Ethëri 8

“Zoti Nuk Vepron me Lidhje të Fshehta”

Jezu Krishti

Lidhjet e fshehta pllakosën disa grupe njerëzish nëpër të gjithë Librin e Mormonit. Ky model lindi mes jareditëve dhe madje çoi në shkatërrimin e tyre. Ndërsa shkroi rreth jareditëve, profeti Moroni shtoi të vërteta të rëndësishme që mund t’i mësojmë nga këto ndodhi shkatërrimtare. Ky mësim mund të të ndihmojë ta kuptosh nevojën për t’i refuzuar lidhjet e fshehta duke e ndjekur Jezu Krishtin.

Ndihmojini nxënësit që të zbulojnë lidhjen [me jetën e tyre]. Kur nxënësit mund ta lidhin atë që po studiojnë në shkrimet e shenjta me situatat dhe rrethanat e tyre vetjake, ata janë përgjithësisht më të nxitur për t’i mësuar dhe zbatuar mësimet e ungjillit. Ftojini nxënësit të kërkojnë lidhjen [me jetën e tyre] duke u bërë atyre pyetje si “Si mund të jetë kjo ngjarje ose ky mësim i ngjashëm me përvojat tuaja?” ose “Si zbatohet kjo e vërtetë në jetën tuaj?”

Përgatitja e nxënësve: Ftojini nxënësit të lexojnë shënimin “Lidhje të Fshehta” tek Udhëzuesi për Shkrimet e Shenjta në scriptures.ChurchofJesusChrist.org.

Veprimtari të Mundshme të të Mësuarit

Vepra në fshehtësi

Shkruajeni fjalën fshehtësi në tabelë, më pas bëni pyetjet vijuese:

• Cilat janë disa mënyra se si Satani e përdor fshehtësinë për t’i realizuar qëllimet e tij të liga?

• Si do të ndikonte një fshehtësi e tillë në marrëdhënien e një personi me Jezu Krishtin? Përse?

• Çfarë do të doje që të dinte dikush që mendon se mund t’ia hedhë paq duke bërë të keqen ngaqë e mban të fshehtë?

Sot do të mësosh rreth një grupi njerëzish që morën pjesë në vepra të fshehta ligësie të njohura si një lidhje e fshehtë. Ndërsa studion, kërko mësime që të ndihmojnë ta kuptosh rrezikun e lidhjeve të fshehta.

Ligësia mes jareditëve

Mund të të kujtohet se pasi jareditët arritën në tokën e premtuar, ata caktuan një mbret për të sunduar mbi ta pavarësisht nga paralajmërimet e vëllait të Jaredit se bërja e kësaj do të çonte në robëri (shih tek Ethëri 6:22–23). Në brezat pasardhës, mbretërit e ligj shkaktuan ndarje dhe vuajtje mes njerëzve.

Ju mund t’i ftoni disa nxënës të gatshëm që t’ia lexojnë me radhë klasës vargjet vijuese me zë të lartë ndërkohë që pjesa tjetër e nxënësve i ndjekin në shkrimet e tyre të shenjta.

Lexo tek Ethëri 8:1–10, duke kërkuar atë ndodhi kur një njeri me emrin Omer u bë mbret.

Jaredi ra dakord me planin e lig të së bijës. Kur Akishi e kërkoi për martesë të bijën e Jaredit, Akishi, Jaredi, e bija dhe pjesëtarë të tjerë të familjes bënë një lidhje të fshehtë për ta vrarë Omerin (shih tek Ethëri 8:11–15).

Rreziqet e lidhjeve të fshehta

Një lidhje e fshehtë është “një organizatë njerëzish të lidhur së bashku me anë të betimeve për të kryer qëllimet e liga të grupit” (“Lidhje të Fshehta”, Udhëzuesi për Shkrimet e Shenjta, scriptures.ChurchofJesusChrist.org). Satani është autori i lidhjeve të fshehta (shih te Helamani 6:25–30).

