3 Nefia 27, Tapany 2

Hamasinina amin’ny alalan’i Jesoa Kristy

Misy fotoana ve ianao maniry ny hadio ara-panahy kokoa? Rehefa nampianatra ny mpianany tany Amerika fahiny i Jesoa Kristy dia nanazava fitahiana manan-danja izay misy ho an’ireo izay manaraka ny filazantsarany Izy, ao anatin’izany ny fanamasinana amin’ny alalan’ny Fanahy Masina. Ity lesona ity dia afaka manampy anao hahatakatra ny fomba fandraisana ny hery manamasin’ny Mpamonjy rehefa miezaka miaina ny filazantsarany ianao.

Manampy ny mpianatra hahatsapa ho manana ny toerany. Ny seminera dia tokony ho tontolo hahatsapan’ny mpianatra ho voaro sy tohanana ary omen-danja ny anjara birikin’izy ireo. Asehoy ny fitiavanao sy fiahianao ny mpianatra rehefa mifanerasera amin’izy ireo ianao. Amporisiho ny olona ao an-dakilasy mba hifampihaino sy hanome lanja ny fomba fijerin’ireo mpiara-mianatra hafa.

Fanomanana ny mpianatra: Asao hamaky ny andiam-pehezanteny telo voalohany ao amin’ny “Fanahy Masina” ao amin’ny Torolalana ho an’ny Soratra Masina ireo mpianatra (scriptures.ChurchofJesusChrist.org). Asao izy ireo ho tonga efa vonona hizara ny fomba heverin’izy ireo fa azon’ny Fanahy Masina anampiana azy ireo mba hohamasinina kokoa, na hitovy kokoa amin’ny Mpamonjy.

Ireo sahanasa fianarana azo atao

Tsy madio

Mba hanampiana ny mpianatra hiomana handalina momba ny antony ilana hanadiovana azy ireo amin’ny fahotany dia zarao ity tantara manaraka ity.

Ny Loholona Allen D. Haynie, ao amin’ny Fitopololahy, dia nizara ity tantara manaraka tany amin’ny fahazazany ity.

Tamin’izaho sivy taona dia tonga mba hiaraka taminay nandritra ny herinandro vitsivitsy tao an-trano ny renibeko avy amin’ny reniko, izay iray metatra sy dimampolo sy efa fotsy volo. Indray tolakandro, raha iny izy tao iny, dia nanapa-kevitra izaho sy ny zokiko roalahy ny hangady lavaka teo amin’ny tanimboly iray teo ampitan’ny tranonay. Tsy haiko izay antony nanaovanay izany. Indraindray dia mangadingady lavaka ny zazalahy kely. Somary naloto izahay saingy tsy dia nisy zavatra tokony hampahatahotra anay loatra izany. Hitan’ireo zazalahy hafa manodidina hoe tena tsara izany mangady lavaka izany ka dia nanomboka nanampy anay izy ireo. Ary dia niara-nihoson-doto kokoa izahay rehetra. Mafy be ilay tany ka dia nitondra fantsona fanondrahana zaridaina izahay, ary dia nasianay rano kely ny fanambanin’ilay lavaka mba hampahalemilemy ny tany. Feno fotaka izahay teo am-pangadiana, saingy nihalalina hatrany ilay lavaka.

Nisy anankiray taminay nanapa-kevitra fa tokony ho avadikay ho dobo filomanosana ilay lavaka ka dia nofenoinay rano ilay izy. Amin’ny maha-zandriny indrindra ahy sady te ho tian’ireo ankizy rehetra, dia nanaiky nitsambikina tao aho mba hanandrana izany. Teo aho dia tena naloto be mihitsy. Tsy noeritreretiko mihitsy hoe hiosom-potaka aho tamin’io, saingy izay no niafarako.

