« ចំណេះចំណានខាងគោលលទ្ធិ ៖ នីហ្វៃទី ៣ ២៧:២០—‹ ចូរមករកយើង ហើយទទួលបុណ្យជ្រមុជទឹក … ប្រយោជន៍ឲ្យអ្នករាល់គ្នាអាចបានញែកចេញបរិសុទ្ធ ដោយការទទួលនូវព្រះវិញ្ញាណបរិសុទ្ធ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
«ចំណេះចំណានខាងគោលលទ្ធិ ៖ នីហ្វៃទី ៣ ២៧:២០ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
ចំណេះចំណានខាងគោលលទ្ធិ ៖ នីហ្វៃទី ៣ ២៧: ២០
« ចូរមករកយើង ហើយទទួលបុណ្យជ្រមុជទឹក … ប្រយោជន៍ឲ្យអ្នករាល់គ្នាអាចបានញែកចេញបរិសុទ្ធ ដោយការទទួលនូវព្រះវិញ្ញាណបរិសុទ្ធ »°។
នៅក្នុងការសិក្សារបស់អ្នកនៅ នីហ្វៃទី ៣ ២៧ អ្នកបានរៀនអំពីការញែកចេញជាបរិសុទ្ធ ដែលអ្នកអាចដកពិសោធន៍មកពីព្រះវិញ្ញាណបរិសុទ្ធ នៅពេលអ្នករស់នៅតាមដំណឹងល្អរបស់ព្រះអង្គសង្គ្រោះ ។ មេរៀននេះអាចជួយអ្នកទន្ទេញសេចក្ដីយោងបទគម្ពីរ និងឃ្លាបទគម្ពីរគន្លឹះសម្រាប់ នីហ្វៃទី ៣ ២៧:២០ ដោយពន្យល់អំពីគោលលទ្ធិដែលបានបង្រៀននៅក្នុងវគ្គបទគម្ពីរនេះ និងអនុវត្តនូវគោលការណ៍នៃការទទួលបានចំណេះដឹងខាងវិញ្ញាណនៅក្នុងស្ថានភាពជីវិតពិត ។
ការជួយសិស្សឲ្យអភិវឌ្ឍសមត្ថភាពក្នុងការពិភាក្សាអំពីជំនឿនៃដំណឹងល្អជាមួយអ្នកដទៃ ។ ការយល់ដឹងរបស់សិស្សកើនឡើងនៅពេលដែលពួកគេពន្យល់អំពីដំណឹងល្អដល់គ្នាទៅវិញទៅមក ។ សូមបង្កើតបរិយាកាសមួយ ដែលសិស្សមានទំនុកចិត្តក្នុងការចែកចាយការយល់ដឹងរបស់ពួកគេអំពីសេចក្តីពិតនៃដំណឹងល្អ ។
ការរៀបចំសិស្ស ៖ សូមពិចារណាអញ្ជើញសិស្សឲ្យចាប់ផ្តើមទន្ទេញសេចក្ដីយោងបទគម្ពីរ និងឃ្លាបទគម្ពីរគន្លឹះសម្រាប់ នីហ្វៃទី ៣ ២៧:២០ ៖ « ចូរមករកយើង ហើយទទួលបុណ្យជ្រមុជទឹក … ប្រយោជន៍ឲ្យអ្នករាល់គ្នាអាចបានញែកចេញបរិសុទ្ធ ដោយការទទួលនូវព្រះវិញ្ញាណបរិសុទ្ធ » ។
សកម្មភាពរៀនសូត្រដែលអាចមាន
មេរៀនវគ្គចំណេះចំណានខាងគោលលទ្ធិនេះត្រូវបានរៀបចំឡើងដើម្បីបង្រៀនបន្ទាប់ពីមេរៀន « នីហ្វៃទី ៣ ១២:១៧ ផ្នែកទី ២ » ដែលជាមេរៀនបរិបទសម្រាប់វគ្គចំណេះចំណានខាងគោលលទ្ធិ នីហ្វៃទី ៣ ២៧:២០ ។ ប្រសិនបើមេរៀនវគ្គបទគម្ពីរចំណេះចំណានខាងគោលលទ្ធិនេះត្រូវប្តូរទៅសប្តាហ៍ផ្សេង សូមប្រាកដថា មេរៀនបរិបទដែលត្រូវគ្នានេះត្រូវបានបង្រៀននៅអំឡុងសប្តាហ៍នោះផងដែរ ។