Si tregimtari i kësaj historie, profeti Moroni dha disa mësime dhe paralajmërime të rëndësishme rreth lidhjeve të fshehta. Lexo tek Ethëri 8:18–25, duke kërkuar se si ndihet Zoti rreth lidhjeve të fshehta.

Ftojini nxënësit ta diskutojnë atë që mësuan nga këto vargje. Krahas pyetjeve në vijim, mund të merrni parasysh gjithashtu të bëni pyetjen “Çfarë paralajmërimesh u dha Moroni atyre që marrin pjesë në lidhje të fshehta?”

• Çfarë mësove rreth lidhjeve të fshehta nga këto vargje?

Një e vërtetë që mund të mësojmë nga këto vargje është se lidhjet e fshehta janë të urryera në sytë e Perëndisë (Ethëri 8:18).

Për të të ndihmuar ta kuptosh më tej se përse lidhjet e fshehta janë të urryera për Zotin, lexoji shkrimet e shenjta vijuese, duke kërkuar atë që mëson rreth Jezu Krishtit:

• 2 Nefi 26:22–24

• Alma 39:8

Ftojini nxënësit ta diskutojnë atë që mësuan nga këto vargje. Mund të përdoren pyetjet vijuese.

• Çfarë mësove nga këto vargje që mund t’i kenë ndihmuar njerëzit rreth të cilëve studiove tek Ethëri 8?

• Çfarë të mësuan këto vargje rreth Zotit?

• Si mund t’i ndihmojnë këto mësime adoleshentët sot?

Moroni i përmbylli mësimet e tij rreth lidhjeve të fshehta duke shpjeguar se përse i përfshiu këto paralajmërime. Lexo tek Ethëri 8:26, duke kërkuar atë që Moroni donte që ne të dimë.

• Çfarë mësove rreth arsyes përse Moroni i përfshiu këto mësime në Librin e Mormonit?

• Çfarë ke mësuar sot që mund të të bindë ta ndjekësh Jezu Krishtin më plotësisht?

Merreni parasysh të jepni dëshminë tuaj për mënyrën se si të vërtetat që jepen në këtë mësim ju nxitin ta mirëbesoni dhe ta ndiqni Jezu Krishtin.

Komente dhe Informacion për Rrethanat

Cilat janë mënyrat se si i shohim lidhjet e fshehta sot?

Presidenti M. Rasëll Ballard, i Kuorumit të Dymbëdhjetë Apostujve, tha:

Presidenti M. Rasëll Ballard

“Libri i Mormonit jep mësimin se lidhjet e fshehta që merren me krimin, paraqesin një sfidë serioze, jo vetëm për individët dhe familjet, por për mbarë qytetërimet. Ndër lidhjet e fshehta të sotme janë bandat, kartelet e drogës dhe familjet e krimit të organizuar. Lidhjet e fshehta të ditëve të sotme funksionojnë në mënyrë shumë të ngjashme me hajdutët e Gadiantonit në kohën e Librit të Mormonit. Ata kanë shenja të fshehta dhe fjalë me kode. Ata marrin pjesë në rite të fshehta dhe ceremoni pranimi. Mes qëllimeve të tyre janë ‘të vr[asin] dhe të plaçkit[in] dhe të v[jedhin], dhe të bë[jnë] lavirësi dhe të gjitha llojet e ligësisë, në kundërshtim me ligjet e vendit të tyre dhe gjithashtu me ligjet e Perëndisë së tyre’ (Helamani 6:23).

Nëse ne nuk jemi të kujdesshëm, lidhjet e fshehta të sotme mund të fitojnë pushtet dhe ndikim po aq shpejt dhe po aq plotësisht, siç arritën ato në kohët e Librit të Mormonit.” (M. Russell Ballard, “Standing for Truth and Right”, Ensign, nëntor 1997, f. 38)

Përse nevojitet të jemi të ndershëm me veten dhe me Zotin për mëkatet tona?