Rehefa nanomboka nangatsiaka aho dia niampita ny arabe, nieritreritra ny hiditra tao an-tranonay. Nifanena tamiko teo am-baravarana teo anoloana ny renibeko ary tsy navelany niditra aho. Hoy izy tamiko hoe raha avelany miditra aho dia hamela fotaka eraky ny trano izay vao avy nodioviny. Noho izany dia nataoko izay ho nataon’ny zaza sivy taona rehetra anatin’ny toe-javatra toy izany ka dia lasa aho nihazakazaka tany amin’ny varavarana ambadika, saingy kinga kokoa noho ny noeritreretiko izy. Tezitra aho, ka natontontontoko ny tongotro, ary nangataka ny hiditra tao an-trano aho saingy mbola nihidy ihany ny varavarana.

Hotsaka aho, nihosom-potaka, nangatsiaka, ary ny eritreritro tamin’ny maha-zaza ahy, dia nihevitra aho fa ho faty teo an-tokontany teo. Noho ny farany dia nanontaniako azy izay tokony hataoko mba hahafahako miditra ao an-trano. Tsy tonga saina akory aho fa raha izaho mbola nijoro teo an-tokotany iny dia notifirin’ny renibeko rano tamin’ny fantson-drano. Taorian’ny fotoana izay toa ela dia ela tokoa, dia nilaza ny renibeko fa efa madio amin’izay aho ka navelany hiditra ao an-trano. Nafana ery tao an-trano, ary afaka nampiditra akanjo maina sy madio aho. (Allen D. Haynie, “Mahatsiaro ilay nametrahantsika fitokiana,” Liahona, nôv. 2015, 121)

• Inona no fampitahana ara-panahy azonao atao eo amin’ny tantaran’ny Loholona Haynie sy ny fiainantsika?

Ao amin’ny 3 Nefia 27, ao anatin’ny lahateny nataon’ny Mpamonjy tamin’ny mpianany Nefita momba ny filazantsarany, Izy dia nampianatra momba ny vokatry ny fahotana sy ny fomba ahafahantsika mandresy azy ireny sy tonga madio ara-panahy.

Vakio ny 3 Nefia 27:19, hitadiavana ireo fampianaran’ny Mpamonjy.

• Inona no ampianarin’io andininy io anao momba ny filanao an’i Jesoa Kristy sy ny Sorompanavotany?

Ny fizaràna ity andiam-pehezanteny manaraka ity dia afaka manampy ny mpianatra hahafantatra ny filan’izy ireo manokana ny hery manasitran’ny Mpamonjy.

Afaka manadio anao amin’ny loton’ny ota sy manampy anao ho tonga masina i Jesoa Kristy. Eritrereto ny filanao diovina amin’ny fahotana sy ny hoe mety hanao ahoana na hoe manao ahoana izany hoe madio ara-panahy izany. Rehefa manohy mandalina ianao anio, dia mitadiava fampianarana izay afaka manampy anao hahatakatra tsara kokoa ny fomba ahafahanao mahazo ny hery manasitran’ny Mpamonjy eo amin’ny fiainanao.

I Jesoa Kristy dia namaritra ny fomba ahafahantsika hamasinina amin’ny alalan’ny Fanahy Masina

Ao amin’ny 3 Nefia 27:20–22, ny Mpamonjy dia nampianatra ny zavatra azontsika atao mba handraisana ny hery manasitrany sy hahafenoana ireo fepetra amin’ny fiainana mandrakizay. Mba hanampiana anao handalina ireo andininy ireo, dia adikao ao amin’ny diary fandalinanao ity tabilao manaraka ity.

Azonao atao ihany koa ny mandika ity tabilao ity eny amin’ny solaitrabe mba hahafahan’ny mpianatra mameno azy miaraka amin’ny iray kilasy aorian’ny fandalinana.

Didy	Fitahiana

Vakio ny 3 Nefia 27:20–22 ary fenoy miainga avy amin’ny zavatra hitanao ilay tabilao.

Ny 3 Nefia 27:20 dia andalan-tsoratra masina fifehezana fotopampianarana. Hevero ny hanisy marika ireo andalan-tsoratra masina fifehezana fotopampianarana amina fomba miavaka mba hahafahanao mahita azy ireny mora foana. Ao amin’ny lesona manaraka ianao dia hanana fahafahana hamerimberina fampiharana ny fotopampianarana nampianarina tao amin’io andininy io amina fanontaniana na toe-java-misy iray.

