Eter 12:1–22

Pagtanggap ng Patotoo sa Katotohanan

mga dalagitang nag-aaral ng ebanghelyo

Ano ang nakatulong sa iyong mga pagsisikap na matutuhan ang espirituwal na katotohanan? Matapos isalaysay ang maraming taon ng kasaysayan ng mga Jaredita, ipinabatid ni Moroni ang paglilingkod ng propetang si Eter. Pagkatapos ay ibinahagi ni Moroni ang ilan sa mga pagpapalang nagmumula sa pagsampalataya kay Jesucristo, pati na kung paano tayo matutulungan ng pagsubok sa ating pananampalataya na makatanggap ng patotoo sa katotohanan. Layunin ng lesson na ito na matulungan kang sumampalataya upang makatanggap ng espirituwal na patotoo sa katotohanan.

Ihanda ang iyong sarili na magturo. Dahil ang Espiritu ay nagpapatotoo sa katotohanan at siyang pinagmumulan ng pagbabalik-loob, inihahanda ng mahuhusay na titser ng ebanghelyo ang kanilang sarili sa espirituwal na aspeto bago sila magturo. Anyayahan ang Espiritu Santo sa paghahanda mo ng lesson sa pamamagitan ng taimtim na panalangin, at hangaring sundin ang Kanyang patnubay habang nagtutuon ka sa pagtuturo ng doktrina at mga alituntunin.

Paghahanda ng estudyante: Sabihin sa mga estudyante na mag-isip ng mga halimbawa mula sa mga banal na kasulatan kung saan ang matatapat na pagkilos ay humantong sa mga espirituwal na patotoo, pagpapala, o sagot mula sa Diyos.

Mga Posibleng Aktibidad sa Pag-aaral

“Paano mo nalaman?”

Ibinahagi ni Sister Rebecca L. Craven, Pangalawang Tagapayo sa Young Women General Presidency, ang sumusunod na karanasan niya habang kausap ang isang dalagita:

Sister Rebecca L. Craven

Nagkaroon ako ng magandang karanasan sa isang magiliw na dalagita na tapat na nagtanong: “Sister Craven, paano mo po nalaman na anumang tungkol sa Simbahan ay totoo? Kasi po wala akong nararamdaman.”

Bago ko siya sinagot, tinanong ko muna siya ng ilang bagay. “Ikuwento mo sa akin ang personal na pag-aaral mo ng mga banal na kasulatan.”

Sagot niya, “Hindi po ako nagbabasa ng mga banal na kasulatan.”

Tanong ko, “Eh ang pamilya mo? “Nagbabasa ba kayo ng Pumarito Ka, Sumunod Ka sa Akin nang sama-sama?”

Sabi niya, “Hindi po.”

Nagtanong ako tungkol sa pagdarasal niya: “Ano ang nadarama mo kapag nagdarasal ka?”

Sagot niya: “Hindi po ako nagdarasal.” (Rebecca L. Craven, “Gawin ang Pinakamahalaga,” Liahona, Mayo 2022, 62)

• Batay sa iyong mga karanasan, ano ang maaari mong sabihin para matulungan ang dalagitang ito?

Matapos talakayin ng mga estudyante ang naunang tanong, sabihin sa kanila na magbahagi ng mga halimbawa ng mga partikular na katotohanan na maaaring kailangang hanapin ng mga tao para magkaroon ng espirituwal na patotoo tungkol dito. Isulat sa pisara ang kanilang mga sagot. (Maaaring kabilang sa mga sagot ang patotoo na ang Aklat ni Mormon ay totoo, na ang pamumuhay nang malinis at marangal ay mahalaga, o na ang Word of Wisdom ay batas ng Diyos.)

Isipin ang mga espirituwal na katotohanan na gusto mong makatanggap ka ng espirituwal na patotoo o ng mas malakas na patotoo tungkol dito. Maaari mong isulat ang mga ito sa iyong study journal. Sa pag-aaral mo ngayong araw, maghanap ng mga turo na makatutulong sa iyo na magkaroon ng espirituwal na patotoo o mapalakas ang iyong patotoo.

