Doctrinal Mastery: 3 Nephi 27:20

“Lumapit sa Akin at Magpabinyag … , Upang Kayo ay Pabanalin sa pamamagitan ng Pagtanggap sa Espiritu Santo.”

batang kinukumpirma

Sa iyong pag-aaral ng 3 Nephi 27, nalaman mo ang tungkol sa pagpapabanal na mararanasan mo mula sa Espiritu Santo habang ipinamumuhay mo ang ebanghelyo ng Tagapagligtas. Ang lesson na ito ay makatutulong sa iyo na maisaulo ang scripture reference at mahalagang parirala para sa 3 Nephi 27:20, maipaliwanag ang doktrinang itinuro sa passage na ito, at magamit ang mga alituntunin ng pagtatamo ng espirituwal na kaalaman sa mga sitwasyon sa totoong buhay.

Pagtulong sa mga estudyante na magkaroon ng kakayahang talakayin sa iba ang mga paniniwala ng ebanghelyo. Lumalawak ang pag-unawa ng mga estudyante kapag ipinaliliwanag nila ang ebanghelyo sa isa’t isa. Gawing kaaya-aya ang kapaligiran kung saan magiging komportable ang mga estudyante na ibahagi ang kanilang naunawaan sa mga katotohanan ng ebanghelyo.

Paghahanda ng estudyante: Maaari mong anyayahan ang mga estudyante na simulang isaulo ang scripture reference at mahalagang parirala para sa 3 Nephi 27:20: “Lumapit sa akin at magpabinyag … , upang kayo ay pabanalin sa pamamagitan ng pagtanggap sa Espiritu Santo.”

Mga Posibleng Aktibidad sa Pag-aaral

Ang doctrinal mastery passage lesson na ito ay ginawa upang maituro pagkatapos ng lesson na “3 Nephi 27, Bahagi 2,” na siyang kontekstuwal na lesson para sa doctrinal mastery passage na 3 Nephi 27:20. Kung kailangang ilipat ang doctrinal mastery passage lesson na ito sa ibang linggo, tiyaking ituro din ang kaukulang kontekstuwal na lesson sa linggong iyon.

Ipaliwanag at isaulo

Mula sa iyong pag-aaral ng 3 Nephi 27:20, natutuhan mo ang sumusunod na katotohanan: Kung tayo ay magsisisi, lalapit kay Jesucristo, at magpapabinyag, mapapabanal tayo sa pamamagitan ng pagtanggap sa Espiritu Santo at tatayo tayo nang walang bahid-dungis sa harapan ng Tagapagligtas sa huling araw.

Ipagpalagay na nagkaroon ka ng pagkakataong ituro ang katotohanang ito sa isang maliit na bata.

Bago sabihin sa mga estudyante na sagutin nang malakas ang sumusunod na tanong, maaari mong sabihin sa kanila na isulat ang kanilang paliwanag sa kanilang study journal. Pagkatapos ay maaari mong anyayahan ang mga estudyante na ibahagi ang isinulat nila sa isang kapartner o sa isang maliit na grupo.

• Paano mo ipaliliwanag ang katotohanang ito sa isang maliit na bata sa paraang mauunawaan niya?

Isaulo ang mahalagang parirala ng banal na kasulatan para sa 3 Nephi 27:20: “Lumapit sa akin at magpabinyag … , upang kayo ay pabanalin sa pamamagitan ng pagtanggap sa Espiritu Santo.”

Hatiin ang scripture reference at mahalagang parirala sa mga sumusunod na segment. Bigkasin nang ilang beses ang bawat segment. Pagkatapos ay pagsama-samahin ang mga segment at bigkasin ang buong reperensya at mahalagang parirala.

Para magkaroon ng pagkakaiba-iba, maaari mong hilingin sa iba’t ibang estudyante o grupo ng mga estudyante na isaulo ang isa sa mga sumusunod na segment. Tumuro ng isang estudyante o grupo at ipabigkas sa kanila ang segment na itinalaga sa kanila. Ipagpatuloy ito hanggang sa maulit ang buong scripture reference at mahalagang parirala. Pagkatapos ay maaari kang magtalaga ng ibang segment sa bawat estudyante o grupo at ulitin ang aktibidad na ito.

