Ифер 3

“Ийм үлэмж итгэл”

Та нар Есүс Христэд итгэх нь бидний амьдралд ямар өөрчлөлт авчрах талаар нухацтай бодож байсан уу? Нэгэн гайхалтай жишээ бол Жаредын ах байсан бөгөөд тэр Их Эзэний өмнө асуудлуудаа шийдэх төлөвлөгөөтэй ирж, “үлэмж итгэлтэйгээр” (Ифер 3:9) даруухнаар залбиран, “нүднээс [нь] гивлүүр сөхөгдөхөд” (Ифер 3:6) Их Эзэнийг харж мөн ярилцсан. Энэ хичээл танд Есүс Христэд итгэх итгэлээ даруухнаар хэрэгжүүлэхэд туслах зорилготой.

Судруудыг зааж байхдаа Есүс Христэд төвлөр. Аврагч, Түүний гэтэлгэх хүчний талаарх үнэнүүдийг таньж мэдэхэд нь суралцагчдад туслах цаг гарга. Түүнд итгэх тэдний итгэлийг нэмэгдүүлэхүйц судрын хэсгүүдийг онцол. Есүс Христ хэрхэн тэднийг адисалж, хүчирхэгжүүлж, чиглүүлж болох талаар тунгаан бодоход урих асуултуудыг тавих талаар бодож үз.

Суралцагчийн бэлтгэл: Суралцагчдыг Сүмийн түүх юм уу судраас хүндэлж биширдэг гурван хүнийхээ тухай, тэд Есүс Христэд итгэх итгэлээ хэрхэн харуулсан талаар бодоход урь.

Боломжит суралцах үйл ажиллагаа

Та итгэлээ хэрхэн харуулдаг вэ?

Дараах нь Есүс Христэд итгэх итгэлийн талаар илүү дэлгэрэнгүй суралцахад суралцагчдыг бэлтгэнэ. Суралцагчдаар жишээг нь жагсаан бичүүлэхийн оронд, хичээлийн төгсгөлд байгаа видеонуудаас аль нэгийг нь үзүүлэх юм уу Жан Рүүтхоффын түүхийг ярьж өгч болно.

Сүмийн түүхээс эсвэл судраас хүндэлж биширдэг гурван хүний жагсаалтыг гарга.

• Тэд ямар арга замаар Есүс Христэд итгэх итгэлээ харуулсан бэ?

• Та нар амьдралдаа Есүс Христэд итгэх итгэлээ хэрэгжүүлж байгаа эсэхээ хэрхэн мэдэх вэ?

• Та нар яагаад итгэлээ хэрэгжүүлэх хэрэгтэй вэ?

Хоёр дахь асуултад өгсөн суралцагчдын хариултыг самбарт бич. Суралцагчдыг эдгээр хариултыг тунгаан бодож, өөрсдийн итгэлийг үнэлж дүгнэхэд урь. Хэрэв тус болно гэвэл, дараах өөрийгөө үнэлэх мэдэгдлүүдээс хэд хэдийг эсвэл бүгдийг нь нэмж оруулаад, суралцагчдыг бөглөхөд урь.

Есүс Христэд итгэх итгэлийнхээ талаар тунгаан бодоход тань туслах дараах мэдэгдлүүд хэр үнэн болохыг 1–5 (1 = хэзээ ч үгүй; 2 = заримдаа; 3 = байнга; 4 = бараг үргэлж; 5 = үргэлж) гэсэн үнэлгээгээр дүгнэн бич.

• Би Христэд итгэдэг бөгөөд Түүнийг Аврагчаа хэмээн хүлээн зөвшөөрдөг.

• Би Тэнгэрлэг Эцэгт хандан чин сэтгэлээсээ залбирч, асуудлууддаа Бурханы болон Есүс Христийн тусламжийг эрэлхийлэн, Тэдний удирдлага, тусламжид итгэдэг.

• Би үйлдэж, Их Эзэн надад тусална гэдэгт итгэдэг.

Энэ хичээлийг судалж байхдаа та нар Есүс Христэд итгэх итгэлээ хэрхэн даруухнаар хэрэгжүүлж болох тухай, яагаад ингэх хэрэгтэй талаар илүү ихийг суралцахаар эрэлхийл.

