Ethëri 6

Jareditët Udhëtojnë për në Tokën e Premtuar

Maune jaredite duke u lëkundur nga dallgët

Imagjino se si mund të jenë ndier jareditët kur hynë në maunet e tyre dhe i kaluan ujërat e paana ndërsa udhëtonin drejt tokës së premtuar. Megjithëse udhëtimi i tyre ishte i gjatë dhe i vështirë, jareditët e dalluan se Zoti po i ndihmonte gjatë rrugës. Zoti mund të na ndihmojë edhe ne gjatë udhëtimit tonë përgjatë vdekshmërisë dhe sërish në praninë e Atit Qiellor. Ky mësim mund të të ndihmojë t’i krahasosh shkrimet e shenjta në mënyrë që të mësosh të vërteta që mund të të ndihmojnë gjatë udhëtimit të jetës sate.

Ndihmojeni çdo nxënës të japë kontribut në përvojën e të mësuarit. Pranojeni në mënyrë të sinqertë se çdo nxënës është i nevojshëm dhe ka një kontribut për të dhënë. Disa nxënës mund të jenë më të prirur sesa të tjerët për të marrë pjesë. Bëni një përpjekje shtesë dhe jini krijues për ta nxitur secilin nxënës për të dhënë kontribut në mënyra domethënëse.

Përgatitja e nxënësve: Nxënësit mund të lexojnë tek Ethëri 6:1–12 dhe të mendojnë rreth aspekteve të këtij rrëfimi që mund të zbatohen në mënyrë simbolike në jetën e tyre. Veprimtaria e studimit për këto vargje tek materiali Eja, Më Ndiq – Për Individët dhe Familjet: Libri i Mormonit 2024 mund të ndihmojë për këtë.

Veprimtari të Mundshme të të Mësuarit

Udhëtimi i jetës

Sa vijon ka për qëllim të ndihmojë që nxënësit të përgatiten për ta krahasuar studimin e tyre të kapitullit Ethëri 6 me jetën e tyre. Krahas ftesës që nxënësit ta plotësojnë veprimtarinë në ditarët e tyre të studimit, merreni parasysh ta plotësoni atë në tabelë.

Jeta jonë në vdekshmëri mund të krahasohet me një udhëtim të gjatë, vendmbërritja e dëshiruar e të cilit është jeta e përjetshme. Në ditarin tënd të studimit, shkruaj “Unë” në njërën anë të faqes dhe “Jeta e përjetshme” në anën tjetër. Në hapësirën ndërmjet këtyre dy krerëve, shkruaj disa nga pengesat që mund të dalin gjatë udhëtimit tonë, që na e bëjnë të vështirë të kthehemi në mënyrë të denjë tek Ati Qiellor. Më pas mendo se si po shkon udhëtimi yt drejt jetës së përjetshme dhe me cilën prej pengesave të përcaktuara po përballesh aktualisht.

Sot ti do të studiosh rreth udhëtimit që bënë jareditët për në tokën e premtuar pasi mbaruan ndërtimin e mauneve të tyre. Ndërsa studion, kërko të vërtetat që mund të të ndihmojnë t’i kapërcesh pengesat me të cilat përballesh në udhëtimin tënd të kthimit në praninë e Perëndisë.

Krahasimi i shkrimeve të shenjta me jetën tënde

Hapat vijues mund të të ndihmojnë ta krahasosh atë që do të lexosh në shkrimet e shenjta me rrethanat e tua vetjake. Në ditarin tënd të studimit, shkruaj kreun “Mënyrat për t’i krahasuar shkrimet e shenjta me jetën time”. Shënoji këta hapa poshtë kreut.

Paraqiti këta hapa në mënyrë që nxënësit të mund t’i kopjojnë në ditarët e tyre.