Plaku Nil L. Andersen, i Kuorumit të Dymbëdhjetë Apostujve, tregoi:

Plaku Nil L. Andersen

“Në dëshirën tonë për t’u penduar, ndershmëria bëhet jashtëzakonisht me rëndësi. Para së gjithash, ne duhet të jemi të ndershëm me Atin tonë Qiellor dhe me veten. Mungesa e ndershmërisë dhe mashtrimi janë themeli dhe rrënja e pothuajse çdo mëkati. Ndonjëherë kur dikush fillon të pendohet, ai ose ajo fillon duke ekspozuar vetëm një pjesë të një problemi më të madh. Ndonjëherë ne e mashtrojmë veten duke menduar se nevojitet të tregohet e gjithë tabloja, ose që një pjesë e asaj që ndodhi ishte faji i dikujt tjetër. Njerëzit e mirë mund ta mashtrojnë veten dhe të mashtrohen. Çdo mashtrim e vonon procesin e pendimit.” (Neil L. Andersen, The Divine Gift of Forgiveness [2019], f. 194)

Në materialin filmik vijues, “Being Honest in Our Repentance” [“Të Qenit të Ndershëm në Pendimin Tonë”] (4:05), Plaku Nil L. Andersen, i Kuorumit të Dymbëdhjetë Apostujve, diskuton mendime në lidhje me librin e tij The Divine Gift of Forgiveness (2019). Ai tregon rreth dy njerëzve që reaguan ndaj një mëkati të ngjashëm, por në mënyra të ndryshme: njëri ndershmërisht dhe tjetri pandershmërisht.

Veprimtari Plotësuese të të Mësuarit

Fillim alternativ

Presidenti Ezra Taft Benson (1899–1994) dha mësim se Libri i Mormonit “u shkrua për kohën tonë” (“The Book of Mormon – The Keystone of Our Religion”, Ensign, nëntor 1986, f. 6).

Mund t’i ftoni nxënësit t’i diskutojnë disa prej mesazheve ose paralajmërimeve nga Libri i Mormonit që mund t’i ndihmojnë njerëzit në kohën tonë.

Pasi nxënësit t’i japin përgjigjet e tyre, shpjegoni se njëri prej paralajmërimeve që profetët e Librit të Mormonit ua dhanë lexuesve të ditëve të mëvonshme ishte për rrezikun e lidhjeve të fshehta. Nxitini nxënësit t’i kushtojnë vëmendje ndërsa studiojnë asaj që dëshiron Zoti që ata të dinë rreth lidhjeve të fshehta dhe se si mund t’i shmangin ato.

Vazhdimi i historisë

Nëse dëshironi, mund t’i përmblidhni vargjet tek Ethëri 9:1–13 duke shpjeguar se, si rezultat i lidhjes së tyre të fshehtë, Akishi dhe miqtë e tij qenë në gjendje ta rrëzonin mbretërinë e Omerit. Sidoqoftë, Perëndia e paralajmëroi Omerin se duhej të arratisej me familjen e tij, duke shpëtuar kështu jetën e tyre. Biri i lig i Omerit, Jaredi, u bë mbret dhe ia dha bijën e tij Akishit për martesë. Akishi dhe miqtë e tij vazhduan me planet e tyre të liga, duke e vrarë Jaredin dhe madje edhe një nga bijtë e Akishit. Këto veprime çuan në luftë midis Akishit dhe bijve të tij, që më në fund i shkatërruan thuajse të gjithë jareditët dhe e rivunë Omerin në fron.

Lidhjet e fshehta në Librin e Mormonit

Nëse dëshironi, mund të referoheni tek Udhëzuesi për Shkrimet e Shenjta, shënimi “Lidhje të Fshehta”, scriptures.ChurchofJesusChrist.org, për shembuj të tjerë në Librin e Mormonit që tregojnë paralajmërime dhe rreziqe shtesë të lidhjeve të fshehta.