Ethëri 7–11

“Me Siguri, Kjo Gjë do t’ju Shpjerë në Robëri”

Për shkak se Perëndia na do, Ai thërret profetë për të na paralajmëruar për të keqen dhe për të na nxitur t’i zbatojmë urdhërimet. Jareditët nuk ia vunë veshin një paralajmërimi nga vëllai i Jaredit dhe kjo përfundoi në pasoja të vështira për shumë breza. Ky mësim mund të të ndihmojë ta ndiesh rëndësinë e ndjekjes së profetëve të Zotit.

Jepini mësim fjalët e profetëve me bindje dhe qëllim. Vullneti dhe qëllimet e Zotit komunikohen nëpërmjet profetëve të Tij. Ndihmojini nxënësit ta dallojnë se ata mund të mbështeten në mësimet profetike për drejtim dhe mbrojtje, pavarësisht nëse shënohen në shkrimet e shenjta ose thuhen sot.

Përgatitja e nxënësve: Ftojini nxënësit të vijnë të përgatitur për të treguar disa nga këshillat profetike ose paralajmërimet që kemi marrë në kohën tonë. Ata mund të gjejnë shembuj te materiali Për Forcën e Rinisë: Një Udhëzues për Bërjen e Zgjedhjeve (broshurë, 2022) ose në fjalime nga konferenca e përgjithshme e kohëve të fundit.

Veprimtari të Mundshme të të Mësuarit

Robëria

Merreni parasysh ta paraqitni figurën vijuese ose të vizatoni një qeli të thjeshtë burgu në tabelë.

Vështroje figurën e mëposhtme. Çfarë mund të jetë duke menduar ose ndier ky person?

Merre parasysh se cilat zgjedhje të mëparshme mund të kenë çuar gradualisht në këto rrethana dhe përse ky person mund t’i ketë bërë ato zgjedhje.

Përfshirja në sjellje mëkatare mund t’i çojë njerëzit në robëri shpirtërore dhe fizike.

Sot do të studiosh një rrëfim që do të të ndihmojë të kuptosh një mënyrë të rëndësishme për ta shmangur robërinë shpirtërore. Ndërsa studion, kushtoju vëmendje nxitjeve të Shpirtit që mund të të ndihmojnë të shohësh se si ta zbatosh atë që mëson në vetë jetën tënde.

“Me siguri, kjo gjë do t’ju shpjerë në robëri”

Pasi jareditët arritën në tokën e premtuar, ata i shërbyen me besnikëri Zotit dhe u shtuan e u bënë të fortë në tokë (shih tek Ethëri 6:17–18). Ndërsa Jaredi dhe vëllai i tij iu afruan fundit të jetës së tyre, ata i mblodhën njerëzit e tyre së bashku për të folur me ta.

Lexo tek Ethëri 6:19–23, duke kërkuar atë që dëshiruan njerëzit.

• Çfarë paralajmërimi u dha vëllai i Jaredit njerëzve te vargu 23?

Merreni parasysh t’i ftoni nxënësit të tregojnë se si mund të ishin përgjigjur nëse do të kishin qenë në këtë situatë. Mund t’i ftoni ata të mendojnë rreth mënyrës se si njohuria e tyre për Perëndinë dhe profetët e Tij mund të ketë ndikuar në vendimin e tyre. Përgjigjet e tyre mund të ndërtojnë besimin dhe dëshminë te Perëndia dhe profetët e Tij.

Paralajmërimet e përmbushura

Pavarësisht nga paralajmërimi i vëllait të Jaredit, njerëzit zgjodhën gjithsesi të kenë një mbret. Pasi disa prej bijve të tyre refuzuan, i biri i Jaredit, Oriha, pranoi më në fund të bëhej mbret dhe mbretëroi me drejtësi gjatë gjithë jetës së tij (shih tek Ethëri 6:24–29; 7:1). Megjithatë, profecia e vëllait të Jaredit se pasja e një mbreti do të çonte në robëri, u përmbush shumë herë gjatë gjithë historisë së jareditëve.

Lexoji fragmentet vijuese, duke kërkuar shembuj të mënyrës se si u përmbush profecia e vëllait të Jaredit. Nëse dëshiron, mund t’i renditësh këto referenca në shkrimet e tua të shenjta pranë vargut tek Ethëri 6:23.

Ftojini nxënësit e gatshëm t’i lexojnë me radhë disa ose të gjitha vargjet vijuese me zë të lartë. Nëse zgjidhni të mos i lexoni të gjitha vargjet, sigurohuni të mos i kapërceni vargjet tek Ethëri 7:1–5, të cilat thotë në veçanti se profecia e vëllait të Jaredit u përmbush (shihni tek Ethëri 7:5). Mund të jetë gjithashtu e dobishme të lexoni tek Ethëri 11:20–23, që na njeh me profetin Ethër.

• Ethëri 7:1–5

• Ethëri 7:15–17

• Ethëri 8:2–3

• Ethëri 9:28–32

• Ethëri 10:13–15

• Ethëri 10:29–31

• Ethëri 11:1–7

• Ethëri 11:20–23

• Çfarë të bëri përshtypje nga këto vargje?

