring anyayahan ang dalawang handang estudyante na isadula ito.

Isang araw habang nagkukuwentuhan ng ginawa nila noong katapusan ng linggo, binanggit ni Naomi sa kaibigan niyang si Marco na nagsimba siya sa araw ng Linggo.

Itinanong ni Marco, “Mormon ka, ’di ba?”

Sinabi ni Naomi, “Kung minsan tinatawag kaming ganoon ng mga tao, pero mas gusto naming tawaging mga miyembro ng Ang Simbahan ni Jesucristo ng mga Banal sa mga Huling Araw.”

Sagot ni Marco, “Ang haba naman niyan. Bakit hindi mo na lang sabihin na kabilang ka sa simbahan ng mga Mormon? Hindi ba kayo nagbabasa mula sa Aklat ni Mormon?”

Maaari mong anyayahan ang mga estudyante na talakayin ang sumusunod na tanong kasama ng isang kapartner o sa maliit na grupo.

• Ano ang ilang paraan na masasagot ni Naomi ang tanong ni Marco?

Ngayon, pag-aaralan mo ang ilan sa mga turo ng Tagapagligtas sa Kanyang mga Nephitang disipulo na nakatala sa 3 Nephi 27. Habang nag-aaral ka, alamin ang mga katotohanang itinuro ni Jesus tungkol sa Kanyang Simbahan na makatutulong sa iyo kapag naharap ka sa mga sitwasyong katulad ng nabasa mo kanina lang.

Ang pangalan ng Simbahan

Hindi nagtagal matapos ang pagdalaw ni Cristo sa mga Nephita, nagkaisa ang Kanyang labindalawang Nephitang disipulo sa pag-aayuno at panalangin. Gusto nilang malaman kung ano ang dapat maging pangalan ng Simbahan. Habang nagdarasal sila, ang Tagapagligtas ay nagpakita at nagsimulang magturo sa kanila (tingnan sa 3 Nephi 27:1–3).

Basahin ang 3 Nephi 27:4–7, at alamin kung ano ang itinuro ng Tagapagligtas sa Kanyang mga disipulo tungkol sa pangalan ng Kanyang Simbahan.

• Ano ang sinabi ng Tagapagligtas na dapat ipangalan sa Kanyang Simbahan?

Maaari mong isulat sa pisara ang sumusunod na katotohanan at mag-iwan ng espasyo sa pisara sa dulo, para makapagdagdag ka sa katotohanan kalaunan sa lesson.

Ang isang katotohanan na matututuhan natin mula sa mga talatang ito ay ang totoong Simbahan ni Jesucristo ay dapat tawagin sa Kanyang pangalan.

• Ano ang mga dahilang ibinigay ng Tagapagligtas kung bakit ipinangalan Niya ang Simbahan sa Kanyang sarili?

Ibinahagi ni Pangulong Russell M. Nelson ang mga dahilan kung bakit mahalagang gamitin natin ang tamang pangalan ng Simbahan:

Pangulong Russell M. Nelson

Ang pangalan ng Simbahan ay hindi pinag-uusapan. Kapag malinaw na ipinapahayag ng Tagapagligtas ang dapat ipangalan sa Kanyang Simbahan, at inuunahan pa Niya ng pahayag na, “Sa ganito tatawagin ang aking simbahan,” seryoso Siya. At kung ginagamit at hinihiram o kinukunsinti pa natin ang mga palayaw na iyon, nasasaktan Siya.

Ano ang nakapaloob sa isang pangalan, o sa kasong ito, sa isang palayaw? Pagdating sa mga palayaw ng Simbahan, tulad ng “Simbahan ng LDS,” ang “Simbahan ni Mormon,” o ang “Simbahan ng mga Banal sa mga Huling Araw,” ang pinakamalinaw na nawawala ay ang pangalan ng Tagapagligtas. Malaking tagumpay para kay Satanas ang maalis ang pangalan ng Panginoon sa Simbahan ng Panginoon. Kapag inaalis natin ang pangalan ng Tagapagligtas, unti-unti nating binabalewala ang lahat ng ginawa ni Jesucristo para sa atin—maging ang Kanyang Pagbabayad-sala. (Russell M. Nelson, “Ang Tamang Pangalan ng Simbahan,” Liahona, Nob. 2018, 87–88)

• Ano ang pinakanapansin mo sa pahayag ni Pangulong Nelson?

• Sa iyong palagay, paano nakakaapekto ang ating mga pagsisikap na gamitin ang tamang pangalan ng Simbahan sa mga hindi miyembro ng Simbahan?

Bilang bahagi ng talakayan tungkol sa naunang tanong, maaari mong panoorin ang isa o mahigit pang video mula sa bahaging “Komentaryo at Impormasyon ng Konteksto” sa ilalim ng heading na “Ano ang maaaring mangyari kapag ginagamit natin ang tamang pangalan ng Simbahan?”

