3 Nephi 27, Bahagi 2

Nagiging Banal sa pamamagitan ni Jesucristo

masayang bata na binibinyagan

May mga pagkakataon ba na gusto mong maging mas espirituwal na malinis? Nang magturo si Jesucristo sa Kanyang mga disipulo sa sinaunang Amerika, ipinaliwanag Niya ang mahahalagang pagpapala na makakamtan ng mga taong sumusunod sa Kanyang ebanghelyo, kabilang na ang pagpapabanal sa pamamagitan ng Espiritu Santo. Ang lesson na ito ay makatutulong sa iyo na maunawaan kung paano tanggapin ang nagpapabanal na kapangyarihan ng Tagapagligtas sa pagsisikap mong ipamuhay ang Kanyang ebanghelyo.

Pagtulong sa mga estudyante na madama na kabilang sila. Dapat madama ng mga estudyante sa seminary na sila ay ligtas at sinusuportahan at pinahahalagahan ang kanilang mga kontribusyon. Ipakita ang iyong pagmamahal at pagmamalasakit sa mga estudyante habang nakikipag-ugnayan ka sa kanila. Hikayatin ang mga miyembro ng klase na makinig sa isa’t isa at pahalagahan ang mga pananaw ng kanilang mga kaklase.

Paghahanda ng estudyante: Ipabasa sa mga estudyante ang unang tatlong talata ng “Espiritu Santo” sa Gabay sa mga Banal na Kasulatan (scriptures.ChurchofJesusChrist.org). Anyayahan silang pumasok sa klase na handang ibahagi kung paano sila sa palagay nila matutulungan ng Espiritu Santo na mapabanal, o maging higit na katulad ng Tagapagligtas.

Mga Posibleng Aktibidad sa Pag-aaral

Hindi Malinis

Upang matulungan ang mga estudyante na maghandang pag-aralan ang pangangailangan nila na maging malinis mula sa kanilang mga kasalanan, maaari mong ibahagi ang sumusunod na salaysay.

Ibinahagi ni Elder Allen D. Haynie ng Pitumpu ang sumusunod na kuwento mula sa kanyang pagkabata.

Elder Allen D. Haynie

Noong ako ay siyam na taong gulang, ang aking lola na puti na ang buhok at may taas na four-foot-eleven-inch (1.5 m), ay nagbakasyon nang ilang linggo sa bahay namin. Isang hapon habang nasa bahay siya, nakatuwaan namin ng dalawa kong kuya na humukay sa tapat ng bahay namin. Hindi ko alam kung bakit ginawa namin ito; kung minsan natutuwa lang maghukay ang mga batang lalaki. Nadumihan kami, pero kaunti lang naman kaya walang problema. Nakita ng iba pang mga bata sa lugar namin na masayang maghukay kaya nakihukay na rin sila. At nadumihan na kaming lahat. Matigas ang lupa, kaya humila kami ng hose at diniligan ang ilalim ng hukay para lumambot ang lupa. Naputikan kami habang naghuhukay, pero nakagawa naman kami ng malalim na hukay.

Isa sa kagrupo namin ang nagsabi na gawin naming swimming pool ang hukay, kaya pinuno namin ito ng tubig. Dahil ako ang pinakabata at gusto kong makabilang sa kanila, napapayag nila akong tumalon para subukan kung ayos na ito. Ngayon talagang napakarumi ko na. Wala naman akong balak na maglublob sa putik, pero iyon ang nangyari sa akin sa bandang huli.

Nang magsimula nang lumamig, tumawid ako ng kalsada para umuwi. Sinalubong ako ng lola ko sa pintuan sa harapan ng bahay at ayaw akong papasukin. Sabi niya, kung papapasukin niya ako, magkakalat ako ng putik sa bahay na kalilinis lang niya. Kaya ginawa ko ang gagawin ng sinumang siyam na taong gulang at tinakbo ang pintuan sa likod-bahay, pero mas mabilis siya kaysa sa akin. Nagalit ako, nagdabog, at nagpumilit na papasukin ako sa bahay, pero hindi niya ako pinagbuksan.

Basang-basa ako, puro putik, at giniginaw, at inisip ko na baka mamatay ako sa mismong bakuran namin. Sa huli, itinanong ko sa kanya kung ano ang gagawin ko para makapasok sa bahay. Bago ko pa namalayan, naramdaman ko na lang na iniispreyan ako ni lola ng tubig mula sa hose habang nakatayo ako. Matapos ang tila walang katapusang sandali, sinabi ni lola na malinis na ako at pinapasok na ako sa bahay. Mainit sa bahay, at nakapagsuot ako ng tuyo at malinis na damit. (Allen D. Haynie, “Alalahanin Kung Kanino Tayo Nagtitiwala,” Liahona, Nob. 2015, 121)

• Anong mga espirituwal na paghahambing ang magagawa mo sa kuwento ni Elder Haynie at sa ating buhay?