1. Gjej hollësi të rëndësishme.

2. Bëj krahasime.

3. Zbulo mësime të vyera.

4. Përcakto zbatimin në planin vetjak.

Përpara se t’u jepni nxënësve një mundësi për ta ushtruar përdorimin më vete të këtyre hapave, merreni parasysh ta shqyrtoni shembullin vijues si klasë. Sigurohuni të kurseni kohë të mjaftueshme për nxënësit që të ushtrohen më vete më vonë në mësim.

Hapi 1: Gjej hollësi të rëndësishme

Lexo tek Ethëri 6:1–3, duke kërkuar hollësi të rëndësishme. Këto hollësi mund të përfshijnë njerëz, vende, sende ose veprime që theksohen.

Kërkojuni nxënësve t’i japin hollësitë e rëndësishme që gjetën në këto vargje. Këto mund të shkruhen në tabelë. Ju mund të vini në dukje sa vijon:

Një hollësi e rëndësishme që mund ta kesh vënë re është se Zoti bëri që gurët që vëllai i Jaredit i kishte sjellë më parë tek Ai (shih tek Ethëri 3:1–6) të ndriçonin në mënyrë që jareditët të kishin dritë në maunet e tyre.

Hapi 2: Bëj krahasime

Mendo se si hollësitë që përcaktove në hapin e mëparshëm mund të krahasohen me diçka shpirtërore ose me situata në jetën tënde.

• Çfarë krahasimesh mund të bësh me hollësitë që përcaktove në hapin e mëparshëm?

Për shembull, ti mund t’i kesh krahasuar gurët e ndritshëm me burimet e dritës shpirtërore me të cilat Ati Qiellor na ka bekuar, si mësimet dhe shembulli i Jezu Krishtit, Fryma e Shenjtë, shkrimet e shenjta dhe profetët e gjallë. (Shih te Psalmeve 119:105; Gjoni 8:12 dhe 1 Nefi 17:13. Mund t’i lidhësh si referencë-kryq këto vargje me vargun tek Ethëri 6:3.)

Hapi 3: Zbulo mësime të vyera

Mendo se çfarë mësimesh ose të vërtetash mëson ndërsa i krahason këto vargje me jetën tënde ose me diçka shpirtërore. Gjithashtu, merre parasysh atë që mëson rreth Atit Qiellor dhe Jezu Krishtit.

• Cilat janë disa mësime ose të vërteta që ti i mëson nga këto vargje? Çfarë gjen që mund të të ndihmojë në jetën tënde të përditshme?

Një e vërtetë që mund të mësojmë është se Ati Qiellor dhe Jezu Krishti na japin udhërrëfim dhe dritë për të na ndihmuar gjatë udhëtimit tonë përgjatë vdekshmërisë.

Ju mund t’i ftoni nxënësit të tregojnë disa nga mënyrat se si Perëndia u ka siguruar atyre udhërrëfim dhe dritë shpirtërore në jetën e tyre.

Hapi 4: Përcakto zbatimin në planin vetjak

Reflekto se si mund t’i zbatosh në jetën tënde mësimet që përcaktove në hapin e mëparshëm.

• Çfarë mund të bësh për ta ndjekur ose për të marrë më shumë nga drita e Perëndisë në jetën tënde?

Mund të kesh menduar për veprime si përmirësimi i studimit tënd të shkrimeve të shenjta, të kërkuarit me lutje të udhërrëfimit nga Ati Qiellor në vendimet e tua të përditshme, ose përpjekja më e zellshme për ta mbajtur Frymën e Shenjtë si shoqëruesin tënd të përhershëm.

Ushtroje krahasimin e vargjeve të tjera nga ky rrëfim

Maune jaredite

Nxënësit mund ta plotësojnë veprimtarinë vijuese të studimit në mënyrë individuale, me një partner ose në një grup të vogël.

Studioje pjesën tjetër të rrëfimit të udhëtimit të jareditëve drejt tokës së premtuar duke lexuar tek Ethëri 6:4–12. Kërko më shumë mënyra se si udhëtimi i jareditëve mund të lidhet me udhëtimin tënd përgjatë jetës. Ndërsa studion, ushtroje përdorimin e procesit me katër hapa për krahasimin e shkrimeve të shenjta.

