«នីហ្វៃទី ៤ ៖ ‹ បានប្រែចិត្តជឿដល់ព្រះអម្ចាស់ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ៤ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ៤
« បានប្រែចិត្តជឿដល់ព្រះអម្ចាស់ »
ជាច្រើនពាន់ឆ្នាំមកហើយបុគ្គលទាំងឡាយ ក្រុមគ្រួសារ និងសង្គមបានខិតខំស្វែងរកឧត្តមគតិដូចជា ភាពសុខដុមរមនា សេចក្តីសុខសាន្ត និងសាមគ្គីភាព ។ អ្វីៗទាំងអស់នេះប្រហែលជាពិបាកនឹងយោងដល់ ប៉ុន្តែវាបានមានរួចទៅហើយ ។ ដំណើររឿងនៅក្នុង នីហ្វៃទី ៤ គឺជាឧទាហរណ៍មួយនៃរឿងនោះ ។ គន្លឹះមួយដើម្បីទទួលបានពរជ័យទាំងអស់នេះ គឺធ្វើឲ្យការប្រែចិត្តជឿរបស់យើងលើព្រះអម្ចាស់កាន់តែស៊ីជម្រៅ ហើយមានសេចក្តីស្រឡាញ់របស់ព្រះនៅក្នុងចិត្តរបស់យើង ។ មេរៀននេះអាចជួយអ្នកឲ្យមានអារម្មណ៍ស្រឡាញ់ព្រះវរបិតាសួគ៌ និងព្រះយេស៊ូវគ្រីស្ទកាន់តែខ្លាំងឡើង ដើម្បីអ្នកអាចប្រែចិត្តកាន់តែស៊ីជម្រៅចំពោះទ្រង់ ។
រៀបចំខ្លួនដោយការសិក្សាព្រះបន្ទូលរបស់ព្រះ ។ យើងមានទំនួលខុសត្រូវក្នុងការបង្រៀនសេចក្ដីពិត ដែលមាននៅក្នុងបទគម្ពីរ និងការបង្រៀនរបស់ពួកព្យាការី និងសាវកនៅថ្ងៃចុងក្រោយ ។ តាមរយៈការសិក្សាព្រះបន្ទូលរបស់ព្រះប្រកបដោយការអធិស្ឋាន នោះយើងអាចធ្វើវេញជាធ្លុងមួយជាមួយនឹងព្រះវិញ្ញាណបរិសុទ្ធ ហើយទទួលបានការយល់ដឹង និងការណែនាំ ។
ការរៀបចំសិស្ស ៖ សូមពិចារណាអញ្ជើញសិស្សឲ្យសិក្សាអំពីអត្ថន័យនៃពាក្យ ការប្រែចិត្តជឿ ដែលមាននៅក្នុងធនធានសាសនាចក្រ ។ ម្យ៉ាងវិញទៀត អ្នកអាចអញ្ជើញសិស្សឲ្យសួរសិស្សណាម្នាក់ដែលពួកគេដឹងថាអ្វីទៅជាការប្រែចិត្តជឿលើព្រះគ្រីស្ទមានន័យចំពោះពួកគេ ។
សកម្មភាពរៀនសូត្រដែលអាចមាន
ស្ថានសួគ៌អាចកើតមាន
សូមស្រមៃថា តើវានឹងទៅជាយ៉ាងណា ប្រសិនបើអ្នក និងមនុស្សជុំវិញអ្នកទាំងអស់គ្នាស្រឡាញ់ ហើយព្យាយាមធ្វើតាមព្រះយេស៊ូវគ្រីស្ទ ។
សូមពិចារណាដាក់សិស្សជាក្រុមតូចៗ ហើយឲ្យពួកគេពិភាក្សាសំណួរខាងក្រោមខ្លីៗ ។
-
តើសហគមន៍របស់អ្នកនឹងមានភាពខុសគ្នាយ៉ាងណា ?
-
តើសាលារៀន ឬព្រះវិហាររបស់អ្នកនឹងមានភាពខុសគ្នាយ៉ាងណា ?
-
តើផ្ទះរបស់អ្នកនឹងមានភាពខុសគ្នាយ៉ាងណា ?