Sa 3 Nephi 27, bilang bahagi ng mensahe ng Tagapagligtas sa Kanyang mga Nephitang disipulo tungkol sa Kanyang ebanghelyo, itinuro Niya ang mga kahihinatnan ng kasalanan at kung paano natin madaraig ang mga ito at kung paano tayo magiging espirituwal na malinis.

Basahin ang 3 Nephi 27:19, at alamin ang mga turo ng Tagapagligtas.

• Ano ang itinuturo sa iyo ng talatang ito tungkol sa pangangailangan mo kay Jesucristo at sa Kanyang Pagbabayad-sala?

Ang pagbabahagi ng sumusunod na talata ay makatutulong sa mga estudyante na matukoy ang kanilang personal na pangangailangan sa nakalilinis na kapangyarihan ng Tagapagligtas.

Malilinis ka ni Jesucristo mula sa mantsa ng kasalanan at matutulungan ka Niyang maging banal. Isipin ang pangangailangan mo na maging malinis mula sa kasalanan at kung ano kaya ang pakiramdam na maging espirituwal na malinis. Sa pag-aaral mo ngayon, maghanap ng mga turo na makatutulong sa iyo na mas maunawaan kung paano mo matatamo ang nakapagpapabanal na kapangyarihan ng Tagapagligtas sa iyong buhay.

Inilarawan ni Jesucristo kung paano tayo mapapabanal sa pamamagitan ng Espiritu Santo

Sa 3 Nephi 27:20–22, itinuro ng Tagapagligtas kung ano ang magagawa natin para matanggap ang Kanyang nagpapabanal na kapangyarihan at maging karapat-dapat sa buhay na walang hanggan. Upang matulungan kang pag-aralan ang mga talatang ito, kopyahin ang sumusunod na chart sa iyong study journal.

Maaari mo ring kopyahin ang chart na ito sa pisara para mapunan ito ng mga estudyante bilang isang klase pagkatapos mag-aral.

Mga Kautusan	Mga Pagpapala

Basahin ang 3 Nephi 27:20–22 at kumpletuhin ang chart batay sa malalaman mo.

Ang 3 Nephi 27:20 ay isang doctrinal mastery passage. Maaari mong markahan ang mga doctrinal mastery passage sa partikular na paraan upang madali mong mahanap ang mga ito. Magkakaroon ka ng pagkakataon sa susunod na lesson na magsanay na gamitin ang doktrinang itinuturo sa passage na ito sa isang tanong o sitwasyon.

• Paano mo ibubuod ang mga turo ng Tagapagligtas sa talata 20 bilang pahayag ng katotohanan?

Ang isang katotohanan na matututuhan natin ay kung tayo ay magsisisi at lalapit kay Jesucristo sa pamamagitan ng pagpapabinyag, mapapabanal tayo sa pamamagitan ng pagtanggap ng Espiritu Santo at tatayo tayo nang walang bahid-dungis sa Kanyang harapan sa huling araw.

Ang ibig sabihin ng mapabanal ay maging “malaya mula sa kasalanan, pagiging dalisay, malinis, at banal sa pamamagitan ng pagbabayad-sala ni Jesucristo” (Gabay sa mga Banal na Kasulatan, “Pagpapabanal,” scriptures.ChurchofJesusChrist.org).

• Paano nakatutulong sa atin ang pagsisisi at pagbibinyag na maranasan ang pagpapabanal sa pamamagitan ni Jesucristo?

• Paano mo kaya sasagutin ang isang tao na nagtatanong kung paano naaangkop ang mga kautusang ito sa kanila matapos nilang matanggap ang ordenansa ng binyag?

Kung kinakailangan, tulungan ang mga estudyante na maunawaan na dahil hindi tayo perpekto, may mga pagkakataon tayong magsisi araw-araw. Dapat din tayong patuloy na magsikap na tuparin ang ating mga tipan sa binyag matapos mabinyagan. Ang pagtanggap ng sakramento nang karapat-dapat ay nagbibigay sa atin ng pagkakataon bawat linggo na mapanibago ang mga tipang iyon. Lahat ng gawaing ito ay tumutulong sa atin na maging mas espirituwal na dalisay.

Ang mga pahayag nina Pangulong Russell M. Nelson at Pangulong Boyd K. Packer sa bahaging “Komentaryo at Impormasyon ng Konteksto” ay magagamit upang makatulong sa pagtuturo ng mga konseptong ito.

Nagiging Banal sa pamamagitan ng Espiritu Santo

Itinuturo sa atin ng mga salita ni Jesucristo sa talata 20 na ang paraan ng pagtulong Niya sa atin na maging banal ay sa pamamagitan ng pagtanggap sa Espiritu Santo.