“Ang pagsubok sa inyong pananampalataya”

Habang patuloy na pinaiikli ni Moroni ang talaan ng mga Jaredita, ipinabatid niya ang paglilingkod ng propetang si Eter. Kahit isinilang si Eter sa pagkabihag at namuhay sa kalipunan ng mga taong hindi tumanggap sa mga propeta (tingnan sa Eter 11:20–23), siya ay namuhay nang matwid at tinawag siya ng Diyos na maging propeta.

Basahin ang Eter 12:2–5, at alamin kung paano tinanggap ng mga Jaredita ang pangangaral ni Eter.

• Bakit ayaw paniwalaan ng mga tao ang mga salita ni Eter?

Basahin ang Eter 12:6, at alamin ang itinuro ni Moroni tungkol sa kung paano tayo magtatamo ng espirituwal na patotoo sa katotohanan.

Ang Eter 12:6 ay isang doctrinal mastery passage. Maaari mong markahan ang mga doctrinal mastery passage sa paraang madali mong mahahanap ang mga ito. Magkakaroon ka ng pagkakataon sa susunod na lesson na magsanay na gamitin ang doktrinang itinuturo sa passage na ito sa isang tanong o sitwasyon.

Ibinahagi ni Elder Richard G. Scott (1928–2015) ng Korum ng Labindalawang Apostol ang isang kahulugan ng pariralang pagsubok sa inyong pananampalataya:

Elder Richard G. Scott

Mas mabisa ninyong magagamit ang pananampalataya sa pagsunod sa alituntuning itinuro ni Moroni: “Ang pananampalataya ay mga bagay na inaasahan at hindi nakikita; kaya nga, huwag magtalu-talo dahil sa hindi ninyo nakikita, sapagkat wala kayong matatanggap na patunay hangga’t hindi natatapos ang pagsubok sa inyong pananampalataya” [Eter 12:6; idinagdag ang pagbibigay-diin]. Sa gayon, sa tuwing susubukin ninyo ang inyong pananampalataya, ibig sabihin kikilos kayo nang marapat sa isang impresyon, tatanggapin ninyo ang nagpapatibay na patunay ng Espiritu. Ang mga damdaming iyon ang magpapalakas sa inyong pananampalataya. Kapag paulit-ulit ninyong ginagawa ang huwarang iyon, lalakas ang inyong pananampalataya. (Richard G. Scott, “The Sustaining Power of Faith in Times of Uncertainty and Testing,” Ensign o Liahona, Mayo 2003, 76)

• Ano ang natutuhan mo mula sa Eter 12:6 at sa pahayag na ito na makatutulong sa isang taong nagnanais na magkaroon ng espirituwal na patotoo o mas malakas na patotoo sa katotohanan?

Ang isang katotohanan na matututuhan natin mula sa Eter 12:6 ay kung nais nating magkaroon ng espirituwal na patotoo, dapat muna tayong manampalataya kay Jesucristo at sa Kanyang ebanghelyo.

Isinalaysay ni Sister Rebecca L. Craven kung paano siya sumagot sa dalagitang kausap niya:

Sister Rebecca L. Craven

Simple lang ang tugon ko sa kanya: “Kung may gusto kang malaman, mayroon kang kailangang gawin.”

Hindi ba totoo iyan sa anumang gusto nating matutuhan o malaman? Inanyayahan ko ang bago kong kaibigan na simulang gawin ang turo ng ebanghelyo ni Jesucristo: pagdarasal, pag-aaral, paglilingkod sa iba, at pagtitiwala sa Panginoon. Hindi darating ang pagbabalik-loob nang wala tayong ginagawa. Dumarating ito sa pamamagitan ng kapangyarihan ng Espiritu Santo habang sadya tayong nagsisikap na makaalam sa pamamagitan ng pagtatanong, paghahanap, at pagkatok. Dumarating ito sa pamamagitan ng paggawa. (Rebecca L. Craven, “Gawin ang Pinakamahalaga,” Liahona, Mayo 2022, 62)

• Sa iyong palagay, bakit ang pagsampalataya kay Jesucristo sa pamamagitan ng ating paggawa ay mahalagang aspeto ng pagtanggap ng espirituwal na patotoo tungkol sa Kanya at sa Kanyang ebanghelyo?

• Paano maaapektuhan ng pagpapamuhay ng ebanghelyo ng Tagapagligtas ang ating damdamin para sa Kanya?

