Ethëri 3

“Besim Kaq të Jashtëzakonshëm”

E ke marrë ndonjëherë parasysh me të vërtetë ndryshimin që besimi te Jezu Krishti mund të sjellë në jetën tonë? Një shembull i madh është vëllai i Jaredit, i cili iu afrua Zotit me një plan për t’i zgjidhur problemet e tij dhe u lut me përulësi me “besim kaq të jashtëzakonshëm” (Ethëri 3:9), saqë “veli u hoq nga sytë e [tij]” (Ethëri 3:6) dhe e pa Zotin e bisedoi me Të. Ky mësim ka për qëllim të të ndihmojë ta ushtrosh me përulësi besimin zr Jezu Krishti.

Përqendrohuni te Jezu Krishti ndërsa i jepni mësim shkrimet e shenjta. Shpenzoni kohë për t’i ndihmuar nxënësit t’i dallojnë të vërtetat rreth Shpëtimtarit dhe fuqisë së Tij shëlbuese. Vini në dukje fragmentet e shkrimit të shenjtë që mund ta rritin besimin e tyre tek Ai. Merreni parasysh të bëni pyetje që do t’i ftojnë nxënësit të përsiatin se si Jezu Krishti mund t’i bekojë, forcojë dhe udhërrëfejë ata.

Përgatitja e nxënësve: Ftojini nxënësit të mendojnë për tre njerëz që i admirojnë nga historia e Kishës ose shkrimet e shenjta dhe se si këta njerëz treguan besim te Jezu Krishti.

Veprimtari të Mundshme të të Mësuarit

Si tregon ti besim?

Sa vijon do t’i ndihmojë nxënësit të përgatiten për të mësuar më shumë rreth besimit te Jezu Krishti. Në vend që t’i vini nxënësit të renditin shembuj, mund të kaloni në fund të mësimit për të shfaqur njërin prej materialeve filmike ose të tregoni historinë e Jan Rut’hofit.

Bëj një listë të tre njerëzve që i admiron nga historia e Kishës ose shkrimet e shenjta.

• Cilat janë disa mënyra se si këta njerëz treguan besim te Jezu Krishti?

• Si mund ta kuptosh nëse po ushtron besim te Jezu Krishti në jetën tënde?

• Përse do të doje të ushtroje besim?

Merreni parasysh t’i shkruani përgjigjet e nxënësve për pyetjen e dytë në tabelë. Ftojini nxënësit t’i përsiatin këto përgjigje dhe ta vlerësojnë besimin e tyre. Nëse është e dobishme, shtojini disa ose të gjitha thëniet vijuese të vetëvlerësimit dhe ftojini nxënësit t’i përfundojnë ato.

Për të të ndihmuar të përsiatësh për besimin tënd te Jezu Krishti, shkruaje se sa të vërteta janë thëniet vijuese në një shkallë nga 1–5 (1 = asnjëherë; 2 = ndonjëherë; 3 = shpesh; 4 = pothuajse gjithnjë; 5 = gjithnjë):

• Unë besoj te Krishti dhe e pranoj Atë si Shpëtimtarin tim.

• Nëpërmjet lutjes së sinqertë ndaj Atit Qiellor, unë kërkoj ndihmë nga Perëndia dhe Jezu Krishti për problemet e mia dhe besoj te drejtimi dhe ndihma e Tyre.

• Unë veproj dhe mirëbesoj se Zoti do të më ndihmojë.

Ndërsa e studion këtë mësim, kërko të mësosh më shumë se si mund ta ushtrosh me përulësi besimin te Jezu Krishti dhe përse mund të duash ta bësh.

Ushtrimi i besimit

Në mësimin e mëparshëm, ti mësove se Zoti e urdhëroi vëllanë e Jaredit të ndërtonte mauna dhe të kalonte oqeanin drejt tokës së premtuar; megjithatë, maunat nuk kishin dritë. Zoti i kërkoi vëllait të Jaredit të propozonte një zgjidhje (shih tek Ethëri 2:23). Ndërsa vëllai i Jaredit veproi me besim te Jezu Krishti, Zoti e ndihmoi ta zgjidhte problemin e tij dhe e bekoi në mënyra përtej asaj që kishte kërkuar.