Itinuro ni Pangulong Henry B. Eyring ng Unang Panguluhan ang kaugnayan ng Pagbabayad-sala ng Tagapagligtas at ng nakapagpapabanal na impluwensya ng Espiritu Santo.

Pangulong Henry B. Eyring

Kung nadarama ninyo ang impluwensya ng Espiritu Santo ngayon, maituturing ninyong katibayan ito na nagkakaroon ng epekto ang Pagbabayad-sala sa inyong buhay. Sa kadahilanang iyan at sa marami pang iba, makabubuting ilagay ninyo ang inyong sarili sa mga lugar o mga gawain na nag-aanyaya ng mga pahiwatig ng Espiritu Santo. Madarama natin ang impluwensya ng Espiritu Santo sa dalawang paraang ito: ang Espiritu Santo ay nananahan lamang sa isang malinis na templo, at kapag nasa atin ang Espiritu Santo, nililinis tayo nito sa pamamagitan ng Pagbabayad-sala ni Jesucristo. (Henry B. Eyring, “Gifts of the Spirit for Hard Times,” Ensign, Hunyo 2007, 23)

• Paano mo napansin ang nagpapadalisay na impluwensya ng Espiritu sa iyong buhay?

  Bilang bahagi ng pagtalakay sa nakaraang tanong, maaari kang magbahagi ng mga halimbawa kung paano ka natulungan ng Espiritu Santo na mapag-ibayo ang iyong espirituwal na kadalisayan. Maaaring kabilang dito ang mga paraan na nadagdagan ng Espiritu Santo ang iyong mga hangaring sundin si Jesucristo o ang mga pahiwatig na ibinigay sa iyo ng Espiritu Santo upang maiwasan ang mga pag-uugaling naglalayo sa iyo sa Tagapagligtas.

• Ano ang ilang paraan na maaanyayahan natin ang patuloy na patnubay ng Espiritu Santo upang regular tayong mapagpala ng nagpapabanal na impluwensya nito?

Pagsasabuhay ng mga turo ng Tagapagligtas

Ang mga katotohanang napag-aralan mo ngayon ay simple ngunit mahalagang sundin palagi upang makabalik ka nang karapat-dapat sa kinaroroonan ng Diyos. Isipin kung paano mo ipamumuhay ang natutuhan at nadama mo. Maaari kang pumili ng isa o mahigit pa sa mga sumusunod na opsiyon o pumili ng ibang paraan para maipamuhay ang mga turong ito.

I-display ang mga sumusunod na opsiyon at bigyan ang mga estudyante ng sapat na oras na mag-isip at magsulat sa kanilang study journal ng plano ng gagawin nila. Kapag tapos na sila, patotohanan ang mga katotohanang tinalakay ninyo sa lesson na ito.

1. Maging mas handang magsisi araw-araw at magpasiyang sundin nang mas lubusan ang Tagapagligtas.

2. Gawing mas makabuluhang bahagi ng iyong pagsamba sa araw ng Linggo ang pakikibahagi mo sa ordenansa ng sakramento.

3. Tukuyin ang isang kasalanan o panggagambala na humahadlang para mapasaiyo ang Espiritu Santo. Gawin ang mga kinakailangang pagkilos para maalis ang kasalanan o panggagambalang iyon sa iyong buhay.

4. Simulang gawin ang isang bagay para mas matanggap mo ang patnubay ng Espiritu Santo.

Komentaryo at Impormasyon ng Konteksto

Paano makatutulong sa akin ang araw-araw na pagsisisi para maranasan ang nakapagpapabanal na kapangyarihan ng Tagapagligtas?

Itinuro ni Pangulong Russell M. Nelson:

Pangulong Russell M. Nelson

Wala nang mas nagpapalaya, mas nagpapabanal, o mas mahalaga sa ating indibiduwal na pag-unlad kaysa sa regular at araw-araw na pagtutuon sa pagsisisi. Ang pagsisisi ay hindi ginagawa nang isang beses lang, ito ay isang proseso. Ito ay susi sa kaligayahan at kapayapaan ng isipan. Kapag nilakipan ng pananampalataya, ang pagsisisi ay nagiging daan para magamit natin ang kapangyarihan ng Pagbabayad-sala ni Jesucristo. …

… Hindi inaasahan ng Panginoon na magiging perpekto tayo sa bahaging ito ng ating walang hanggang pag-unlad. Ngunit ang inaasahan Niya sa atin ay maging mas dalisay tayo. Ang araw-araw na pagsisisi ay landas patungo sa kadalisayan, at ang kadalisayan ay nagdadala ng kapangyarihan. (Russell M. Nelson, “Maaari Tayong Gumawa nang Mas Mahusay at Maging Mas Mahusay,” Liahona, Mayo 2019, 67, 68)

Paano ako malilinis mula sa aking mga kasalanan matapos akong mabinyagan?