ពន្យល់ និងទន្ទេញ
ចេញពីការសិក្សារបស់អ្នកនៅ នីហ្វៃទី ៣ ២៧:២០ អ្នកបានរៀនអំពីសេចក្តីពិតដូចខាងក្រោមនេះ ៖ ប្រសិនបើយើងប្រែចិត្ត ហើយចូលមករកព្រះយេស៊ូវគ្រីស្ទ ហើយបានទទួលពិធីបុណ្យជ្រមុជទឹក នោះយើងអាចញែកចេញជាបរិសុទ្ធ ដោយទទួលព្រះវិញ្ញាណបរិសុទ្ធ ហើយឈរដោយស្អាតស្អំនៅចំពោះព្រះភ័ក្រ្តរបស់ ព្រះអង្គសង្រ្គោះនៅថ្ងៃចុងក្រោយ ។
សូមស្រមៃថា អ្នកមានឱកាសបង្រៀនសេចក្ដីពិតនេះទៅដល់កុមារម្នាក់ ។
មុនពេលអញ្ជើញសិស្សឲ្យឆ្លើយសំណួរខាងក្រោមឲ្យឮៗ សូមពិចារណាអញ្ជើញពួកគេឲ្យសរសេរសេចក្តីពន្យល់របស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។ បន្ទាប់មក អ្នកអាចអញ្ជើញសិស្សឲ្យចែកចាយអ្វី ដែលពួកគេបានសរសេរជាមួយដៃគូ ឬក្រុមតូចមួយ ។
-
តើអ្នកនឹងពន្យល់សេចក្ដីពិតនេះទៅដល់កុមារម្នាក់ ឲ្យគាត់ ឬនាងយល់តាមរបៀបណា ?
សូមអនុវត្តការទន្ទេញឃ្លាបទគម្ពីរគន្លឹះសម្រាប់ នីហ្វៃទី ៣ ២៧:២០ ៖ « ចូរមករកយើង ហើយទទួលបុណ្យជ្រមុជទឹក … ប្រយោជន៍ឲ្យអ្នករាល់គ្នាអាចបានញែកចេញបរិសុទ្ធ ដោយការទទួលនូវព្រះវិញ្ញាណបរិសុទ្ធ » ។
សូមបំបែកសេចក្ដីយោងបទគម្ពីរ និងឃ្លាគន្លឹះទៅជាវគ្គៗដូចខាងក្រោមនេះ ។ អនុវត្តការសូត្រឃ្លានីមួយៗឲ្យបានច្រើនដង ។ បន្ទាប់មកដាក់វគ្គទាំងអស់ចូលគ្នា ហើយសូត្រសេចក្តីយោង និងឃ្លាគន្លឹះទាំងមូល ។
ដើម្បីបន្ថែមឲ្យមានភាពចម្រុះ អ្នកអាចសុំឲ្យសិស្ស ឬក្រុមសិស្សផ្សេងៗទន្ទេញឃ្លាណាមួយខាងក្រោមនេះ ។ សូមចង្អុលទៅសិស្ស ឬក្រុម ហើយឲ្យពួកគេសូត្រផ្នែក ដែលអ្នកបានដាក់ឲ្យពួកគេ ។ សូមបន្តធ្វើបែបនេះ រហូតដល់សេចក្ដីយោងបទគម្ពីរ និងឃ្លាគន្លឹះទាំងមូលត្រូវបានសូត្រឡើងវិញ ។ បន្ទាប់មក អ្នកអាចកំណត់ផ្នែកផ្សេងមួយទៀតទៅដល់សិស្ស ឬក្រុមនីមួយៗ ហើយធ្វើសកម្មភាពបែបនេះឡើងវិញ ។
-
ចូរមករកយើង
-
ហើយទទួលបុណ្យជ្រមុជទឹក
-
ប្រយោជន៍ឲ្យអ្នករាល់គ្នាអាចបានញែកចេញបរិសុទ្ធ
