3 Nefi 28

Pasja e Dëshirës për t’i Sjellë të Tjerët te Jezu Krishti

Një nga dëshirat më të mëdha që mund të kemi në jetën tonë është t’i ndihmojmë njerëzit e tjerë t’i marrin bekimet e ofruara nga Jezu Krishti dhe Shlyerjen e Tij (shih te Doktrina e Besëlidhje 15:6). Tre prej dishepujve nefitë e treguan këtë në një mënyrë unike kur dëshiruan të qëndronin në tokë dhe të sillnin shpirtra te Jezu Krishti deri në Ardhjen e Tij të Dytë. Ky mësim ka për qëllim të të ndihmojë të ndiesh një dëshirë më të madhe për t’i sjellë të tjerët te Jezu Krishti.

Ndihma që nxënësit të mësojnë të mbështeten te Jezu Krishti. Ndërsa nxënësit përpiqen ta ndjekin Jezu Krishtin, ata mund të ndihen të pasigurt për aftësitë e tyre për t’i përmbushur detyrat e tyre. Kujtojuani nxënësve që, ndërsa veprojnë me besim, ata do të forcohen nga Zoti. Nxitini ata të kërkojnë udhërrëfim dhe kurajë duke u kthyer tek Ati Qiellor në lutje.

Përgatitja e nxënësve: Ftojini nxënësit të mendojnë rreth përvojave që kanë pasur me shpërndarjen e ungjillit dhe çfarë i ndihmoi të dëshironin ta bënin atë që bënë.

Veprimtari të Mundshme të të Mësuarit

Çfarë dëshiron?

Merreni parasysh t’i ftoni nxënësit të përsiatin për pyetjet vijuese.

• Si do të përgjigjeshe nëse Jezusi do të të shfaqej dhe do të të pyeste: “Çfarë dëshiron prej meje?”

• Përse do ta zgjidhje atë që zgjodhe?

Merreni parasysh t’i ftoni disa nxënës që ndihen të lirshëm për ta bërë këtë gjë t’i tregojnë përgjigjet e tyre.

Gjatë shërbesës së Shpëtimtarit midis nefitëve, Ai ua bëri këtë pyetje dishepujve të Tij (shih te 3 Nefi 28:1).

Lexo tek 3 Nefi 28:2–6, duke kërkuar se si iu përgjigjën dishepujt nefitë pyetjes së Shpëtimtarit.

• Çfarë gjete?

Te vargu 6, Shpëtimtari përmendi se tre prej dishepujve nefitë dëshiruan të njëjtën gjë që kishte dëshiruar Gjoni, Dishepulli i Dashur. Lexo te Doktrina e Besëlidhje 7:1–3, duke kërkuar dëshirën e Gjonit.

• Përse mendon se këta tre dishepujt dëshiruan të qëndronin mbi tokë?

Mendo për dëshirën tënde për t’i sjellë njerëzit te Jezu Krishti. Vlerësimi vijues i vetes mund të të ndihmojë ta bësh këtë.

Merreni parasysh ta paraqitni veprimtarinë vijuese dhe t’i ftoni nxënësit ta vlerësojnë veten në heshtje. Mos ua kërkoni nxënësve t’ia tregojnë përgjigjet e tyre klasës.

Përgjigju për secilin nga pohimet vijuese me njërën nga këto përgjigje: “rregullisht”, “nganjëherë” ose “rrallëherë”.

1. Unë kërkoj mundësi për t’u treguar njerëzve rreth Krishtit.

2. Unë lutem për mundësi për të gjetur njerëz për t’u folur rreth Krishtit.

3. Unë ndiej një dëshirë për t’i ndihmuar të tjerët ta ndjekin Jezu Krishtin.

Shtimi i dëshirës sate për t’i ndihmuar të tjerët të vijnë te Krishti

Krahas nxënësve që e vizatojnë figurën vijuese në ditarët e tyre të studimit, ju mund ta vizatoni atë në tabelë.