Itinuro ni Pangulong Boyd K. Packer (1924–2015) ng Korum ng Labindalawang Apostol:

Pangulong Boyd K. Packer

Karaniwang nauunawaan natin na, batay sa pagsisisi, hinuhugasan ng ordenansa ng binyag ang ating mga kasalanan. Iniisip ng ilan kung masyadong maaga silang bininyagan. Kung mabibinyagan lang sana sila ngayon at makapagsimula ulit. Ngunit hindi na kailangan iyan! Sa pamamagitan ng ordenansa ng sakramento, pinaninibago ninyo ang mga tipang ginawa sa binyag. Kapag natugunan ninyo ang lahat ng kundisyon ng pagsisisi, gaano man kahirap, maaari kayong mapatawad at hindi na mababagabag pa ng inyong mga kasalanan ang inyong isipan. (Boyd K. Packer, “Washed Clean,” Ensign, Mayo 1997, 10)

Paano tayo tinutulungan ng Espiritu Santo na maranasan ang nagpapabanal na kapangyarihan ng Tagapagligtas?

Ipinaliwanag ni Elder Kevin R. Duncan ng Pitumpu:

Elder Kevin R. Duncan

Mahalaga ang ginagampanan ng Espiritu Santo sa pagtulong sa atin na madaig ang kasalanan at mapalitan ito ng pagmamahal sa kabutihan at kakayahang sundin ang mga kautusan ng Diyos.

Nasaksihan ko ang nagpapabanal na kapangyarihan ng Espiritu sa buhay ng maraming tao. Nakita ko ang masasamang tao na nagiging mabuti, at ang mabubuting tao ay nagiging dakila, nang isuko nila ang kanilang puso sa nagpapadalisay na impluwensya ng Espiritu. Ang Espiritu Santo ay nagpapabanal. (Kevin R. Duncan, “The Sacred Roles of the Holy Ghost,” Ensign, Okt. 2014, 65)

Upang mas maunawaan kung paano tayo nililinis ng Tagapagligtas sa pamamagitan ng Espiritu Santo, maaari mong panoorin ang “Face to Face with President Eyring and Elder Holland,” na matatagpuan sa ChurchofJesusChrist.org, mula sa time code na 1:03:17 hanggang 1:09:16.

Video presentation

Para mapanood ang paglalarawan ng ilan sa mga turo ng Tagapagligtas sa 3 Nephi 27, panoorin ang “Ipinahayag ni Jesucristo ang Pangalan ng Kanyang Simbahan at ang Kanyang Doktrina” mula sa time code na 3:26 hanggang 8:03.

Mga Karagdagang Aktibidad sa Pag-aaral

Alternatibong simula sa lesson

Bago basahin ang 3 Nephi 27:19, maaari mong anyayahan ang mga estudyante na ipagpalagay na may dadaluhan silang mahalagang kaganapan, tulad ng interbyu o pulong, kung saan kailangan nilang manamit nang maayos. Pagkatapos ay sabihin sa kanila na isipin kung ano kaya ang madarama nila kung, bago magsimula ang kaganapan, may natapon sa kanilang damit at namantsahan ito. Pagkatapos ay maaari mong sabihin sa mga estudyante na pag-isipan ang mga bagay na magiging dahilan para maging marumi ang ating espiritu at kung ano ang madarama natin kapag tumayo tayo sa harapan ng Diyos na espirituwal na marumi.

3 Nephi 27:27. “Maging anong uri ng mga tao ba nararapat kayo?”

Sa 3 Nephi 27:23–33, nagbigay ang Tagapagligtas ng mga tagubilin sa Kanyang labindalawang disipulo at itinuro Niya sa kanila ang tungkol sa kanilang mga responsibilidad, kabilang na ang kanilang mga tungkulin bilang mga hukom ng mga tao. Sabihin sa mga estudyante na basahin ang 3 Nephi 27:27, at alamin ang katotohanang matututuhan natin mula sa utos na ibinigay ng Tagapagligtas sa Kanyang mga disipulo na maipamumuhay nila. Ang isang katotohanan na maaaring matukoy ng mga estudyante ay iniutos ng Panginoon sa Kanyang mga disipulo na maging katulad Niya.

Mapag-aaralan ng mga estudyante ang mga pangyayari sa buhay ng Tagapagligtas na nagpapakita ng Kanyang perpektong halimbawa at makahahanap sila ng mga katangian ng Tagapagligtas na gusto nilang tularan. Maaari silang gumawa ng plano na mas lubos na magkaroon ng isa sa Kanyang mga katangian upang sila ay maging higit na katulad Niya.