Итгэлээ хэрэгжүүлэх

Өмнөх хичээлээс та нар Их Эзэн Жаредын ахад усан онгоц барьж, далайг гаталж, амлагдсан нутаг руу явахыг зарлигласан тухай мэдэж авсан. Хэдий тийм ч усан онгоц гэрэлгүй байв. Их Эзэн Жаредын ахаас шийдэл санал болгохыг хүсжээ (Ифер 2:23-ыг үзнэ үү). Жаредын ах Есүс Христэд итгэн үйлдэх үед Их Эзэн түүнд асуудлуудаа шийдвэрлэхэд тусалж, хүссэнээс нь илүүгээр адисалсан.

Дараах тараах материалыг өгч, суралцагчдыг хувиараа эсвэл жижиг бүлгээрээ бөглөхөд урь.

Жаредын ахын итгэл

Мормоны Номын багшийн гарын авлага (2024)—“Ифер 3: ‘Ийм үлэмж итгэл’”

Дараах зураг бүрийн доор байгаа шүлгийг уншаад, Жаредын ах итгэлээ харуулахын тулд юу хийсэн, хэлснийг бич. (Ифер 3:2–3-ыг ойлгохын тулд Адам, Ева хоёрын уналтын улмаас бид Бурханаас бие махбодын хувьд тусгаарлагдсан, бүгд нүгэл үйлдэж, сүнслэг байдлаараа өөрсдийгөө Бурханаас тусгаарладаг дэлхийд амьдарч байгаа гэдгээ ойлгох нь чухал юм.)

Ифeр 3:1

Ифер 3:2–5

Ифер 3:6–10

Ифер 3:11–16; 19–20

• Жаредын ахын туршлагаас та нар юу сурсан бэ?

Хэдэн суралцагчийг хариултаа хуваалцахад урина уу. Тэдний хуваалцсан үнэн зарчмуудыг самбарт бич.

Их Эзэнд итгэх итгэлээ даруухнаар хэрэгжүүлснээр бид Түүн рүү улам ойртох болно гэсэн нэг зарчмыг бид сурч болох юм.

Суралцагчдад Жаредын ахын итгэлийн талаар илүү сайн ойлгоход нь туслахын тулд ангийг жижиг бүлгүүдэд хувааж, дараах дөрвөн үйл ажиллагааг гүйцэтгүүлэх талаар бодож үз. Эсвэл тэднийг дөрөв дөрвөөрөө баг болоод, суралцагч бүрийг нэг нэг үйл ажиллагааг хийж гүйцэтгэхэд урь. Дараа нь суралцагчид сурсан зүйлсээ бүлгийнхэндээ, хэрвээ тустай бол онцлох зүйлсийг ангийнхантайгаа хуваалцаж болно.

1. Жаредын ах “хаднаас арван зургаан жижиг чулууг хайлуулан гаргаж ав[аад], тэдгээрийг зөөж, “уулын орой дээр … Их Эзэнд хандан залбир[ав]” (Ифер 3:1). Асуудлыг шийдвэрлэхийн тулд чадах бүхнээ хийж, үйлдэхэд бэлэн байгаа нь яагаад Их Эзэнд итгэх бидний итгэлийн чухал хэсэг гэж бодож байгаагаа бич.

2. Жаредын ах залбирч байхдаа “[Бурханы] өмнөх сул дорой” (Ифер 3:2) байдлаа хэлж, даруухнаар тусламж гуйсан. Бид өөрсдийн сул талыг болон Их Эзэнээс бүрэн хамааралтай байдлаа ойлгох нь бидний залбирал, Түүнд итгэх итгэлд хэрхэн нөлөөлж болохыг бич.

3. Жаредын ах Их Эзэнээс чулуунуудад хүрч, тэдгээрийг гэрэлтүүлж өгөхийг гуйхдаа “Ай Их Эзэн, та бүх хүчийг эзэмшдэг, мөн хүмүүний тусын тулд та ямарвааг хийж чадна гэдгийг би мэднэ” (Ифер 3:4) хэмээн гэрчилсэн. Их Эзэн бидний асуудалд туслах хүчтэй гэдгийг та нар хэрхэн мэдсэн эсвэл мэдэж болох тухайгаа бич. Мөн энэ мэдлэг Түүнд итгэх бидний итгэлд хэрхэн нөлөөлж болох тухай бичиж болно.

4. Жаредын ах Их Эзэний ярих үгсэд итгэнэ гэж амласан (Ифер 3:11–12-ыг үзнэ үү). Жаредын ах яагаад Их Эзэнд үлэмж их итгэж, үүнийг зөвшөөрсөн гэж бодож байгаагаа бич.

Их Эзэнд улам ойртох нь

• Жаредын ахыг итгэлийнх нь улмаас Их Эзэн өөр ямар байдлаар адисалсан бэ?