“Nakatayo sa aking ebanghelyo”

Bukod sa pagbibigay-diin na ang Kanyang Simbahan ay dapat tawagin sa Kanyang pangalan, itinuro ng Tagapagligtas sa Kanyang mga Nephitang disipulo ang isa pang mahalagang katangian ng Kanyang Simbahan.

Basahin ang 3 Nephi 27:8–10, at hanapin ang katangiang ito.

• Mula sa mga talatang ito, ano ang maidaragdag mo sa katotohanan na nakasulat sa bold letter na natukoy mo kanina tungkol sa Simbahan ng Tagapagligtas?

Maaari mong i-update ang katotohanang isinulat mo kanina sa pisara sa isang bagay na katulad ng sumusunod.

Ang isang paraan na maibubuod natin ang mga turo ng Tagapagligtas na napag-aralan mo na ay ang totoong Simbahan ni Jesucristo ay dapat tawagin sa Kanyang pangalan at itayo sa Kanyang ebanghelyo.

• Ano sa palagay mo ang ibig sabihin ng itatayo ang Simbahan ng Tagapagligtas sa Kanyang ebanghelyo?

Maaaring makatulong na maunawaan na ang ibig sabihin ng salitang ebanghelyo ay “mabuting balita” (tingnan sa Bible Dictionary, “Gospels”).

Upang matulungan kang maunawaan ang mahahalagang aspeto ng ebanghelyo ng Tagapagligtas, magdrowing ng simpleng larawan ng isang gusali ng simbahan sa iyong study journal, tulad ng sumusunod. Tiyaking mag-iwan ng espasyo para pagsulatan ng mga salita at parirala sa ilalim ng simbahan.

Magdrowing ng isang larawan ng simbahan sa pisara para magamit ito bilang bahagi ng inyong talakayan.

line drawing ng meetinghouse

Basahin ang 3 Nephi 27:13–22, at alamin ang sinabi ni Jesucristo kung ano ang Kanyang ebanghelyo. Isulat sa espasyo sa ilalim ng iyong drawing ang mga salita o parirala na mahahanap mo.

Sabihin sa iba’t ibang estudyante na ilista sa ilalim ng larawan ng simbahan sa pisara ang mga salita o parirala na natukoy nila. Pagkatapos ay talakayin ang natutuhan ng mga estudyante mula sa pag-aaral nila ng mga talatang ito sa pamamagitan ng pagtatanong ng tulad ng sumusunod.

• Batay sa mga talatang pinag-aralan mo, paano mo ilalarawan kung ano ang ebanghelyo ng Tagapagligtas?

Bigyang-diin ang mga partikular na aspeto ng ebanghelyo ng Tagapagligtas na nakalista sa pisara. Tulungan ang mga estudyante na maunawaan ang kahalagahan ng mga aspetong ito sa pamamagitan ng pagtatanong nang ganito: Sa iyong palagay, bakit maituturing na mabuting balita ang aspetong ito ng ebanghelyo ng Tagapagligtas? Sa iyong palagay, bakit mahalaga para sa Simbahan ng Tagapagligtas na “nakatayo sa” (o nakatuon sa) turo o alituntuning ito? Paano makakaimpluwensya ang aspetong ito ng ebanghelyo ng Tagapagligtas sa iyong buhay?

Kapag natapos na ang talakayan ninyo, maaari mong balikan ang sitwasyon mula sa simula ng lesson at sabihin sa mga estudyante na tugunin ito gamit ang natutuhan nila.

Komentaryo at Impormasyon ng Konteksto

Ano ang maaaring mangyari kapag ginamit natin ang tamang pangalan ng Simbahan?

Ipinangako ni Pangulong Russell M. Nelson:

Pangulong Russell M. Nelson

Mahal kong mga kapatid, ipinapangako ko na kung gagawin natin ang lahat para ipanumbalik ang tamang pangalan ng Simbahan ng Panginoon, ibubuhos Niya na nagmamay-ari ng Simbahang ito ang Kanyang kapangyarihan at mga pagpapala sa mga Banal sa mga Huling Araw, sa mga paraang hindi pa natin nakita kailanman. Magkakaroon tayo ng kaalaman at kapangyarihan ng Diyos para tulungan tayong dalhin ang mga pagpapala ng ipinanumbalik na ebanghelyo ni Jesucristo sa bawat bansa, lahi, wika, at tao at ihanda ang mundo para sa Ikalawang Pagparito ng Panginoon. (Russell M. Nelson, “Ang Tamang Pangalan ng Simbahan,” Liahona, Nob. 2018, 89)

Para makakita ng mga halimbawa ng kabutihan na nagmula sa mga tao na gumagamit ng tamang pangalan ng Simbahan, panoorin ang ilan o ang lahat ng sumusunod na video:

“Ang Tamang Pangalan ng Simbahan” (mula sa time code na 11:34 hanggang 13:07).