-
ដោយការទទួលនូវព្រះវិញ្ញាណបរិសុទ្ធ
អនុវត្តជាក់ស្ដែង
ដើម្បីជួយអ្នករំឭកឡើងវិញ សូមចំណាយពេល ៣០ វិនាទីសរសេរអ្វីដែលអ្នកអាចចាំបានអំពីគោលការណ៍មួយនៃគោលការណ៍ទទួលបានចំណេះដឹងខាងវិញ្ញាណ ។ បន្ទាប់មក ធ្វើដូចគ្នាទៅនឹងគោលការណ៍ពីរផ្សេងទៀត ។ ប្រសិនបើអ្នកត្រូវការជំនួយក្នុងការចងចាំអំពីគោលការណ៍នេះ អ្នកអាចមើលកថាខណ្ឌ ទី ៥–១២ នៅក្នុងផ្នែក « ការទទួលបានចំណេះដឹងខាងវិញ្ញាណ » នៃ ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២៣ ) ។
ជម្រើសមួយទៀត ដើម្បីរំឭកឡើងវិញអំពីគោលការណ៍ទទួលបានចំណេះដឹងខាងវិញ្ញាណ គឺត្រូវបំបែកសិស្សនៅក្នុងថ្នាក់ទៅជាបីក្រុម ហើយដាក់កំណត់គោលការណ៍មួយទៅឲ្យក្រុមនីមួយៗ ដើម្បីធ្វើការរំឭកឡើងវិញ ។ សិស្សម្នាក់មកពីក្រុមនីមួយៗអាចសរសេរនៅលើក្តារខៀនចំពោះអ្វីដែលក្រុមរបស់គាត់ ឬនាងចងចាំពីគោលការណ៍ ដែលបានដាក់ឲ្យពួកគេ។
នៅពេលសិស្សបានបញ្ចប់ការរំឭកឡើងវិញអំពីគោលការណ៍ដែលបានចាត់ទៅឲ្យពួកគេហើយ សូមចែកចាយសាច់រឿងខាងក្រោមជាមួយនឹងសិស្សនៅក្នុងថ្នាក់ ។ អ្នកប្រហែលជាចង់បង្ហាញសាច់រឿងនេះ ដើម្បីសិស្សអាចមើលវាទាំងស្រុងនៅក្នុងអំឡុងពេលរៀនមេរៀន ។
អ្នក និងមិត្តភក្តិរបស់អ្នកឈ្មោះ មេហ្គាន កំពុងពិភាក្សាពីដំណឹងល្អនៅតាមផ្លូវចេញពីសាលារៀនមកផ្ទះវិញ ។ មេហ្គាន សួរថា « តើអ្នកធ្លាប់ខ្លាចអំពី ការជួបព្រះម្ដងទៀតទេ ? ខ្ញុំព្យាយាមរស់នៅឲ្យបានត្រឹមត្រូវ ហើយនៅពេលដែលខ្ញុំធ្វើខុស ខ្ញុំប្រែចិត្ត ប៉ុន្តែគំនិតដែលថាការឈរនៅចំពោះព្រះភ័ក្រព្រះ ដើម្បីទទួលការជំនុំជម្រះនោះធ្វើឲ្យខ្ញុំមានការភ័យខ្លាច » ។
សូមអញ្ជើញសិស្សឲ្យពិភាក្សាអំពីរបៀប ដែលពួកគេអាចប្រើប្រាស់គោលការណ៍នានាមកពីការទទួលបានចំណេះដឹងខាងវិញ្ញាណ និងគោលលទ្ធិ ដែលបានបង្រៀននៅក្នុងគម្ពីរ នីហ្វៃទី ៣ ២៧:២០ ដើម្បីជួយមេហ្គាន អំពីកង្វល់របស់នាង ។
