3 Nephi 28

Pagnanais na Madala ang Iba kay Jesucristo

Ang isa sa mga pinakadakilang hangarin na maaaring madama natin sa ating buhay ay tulungan ang ibang tao na matanggap ang mga pagpapalang ibinibigay ni Jesucristo at ng Kanyang Pagbabayad-sala (tingnan sa Doktrina at mga Tipan 15:6). Ipinakita ito ng tatlo sa mga disipulong Nephita sa kakaibang paraan nang naisin nilang manatili sa mundo at magdala ng mga kaluluwa kay Jesucristo hanggang sa Kanyang Ikalawang Pagparito. Layunin ng lesson na ito na tulungan kang magkaroon ng higit na hangaring dalhin ang iba kay Jesucristo.

Pagtulong sa mga estudyante na matutong magtiwala kay Jesucristo. Sa pagsisikap ng mga estudyante na sundin si Jesucristo, maaaring makadama sila ng pag-aalinlangan tungkol sa kanilang mga kakayahan na gampanan ang kanilang mga tungkulin o gawain. Ipaalala sa mga estudyante na kapag kumilos sila nang may pananampalataya, mapapalakas sila ng Panginoon. Hikayatin silang humingi ng patnubay at tapang sa pamamagitan ng pagdarasal sa Ama sa Langit.

Paghahanda ng estudyante: Sabihin sa mga estudyante na isipin ang mga karanasan nila sa pagbabahagi ng ebanghelyo at kung ano ang nakatulong sa kanila na hangaring gawin ang ginawa nila.

Mga Posibleng Aktibidad sa Pag-aaral

Ano ang ninanais mo?

Maaari mong anyayahan ang mga estudyante na pag-isipan ang mga sumusunod na tanong.

• Ano ang isasagot mo kung magpakita sa iyo si Jesucristo at magtanong ng, “Ano ba ang [iyong] hihilingin sa akin?”

• Bakit ito ang pinili mo?

Maaari mong anyayahan ang ilang estudyante na gustong magbahagi ng mga sagot nila.

Sa panahon ng ministeryo ng Tagapagligtas sa mga Nephita, itinanong Niya ito sa Kanyang mga disipulo (tingnan sa 3 Nephi 28:1).

Basahin ang 3 Nephi 28:2–6, at alamin kung paano tinugon ng mga Nephitang disipulo ang tanong ng Tagapagligtas.

• Ano ang nalaman mo?

Sa talata 6, binanggit ng Tagapagligtas na ninais ng tatlo sa mga Nephitang disipulo ang gayon ding bagay na ninais ni Juan na Pinakamamahal. Basahin ang Doktrina at mga Tipan 7:1–3, at alamin ang ninais ni Juan.

• Sa iyong palagay, bakit ninais ng tatlong disipulong ito na manatili sa mundo?

Isipin ang sarili mong hangaring dalhin ang mga tao kay Jesucristo. Maaaring makatulong sa iyo ang mga sumusunod na pagsusuri sa sarili para magawa ito.

Maaari mong i-display ang sumusunod na aktibidad at anyayahan ang mga estudyante na tahimik na suriin ang kanilang sarili. Huwag ipabahagi sa mga estudyante ang kanilang mga sagot sa mga klase.

Sagutin ang bawat isa sa mga sumusunod na pahayag gamit ang isa sa mga sagot na ito: “palagi,” “kung minsan,” o “bihira.”

1. Naghahanap ako ng mga pagkakataong sabihin sa mga tao ang tungkol kay Cristo.

2. Nagdarasal ako para sa mga pagkakataong makahanap ng mga taong kakausapin tungkol kay Cristo.

3. Nais kong tulungan ang iba na sundin si Jesucristo.

Pag-ibayuhin ang iyong hangarin na tulungan ang iba na lumapit kay Cristo

Bukod pa sa pagdrowing ng mga estudyante ng sumusunod na larawan sa kanilang study journal, maaari mo itong idrowing sa pisara.

Sa gitna ng isang pahina sa iyong study journal, magdrowing ng isang maliit na stick figure na kumakatawan sa isang tinedyer na walang hangaring ibahagi ang ebanghelyo sa iba. Sa blankong espasyo sa paligid ng stick figure, isulat ang ilan sa mga dahilan kung bakit maaaring walang hangarin ang tinedyer na ito na ibahagi ang ebanghelyo. Mag-iwan ng espasyo para magsulat ng mga katotohanang natutuhan mo habang nag-aaral ka ngayon.