• Çfarë të vërtete mund të mësojmë nga ky rrëfim rreth pasojave të refuzimit të profetëve të Zotit?

Një e vërtetë që mund të mësojmë nga ky rrëfim është se refuzimi i profetëve të Zotit mund të çojë në robëri.

• Cilët janë disa shembuj të mënyrës se si dikush mund të përjetojë robëri nëpërmjet shpërfilljes ose refuzimit të profetëve të Zotit?

  Nëse nxënësve u nevojitet ndihmë me pyetjen e mëparshme, merreni parasysh t’u jepni disa shembuj, si mundësia që mosbindja ndaj Fjalës së Urtësisë ose shikimi i pornografisë mund të çojë në robërinë e varësisë. Sigurohuni që nxënësit ta kuptojnë se të gjitha format e mëkatit e ulin fuqinë e Shpirtit të Shenjtë në jetën tonë.

• Si mendon, përse njerëzit zgjodhën ta shpërfillnin këshillën dhe paralajmërimet që jep Zoti nëpërmjet profetëve të Tij?

Këshilla bashkëkohore nga profetët e Zotit

Ndihmojini nxënësit të shohin se si kjo e vërtetë zbatohet ende sot. Veprimtaria vijuese është një mënyrë për ta bërë këtë.

Gjej këshilla ose paralajmërime nga profetët dhe apostujt bashkëkohorë. Këto mund të vijnë nga materiali Për Forcën e Rinisë (broshurë, 2022) ose nga fjalime të konferencës së përgjithshme të kohëve të fundit. Shiko nëse mund të gjesh fjalë ose fraza të veçanta që e përshkruajnë se si ne do të bekohemi ndërsa e ndjekim këtë këshillë, si edhe pasojat që mund të përjetojmë për shpërfilljen e saj.

Mund të jetë e dobishme t’i vendosni nxënësit në grupe të vogla dhe t’i caktoni secilit grup një temë të ndryshme nga materiali Për Forcën e Rinisë (broshurë, 2022) për ta studiuar ndërsa e plotësojnë këtë veprimtari. Merreni parasysh t’i paraqitni pyetjet e mëposhtme. Jepuni nxënësve kohë të mjaftueshme për t’i diskutuar përgjigjet e tyre me grupet e tyre.

• Çfarë paralajmërimesh ose këshillë pate mundësinë të gjeje?

• Cilat janë disa mënyra se si Zoti do të na bekojë ndërsa e ndjekim këtë këshillë?

• Si mund ta çojë dikë në robëri shpërfillja e kësaj këshille ose këtyre paralajmërimeve?

Pasi nxënësit të kenë mbaruar, ftojini ata t’ia tregojnë klasës disa nga idetë e tyre.

Mund të jetë e dobishme t’i vini nxënësit të tregojnë përgjigjet që gjetën për pyetjet e renditura më lart. Për shembull, nxënësit që e studiuan këshillën nga pjesa “Ecni në dritën e Perëndisë” tek materiali Për Forcën e Rinisë, mund të vërë në dukje se ajo që shohim, lexojmë, dëgjojmë ose ku marrim pjesë mund të ftojë mendime të mira ose mund ta mpijë ndjeshmërinë tonë ndaj Shpirtit (shihni te Për Forcën e Rinisë [broshurë, 2022], f. 18).

Zbatimi i kësaj në jetën tënde

Mendo se si i përgjigjesh këshillës dhe paralajmërimeve të profetëve të Zotit, bekimeve që ke marrë për ndjekjen e tyre, si dhe këshillës që mund të të nevojitet ta ndjekësh me më shumë besnikëri.

Merreni parasysh t’i ftoni nxënësit të tregojnë shembuj të mënyrës se si Zoti i ka bekuar ata ndërsa e kanë ndjekur këshillën e Tij nëpërmjet profetëve të Tij. Nëse dëshironi, mund të tregoni edhe një përvojë vetjake.

Sa vijon mund t’i ndihmojë nxënësit që mund të ndihen të shkurajuar për shkak të robërisë që përjetojnë si rezultat i shpërfilljes së këshillës nga profetët e Zotit. Merreni parasysh ta lexoni vargun te Mosia 7:33 si klasë.

Disa mund të ndihen të shkurajuar kur përjetojnë pasojat për shpërfilljen e këshillës së Zotit dhe paralajmërimeve nëpërmjet profetëve të Tij. Por edhe kur kemi bërë gabime, Shpëtimtari mund të na çlirojë nga robëria kur i drejtohemi Atij. Për shembull, lexo tek Ethëri 7:25–27, si dhe vër re se çfarë ndodhi kur njerëzit u penduan dhe u drejtuan sërish te Perëndia.

• Çfarë të mëson ky fragment rreth Zotit? (Shih edhe te Mosia 7:33.)

Për të parë një shembull të mënyrës se si dikush e përjetoi çlirimin e Zotit pasi përjetoi robëri shpirtërore, merre parasysh të shohësh “Mirësia e Menjëhershme e Perëndisë”, që gjendet në ChurchofJesusChrist.org, nga kodi kohor 3:37 deri në 6:33.