Në mes të një faqeje në ditarin tënd të studimit, vizato një figurë të vogël njeriu që përfaqëson një adoleshent që nuk e ka dëshirën për ta shpërndarë ungjillin te të tjerët. Në një vend bosh rreth figurës së njeriut shkruaj disa nga arsyet përse ky adoleshent mund të mos dëshirojë ta shpërndajë ungjillin. Ruaj vend për t’i shkruar të vërtetat që mëson ndërsa studion sot.

Ndërsa vazhdon të studiosh, kërko mësimet që mund ta ndihmojnë dikë të ndiejë një dëshirë më të madhe për ta shpërndarë ungjillin.

Lexo tek 3 Nefi 28:7–10, duke kërkuar se çfarë u premtoi Zoti dishepujve nefitë që dëshiruan të qëndronin mbi tokë për të sjellë shpirtra tek Ai.

• Çfarë bekimesh u dha Jezusi atyre te vargjet 7–8 që të mund t’i përmbushnin dëshirat e tyre?

• Çfarë u premtoi Shpëtimtari dishepujve të Tij te vargjet 9–10 se do të merrnin për shkak të dëshirave të tyre të drejta?

Në periudhën tonë ungjillore, Zoti u ka premtuar bekime atyre që përpiqen të sjellin shpirtra tek Ai. Lexo te Doktrina e Besëlidhje 18:15–16, duke kërkuar bekimet që mund të përjetojmë për sjelljen e shpirtrave te Jezu Krishti.

• Cila është një e vërtetë që mund ta mësojmë nga këto vargje rreth mënyrës se si mund të bekohemi ndërsa përpiqemi të sjellim shpirtra te Jezu Krishti?

Një e vërtetë që mund të mësojmë nga këto vargje është: ndërsa bëjmë përpjekje për të sjellë shpirtra te Jezu Krishti, ne mund të përjetojmë gëzim. Merre parasysh ta shkruash këtë të vërtetë te figura që krijove.

• Përse mendon se sjellja e shpirtrave te Jezu Krishti është një burim gëzimi?

• Si mund ta ndihmojë të kuptuarit e kësaj të vërtete dikë të ndiejë një dëshirë më të madhe për ta shpërndarë ungjillin?

Kërko shkrime të shenjta ose thënie të tjera nga udhëheqësit e Kishës që mund të ndihmojnë të rritet dëshira jonë për ta shpërndarë ungjillin. Mund të përdorësh mjete studimi si Udhëzuesi për Shkrimet e Shenjta për të kërkuar tema si “Punë Misionare”, ose mund t’i studiosh disa ose të gjitha vargjet vijuese. Shtoji të vërtetat që gjen në figurën në ditarin tënd të studimit.

Paraqitini vargjet e mëposhtme. Jepuni nxënësve kohë për t’i studiuar këto vargje ose të tjera ose thëniet nga udhëheqësit e Kishës që i gjejnë vetë.

• 2 Nefi 2:8

• Doktrina e Besëlidhje 33:8–10

• Doktrina e Besëlidhje 84:88

• Doktrina e Besëlidhje 123:12–14

Ftojini nxënësit të tregojnë se çfarë mësuan nga studimet e tyre. Përveç se t’ua bëni pyetjen vijuese, mund t’i ftoni ata t’i shkruajnë të vërtetat që zbuluan përreth vizatimit në tabelë.

• Cilat janë disa mësime që gjete që mund ta ndihmojnë dikë të ndiejë një dëshirë më të madhe për ta shpërndarë ungjillin? Pse mendon se këto mësime do të ndihmonin?

• Cilat përvoja të kanë ndihmuar t’i shohësh bekimet që mund të merren kur ne e shpërndajmë ungjillin?

Për të parë shembuj se si individët u bekuan nëpërmjet përpjekjeve misionare, merre parasysh të shohësh “Your Day for a Mission” [“Dita Juaj për një Mision”] (3:31) ose “By Small and Simple Things: Sharing the Gospel” [“Me Anë Të Gjërave të Vogla dhe të Thjeshta: Shpërndarja e Ungjillit”] (3:19). Të dyja materialet filmike mund të gjenden në ChurchofJesusChrist.org.