Mga halimbawa ng pananampalataya

Isipin ang mga karanasan kung saan nakatanggap ka o ang iba ng espirituwal na patotoo dahil ipinamuhay mo ang ebanghelyo ng Tagapagligtas at sumampalataya ka sa Kanya.

Anyayahan ang ilang estudyante na ibahagi ang mga karanasang naisip nila. Ipaliwanag na hindi sila dapat magbahagi ng mga karanasang masyadong personal. Maaari mong ibahagi ang sarili mong karanasan bilang bahagi ng talakayang ito. Maaari ding gamitin ang sumusunod na video.

Para makakita ng halimbawa ng isang taong napalakas dahil sa pananampalataya sa Tagapagligtas, panoorin ang “Pure and Simple Faith” (5:21), na matatagpuan sa ChurchofJesusChrist.org.

Sa patuloy na pagtuturo ni Moroni, nagbahagi siya ng maraming halimbawa ng mga taong pinagpala nang manampalataya ang mga ito kay Jesucristo.

Para sa sumusunod na aktibidad, maaari mong hatiin ang mga estudyante sa apat na grupo at magtalaga sa bawat grupo ng isa sa mga sumusunod na set ng mga talatang pag-aaralan: Eter 12:7–10, 11–14, 15–18, 19–22. Anyayahan ang bawat grupo na ibahagi sa klase ang mga halimbawa ng pananampalatayang nabasa nila.

Basahin ang Eter 12:7–22, at alamin kung paano pinagpala ng Panginoon ang mga taong ito na nanampalataya sa Kanya. Maaari mong markahan ang anumang halimbawa na kapansin-pansin para sa iyo.

• Alin sa mga halimbawang ito ng pananampalataya ang lubos na nagpahanga sa iyo? Bakit?

• Paano makatutulong sa iyong personal na kalagayan ang isa o mahigit pang halimbawang pinag-aralan mo?

Isipin kung paano mo maipamumuhay ang natutuhan mo ngayon. Magsulat ng dalawa o tatlong gawain na magagawa mo para sumampalataya kay Jesucristo at matanggap o mapalakas ang iyong patotoo sa ebanghelyo ng Tagapagligtas.

Komentaryo at Impormasyon ng Konteksto

Eter 12:6. Ano ang ibig sabihin ng sumampalataya at umasa sa mga bagay na hindi nakikita?

Itinuro ni Sister Bonnie L. Oscarson, dating Young Women General President:

Pangulong Bonnie L. Oscarson

Kung minsan ay kabaligtaran ang ginagawa natin. Halimbawa, maaaring ganito ang pamamaraan natin: Handa akong sundin ang batas ng ikapu, pero kailangan ko munang malaman kung ito ay totoo. Siguro ipinagdarasal pa natin na magkaroon ng patotoo tungkol sa batas ng ikapu at umaasa tayo na ibibigay sa atin ng Panginoon ang patotoong iyan bago pa man natin sulatan ang tithing slip. Hindi sa ganyang paraan mangyayari iyan. Inaasahan ng Panginoon na mananalig tayo. Dapat ay patuloy tayong magbayad ng buo at tapat na ikapu para magkaroon tayo ng patotoo sa ikapu. Angkop din ito sa lahat ng alituntunin ng ebanghelyo, ito man ay batas ng kalinisang-puri, alituntunin ng disenteng pananamit, Word of Wisdom, o batas ng ayuno. (Bonnie L. Oscarson, “Magbalik-loob Kayo,” Liahona, Nob. 2013, 77)

Eter 12:12. Saan ako makakakita ng iba pang mga salaysay tungkol sa mga himala sa makabagong panahon na bunga ng pananampalataya?

Panoorin ang “Isang Himala sa Digmaan” para matuto mula kay Pangulong Thomas S. Monson (1927–2018) kung paano humahantong sa mga himala ang pananampalataya kay Jesucristo at sa kapangyarihan ng Kanyang priesthood.

Basahin ang tungkol sa pagpapagaling at pagpapalakas ni Joseph Smith sa isang lalaki na nasa bingit ng kamatayan matapos ipahayag ng lalaki ang kanyang pananampalataya kay Jesucristo (tingnan sa Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 458–459).