អ្នកអាចនឹងពិចារណាពីការចាប់ផ្តើមការពិភាក្សាដោយការសុំសិស្សឲ្យចែកចាយអំពីគោលការណ៍មួយណាដែលពួកគេអាចនឹងចាប់ផ្តើម និងរបៀបដែលគោលការណ៍នោះអាចមានប្រយោជន៍ ។ បន្ទាប់មកបន្តពិភាក្សាអំពីគោលការណ៍ផ្សេងទៀតនៃការទទួលបានចំណេះដឹងខាងវិញ្ញាណ រហូតដល់អ្នកបានពិភាក្សាអំពីរបៀបដែលគោលការណ៍ទាំងបីនេះអាចជួយដោះស្រាយកង្វល់ដូចជាកង្វល់របស់ មេហ្គាន ។
ប្រសិនបើចាំបាច់ សូមប្រើប្រាស់សំណួរខាងក្រោម ជាផ្នែកនៃការពិភាក្សារបស់អ្នក ។ អ្នកមិនចាំបាច់ប្រើប្រាស់សំណួរទាំងអស់នេះទេ ហើយអ្នកអាចសាកសួរទៅពួកគេទៅតាមលំដាប់ ដែលមានប្រយោជន៍បំផុត ។
សូមពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏អស់កល្បមួយ
-
តើមានការសន្មតអ្វីខ្លះអាចខុសឆ្គងដែល មេហ្គាន មានអំពីព្រះវរបិតាសួគ៌ ឬផែនការរបស់ទ្រង់ ?
-
តើមានសេចក្ដីពិតអ្វីខ្លះដែលអ្នកចង់ឲ្យ មេហ្គាន យល់អំពីព្រះវរបិតាសួគ៌ និងផែនការរបស់ទ្រង់ ?
សូមស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព
-
តើការបង្រៀនអ្វីខ្លះមកពី នីហ្វៃទី ៣ ២៧: ២០ ដែលអាចជួយដល់ស្ថានភាពនេះបាន ?
-
តើមានបទគម្ពីរ ឬសេចក្ដីថ្លែងការណ៍អ្វីខ្លះទៀតមកពីថ្នាក់ដឹកនាំសាសនាចក្រដែលអាចមានប្រយោជន៍ ?
ធ្វើសកម្មភាពដោយសេចក្ដីជំនឿ
-
តើសកម្មភាពអ្វីខ្លះដែល មេហ្គាន អាចធ្វើបាន ដែលអាចជួយដល់នាងឲ្យមានសេចក្តីសុខសាន្តកាន់តែខ្លាំងពីកង្វាល់របស់នាង ? ហេតុអ្វីបានជាអ្នកគិតថា សកម្មភាពទាំងនេះអាចជួយបាន ?
ការរំឭកចំណេះចំណានខាងគោលលទ្ធិ
សកម្មភាពខាងក្រោមនេះអាចប្រើប្រាស់បាននៅក្នុងមេរៀននៅពេលខាងមុខ ដើម្បីជួយសិស្សឲ្យទន្ទេញសេចក្ដីយោងបទគម្ពីរ និងឃ្លាបទគម្ពីរគន្លឹះសម្រាប់ នីហ្វៃទី ៣ ២៧:២០ ។ សកម្មភាពនេះអាចធ្វើជាមួយសិស្សទាំងអស់នៅក្នុងថ្នាក់ ជាក្រុមតូចៗ ឬចាប់ជាដៃគូ ។
សូមអញ្ជើញសិស្សឲ្យសរសេរនៅលើក្រដាសមួយសន្លឹកអំពីសេចក្ដីយោងបទគម្ពីរ និងឃ្លាបទគម្ពីរគន្លឹះសម្រាប់ នីហ្វៃទី ៣ ២៧:២០ ហើយសូត្រសេចក្ដីយោងបទគម្ពីរ និងឃ្លាបទគម្ពីរគន្លឹះឲ្យឮៗចំនួនបីដង ។ បន្ទាប់មកសុំឲ្យពួកគេកាត់ពាក្យឲ្យដាច់ៗពីគ្នា ហើយច្របល់បញ្ចូលគ្នា ។ បន្ទាប់មកឲ្យសិស្សដាក់ពាក្យតាមលំដាប់លំដោយឡើងវិញ ។