Mendo se çfarë ke mësuar ose ndier sot që mund të ketë ndikuar në dëshirën tënde për t’i ndihmuar të tjerët të vijnë te Krishti. Shëno në ditarin tënd të studimit çdo mendim ose mbresë shpirtërore që ke pasur dhe bëj një plan për të vepruar sipas mbresave të tua.

Merreni parasysh të dëshmoni për forcën që mund të marrim dhe dashurinë e Perëndisë që mund të ndiejmë ndërsa veprojmë sipas dëshirës për t’i ndihmuar të tjerët të vijnë te Jezu Krishti.

Komente dhe Informacion për Rrethanat

Përse është e rëndësishme sot dëshira jonë për t’i ndihmuar të tjerët të vijnë te Krishti?

Presidenti Rasëll M. Nelson dha mësim:

“Ungjilli i Jezu Krishtit nuk është dashur kurrë më shumë sesa sot. Grindja shkel gjithçka që përfaqësoi dhe dha mësim Shpëtimtari. Unë e dua Zotin Jezu Krisht dhe dëshmoj se ungjilli i Tij është e vetmja zgjidhje e qëndrueshme për paqe.

Ungjilli i Tij është e vetmja përgjigje kur shumë njerëz në botë janë shtangur nga frika. … Ne kemi përgjegjësinë e shenjtë për t’u treguar për fuqinë dhe paqen e Jezu Krishtit të gjithë atyre që do të dëgjojnë dhe atyre që do ta lejojnë Perëndinë të triumfojë në jetën e tyre. …

… Errësira shpirtërore në botë bën që drita e Jezu Krishtit të nevojitet më shumë se kurrë. Të gjithë e meritojnë mundësinë që të dinë për ungjillin e rivendosur të Jezu Krishtit. Çdo njeri meriton të dijë se ku mund ta gjejë shpresën dhe paqen që ‘ia tejkalon çdo zgjuarsie’ [Filipianëve 4:7].” (Rasëll M. Nelson, “Predikimi i Ungjillit të Paqes”, Liahona, maj 2022, f. 6, 7)

A mund të ndiejnë të tjerët gëzim kur unë e shpërndaj ungjillin?

Plaku Markus B. Nash, i Të Shtatëdhjetëve, dha mësim:

“Kur një njeri e mëson qëllimin e lavdishëm të jetës, kur arrin të kuptojë se Krishti i fal dhe i ndihmon ata që e ndjekin Atë dhe më pas zgjedh ta ndjekë Krishtin në ujërat e pagëzimit, jeta ndryshon për mirë – madje edhe kur rrethanat e jashtme të jetës nuk ndryshojnë.

Një motër rrezatuese dhe e lumtur që e takova në Onitsha të Nigerisë, më tha se që nga koha që mësoi për ungjillin dhe u pagëzua (dhe tani po përdor fjalët e saj): ‘Çdo gjë më shkon mirë. Jam e lumtur! Jam në qiellin e shtatë.’ Shpërndarja e ungjillit ndez gëzim dhe shpresë në shpirtin e dhënësit dhe të marrësit. Me të vërtetë, ‘sa i madh do të jetë gëzimi juaj’ [Doktrina e Besëlidhje 18:15] teksa e shpërndani ungjillin! Shpërndarja e ungjillit është gëzim mbi gëzimin, shpresë mbi shpresën.” (Markus B. Nash, “Mbajeni Lart Dritën Tuaj”, Liahona, nëntor 2021, f. 71)

Cili është ndryshimi ndërmjet shndërrimit, shpërfytyrimit dhe ringjalljes?

Tre dishepujt nefitë u shpërfytyruan në fillim me qëllim që të “shihnin gjërat e Perëndisë” (3 Nefi 28:13–15) dhe më pas u shndërruan që të mund të qëndronin në tokë deri në Ardhjen e Dytë (3 Nefi 28:37–40).

Përkufizimet vijuese mund të ndihmojë të qartësohen ndryshimet ndërmjet shndërrimit, shpërfytyrimit dhe ringjalljes.