Habang patuloy kang nag-aaral, maghanap ng mga turong makatutulong sa isang tao na makadama ng mas malaking hangaring ibahagi ang ebanghelyo.

Basahin ang 3 Nephi 28:7–10, at alamin ang ipinangako ng Panginoon sa mga Nephitang disipulo na nagnais na manatili sa mundo upang magdala ng mga kaluluwa sa Kanya.

• Anong pagpapala ang ibinigay ni Jesus sa kanila sa talata 7–8 upang matupad nila ang kanilang mga hangarin?

• Ano ang ipinangako ng Tagapagligtas sa Kanyang mga disipulo na matatanggap nila sa talata 9–10 dahil sa kanilang mabubuting hangarin?

Sa ating dispensasyon, nangako ang Panginoon ng mga pagpapala sa mga naghahangad na magdala ng mga kaluluwa sa Kanya. Basahin ang Doktrina at mga Tipan 18:15–16, at alamin ang mga pagpapalang mararanasan natin sa pagdadala ng mga kaluluwa kay Jesucristo.

• Anong katotohanan ang matututuhan natin mula sa mga talatang ito tungkol sa kung paano tayo mapagpapala kapag hinangad nating magdala ng mga kaluluwa kay Jesucristo?

Ang isang katotohanan na matututuhan natin mula sa mga talatang ito ay kapag nagsisikap tayong magdala ng mga kaluluwa kay Jesucristo, makadarama tayo ng kagalakan. Maaari mong isulat ang katotohanang ito sa larawang idinrowing mo.

• Sa iyong palagay, bakit pinagmumulan ng kagalakan ang pagdadala ng mga kaluluwa kay Jesucristo?

• Paano makatutulong sa isang tao ang pag-unawa sa katotohanang ito upang magkaroon siya ng mas malaking hangaring ibahagi ang ebanghelyo?

Maghanap ng iba pang mga banal na kasulatan o pahayag ng mga lider ng Simbahan na makatutulong para mas mapag-ibayo ang ating hangaring ibahagi ang ebanghelyo. Maaari mong gamitin ang mga tool sa pag-aaral tulad ng Mga Paksa ng Ebanghelyo o Gabay sa mga Banal na Kasulatan sa paghahanap ng mga paksang tulad ng “Gawaing Misyonero,” o maaari mong pag-aralan ang ilan o ang lahat ng sumusunod na talata. Magdagdag ng mga katotohanang makikita mo sa larawan sa iyong study journal.

I-display ang mga sumusunod na talata. Bigyan ng oras ang mga estudyante na pag-aralan ang mga ito o ang iba pang mga talata o pahayag ng mga lider ng Simbahan na nahanap nila nang mag-isa.

• 2 Nephi 2:8

• Doktrina at mga Tipan 33:8–10

• Doktrina at mga Tipan 84:88

• Doktrina at mga Tipan 123:12–14

Sabihin sa mga estudyante na ibahagi ang natutuhan nila mula sa pag-aaral nila. Bukod pa sa pagtatanong ng sumusunod, maaari mo silang anyayahang isulat ang mga katotohanang natuklasan nila sa paligid ng drowing sa pisara.

• Ano ang ilang turo na nahanap mo na makatutulong sa isang tao na magkaroon ng mas malaking hangaring ibahagi ang ebanghelyo? Sa iyong palagay, bakit makatutulong ang mga turong ito?

• Anong mga karanasan ang nakatulong sa iyo na makita ang mga pagpapalang matatanggap kapag ibinabahagi natin ang ebanghelyo?

Para makita ang mga halimbawa kung paano pinagpala ang mga tao sa pamamagitan ng gawaing misyonero, maaari mong panoorin ang “Your Day for a Mission” (3:31) o “By Small and Simple Things: Sharing the Gospel” (3:19). Matatagpuan ang dalawang video sa ChurchofJesusChrist.org.

Isipin ang natutuhan o nadama mo ngayon na maaaring nakaimpluwensya sa sarili mong hangarin na tulungan ang iba na lumapit kay Cristo. Isulat sa iyong study journal ang anumang ideya o espirituwal na impresyon na natanggap mo at gumawa ng plano na kumilos ayon sa iyong mga impresyon.