“Ang Pangalan ng Simbahan Ay Hindi Dapat Mababago” (mula sa time code na 4:36 hanggang 6:41).

“Ang Pangalan ng Simbahan Ay Hindi Dapat Mababago” (mula sa time code na 10:45 hanggang 12:16).

Paano nakatutulong sa atin ang pamumuhay sa ebanghelyo ng Tagapagligtas para maging katulad Niya?

Ipinaliwanag ni Elder Thierry K. Mutombo ng Pitumpu kung paano nakaimpluwensya sa kanya at sa kanyang pamilya ang pag-aaral, pagtanggap, at pagsunod sa ebanghelyo ng Tagapagligtas.

Elder Thierry K. Mutombo

Nang simulan naming kausapin ang mabubuting missionary na ito, na parang mga anghel na nagmula sa Diyos, napansin ko na may nagsimulang magbago sa aming pamilya. Pagkatapos ng aming binyag, talagang nagsimulang magbago ang estilo ng aming pamumuhay dahil sa ipinanumbalik na ebanghelyo. Sinimulang palaguin ng mga salita ni Cristo ang aming kaluluwa. Sinimulan nitong liwanagin ang aming pang-unawa at naging masarap iyon para sa amin, dahil ang mga katotohanang natanggap namin ay madaling unawain at nakikita namin ang liwanag, at ang liwanag na ito ay mas lumiliwanag araw-araw.

Ang pag-unawang ito sa layunin ng ebanghelyo ay tumutulong sa amin na maging lalong katulad ng Tagapagligtas. (Thierry K. Mutombo, “Kayo’y Magiging Malaya,” Liahona, Mayo 2021, 51)

Pagpapanood ng Video

Para mapanood ang paglalarawan sa Tagapagligtas na nagtuturo sa Kanyang mga Apostol tungkol sa Kanyang Simbahan at sa Kanyang ebanghelyo, panoorin ang “Ipinahayag ni Jesucristo ang Pangalan ng Kanyang Simbahan at ang Kanyang Doktrina” mula sa time code na 0:00 hanggang 5:26.

Mga Karagdagang Aktibidad sa Pag-aaral

Alternatibong simula sa lesson

Maaari mong anyayahan ang mga estudyante na ipagpalagay na bubuo sila ng isang grupo na kasama ang ilang kaibigan para sa isang bagay na kinahihiligan nila (sport, grupo ng mga musikero, atbp.). Sabihin sa kanila na mag-isip ng isang pangalan na gagamitin nila para sa kanilang grupo. Maaari mong itanong sa kanila kung bakit nila pinili ang pangalang iyon at kung ano ang maaaring iparating ng pangalan sa iba tungkol sa kanilang grupo. Pagkatapos ay ipabasa sa kanila ang 3 Nephi 27:4–7, at alamin ang pangalang ibinigay ng Tagapagligtas para sa Kanyang Simbahan at kung bakit Niya ibinigay ang pangalang iyon.

3 Nephi 27:11. Kagalakan nang kaunting panahon

Ang ilan ay maaaring nag-aalala sa ibang tao sa labas ng Simbahan na tila nakadarama ng kaligayahan at kalayaan. Maaari mong ibahagi ang ikinuwento ni Elder Robert C. Gay tungkol sa isang kabataang babae na nagtanong nang ganito: “‘Nag-break na kami ng boyfriend ko, at pinili niyang lisanin ang Simbahan. Sinabi niya sa akin na ngayon lang siya naging masaya. Paano nangyari iyon?’” (“Taglayin sa Ating Sarili ang Pangalan ni Jesucristo,” Liahona, Nob. 2018, 99). Sabihin sa mga estudyante na isipin kung ano ang isasagot nila. Maaaring pag-aralan ng mga estudyante ang 3 Nephi 27:10–17, at alamin ang itinuro ng Tagapagligtas na makatutulong sa pagsagot nila.

3 Nephi 27:13–15. Si Cristo ay itinaas sa krus

Ginamit ng Tagapagligtas ang nakapupukaw na larawan ng krus para ipaalala sa mga tao ang ginawa Niya para sa kanila. Dahil Siya ay itinaas, tayo rin ay itataas, o ibabangon mula sa libingan (mabubuhay na mag-uli), upang pagkatapos nito tayo ay mahatulan. Maaari mong ipabasa sa mga estudyante ang Juan 3:14–17 at i-cross-reference ito sa 3 Nephi 27:14 sa kanilang mga banal na kasulatan.