• Жаредын ах энэ туршлагаар дамжуулан Их Эзэнд хэрхэн ойртсон бэ?

Жаредын ахад хэлсэн Их Эзэний “Чи уналтаас гэтэлгэгдсэн болой; тиймийн тул чи миний дэргэд буцаан хүргэгдлээ” (Ифер 3:13) гэсэн үгсийг тэмдэглэх нь тустай байж болох юм. Бид Их Эзэнд итгэх итгэлийг хувийн асуудлууддаа хэрэгжүүлснээр Түүнээс тусгаарлагдсан байдлаа ялан дийлж, Түүнтэй хамт амьдрахаар буцах мөнхийн зорилгодоо Түүний тусламжийг хүлээн авч чадна.

Өсвөр үеийнхний итгэлээ хэрэгжүүлж буй дараах жишээнүүдээс аль нэгийг нь үз эсвэл унш.

• “Faith and the Goal” (4:40)-ийг үзнэ үү. Залуухан мэргэжлийн хөл бөмбөгчин Их Эзэнд итгэх итгэлээ хэрхэн хэрэгжүүлж байгаагаа ярина.

• “Rebuilding My Faith When I Felt Lost” (6:25)-ыг үзнэ үү. Номлолоосоо эрт буцаж ирсэн нэгэн залуу Есүс Христэд итгэх итгэлээ сэргээж байгаа талаар гарна.

• Өвдсөн нүдээ эдгээлгэхийн тулд бошиглогч Жозеф Ф.Смитийг эрж хайсаар Нидерландаас ирсэн залуу хүү Жан Рүтхоффын түүхийг унш (Гэгээнтнүүд: Хожмын үеийн Есүс Христийн Сүмийн түүх боть 3, Boldly, Nobly, and Independent, 1893–1955 [2022], 123–125).

Суралцагчдыг видео эсвэл түүхээс сурч мэдсэн зүйлээ хуваалцахад урь.

• Танд болон таны мэддэг хүмүүст Есүс Христэд итгэх итгэлийг нь хүчирхэгжүүлсэн ямар туршлага байдаг вэ?

Хичээлийн төгсгөлд Есүс Христэд илүү их итгэх итгэлийг хэрэгжүүлэх нэг арга замыг мөн яагаад үүнийг сонгосноо бич. Энэ үйл ажиллагааг дуусгахад туслах ерөнхий санаануудыг өгөв. Та нар өөрт тохирох дэлгэрэнгүй мэдээллийг оруулах шаардлагатай.

• Асуудлыг шийдэхийн тулд тодорхой үйлдэл хийж, Их Эзэнээс тусламж хүс.

• Илүү даруухнаар залбирч, Их Эзэнд итгэх зорилго тавь.

• Та нарыг Их Эзэнд ойртуулах нэг зүйлийг идэвхтэй хий.

Итгэлээр үйлдэхдээ Их Эзэнд илүү ойр байх арга замуудыг хай.

Суралцагчид удахгүй үзэх үнэлгээний хичээлээр итгэлээ хэрхэн хэрэгжүүлсэн, ямар үр дүнд хүрсэн тухайгаа хуваалцах боломжтой байна (“Суралцахуйн үнэлгээ 9”).

Аврагчийн тухай, Түүнд итгэх итгэлийг хэрэгжүүлснээр ирдэг адислалуудын талаар гэрчлэлээ хуваалцаад, хичээлээ дуусга.

Тайлбар ба нөхцөл байдлын талаарх мэдээлэл

Ифер 3:7, 9. Их Эзэн хариултыг нь мэддэг атлаа яагаад биднээс асуудаг вэ?

Арван хоёр төлөөлөгчийн чуулгын ахлагч Жэффри Р.Холланд ийн заасан.

Бурхан “бүх зүйлийг мэддэг, мөн түүний мэдлэгээс гадуур нэгээхэн ч зүйл эс орших буюу” [2 Нифай 9:20]. … Харин Бурхан мөнх бус хүмүүсээс байнга асуудгийн учир нь тэдний итгэлийг шалгах, шударга занг нь сорьж, мэдлэгийг нь нэмэгдүүлэхийн тулд юм. (Jeffrey R. Holland, Christ and the New Covenant: The Messianic Message of the Book of Mormon [1997], 19–20)

Ифер 3:15. Их Эзэн өөрийгөө Жаредын ахаас өмнө хэнд ч үзүүлж байгаагүй гэж үү?