ព្រះគម្ពីរនីហ្វៃទី ៤ មានដំណើររឿងអំពីមនុស្ស ដែលបានរស់នៅ បន្ទាប់ពីការយាងមករបស់ព្រះអង្គសង្គ្រោះទៅកាន់ទ្វីបអាមេរិក ។ នៅពេលអ្នកសិក្សាពីបទពិសោធន៍របស់ពួកគេ សូមរកមើលឥទ្ធិពលដែល ព្រះយេស៊ូវគ្រីស្ទ និងដំណឹងល្អរបស់ទ្រង់មានសម្រាប់មនុស្សទាំងនេះ ។ សូមគិតអំពីរបៀបដែលការបង្រៀនទាំងនេះអាចមានឥទ្ធិពលលើរបៀប ដែលអ្នកជ្រើសរើសរស់នៅក្នុងជីវិតរបស់អ្នក ។
ឥទ្ធិពលនៃដំណឹងល្អរបស់ព្រះអង្គសង្គ្រោះ
សូមអាន នីហ្វៃទី ៤ ១:១–២ ដោយរកមើលឥទ្ធិពលដែលព្រះអង្គសង្គ្រោះ និងការបង្រៀនរបស់ទ្រង់មានលើប្រជាជននេះ ។
-
តើអ្នកបានសម្គាល់ឃើញអ្វីខ្លះ ?
អ្នកប្រហែលជាចង់គូសចំណាំឃ្លា « នោះប្រជាជនទាំងអស់ បានប្រែចិត្តជឿដល់ព្រះអម្ចាស់ » នៅក្នុង ខទី ២ ។
សូមពិចារណាអញ្ជើញសិស្សដែលបានបំពេញសកម្មភាពរៀបចំឲ្យចែកចាយអ្វី ដែលពួកគេបានរៀនអំពីអត្ថន័យនៃការប្រែចិត្តជឿដល់ព្រះអម្ចាស់ ។ អ្នកក៏អាចចែកចាយនិយមន័យខាងក្រោមបានផងដែរ ។
ការប្រែចិត្តជឿដល់ព្រះអម្ចាស់មានន័យថា « ជាការប្រែជំនឿ ចិត្ត និងជីវិតរបស់មនុស្សម្នាក់ ដើម្បីទទួលយក ហើយធ្វើឲ្យបានស្របតាមព្រះហឫទ័យនៃព្រះ … [ និង ] ហើយប្រែឲ្យបានទៅជាសិស្សនៃព្រះគ្រីស្ទ » ( សេចក្ដីណែនាំដល់បទគម្ពីរទាំងឡាយ « ប្រែចិត្តជឿ, ការប្រែចិត្តជឿ, អ្នកប្រែចិត្តជឿ » នៅលើគេហទំព័រ scriptures.ChurchofJesusChrist.org ) ។
ពរជ័យនៃការប្រែចិត្តជឿ
ពួកសាសន៍នីហ្វៃ និងសាសន៍លេមិនបានដកពិសោធន៍នូវពរជ័យដ៏មិនគួរឲ្យជឿ ដោយសារការប្រែចិត្តជឿរបស់ពួកគាត់ដល់ព្រះយេស៊ូវគ្រីស្ទ ។ នៅក្នុងសៀវភៅកំណត់ហេតុការសិក្សារបស់អ្នក សូមសរសេរ « ពរជ័យពីការប្រែចិត្តជឿ » នៅកណ្តាលទំព័រមួយសន្លឹក ។
បន្ថែមពីលើសិស្សសរសេរចំណងជើងនៅក្នុងសៀវភៅកំណត់ហេតុការសិក្សារបស់ពួកគេ នោះអ្នកអាចសរសេរវានៅលើក្ដារខៀនផងដែរ ។ សិស្សអាចសរសេរចម្លើយរបស់ពួកគេនៅលើក្ដារខៀន បន្ទាប់ពីសិក្សាខគម្ពីរខាងក្រោម ។
សូមអាន នីហ្វៃទី ៤ ១:២–១៨ ហើយគូសចំណាំពាក្យ ឬឃ្លា ដែលបង្ហាញពីពរជ័យ ដែលពួកគេបានទទួល ។ នៅលើក្រដាសរបស់អ្នក សូមសរសេរពាក្យ ឬឃ្លាទាំងនេះជុំវិញចំណងជើង « ពរជ័យពីការប្រែចិត្តជឿ » ។ ( វាអាចមានអត្ថប្រយោជន៍ក្នុងការដឹងអំពីអត្ថន័យនៃពាក្យមួយចំនួននៅក្នុង ខទី ១៦ ។ kការច្របូកច្របល់ សំដៅ ទៅលើការចលាចល ឬ ដំណើរអ៊ូអែរ ជាសាធារណៈ ការសហាយស្មន់ សំដៅទៅលើ អំពើបាប ខាងផ្លូវភេទ និង អំពើអាសអាភាស សំដៅទៅលើភាពស្រើបស្រាល និង ភាពអសីលធម៌ ) ។
សូមគិតអំពីពរជ័យមួយណា ដែលអ្នកចង់ដកបទពិសោធន៍បន្ថែមទៀតក្នុងជីវិតរបស់អ្នកផ្ទាល់ ។ សូមពិចារណាគូសរង្វង់ពាក្យទាំងនេះនៅលើទំព័រនេះក្នុងសៀវភៅកំណត់ហេតុការសិក្សារបស់អ្នក ។
សូមអញ្ជើញសិស្សឲ្យចែកចាយអ្វីដែលពួកគេបានរៀន ឬអារម្មណ៍ទទួលបានពីការសិក្សា ខទី ២–១៨ របស់ពួកគេ ។ អ្នកអាចអញ្ជើញសិស្សផ្សេងៗឲ្យចែកចាយឃ្លា ដែលមានសារៈសំខាន់ ជាពិសេសចំពោះពួកគេ ហើយពន្យល់អំពីសារៈសំខាន់ពីឃ្លាទាំងនេះ ។
-
តើអ្វីដែលលេចធ្លោសម្រាប់អ្នកនៅក្នុងខគម្ពីរទាំងនេះ ? ហេតុអ្វី ?