Maaari mong patotohanan ang lakas na matatanggap natin at ang pagmamahal ng Diyos na madarama natin kapag kumikilos tayo ayon sa hangaring tulungan ang iba na lumapit kay Jesucristo.

Komentaryo at Impormasyon ng Konteksto

Bakit napakahalaga ngayon ng hangarin nating tumulong na madala ang iba kay Cristo?

Itinuro ni Pangulong Russell M. Nelson:

Ang ebanghelyo ni Jesucristo ay kailangan ngayon nang higit kailanman. Ang pagtatalo ay lumalabag sa lahat ng kinakatawan at itinuro ng Tagapagligtas. Mahal ko ang Panginoong Jesucristo at pinatototohanan ko na ang Kanyang ebanghelyo ang tanging pangmatagalang solusyon para sa kapayapaan.

Ang Kanyang ebanghelyo ang tanging sagot kapag marami sa mundo ang natutulala sa takot. … Mayroon tayong sagradong responsibilidad na ibahagi ang kapangyarihan at kapayapaan ni Jesucristo sa lahat ng makikinig at hahayaang manaig ang Diyos sa kanilang buhay. …

… Kailangan ngayon ang liwanag ni Jesucristo nang higit kailanman dahil sa espirituwal na kadiliman sa mundo. Lahat ay nararapat na magkaroon ng pagkakataong malaman ang tungkol sa ipinanumbaik na ebanghelyo ni Jesucristo. Bawat tao ay nararapat na malaman kung saan siya makasusumpong ng pag-asa at kapayapaan na “hindi maabot ng pag-iisip” [Filipos 4:7]. (Russell M. Nelson, “Pangangaral ng Ebanghelyo ng Kapayapaan,” Liahona, Mayo 2022, 6, 7)

Makadarama ba ng kagalakan ang iba kapag ibinabahagi ko ang ebanghelyo?

Itinuro ni Elder Marcus B. Nash ng Pitumpu:

Kapag natutuhan ng isang tao ang maluwalhating layunin ng buhay, naunawaan na nagpapatawad at sumasaklolo si Cristo sa lahat ng sumusunod sa Kanya, at pagkatapos ay piniling sundin si Cristo at nagpabinyag, bumubuti ang kalagayan ng buhay—kahit hindi nagbabago ang mga pangkalahatang sitwasyon sa buhay.

Isang masayahing sister na nakilala ko sa Onitsha, Nigeria, ang nagsabi sa akin na simula nang malaman niya ang ebanghelyo at nagpabinyag (at ngayon babanggitin ko ang mga katagang sinabi niya), “lahat ay mabuti para sa akin. Masaya ako. Ako ay nasa langit na.” Ang pagbabahagi ng ebanghelyo ay nagdudulot ng kagalakan at pag-asa sa mga kaluluwa ng nagbibigay at tumatanggap. Tunay ngang, “anong laki ng inyong kagalakan” [Doktrina at mga Tipan 18:15] kapag ibinabahagi ninyo ang ebanghelyo! Ang pagbabahagi ng ebanghelyo ay nagdaragdag sa taglay na kagalakan at pag-asa. (Marcus B. Nash, “Itaas Ninyo ang Inyong Ilawan,” Liahona, Nob. 2021, 71)

Ano ang pagkakaiba ng pagbabagong-kalagayan, pagbabagong-anyo, at pagkabuhay na mag-uli?

Ang tatlong disipulong Nephita ay nagbagong-anyo muna upang “mamasdan ang mga bagay ng Diyos” (3 Nephi 28:13–15) at pagkatapos ay nagbagong-kalagayan upang manatili sila sa mundo hanggang sa Ikalawang Pagparito (3 Nephi 28:37–40).

Ang mga sumusunod na kahulugan ay makatutulong na linawin ang mga pagkakaiba ng pagbabagong-kalagayan, pagbabagong-anyo, at pagkabuhay na mag-uli.

• Mga taong nagbagong-kalagayan. “Mga tao na nagbago upang hindi nila maranasan ang sakit o kamatayan hanggang sa kanilang pagkabuhay na mag-uli sa kawalang-kamatayan” (Gabay sa mga Banal na Kasulatan, “Taong Nagbagong-kalagayan, Mga,” scriptures.ChurchofJesusChrist.org).