Jepni fletushkën vijuese dhe ftojini nxënësit ta plotësojnë atë individualisht ose në grupe të vogla.

Besimi i Vëllait të Jaredit

Manual i Mësuesit për Librin e Mormonit (2024) – “Ethëri 3: ‘Besim Kaq të Jashtëzakonshëm’”

Lexoji vargjet nën secilën prej figurave vijuese dhe shkruaje atë që bëri ose tha vëllai i Jaredit për të treguar besim. (Për t’i kuptuar vargjet tek Ethëri 3:2–3, është e rëndësishme që të kuptosh se, për shkak të Rënies së Adamit dhe Evës, ne jetojmë në një botë ku jemi fizikisht të ndarë nga Perëndia dhe ne të gjithë mëkatojmë dhe ndahemi shpirtërisht nga Perëndia.)

Ethëri 3:1

Ethëri 3:2–5

Ethëri 3:6–10

Ethëri 3:11–16, 19–20

• Çfarë mësove nga përvoja e vëllait të Jaredit?

Ftojini disa nxënës t’i japin përgjigjet e tyre. Shkruajini në tabelë parimet e vërteta që thonë ata.

Një parim që mund të mësojmë, është se, ndërsa e ushtrojmë me përulësi besimin tek Zoti, ne do t’i afrohemi më shumë Atij.

Për t’i ndihmuar nxënësit ta kuptojnë më mirë besimin e vëllait të Jaredit, merreni parasysh ta ndani klasën në grupe të vogla për të bërë katër veprimtaritë vijuese. Përndryshe, ftojini nxënësit të punojnë në grupe me nga katër veta, duke bërë secili nxënës njërën prej veprimtarive. Më pas nxënësit mund të tregojnë se çfarë mësuan në grupet e tyre dhe, nëse është e dobishme, të tregojnë pikat kryesore si klasë.

1. Vëllai i Jaredit “shkriu nga një shkëmb gjashtëmbëdhjetë gurë të vegjël”, i mbajti deri në “majë të malit dhe e luti përsëri Zotin” (Ethëri 3:1). Shkruaje se përse e ndien se të qenit i gatshëm për të vepruar dhe bërë atë që mundemi për ta zgjidhur problemin, është një pjesë e rëndësishme e besimit tonë te Zoti.

2. Ndërsa vëllai i Jaredit u lut, ai përmendi “dobësinë e tij para [Perëndisë]” (Ethëri 3:2) dhe kërkoi përulësisht ndihmë. Shkruaje se si kuptueshmëria e dobësisë sonë dhe varësia jonë e plotë te Zoti mund të ndikojë te lutjet tona dhe besimi ynë tek Ai.

3. Ndërsa vëllai i Jaredit i kërkoi Zotit që t’i prekte gurët për t’i bërë ata të ndriçonin, ai dëshmoi: “Unë e di, O Zot, se ti ke të gjithë fuqinë dhe se mund të bësh çdo gjë që do për të mirën e njeriut” (Ethëri 3:4). Shkruaje se si ke arritur të kuptosh ose mund të arrish të kuptosh se Zoti ka fuqinë të na ndihmojë për problemet tona. Mund të përfshish se si ajo njohuri mund të ndikojë në besimin tonë tek Ai.

4. Vëllai i Jaredit premtoi se do t’i besonte fjalët që Zoti do të fliste në të ardhmen (shih tek Ethëri 3:11–12). Shkruaje përse mendon se vëllai i Jaredit i mirëbesonte Zotit aq shumë, saqë ra dakord me këtë.

Afrimi më pranë Zotit

• Cilat janë mënyrat e ndryshme se si Zoti e bekoi vëllanë e Jaredit për shkak të besimit të tij?