Mga Karagdagang Aktibidad sa Pag-aaral

Alternatibong simula

Maaaring sabihin sa mga estudyante na pag-isipan kung bakit mahalagang gawin ang mga bagay sa partikular na pagkakasunud-sunod. Halimbawa, maaari mong ipasulat sa mga estudyante ang mga numerong 1, 2, at 3 sa anumang pagkakasunud-sunod sa isang papel. Pagkatapos ay ipakita ang mga sumusunod na gawain at sabihin sa mga estudyante na isipin kung ano ang mangyayari kung susubukan nilang gawin ang mga iyon ayon sa pagkakasunud-sunod na pinili nila:

• (1) Magsuot ng medyas. (2) Magsuot ng sapatos. (3) Isintas ang iyong sapatos.

• (1) Buksan ang iyong toothpaste. (2) Maglagay ng toothpaste sa iyong toothbrush. (3) Sepilyuhin ang iyong ngipin.

• (1) Buksan ang messaging app sa iyong phone. (2) Mag-type ng mensahe. (3) Ipadala ang mensahe.

Sabihin sa mga estudyante na mag-isip ng mga paraan kung saan ang paggawa ng mga simpleng gawain sa tamang pagkakasunud-sunod ay mahalaga pagdating sa mga bagay na espirituwal.

Eter 12:1–4. Magagawa ng pag-asa at pananampalataya na iangkla ang ating kaluluwa

Kung makatutulong sa mga estudyante ang pag-aaral kung paano nagtutulungan ang mga alituntunin ng pananampalataya at pag-asa, maaari mo silang anyayahang magdrowing ng isang bangka at sulatan ito ng “Buhay Ko.” Pagkatapos, sabihin sa kanila na magdrowing ng angkla na nakakonekta sa bangka, lagyan ito ng label na “Pananampalataya at Pag-asa,” at magdrowing ng alon sa paligid ng bangka. Itanong sa mga estudyante kung ano ang maaaring kinakatawan ng mga alon kung ang bangka ay kumakatawan sa kanilang buhay. Sabihin sa mga estudyante na ipaliwanag ang mga pakinabang ng angkla, at sama-samang basahin ang Eter 12:1–4. Maaari kang magtanong ng tulad ng mga sumusunod:

• Ano ang ibig sabihin ng pagkakaroon ng lugar sa kanang kamay ng Diyos? (Maaari mong sabihin sa mga estudyante na sumangguni sa Mateo 25:31–34 para sa tulong.)

• Paano tayo nahihikayat ng pananampalataya kay Jesucristo na umasa “nang may katiyakan” na magkakaroon tayo ng lugar sa kanang kamay ng Diyos?

• Paano kayo ligtas na iniaangkla ng inyong pananampalataya at pag-asa sa mahihirap na panahon o personal na mga unos?

Eter 12:6. Cross-referencing

Upang matulungan ang mga estudyante na mapalalim ang kanilang pag-unawa sa doktrinang itinuro sa Eter 12:6, maaari mong anyayahan sila na saliksikin ang mga banal na kasulatan para sa mga scripture passage na nagtuturo ng mga katulad na ideya o konsepto. Ilista sa pisara ang mga reference na makikita nila (kabilang sa mga halimbawa ang Juan 7:17; Mga Hebreo 11:1; Alma 32:21–31). Pagkatapos ay maaaring anyayahan ang mga estudyante na gumawa ng scripture chain, na nagkokonekta sa mga scripture passage na natagpuan nila pabalik sa Eter 12:6.

Eter 12:7–22. “Sa paghahandog ng kanyang Anak, ang Diyos ay naghanda ng higit na mabuting paraan”

Bilang bahagi ng pag-aaral nila ng Eter 12:7–22, maaaring anyayahan ang mga estudyante na alamin pa kung paano pinagpala ni Jesucristo ang ilan sa mga taong binanggit sa mga talatang ito. Ang mga footnote o talababa para sa mga talatang ito sa Eter 12 ay naglalaman ng mga cross-reference sa mga salaysay na tinutukoy ng mga ito. Maaaring anyayahan ang mga estudyante na basahin ang mga salaysay na ito at bigyang-pansin kung paano pinagpala ni Jesucristo ang mga tao nang sumampalataya sila sa Kanya. Matapos makumpleto ng mga estudyante ang kanilang pag-aaral, maaari mo silang anyayahang ibahagi ang natutuhan nila na makadaragdag sa kanilang sariling pananampalataya kay Jesucristo.