Kushtoji vëmendje të veçantë asaj që të japin mësim këto vargje rreth Atit Qiellor dhe Jezu Krishtit.

Pasi nxënësit të kenë pasur kohë të mjaftueshme për të studiuar, diskutojeni atë që mësuan ata. Nëse u nevojitet më shumë ndihmë, merreni parasysh të bëni pyetje si ato në vijim:

• Çfarë mësimi ju dhanë këto vargje rreth Atit Qiellor dhe Jezu Krishtit?

• Cilat janë disa nga “erë[rat] e tmerrshme” (Ethëri 6:5) që Zoti na lejon t’i përjetojmë në jetën tonë? Si mund të sigurohemi që sprovat ose sfidat tona do të na ndihmojnë të afrohemi më shumë me Perëndinë?

• Cilat janë disa mënyra se si mund të ndiheni të “mbulua[r]” (Ethëri 6:6) në udhëtimin tuaj përgjatë vdekshmërisë? Çfarë patë te vargu 7 që mund t’ju ndihmojë gjatë kohëve të tilla?

• Përse mendoni se jareditët e lavdëruan Zotin gjatë udhëtimit të tyre të vështirë? (Shihni tek Ethëri 6:9.) Çfarë mund t’ju ndihmojë të ndieni mirënjohje ndaj Perëndisë, edhe kur përballeni me sprova?

Pas diskutimit, ftojini nxënësit të mendojnë se si ajo që studiuan sot mund t’i ndihmojë në jetën e tyre, duke përfshirë me pengesat që përcaktuan më herët. Nxitini ata ta shënojnë në ditarin e tyre të studimit çdo nxitje shpirtërore ose ide që duan ta kujtojnë.

Dëshmoni për të vërtetat e diskutuara sot. Nxitini nxënësit të vazhdojnë ta krahasojnë atë që lexojnë në shkrimet e shenjta me jetën e tyre.

Komente dhe Informacion për Rrethanat

Ethëri 6:4. Çfarë do të thotë që jareditët ia dorëzuan veten Perëndisë?

Plaku L. Tod Baxh, i Të Shtatëdhjetëve, dha mësim:

Plaku L. Tod Baxh

“Në anal shënohet se jareditët më pas ‘hipën … në maunet e tyre dhe u nisën nëpër det, duke ia dorëzuar veten Zotit, Perëndisë së tyre’ [Ethëri 6:4; theksimi i shtuar]. Të dorëzosh do të thotë t’ia besosh diçka dikujt ose t’ia lësh në dorë. Jareditët nuk hynë në mauna ngaqë e dinin me saktësi se si do të shkonin gjërat në udhëtimin e tyre. Ata hipën në to sepse kishin mësuar të mirëbesonin te fuqia, mirësia dhe mëshira e Zotit dhe prandaj qenë të gatshëm t’ia linin në dorë Zotit veten dhe çdo dyshim e frikë që mund të kishin pasur.” (L. Tod Baxh, “Mirëbesimi i Qëndrueshëm dhe i Paepur”, Liahona, nëntor 2019, f. 48)

Ethëri 6:5–7. Si mund të jem i mbrojtur gjatë sprovave dhe sfidave me të cilat përballem në jetë?