-
ផ្អែកលើអ្វីដែលអ្នកបានរៀនពីខគម្ពីរទាំងនេះ តើអ្នកអាចបំពេញប្រយោគខាងក្រោម ដោយរបៀបណា ៖ « នៅពេលយើងបានប្រែចិត្តជឿដល់ព្រះអម្ចាស់ … » ?
សេចក្តីពិតមួយដែលយើងអាចស្វែងយល់មកពីខគម្ពីរទាំងនេះគឺ នៅពេលដែលយើងប្រែចិត្តជឿដល់ព្រះអម្ចាស់ យើងត្រូវបានប្រទានពរឲ្យមានសុភមង្គល និងសាមគ្គីភាពជាបុត្រាបុត្រីនៃព្រះគ្រីស្ទ ។
-
ហេតុអ្វីបានជាអ្នកគិតថា ការប្រែចិត្តជឿដល់ព្រះយេស៊ូវគ្រីស្ទ ហើយការរស់នៅតាមដំណឹងល្អរបស់ទ្រង់អាចនាំឲ្យពរជ័យបែបនេះ ?
-
តើការយល់អំពីសេចក្តីពិតនេះមានឥទ្ធិពលលើសកម្មភាពប្រចាំថ្ងៃរបស់យើងដោយរបៀបណា ?
សេចក្តីស្រឡាញ់របស់ព្រះ
អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានចែកចាយពីការសង្កេតខាងក្រោមអំពីមូលហេតុ ដែលមនុស្សទាំងនេះអាចរស់នៅក្នុងស្ថានភាព ដែលមានសុភមង្គល និងសាមគ្គីភាព ។
តើអ្វីជាគន្លឺះនៃការរកឃើញការរស់នៅប្រកបដោយភាពសប្បាយរីករាយ និងមានសុភមង្គលនេះ ? វាបានបង្កប់អត្ថន័យក្នុងអត្ថបទនៅឃ្លាមួយគឺ ៖ « សេចក្ដីស្រឡាញ់នៃព្រះ …ដែលបានស្ថិតនៅក្នុងចិត្តរបស់មនុស្ស » [ នីហ្វៃទី ៤ ១:១៥ ] ។ នៅពេលដែលសេចក្តីស្រឡាញ់របស់ព្រះរៀបចំស្ថានភាពជីវិតផ្ទាល់ខ្លួនរបស់យើង ទំនាក់ទំនងរបស់យើងចំពោះគ្នាទៅវិញទៅមក និងនៅទីបំផុតអារម្មណ៍របស់យើងចំពោះមនុស្សជាតិទាំងអស់ បន្ទាប់មកភាពខុសគ្នាកាលពីមុន ការបែងចែកក្រុម និងផ្នែកក្លែងក្លាយក៏ចាប់ផ្តើមរសាត់បាត់ទៅ ហើយសេចក្តីសុខសាន្តនឹងកើនឡើង ។ នោះជាអ្វីដែលបានកើតឡើងយ៉ាងពិតប្រាកដនៅក្នុងឧទាហរណ៍នៃព្រះគម្ពីរមរមនរបស់យើង ។ លែងមានសាសន៍លេមិន ឬសាសន៍យ៉ាកុប ឬសាសន៍យ៉ូសែប ឬសាសន៍សូរាំទៀតឡើយ ។ លែងមាន « ពាក្យថាសាសន៍ » ទៀតហើយ ។ ប្រជាជនបានចាត់ទុកថាពួកគេមានអត្តសញ្ញាណតែមួយ ។ ពួកគេទាំងអស់គ្នាត្រូវបានទទួលស្គាល់ថាជា « កូនចៅនៃព្រះគ្រីស្ទ » [ នីហ្វៃទី ៤ ១: ១៧ ] ។ ( ជែហ្វ្រី អ័រ ហូឡិន « ទ្រព្យសម្បត្តិច្រើនណាស់ » លីអូហា ខែ វិច្ឆិកា ឆ្នាំ ២០២១ ទំព័រ ៩ )
សូមពិចារណាគូសចំណាំឃ្លានៅក្នុង ខទី ១៥ អំពីសេចក្ដីស្រឡាញ់របស់ព្រះ ដែលមាននៅក្នុងចិត្តរបស់មនុស្ស ។ ការមានសេចក្តីស្រឡាញ់របស់ព្រះនៅក្នុងចិត្តរបស់យើងអាចមានន័យថា មានអារម្មណ៍នៃសេចក្តីស្រឡាញ់ ដែលព្រះមានសម្រាប់យើង និងសម្រាប់អ្នកដទៃ ។ វាក៏អាចមានន័យថា មានអារម្មណ៍នូវសេចក្តីស្រឡាញ់ចំពោះព្រះវរបិតាសួគ៌ និងព្រះយេស៊ូវគ្រីស្ទ ផងដែរ ។
-
តើមានសកម្មភាពអ្វីខ្លះ ដែលយើងអាចធ្វើបាន ដែលនឹងជួយយើងឲ្យមានអារម្មណ៍ស្រឡាញ់ព្រះវរបិតាសួគ៌ និងព្រះយេស៊ូវគ្រីស្ទកាន់តែខ្លាំង ?