• Ahoana no hamintinanao ireo fampianaran’ny Mpamonjy ao amin’ny andininy 20 amin’ny maha-fanambarana fahamarinana izany?

Fahamarinana iray azontsika ianarana ny hoe raha mibebaka isika ary manatona an’i Jesoa Kristy amin’ny alalan’ny fanaovana batisa, dia afaka ny hohamasinina amin’ny alalan’ny fandraisana ny Fanahy Masina sy mijoro ho tsy misy pentina eo anoloany amin’ny andro farany isika.

Ny hoe hamasinina dia midika ho “fahafahana amin’ny fahotana, ho madio, ho tsisy pentina ary ho masina amin’ny alalan’ny Sorompanavotan’i Jesoa Kristy” (Torolalana ho an’ny Soratra Masina, “Fanamasinana,” scriptures.ChurchofJesusChrist.org).

• Ahoana no anampian’ny fibebahana sy ny batisa antsika hiaina fanamasinana amin’ny alalan’i Jesoa Kristy?

• Ahoana no mety hamalianao ny olona iray izay manontany tena momba ny fomba iharan’ireo didy ireo amin’izy ireo rehefa avy mandray ny ôrdônasin’ny batisa izy ireo?

Raha ilaina, dia ampio hahatakatra ny mpianatra fa satria tsy tonga lafatra isika, dia manana fahafahana hibebaka isan’andro. Tokony hiezaka hihazona ny fanekempihavanan’ny batisantsika ihany koa isika rehefa vita batisa. Ny fandraisana ny fanasan’ny Tompo amim-pahamendrehana dia manome antsika fahafahana isan-kerinandro hanavao ireny fanekempihavanana ireny. Ireo zavatra atao rehetra ireo dia manampy antsika ho tonga madio ara-panahy kokoa.

Ny teny nambaran’ny Filoha Russell M. Nelson sy Boyd K. Packer ao amin’ny fizaràna hoe “Fanazavana sy fampahalalana avy amin’ny zava-miseho” dia azo ampiasaina mba hanampiana amin’ny fampianarana ireo fotokevitra ireo.

Hamasinina amin’ny alalan’ny Fanahy Masina

Ny tenin’i Jesoa Kristy ao amin’ny andininy 20 dia mampianatra antsika fa ny fomba anampiany antsika ho tonga hamasinina dia amin’ny alalan’ny fandraisana ny Fanahy Masina.

Ny Filoha Henry B. Eyring ao amin’ny Fiadidiana Voalohany dia nampianatra momba ny fifandraisan’ny Sorompanavotan’ny Mpamonjy sy ny fitarihana manamasin’ny Fanahy Masina.

Raha nahatsapa ny fitaoman’ny Fanahy Masina ianao androany dia azonao raisina ho toy ny porofo izany fa miasa eo amin’ny fiainanao ny Sorompanavotana. Noho izany antony izany sy ny maro hafa, dia tena ilaina ny hoe mijanona amin’ny toerana sy asa izay manasa ny bitsiky ny Fanahy Masina. Ny fahatsapana ny Fanahy Masina dia miasa amin’ireto fomba roa ireto: tsy mitoetra afa-tsy ao anatin’ny tempoly madio ny Fanahy Masina ary ny fandraisana ny Fanahy Masina dia manadio antsika amin’ny alalan’ny Sorompanavotan’i Jesoa Kristy. (Henry B. Eyring, “Gifts of the Spirit for Hard Times,” Ensign, June 2007, 23)

• Ahoana no nahitanao ny fitaomana manadion’ny Fanahy teo amin’ny fiainanao?