• Qenie të ngritura në qiell. “Persona që ndryshohen që të mos provojnë dhembje ose vdekje, deri në ringjalljen e tyre në pavdekësi” (Udhëzuesi për Shkrimet e Shenjta, “Qenie të Ngritura në Qiell”, scriptures.ChurchofJesusChrist.org).

• Shpërfytyrim. “Gjendja e njerëzve që përkohësisht ndryshohen në pamjen e jashtme dhe natyrën fizike – domethënë ngrihen në një nivel më të lartë shpirtëror – kështu që ata të mund të durojnë praninë dhe lavdinë e qenieve qiellore” (Udhëzuesi për Shkrimet e Shenjta, “Shpërfytyrim”, scriptures.ChurchofJesusChrist.org).

• Ringjallje. “Ribashkimi i trupit shpirtëror me trupin fizik prej mishi e kockash pas vdekjes. Pas ringjalljes, shpirti dhe trupi nuk do të ndahen më kurrë dhe njeriu do të bëhet i pavdekshëm” (Udhëzuesi për Shkrimet e Shenjta, “Ringjallje”, scriptures.ChurchofJesusChrist.org).

Veprimtari Plotësuese të të Mësuarit

Shqetësime të mundshme rreth shërbimit në mision

Në vend të veprimtarisë me figurën e njeriut, mund t’i ftoni nxënësit ta shohin ose ta lexojnë thënien vijuese nga Presidenti Rasëll M. Nelson. Ftojini nxënësit të imagjinojnë sikur një shok që e dëgjoi këtë thënie ka shqetësime rreth shërbimit në mision. Nxënësit mund të mendojnë se çfarë mund të jenë ato shqetësime. Ata mund të gjejnë më pas shkrime të shenjta ose thënie nga udhëheqësit e Kishës që mund ta ndihmojnë këtë person t’i kapërcejë shqetësimet e tij dhe të ndiejë një dëshirë më të madhe për të shërbyer në mision.

Hollësi të tjera rreth tre dishepujve nefitë

Mund t’i ftoni nxënësit të lexojnë tek 3 Nefi 28:18–23 dhe të kërkojnë se si i bekoi Zoti dishepujt nefitë që të mund t’i realizonin dëshirat e tyre të drejta. Nxënësit mund të lexojnë edhe tek 3 Nefi 28:25–32, duke kërkuar njerëz që kanë përfituar dhe do të përfitojnë ende nga shërbesa e këtyre dishepujve. Merreni parasysh t’i ftoni nxënësit të diskutojnë me një partner diçka që mësuan rreth shërbesës së këtyre dishepujve nefitë.

3 Nefi 29. Profecitë e ditëve të fundit

Nëse do të donit të ndaleni për ta studiuar kapitullin tek 3 Nefi 29 në orën mësimore, mund të përdorni tabelën vijuese. Nxënësit mund t’i lidhin fjalët në të majtë me përkufizimet e tyre në të djathtë. Ata mund të lexojnë më pas tek 3 Nefi 29, duke kërkuar se çfarë profetizoi Mormoni se do të ndodhte në ditët e fundit. Ftojini nxënësit ta diskutojnë se si i kanë parë ato gjëra të ndodhin sot.

1. Johebrenjtë	a. Dy kuptime: 1) pasardhësit e profetit Jakob (Izrael) të Dhiatës së Vjetër, me të cilin Zoti bëri besëlidhje dhe 2) besimtarët e vërtetë te Jezu Krishti, të cilët kanë bërë besëlidhje me Perëndinë
2. Shtëpia e Izraelit	b. Një premtim për besnikët i cili përfshiu bekimet e ungjillit, autoritetin e priftërisë, familjet e përjetshme dhe një tokë trashëgimie
3. Përbuzje	c. Trishtim dhe keqardhje e thellë
4. Tallje	d. Të mos përfillësh ose të mohosh me përçmim
5. Besëlidhja e Zotit me Izraelin	e. Të shprehësh mungesë respekti ose mosmiratim
6. Mjerim	f. Dy kuptime: 1) njerëz me prejardhje familjare joizraelite ose jojudease dhe 2) njerëz pa ungjillin

(Përgjigjet: 1–f, 2–a, 3–d, 4–e, 5–b, 6–c)