សូមស្វែងរកចម្លើយជាច្រើនសម្រាប់សំណួរមុន ។ ដោយជាផ្នែកនៃការពិភាក្សានេះ វាអាចនឹងមានប្រយោជន៍ក្នុងការសុំឲ្យសិស្សពន្យល់អំពីអ្វី ដែលបានជួយពួកគេឲ្យមានអារម្មណ៍ស្រឡាញ់ទ្រង់ព្រះកាន់តែខ្លាំង ។ អ្នកក៏អាចចង់ចែកចាយឧទាហរណ៍ពីជីវិតផ្ទាល់ខ្លួនរបស់អ្នកផងដែរ ។
របៀបមួយដែលយើងអាចមានអារម្មណ៍ស្រឡាញ់ខ្លាំងជាងចំពោះព្រះវរបិតាសួគ៌ និងព្រះយេស៊ូវគ្រីស្ទ គឺដោយការរៀនសូត្រ ហើយមកស្គាល់ទ្រង់ទាំងទ្វេនៅក្នុងព្រះគម្ពីរ ។
សិស្សអាចបំពេញសកម្មភាពខាងក្រោមជាក្រុមតូចៗ ។
សូមចំណាយពេលដើម្បីសិក្សាវគ្គបទគម្ពីរអំពីព្រះវរបិតាសួគ៌ និងព្រះយេស៊ូវគ្រីស្ទ ដែលអាចជួយអ្នកឲ្យមានអារម្មណ៍ស្រឡាញ់ទ្រង់ទាំងទ្វេកាន់តែខ្លាំង ។ សូមយកចិត្តទុកដាក់លើអ្វីដែលអ្នករៀនអំពីគុណលក្ខណៈ ព្រះរាជបំណង និងតួនាទីរបស់ទ្រង់ទាំងទ្វេ ។ អ្នកអាចស្វែងរកពាក្យដូចជា « ព្រះវរបិតាដែលគង់នៅស្ថានសួគ៌ » ឬ « ព្រះយេស៊ូវគ្រីស្ទ » ដោយប្រើឧបករណ៍សិក្សាដូចជា សេចក្ដីណែនាំដល់បទគម្ពីរទាំងឡាយ Topical Guide ឬមុខងារស្វែងរកនៅលើបណ្ណាល័យដំណឹងល្អ ។
សូមអញ្ជើញសិស្សឲ្យចែកចាយខគម្ពីរ ដែលពួកគេបានរកឃើញថា មានអត្ថន័យជាពិសេសចំពោះពួកគេ ។ សូមឲ្យពួកគេពន្យល់អំពីរបៀប ដែលសេចក្ដីពិត ដែលបានបង្រៀនអាចជួយយើងឲ្យមានអារម្មណ៍ស្រឡាញ់ព្រះវរបិតាសួគ៌ ឬព្រះយេស៊ូវគ្រីស្ទ កាន់តែខ្លាំង ។
-
នៅពេលដែលសិស្សបានបញ្ចប់ការចែកចាយហើយ សូមពិចារណាអញ្ជើញពួកគេឲ្យឆ្លើយសំណួរខាងក្រោម នៅក្នុងសៀវភៅកំណត់ហេតុការសិក្សារបស់ពួកគេ ។ បន្ទាប់មក ថ្លែងទីបន្ទាល់អំពីសេចក្ដីពិតដែលអ្នកបានពិភាក្សានៅថ្ងៃនេះ ។
-
តើមានអ្វីខ្លះដែលអ្នកនឹងព្យាយាមធ្វើនៅថ្ងៃខាងមុខ ដែលអាចជួយអ្នកឲ្យប្រែចិត្តជឿលើព្រះយេស៊ូវគ្រីស្ទ កាន់តែខ្លាំង ?