  Ao anatin’ny fifanakalozan-kevitra momba ilay fanontaniana teo aloha, hevero ny hizara ohatra amin’ny fomba nanampian’ny Fanahy Masina anao hampitombo ny fahadiovanao ara-panahy. Izany dia mety hahitana fomba nampitomboan’ny Fanahy Masina ny fanirianao hanaraka an’i Jesoa Kristy na bitsiky nomen’ny Fanahy Masina anao mba hiala amina fitondrantena izay nampanalavitra anao tamin’ny Mpamonjy.

• Inona avy no fomba sasantsasany azontsika anasana ny fiarahana tsy tapaka amin’ny Fanahy Masina mba hahafahantsika hotahiana tsy tapaka amin’ilay fitaomany manamasina?

Mampihatra ireo fampianaran’ny Mpamonjy eo amin’ny fiainanao

Ireo fahamarinana nohalalininao androany dia tsotra saingy tena ilaina ny hanarahana azy tsy tapaka mba hahafahanao miverina amim-pahamendrehana eo anatrehan’ Andriamanitra. Eritrereto ny fomba hampiharanao amin’ny fiainanao ny zavatra nianaranao sy tsapanao. Azonao atao ny misafidy iray na mihoatra amin’ireto safidy manaraka ireto na misafidy fomba hafa hampiharana ireo fampianarana ireo.

Asehoy ireto safidy manaraka ireto ary omeo fotoana ampy hisaintsainana ary, angamba hanoratana drafitr’asa iray ao amin’ny diary fandalinan’izy ireo ny mpianatra. Rehefa vitan’izy ireo izany, dia mijoroa ho vavolombelona momba ireo fahamarinana noresahinareo tato amin’ity lesona ity.

1. Manàna finiavana kokoa momba ny fibebahana isan’andro ary manapaha hevitra hanaraka feno kokoa ny Mpamonjy.

2. Ataovy ampahany manan-danja kokoa amin’ny fitsaohanao isaky ny alahady ny fandraisanao anjara amin’ny ôrdônasin’ny fanasan’ny Tompo.

3. Fantaro ny fahotana na fanelingelenana izay mametra ny fiarahanao amin’ny Fanahy Masina. Ataovy ny zavatra tsy maintsy atao mba hanesorana izany fahotana na fanelingelenana izany eo amin’ny fiainanao.

4. Manomboha manao zavatra izay hanome anao fahafahana miaraka misimisy kokoa amin’ny Fanahy Masina.

Fanamarihana sy fampahalalana avy amin’ny zava-miseho

Ahoana no ahafahan’ny fibebahana manampy ahy hiaina ny hery manamasin’ny Mpamonjy?

Nampianatra toy izao ny Filoha Russell M. Nelson:

Tsy misy zavatra manafaka kokoa sy maha-olom-banona kokoa na lehibe kokoa eo amin’ny fivoaran’ny tenantsika manokana noho ny fibebahana tsy tapaka sy ny fifantohana amin’izany isan’andro. Ny fibebahana dia tsy zava-mitranga indray mandeha fa dingana arahina. Fanalahidin’ny fahasambarana sy fiadanan-tsaina izany. Rehefa ampiarahina amin’ny finoana ny fibebahana dia manokatra ny fahazoantsika ny herin’ny Sorompanavotan’i Jesoa Kristy. …

… Tsy manantena fahalavorariana avy amintsika ny Tompo amin’izao dingana ao anatin’ny fivoarantsika mandrakizay izao. Saingy manantena Izy fa ho lasa hihamadio isika. Ny fibebahana isan’andro no lalana mitondra any amin’ny fahadiovana ary ny fahadiovana dia mitondra hery. (Russell M. Nelson, “Afaka manao tsaratsara kokoa sy ho lasa tsaratsara kokoa isika,” Liahona, mey 2019)

Ahoana no ahafahako hodiovina amin’ny fahotako rehefa avy atao batisa aho?