Presidenti Xhejms E. Faust (1920–2007), i Presidencës së Parë, dha mësim:

Presidenti Xhejms E. Faust

“Ne të gjithë përballemi me erëra të tërbuara të së keqes dhe batica të urryera jo të ndryshme nga situata me të cilën u përballën jareditët ndërsa udhëtuan për në tokën e premtuar. Ata u lëkundën nga dallgët e detit dhe ‘shumë herë ata u mbuluan në thellësinë e detit nga dallgët si male që binin mbi ta dhe gjithashtu nga stuhitë e mëdha dhe të tmerrshme që u shkaktuan nga furia e erës’ (Ethëri 6:6). Por ata ishin të mbrojtur për shkak se ‘kur ata gjendeshin të mbuluar në thellësi, uji nuk mund t’u bënte gjë, pasi barkat ishin të puthitura, sikurse një tas’ (Ethëri 6:7). Në kohën tonë ka barka që janë të mbrojtura ndaj këtyre stuhive shpirtërore të tmerrshme dhe ato janë tempujt tanë, shtëpitë, kuorumet, lagjet dhe kunjet.” (James E. Faust, “We Believe in You!”, New Era, tetor 2006, f. 8–9)

Përse mund të jetë e dobishme të mendoj se si po shkon udhëtimi im gjatë jetës?

Shikojeni materialin filmik “The Journey” [“Udhëtimi”] (3:46). Në këtë material filmik, Plaku Diter F. Uhtdorf, i Kuorumit të Dymbëdhjetë Apostujve, tregon përvojën dhe idetë që mund të na ndihmojnë në udhëtimin tonë përgjatë vdekshmërisë.

Veprimtari Plotësuese të të Mësuarit

Përdorimi i referencave-kryq

Mund të jetë e dobishme t’i ftoni nxënësit të gjejnë shkrime të shenjta që kanë lidhje me të vërtetat që po i studiojnë nga udhëtimi i jareditëve. Ata mund t’i renditin referencat që gjejnë pranë vargjeve përkatëse nga Ethëri 6 në shkrimet e tyre të shenjta. Nxënësit mund t’i gjejnë shkrimet e tyre të shenjta, ose ju mund të jepni shkrime të shenjta përkatëse (si ato më poshtë), duke i ftuar nxënësit të studiojnë dhe zbulojnë se si vargjet lidhen me kapitullin tek Ethëri 6.

Ethëri 6:2–3, 10 – Psalmeve 119:105; Gjoni 8:12; 1 Nefi 17:13

Ethëri 6:4 – Fjalët e Urta 3:5–6; Mosia 7:19; Alma 38:5

Ethëri 6:5–8 – Mateu 7:24–25; Helamani 5:12; 2 Nefi 4:18–20, 35

Ethëri 6:9 – 1 Thesalonikasve 5:18; 1 Nefi 18:16; Alma 34:38

Ethëri 6:11 – 2 Nefi 31:20; Mosia 24:15; Doktrina e Besëlidhje 24:8

Ethëri 6:12 – Psalmeve 145:8–9; Lluka 17:11–19; Alma 7:23

Veprimtari vizatimi

Ka shumë elemente të udhëtimit të jareditëve të përshkruara tek Ethëri 6:1–12 që do të ishin interesante për t’u përfytyruar. Për ta bërë këtë, nxënësit mund të krijojnë një figurë që përfaqëson një koncept ose ngjarje nga një ose më shumë nga vargjet që ata i studiojnë. Ata mund të shkruajnë gjithashtu një frazë nga shkrimi i shenjtë ku po përqendrohen diku në figurën e tyre. Nxënësit mund t’ia tregojnë dhe shpjegojnë më pas vizatimin e tyre një partneri ose grupi të vogël. Disa mund t’ia tregojnë figurën e tyre të gjithë klasës.

Mësime shtesë nga udhëtimi i jareditëve

Për t’i ndihmuar nxënësit t’i përcaktojnë të vërtetat që mund t’i mësojnë nga udhëtimi i jareditëve, merreni parasysh të shfaqni “Consistent and Resilient Trust” [“Mirëbesimi i Qëndrueshëm dhe i Paepur”] nga kodi kohor 2:58 deri në 9:46. Në këtë bisedë, Plaku L. Tod Baxh, i Të Shtatëdhjetëve, tregon shumë mënyra se si udhëtimi i jareditëve për në tokën e premtuar mund të ketë lidhje me jetën tonë.