• Në ç’mënyra u afrua vëllai i Jaredit më pranë Zotit nëpërmjet kësaj përvoje?

Mund të jetë e dobishme t’i shenjosh fjalët e Zotit për vëllanë e Jaredit: “Ti je shëlbuar nga rënia; prandaj ti je kthyer prapë në praninë time” (Ethëri 3:13). Ndërsa ushtrojmë besim te Zoti për problemet tona individuale, ne mund të marrim gjithashtu ndihmën e Tij për synimin tonë të përjetshëm për ta kapërcyer ndarjen tonë nga Ai dhe për t’u kthyer që të jetojmë me Të.

Shikoje ose lexoje njërin prej shembujve vijues të të rinjve që e ushtrojnë besimin e tyre.

• Shikoje materialin filmik “Faith and the Goal” [“Besimi dhe Synimi”] (4:40). Një lojtare në moshë të re, profesioniste e futbollit amerikan tregon se si e ushtron besimin e saj te Zoti.

• Shikoje materialin filmik “Rebuilding My Faith When I Felt Lost” [“Rindërtimi i Besimit Tim Kur u Ndjeva i Humbur”] (6:25). Pasi kthehet herët nga një mision, një i ri e rindërton besimin e tij te Jezu Krishti.

• Lexoje rrëfimin e Jan Rut’hofit, një djalë i ri në Holandë, që e kërkoi profetin Jozef F. Smith që t’ia shëronte sytë e tij të sëmurë (Saints: The Story of the Church of Jesus Christ in the Latter Days, vëll. 3, Boldly, Nobly, and Independent, 1893–1955 [2022], f. 123–125).

Ftojini nxënësit të tregojnë se çfarë mësuan nga materiali filmik ose historia.

• Çfarë përvojash ke pasur ti ose ata që ti i njeh, që e kanë forcuar besimin tënd te Jezu Krishti?

Përmbylle duke shkruar një mënyrë se si do të doje të ushtroje më shumë besim te Jezu Krishti dhe përse. Më poshtë janë disa ide të përgjithshme për të të ndihmuar ta plotësosh këtë veprimtari. Do të të nevojitet të shtosh detaje që gjejnë zbatim tek ti.

• Ndërmerr një veprim të veçantë për të zgjidhur një problem dhe për të kërkuar ndihmën e Zotit.

• Vëri vetes synimin që të lutesh më përulësisht dhe të mirëbesosh te Zoti.

• Bëj në mënyrë aktive një gjë për t’u afruar më shumë me Zotin.

Kërko mënyra për t’u ndier më pranë Zotit ndërsa vepron me besim.

Nxënësit do të kenë një mundësi për të treguar në një mësim vlerësimi të ardhshëm se si e kanë ushtruar besimin e tyre dhe çfarë rezultatesh kanë rrjedhur prej tij (“Vlerësoni të Mësuarit Tuaj 9”).

Përmbylleni duke dhënë dëshmi për Shpëtimtarin dhe bekimet që vijnë nga të ushtruarit e besimit tek Ai.

Komente dhe Informacion për Rrethanat

Ethëri 3:7, 9. Përse Zoti na bën pyetje edhe kur Ai i di përgjigjet?

Plaku Xhefri R. Holland, i Kuorumit të Dymbëdhjetë Apostujve, dha mësim:

“Perëndia ‘i di të gjitha gjërat dhe nuk ka asgjë që ai nuk e di’ [2 Nefi 9:20]. … Sidoqoftë, Perëndia shpesh ka bërë pyetje për njerëzit e vdekshëm, zakonisht si mënyrë për të provuar besimin e tyre, për të matur ndershmërinë e tyre ose për të zhvilluar diturinë e tyre.” (Jeffrey R. Holland, Christ and the New Covenant: The Messianic Message of the Book of Mormon [1997], f. 19–20)

Ethëri 3:15. A ia kishte treguar Zoti Veten ndonjëherë dikujt përpara vëllait të Jaredit?