Dëshmoni për të vërtetat që u diskutuan sot dhe nxitini nxënësit të veprojnë sipas mbresave të tyre shpirtërore.

Komente dhe Informacion për Rrethanat

Përse duhet t’ua vëmë veshin fjalëve të profetëve?

Plaku Nil L. Andersen, i Kuorumit të Dymbëdhjetë Apostujve, dha mësim:

“Përse jemi kaq të gatshëm për ta ndjekur zërin e profetit tonë? Për ata që e kërkojnë me zell jetën e përjetshme, zëri i profetit sjell siguri shpirtërore në kohë shumë të turbullta. …

Hedhja e spirancës së shpirtit tonë te Zoti Jezu Krisht kërkon që t’i dëgjojmë ata që Ai i dërgon. Ndjekja e profetit në një botë rrëmuje është si të jemi të mbështjellë me një kuvertë të butë, të ngrohtë në një ditë acari të ftohtë.” (Nil L. Andersen, “Profeti i Perëndisë”, Liahona, maj 2018, f. 26)

Shiko materialin filmik “Sustaining the Prophets” [“Mbështetja e Profetëve”] nga kodi kohor 3:30 deri në 5:49 për të parë Presidentin Rasëll M. Nelson të tregojë të vërteta të rëndësishme që mund të na ndihmojnë të kuptojmë përse vënia e veshit ndaj profetëve është kaq e rëndësishme.

Si mund të çojë shpërfillja e paralajmërimeve profetike në robëri?

Plaku Kuentin L. Kuk, i Kuorumit të Dymbëdhjetë Apostujve, dha mësim:

“Perëndia kishte si qëllim që burrat dhe gratë do të ishin të lirë për të bërë zgjedhje midis së mirës dhe së ligës. Kur zgjedhjet e liga bëhen tipari mbizotërues i një kulture apo kombi, ka pasoja të rënda si në këtë jetë, edhe në jetën që vjen. Njerëzit mund të bëhen të skllavëruar ose ta vendosin vetveten nën skllavërim jo vetëm prej lëndëve të dëmshme, varësuese, por edhe prej filozofive të dëmshme, varësuese, të cilat i largojnë nga të jetuarit e drejtë.

Largimi nga adhurimi i Perëndisë së vërtetë e të gjallë dhe të adhuruarit e perëndive të rreme, sikurse pasuria e fama, dhe përfshirja në sjellje të pamoralshme e të padrejtë përfundojnë në skllavërim në të gjitha mënyrat tinëzare të shfaqjes së tij. Këto përfshijnë skllavërim shpirtëror, fizik e intelektual dhe nganjëherë sjellin shkatërrim.” (Kuentin L. Kuk, “Vajtimet e Jeremias: Ruhuni nga Skllavërimi”, Liahona, nëntor 2013, f. 88–89)

Veprimtari Plotësuese të të Mësuarit

Cikli i krenarisë

Nxënësit mund të kenë mësuar më parë rreth një modeli ndonjëherë të quajtur “cikli i krenarisë”, që gjendet nëpër të gjitha shkrimet e shenjta. Ky model përfshin hapat vijues:

1. Të qenit krenar dhe i lig dhe të harruarit e Zotit

2. Përjetimi i vuajtjes dhe shkatërrimit

3. Të kujtuarit e Zotit, të bërit i përulur dhe pendimi

4. Të qenit i drejtë dhe përjetimi i begatisë

Merreni parasysh t’i ftoni nxënësit t’i studiojnë shkrimet e shenjta vijuese duke e kërkuar këtë model mes jareditëve:

• Ethëri 7:23–27

• Ethëri 9:26–35; 10:1–2

• Ethëri 10:5–7, 15–19, 28, 30–34; 11:1–8

Pasi t’i studioni këto vargje, ju mund të diskutoni se si ky cikël ka lidhje me ne. Merreni parasysh t’i ftoni nxënësit ta vlerësojnë veten duke menduar se në cilën pjesë të këtij cikli mund të jenë dhe çfarë mund të bëjnë për të qenë vazhdimisht të përulur dhe për ta kujtuar Zotin.

Ethëri 9:14–22. Bekimet e të jetuarit me drejtësi

Megjithëse pjesa më e madhe e historisë jaredite ishte e mbushur me ligësi, kishte raste kur njerëzit përjetuan bekime të mëdha për shkak të drejtësisë së tyre.

Merreni parasysh t’i ftoni nxënësit të studiojnë rreth njërës prej këtyre periudhave të drejta, të udhëhequra nga një njeri i quajtur Emer. Nxënësit mund të lexojnë tek Ethëri 9:14–22, duke kërkuar bekimet që Emeri dhe populli i tij përjetuan ndërsa e ndoqën Zotin.

Mund të jetë e dobishme që nxënësit të bëjnë referencë-kryq të këtyre vargjeve me vargun te Mosia 2:41 ose shkrime të tjera të shenjta që flasin për bekimet e të jetuarit me drejtësi. Ftojini nxënësit të tregojnë shembuj të mënyrës se si Zoti i ka bekuar ndërsa kanë bërë përpjekje për t’i zbatuar urdhërimet e Tij.