• 3 Nephi 27:20

• Lumapit sa akin

• at magpabinyag

• upang kayo ay pabanalin

• sa pamamagitan ng pagtanggap sa Espiritu Santo

Pagsasanay ng pagsasabuhay

Para matulungan kang magrebyu, ilista sa loob ng 30 segundo ang lahat ng maaalala mo tungkol sa isa sa mga alituntunin ng pagtatamo ng espirituwal na kaalaman. Pagkatapos ay gawin din ito sa dalawa pang alituntunin. Kung kailangan mo ng tulong para maalala ang mga alituntunin, maaari mong tingnan ang talata 5–12 ng bahaging “Pagtatamo ng Espirituwal na Kaalaman” ng Doctrinal Mastery Core Document (2023).

Ang isa pang opsiyon para marebyu ang mga alituntunin ng pagtatamo ng espirituwal na kaalaman ay hatiin ang klase sa tatlong grupo at magtalaga sa bawat grupo ng isang alituntunin na rerebyuhin. Maaaring isulat sa pisara ng isang estudyante mula sa bawat grupo kung ano ang naaalala ng kanyang grupo tungkol sa alituntuning nakatalaga sa kanila.

Kapag natapos nang rebyuhin ng mga estudyante ang alituntuning nakatalaga sa kanila, ibahagi sa klase ang sumusunod na sitwasyon. Maaari mong i-display ang sitwasyon para matingnan ito ng mga estudyante sa buong lesson.

Ikaw at ang kaibigan mong si Meagan ay nag-uusap tungkol sa ebanghelyo habang pauwi kayo mula sa paaralan. Itinanong ni Meagan, “Kinakabahan ka bang makita muli ang Diyos? Sinisikap kong mamuhay nang tama at magsisi kapag nagkakamali ako, ngunit natatakot akong isipin na tatayo tayo sa harapan ng Diyos para hatulan.”

Sabihin sa mga estudyante na talakayin kung paano nila magagamit ang mga alituntunin ng pagtatamo ng espirituwal na kaalaman at ang doktrinang itinuro sa 3 Nephi 27:20 para tulungan si Meagan sa kanyang alalahanin.

Maaari mong simulan ang talakayan sa pamamagitan ng paghiling sa mga estudyante na ibahagi kung alin sa mga alituntunin ang maaari nilang simulan at kung paano makatutulong ang alituntuning iyon. Pagkatapos ay patuloy na talakayin ang iba pang mga alituntunin ng pagtatamo ng espirituwal na kaalaman hanggang sa matalakay ninyo kung paano makatutulong ang lahat ng tatlong alituntuning ito sa mga alalahaning katulad ng kay Meagan.

Kung kinakailangan, gamitin ang mga sumusunod na tanong bilang bahagi ng inyong talakayan. Hindi mo kailangang gamitin ang lahat ng tanong na ito, at maaari mong itanong ang mga ito ayon sa pagkakasunud-sunod na lubos na makatutulong.

Suriin ang mga Konsepto at Tanong nang may Walang-hanggang Pananaw

• Ano ang maaaring ilang maling palagay ni Meagan tungkol sa Ama sa Langit o sa Kanyang plano?

• Ano ang ilang katotohanan na gusto mong maunawaan ni Meagan tungkol sa Ama sa Langit at sa Kanyang plano?

Hangaring Mas Makaunawa sa pamamagitan ng Sources na Ibinigay ng Diyos

• Ano ang ilang turo sa 3 Nephi 27:20 na maaaring makatulong sa sitwasyong ito?

• Ano ang ilan pang mga banal na kasulatan o pahayag mula sa mga lider ng Simbahan na maaaring makatulong?

Kumilos nang may Pananampalataya

• Anong mga hakbang ang maaaring gawin ni Meagan na makatutulong sa kanya na mas mapanatag sa kanyang alalahanin? Sa iyong palagay, bakit makatutulong ang mga gawaing ito?

Pagrerebyu ng doctrinal mastery

Ang sumusunod na aktibidad ay magagamit sa isang lesson sa hinaharap upang matulungan ang mga estudyante na maisaulo ang scripture reference at mahalagang parirala ng banal na kasulatan para sa 3 Nephi 27:20. Magagawa ang aktibidad na ito bilang klase, sa maliliit na grupo, o nang magkakapartner.

Sabihin sa mga estudyante na isulat sa isang papel ang scripture reference at mahalagang parirala para sa 3 Nephi 27:20 at bigkasin nang malakas ang reperensya at mahalagang parirala nang tatlong beses. Sabihin sa kanila na gupitin ang mga salita at paghalu-haluin ang mga ito. Pagkatapos ay sabihin sa mga estudyante na ayusin ang mga salita ayon sa pagkakasunud-sunod ng mga ito.