15-р шүлэг бол судрын хүнд хэсэг бөгөөд Бурхан Адамд (Сургаал ба Гэрээ 107:53–55-ыг үзнэ үү) болон Енохд (Мосе 7:4-ийг үзнэ үү) мөн Ноад (Эхлэл 6:8–9-ийг үзнэ үү) үзэгдсэн гэдгийг, тэд бүгдээрээ Жаредын ахаас ч өмнө амьдарч байсныг бид мэддэг. Арван хоёр төлөөлөгчийн чуулгын ахлагч Жэффри Р.Холланд хэд хэдэн боломжит утгыг санал болгожээ. Үүнд: (1) Их Эзэн урьд нь жаредчуудад хэзээ ч үзэгдэж байгаагүй гэдгийг харуулж байна; (2) “Хүн” гэдэг үгийг ашигласан нь Их Эзэн өмнө нь гэтэлгэгдээгүй, ариусгагдаагүй хүмүүст хэзээ ч Өөрийгөө илчилж байгаагүйг илэрхийлж байж болох юм; (3) Их Эзэн Жаредын ахад Өөрийгөө бүрэн дүүрэн, гүйцэд илчилсэн шиг зүйл өмнө нь тохиож байгаагүй; (4) Энэ нь Их Эзэн үзэгдэж, Өөрийгөө Бурханы Хүү Есүс Христ гэж тодорхойлсон нь анхны удаагийнх байж магадгүй; (5) Жаредын ах зөвхөн Их Эзэний хурууг хараад зогсохгүй, “Христийн мах, цус, яснаас бүрдсэн биеийн зарим нэг илэрхий илчлэгдсэн хэсгийг” харсан (Christ and the New Covenant: The Messianic Message of the Book of Mormon [1997], 21–22-ыг үзнэ үү).

Нэмэлт суралцах үйл ажиллагаа

Ифер 3:11. Их Эзэний “ярих” үгсэд итгэх

Ифер 3:11–12-ыг илүү дэлгэрэнгүй ярилцах нь тустай гэж үзвэл та дараахыг хуваалцах талаар бодож үз. “Гэтэлгэгч итгэлийг ихэвчлэн ирээдүйд тохиох туршлагуудад хэрэглэх ёстой[.] … Бурханы ойрын болон алс ирээдүйд шаардаж болох нөхцөлүүдийг урьдчилан, ямар ч нөхцөлгүйгээр хүлээн зөвшөөрөхийг итгэл гэнэ (Jeffrey R. Holland, Christ and the New Covenant: The Messianic Message of the Book of Mormon [1997], 18–19).

Суралцагчдыг патриархын адислал хүлээн авахад бэлтгэх, номлолын дуудлагыг хүлээх зэрэг Их Эзэний бидэнд хандан ярих үгсэд урьдаас итгэхийг сонгохын ач холбогдлыг харуулсан жишээнүүдийг ярилцахад урь.

Их Эзэн Есүс Христийн талаарх үнэнүүд

Суралцагчдад Есүс Христийн тухай үнэнүүдийг ойлгоход илүү тусална гэж үзвэл тэднийг Ифер 3:14–20-ийг уншаад, Жаредын ахын итгэлийнхээ ачаар Их Эзэний тухай өөрөө мэдсэн үнэнүүдийг олж мэдэхэд урь. Тэд Есүс Христ биднийг гэтэлгэхээр дэлхийн үүслээс бэлтгэгдсэн (Ифер 3:14-ийг үзнэ үү); Бурхан биднийг Өөрийн дүр төрхөөр бүтээсэн (Ифер 3:15-ыг үзнэ үү); Есүс Христ махан биед төрөхөөсөө өмнө Өөрийгөө сүнсээр үзүүлсэн (Ифер 3:16-г үзнэ үү); Есүс Христийн бие махбод нь Түүний сүнсэн биетэй адил (Ифер 3:16–17-г үзнэ үү); Хүмүүс Түүнийг Бурхан болохыг мэдэж болохын тулд Есүс Христ тэдэнд тохинуулдаг (Ифер 3:18-ыг үзнэ үү) гэсэн үнэнүүдийг тодорхойлж магадгүй.

Суралцагчдыг эдгээр үнэний аль нь тэдэнд хамгийн их ач холбогдолтойг мөн яагаад гэдгийг хуваалцахад урих талаар бодож үз. Мөн тэд Их Эзэнд итгэх итгэлээ хэрэгжүүлснээр Түүний тухай юу сурснаа хуваалцаж болно.