Ny Filoha Boyd K. Packer (1924–2015) tao amin’ny Kôlejin’ny Apôstôly Roambinifolo dia nampianatra toy izao:

Amin’ny ankapobeny dia takatsika fa, miankina amin’ny fibebahana, ny ôrdônansin’ny batisa dia manasa ny fahotantsika. Ny sasany dia manontany tena raha toa ka natao batisa aloha loatra izy ireo. Raha mba afaka ny hatao batisa amin’izao fotoana izao sy hanomboka fiainana vaovao mantsy izy ireo. Tsy mety izany anefa! Amin’ny alalan’ny ôrdônansin’ny fanasan’ny Tompo dia manavao ireo fanekempihavanana atao amin’ny batisa ianao. Rehefa mahafeno ny fepetran’ny fibebahana ianao, na ahoana na ahoana fahasarotan’izany, dia afaka ny ho voavela ianao ary tsy hanelingelina ny sainao intsony ny fahadisoanao. (Boyd K. Packer, “Washed Clean,” Ensign, May 1997, 10)

Ahoana no anampian’ny Fanahy Masina antsika hiaina ny hery manamasin’ny Mpamonjy?

Nanazava toy izao ny Loholona Kevin R. Duncan ao amin’ny Fitopololahy:

Mitana anjara toerana manan-danja amin’ny fanampiana antsika handresy ny fahotana sy hanolo izany amin’ny fitiavana fahamarinana sy ny fahafahana mitandrina ny didin’ Andriamanitra ny Fanahy Masina.

Nahita maso ny hery manamasin’ny Fanahy teo amin’ny fiainan’olona maro aho. Efa nahita lehilahy ratsy lasa tsara aho, ary lehilahy tsara lasa tena tsara, rehefa nanome ny fon’izy ireo ho amin’ny fitaomana manadion’ny Fanahy. Mpanamasina ny Fanahy Masina. (Kevin R. Duncan, “The Sacred Roles of the Holy Ghost,” Ensign, Oct. 2014, 65)

 ChurchofJesusChrist.org

Ireo sahanasa fianarana fanampiny

Fomba hafa hanombohana ny lesona

Alohan’ny hamakiana ny 3 Nefia 27:19, dia azonao atao ny manasa ny mpianatra haka sary an-tsaina fa manana fotoana lehibe hatrehina izy ireo, toy ny dinidinika na fivoriana, izay hitaky azy ireo hihaingo. Avy eo dia asaovy maka sary an-tsaina ny mety ho fahatsapan’izy ireo raha toa ka, alohan’ny hanombohan’ilay fotoana, dia nahararaka zavatra tamin’ny akanjony izy ireo ary nampisy tasy izany. Azonao atao avy eo ny mangataka ny mpianatra hieritreritra mombana zavatra izay afaka mahatonga ny fanahintsika tsy hadio sy ny mety ho fahatsapantsika raha mijoro eo anatrehan’ Andriamanitra amina toe-panahy tsy madio.

3 Nefia 27:27. “Koa, tokony ho karazana olona toa inona moa ianareo?

Ao amin’ny 3 Nefia 27:23–33, ny Mpamonjy dia nanome toromarika ny mpianany roa ambin’ny folo sy nampianatra azy ireo momba ny andraikitr’izy ireo, ao anatin’izany ny anjara asan’izy ireo amin’ny maha mpitsara ny olona azy ireo. Asao hamaky ny 3 Nefia 27:27 ny mpianatra, ka hitady fahamarinana iray azontsika ianarana avy amin’ny didy nomen’ny Mpamonjy ny mpianany ka azo ampiharina amin’ny fiainan’izy ireo manokana. Fahamarinana iray mety ho hitan’ny mpianatra ny hoe mandidy ny mpianany ho tonga tahaka Azy ny Tompo.

Azon’ny mpianatra atao ny mandalina zava-niseho teo amin’ny fiainan’ny Mpamonjy izay mampiseho ny ohatra tonga lafatra nasehony ary mitady ireo toetran’ny Mpamonjy izay tian’izy ireo halain-tahaka. Afaka manao drafitra iray hampivelarana feno kokoa ny iray amin’ireo toetrany izy ireo mba hahafahan’izy ireo ho tonga tahaka Azy kokoa.