Vargu 15 është një fragment i vështirë, meqë e dimë se Perëndia i ishte shfaqur Adamit (shihni te Doktrina e Besëlidhje 107:53–55), Enokut (shihni te Moisiu 7:4) dhe Noeut (shihni te Zanafilla 6:8–9) e që të gjithë jetuan përpara vëllait të Jaredit. Plaku Xhefri R. Holland, i Kuorumit të Dymbëdhjetë Apostujve, dha disa kuptime të mundshme: 1) Zoti po tregon se Ai nuk i ishte shfaqur kurrë më parë një jarediti; 2) përdorimi i fjalës “njeri” mund të nënkuptojë se Zoti nuk ua ka zbuluar asnjëherë veten personave të pashëlbuar ose të pashenjtëruar; 3) Zoti nuk e kishte zbuluar kurrë veten në një mënyrë kaq të plotë dhe tërësore siç bëri me vëllanë e Jaredit; 4) kjo mund të ketë qenë hera e parë që Zoti ishte shfaqur dhe e kishte përcaktuar Veten si Jezu Krishti, Biri i Perëndisë; dhe 5) vëllai i Jaredit jo vetëm që e pa gishtin e Zotit, por edhe “një aspekt më të rëndësishëm të trupit prej mishi, gjaku dhe kockash të Krishtit” (Shihni te Christ and the New Covenant: The Messianic Message of the Book of Mormon [1997], f. 21–22).

Veprimtari Plotësuese të të Mësuarit

Ethëri 3:11. Besimi tek ajo që Zoti “do të … th[otë]”

Nëse do të ishte e dobishme të diskutoni vargjet tek Ethëri 3:11–12 më me hollësi, merreni parasysh të jepni sa vijon: “Besimi shëlbues duhet të ushtrohet shpesh ndaj përvojave në të ardhmen[.] … Besim do të thotë të biesh dakord pa kushte – dhe që më parë – me çfarëdo kushtesh që Perëndia mund t’i kërkojë si në të ardhmen e afërt edhe të largët” (Jeffrey R. Holland, Christ and the New Covenant: The Messianic Message of the Book of Mormon [1997], f. 18–19).

Ftojini nxënësit të diskutojnë skenarë në të cilët është e rëndësishme të zgjedhësh paraprakisht të besosh në fjalët që Zoti do të na thotë, të tilla si përgatitja për ta marrë bekimin patriarkal ose pritja e një thirrjeje misioni.

Të vërteta rreth Zotit Jezu Krisht

Nëse do të ishte e dobishme që nxënësit të kuptojnë më shumë të vërteta rreth Jezu Krishtit, ftojini ata të lexojnë tek Ethëri 3:14–20, duke kërkuar të vërtetat që vëllai i Jaredit i mësoi personalisht rreth Zotit për shkak të besimit të tij. Disa të vërteta që ata mund të përcaktojnë, janë: Jezu Krishti u përgatit që nga krijimi i botës për të na shëlbuar (shihni tek Ethëri 3:14); Perëndia na krijoi sipas shëmbëlltyrës së Tij (shihni tek Ethëri 3:15); Jezu Krishti e tregoi Veten në shpirt para se të lindte në mish (shihni tek Ethëri 3:16); Trupi fizik i Jezu Krishtit është sipas ngjasimit të trupit të shpirtit të Tij (shihni tek Ethëri 3:16–17); dhe Jezu Krishti u jep shërbesë njerëzve për t’i ndihmuar ata të dinë se Ai është Perëndi (shihni tek Ethëri 3:18).

Merreni parasysh t’i ftoni nxënësit të tregojnë se cilat prej këtyre të vërtetave janë më kuptimplotat për ta dhe përse. Ata mund të tregojnë gjithashtu se çfarë kanë mësuar rreth Zotit ndërsa e kanë ushtruar besimin tek Ai.