• Pagbabagong-anyo. “Ang kalagayan ng mga tao na panandaliang nagbago sa kaanyuan at kalikasan—gayon nga, itinaas sa isang mataas na antas ng espirituwalidad—nang sa gayon magtagal sila sa harapan at kaluwalhatian ng mga makalangit na tao” (Gabay sa mga Banal na Kasulatan, “Pagbabagong-anyo,” scriptures.ChurchofJesusChrist.org).

• Pagkabuhay na Mag-uli. “Ang muling pagsasama ng katawang espiritu at ng katawang may laman at mga buto pagkaraan ng kamatayan. Matapos ang pagkabuhay na mag-uli, ang espiritu at katawan ay hindi na muling maghihiwalay kailanman, at ang tao ay magiging walang kamatayan” (Gabay sa mga Banal na Kasulatan, “Pagkabuhay na Mag-uli,” scriptures.ChurchofJesusChrist.org).

Mga Karagdagang Aktibidad sa Pag-aaral

Mga maaaring maging alalahanin tungkol sa paglilingkod sa misyon

Bilang alternatibo sa aktibidad na stick figure, maaari mong anyayahan ang mga estudyante na panoorin o basahin ang sumusunod na pahayag ni Pangulong Russell M. Nelson. Sabihin sa mga estudyante na ipagpalagay na may mga alalahanin tungkol sa paglilingkod sa misyon ang isang kaibigan na nakarinig sa pahayag na ito. Maaaring pag-isipan ng mga estudyante kung ano ang mga alalahaning iyon. Pagkatapos ay maaari silang maghanap ng mga banal na kasulatan o pahayag ng mga lider ng Simbahan na makatutulong sa taong ito na madaig ang kanyang mga alalahanin at makadama ng mas malaking hangaring maglingkod sa misyon.

Iba pang mga detalye tungkol sa tatlong Nephitang disipulo

Maaari mong anyayahan ang mga estudyante na basahin ang 3 Nephi 28:18–23 at alamin kung paano pinagpala ng Panginoon ang tatlong Nephitang disipulo upang maisagawa nila ang kanilang mabubuting hangarin. Maaari ding basahin ng mga estudyante ang 3 Nephi 28:25–32, at hanapin ang mga taong nakinabang at makikinabang pa sa paglilingkod ng mga disipulong ito. Maaari mong anyayahan ang mga estudyante na talakayin sa isang kapartner ang isang bagay na natutuhan nila tungkol sa paglilingkod ng mga Nephitang disipulong ito.

3 Nephi 29. Mga propesiya tungkol sa mga huling araw

Kung gusto mong maglaan ng oras sa pag-aaral ng 3 Nephi 29 sa klase, maaari mong gamitin ang sumusunod na chart. Maaaring itugma ng mga estudyante ang mga salita sa kaliwa sa mga kahulugan ng mga ito sa kanan. Pagkatapos ay maaari nilang basahin ang 3 Nephi 29, at alamin ang ipinropesiya ni Mormon na mangyayari sa mga huling araw. Sabihin sa mga estudyante na talakayin kung paano nila nakitang nangyayari ang mga bagay na iyon ngayon.

1. Mga Gentil	a. Dalawang kahulugan: (1) mga inapo ng propetang si Jacob (Israel) ng Lumang Tipan, kung kanino nakipagtipan ang Panginoon at (2) mga tunay na naniniwala kay Jesucristo na nakipagtipan sa Diyos
2. Sambahayan ni Israel	b. Isang pangako sa matatapat na kinabibilangan ng mga pagpapala ng ebanghelyo, awtoridad ng priesthood, mga walang-hanggang pamilya, at lupaing pamana
3. Itatwa, Tanggihan	c. Matinding kalungkutan at panghihinayang
4. Mag-anasan	d. Balewalain o tanggihan nang may pangmamaliit
5. Ang tipan ng Panginoon sa Israel	e. Magpakita ng kawalang-galang o pagtutol
6. Sa Aba	f. Dalawang kahulugan: (1) mga tao mula sa angkang hindi Israelita o hindi Judio at (2) mga taong walang ebanghelyo

(Mga sagot: 1–f, 2–a, 3–d, 4–e, 5–b, 6–c)