Eter 8

“Ang Panginoon ay Hindi Gumagawa sa mga Lihim na Pakikipagsabwatan”

Jesucristo

Winasak ng mga lihim na pagsasabwatan ang ilang grupo ng mga tao sa buong Aklat ni Mormon. Ang lihim na pagsasabwatang ito ay lumitaw sa kalipunan ng mga Jaredita at humantong sa kanilang pagkalipol. Habang isinusulat ang tungkol sa mga Jaredita, idinagdag ng propetang si Moroni ang mahahalagang katotohanan na matututuhan natin mula sa mga nakapagpapahamak na pangyayaring ito. Ang lesson na ito ay makatutulong sa iyo na maunawaan na kailangang tanggihan ang mga lihim na pakikipagsabwatan sa pamamagitan ng pagsunod kay Jesucristo.

Tulungan ang mga estudyante na makakita ng kaugnayan. Kapag nakikita ng mga estudyante ang kaugnayan ng pinag-aaralan nila sa mga banal na kasulatan sa sarili nilang mga sitwasyon at kalagayan, kadalasang mas nahihikayat sila na mag-aral at ipamuhay ang mga turo ng ebanghelyo. Sabihin sa mga estudyante na alamin ang kaugnayan sa pamamagitan ng pagtatanong sa kanila ng tulad ng “Paano maitutulad ang pangyayari o turong ito sa inyong mga karanasan?” o “Paano naaangkop ang katotohanang ito sa inyong buhay?”

Paghahanda ng estudyante: Ipabasa sa mga estudyante ang “Lihim na Pagsasabwatan, Mga” sa Gabay sa mga Banal na Kasulatan sa scriptures.ChurchofJesusChrist.org.

Mga Posibleng Aktibidad sa Pag-aaral

Mga lihim na pagkilos

Isulat sa pisara ang salitang paglilihim, at itanong sa mga estudyante ang mga sumusunod:

• Ano ang ilang paraan na ginagamit ni Satanas ang paglilihim upang maisakatuparan ang kanyang masasamang layunin?

• Paano makakaapekto ang gayong paglilihim sa kaugnayan ng isang tao kay Jesucristo? Bakit?

• Ano ang nais mong malaman ng isang tao na nakadarama na makakalusot siya sa paggawa niya ng masama dahil inililihim niya ito?

Ngayon ay malalaman mo ang tungkol sa isang grupo ng mga tao na nakibahagi sa mga lihim na gawain ng kasamaan na kilala bilang lihim na pakikipagsabwatan. Sa iyong pag-aaral, hanapin ang mga turo na tutulong sa iyo na maunawaan ang panganib ng mga lihim na pakikipagsabwatan.

Kasamaan sa mga Jaredita

Maaalala mo na matapos makarating ang mga Jaredita sa lupang pangako, humirang sila ng hari na mamumuno sa kanila sa kabila ng mga babala ng kapatid ni Jared na ang paggawa nito ay hahantong sa pagkabihag (tingnan sa Eter 6:22–23). Sa sumunod na mga henerasyon, ang masasamang hari ay nagdulot ng pagkakahati-hati at pagdurusa sa mga tao.

Maaari mong anyayahan ang ilang handang estudyante na magsalitan sa pagbasa nang malakas ng mga sumusunod na talata sa klase habang tahimik na sumasabay sa pagbasa ang iba pang estudyante sa kanilang banal na kasulatan.

Basahin ang Eter 8:1–10, at alamin kung ano ang nangyari nang maging hari ang isang lalaking nagngangalang Omer.

Pumayag si Jared sa masamang plano ng kanyang anak na babae. Nang hilingin ni Akis na pakasalan ang anak na babae ni Jared, sina Akis, Jared, ang anak na babae ni Jared, at iba pang mga miyembro ng pamilya ay pumasok sa lihim na pakikipagsabwatan upang patayin si Omer (tingnan sa Eter 8:11–15).

Mga panganib ng mga lihim na pakikipagsabwatan

Ang lihim na pakikipagsabwatan ay “isang samahan ng mga tao na pinag-isa ng mga pangako upang isagawa ang masasamang layunin ng pangkat” (“Lihim na Pagsasabwatan, Mga,” Gabay sa mga Banal na Kasulatan, scriptures.ChurchofJesusChrist.org). Si Satanas ang pinagmulan ng mga lihim na pakikipagsabwatan (tingnan sa Helaman 6:25–30).

Bilang tagapagsalaysay ng kuwentong ito, ibinahagi ng propetang si Moroni ang ilang mahahalagang turo at babala tungkol sa mga lihim na pakikipagsabwatan. Basahin ang Eter 8:18–25, at alamin ang nadarama ng Panginoon tungkol sa mga lihim na pakikipagsabwatan.

Sabihin sa mga estudyante na talakayin ang natutuhan nila mula sa mga talatang ito. Bukod pa sa mga sumusunod na tanong, maaari mo ring itanong, “Anong mga babala ang ibinigay ni Moroni sa mga taong nakikibahagi sa mga lihim na pakikipagsabwatan?”

• Ano ang nalaman mo tungkol sa mga lihim na pakikipagsabwatan mula sa mga talatang ito?

Ang isang katotohanan na matututuhan natin mula sa mga talatang ito ay na ang mga lihim na pakikipagsabwatan ay karumal-dumal sa paningin ng Diyos (Eter 8:18).

Upang matulungan kang mas maunawaan kung bakit karumal-dumal sa Panginoon ang mga lihim na pakikipagsabwatan, basahin ang mga sumusunod na banal na kasulatan, at maghanap ng matututuhan mo tungkol kay Jesucristo:

• 2 Nephi 26:22–24

• Alma 39:8

Sabihin sa mga estudyante na talakayin ang natutuhan nila mula sa mga talatang ito. Maaaring gamitin ang mga sumusunod na tanong.

• Ano ang natutuhan mo mula sa mga talatang ito na maaaring nakatulong sana sa mga taong pinag-aralan mo sa Eter 8?

• Ano ang itinuturo sa iyo ng mga talatang ito tungkol sa Panginoon?

• Paano makatutulong ang mga turong ito sa mga kabataan ngayon?

Tinapos ni Moroni ang kanyang mga turo tungkol sa mga lihim na pakikipagsabwatan sa pamamagitan ng pagpapaliwanag kung bakit niya isinama ang mga babalang ito. Basahin ang Eter 8:26, at alamin ang nais ni Moroni na malaman natin.

• Ano ang natutuhan mo tungkol sa dahilan kung bakit isinama ni Moroni ang mga turong ito sa Aklat ni Mormon?

• Ano ang natutuhan mo ngayon na makahihikayat sa iyo na sundin nang mas lubusan si Jesucristo?

Maaari mong ibahagi ang iyong patotoo kung paano ka nahihikayat ng mga katotohanang itinuro sa lesson na ito na magtiwala at sumunod kay Jesucristo.

Komentaryo at Impormasyon ng Konteksto

Ano ang mga paraan na nakikita natin ang mga lihim na pakikipagsabwatan ngayon?

Sinabi ni Pangulong M. Russell Ballard ng Korum ng Labindalawang Apostol:

Pangulong M. Russell Ballard

Itinuturo ng Aklat ni Mormon na ang mga lihim na pagsasabwatan sa paggawa ng krimen ay isang malaking hamon, hindi lamang sa mga tao at pamilya kundi sa buong sibilisasyon. Kabilang sa mga lihim na pagsasabwatan ngayon ang mga gang, mga drug cartel, at mga samahang gumagawa ng planadong krimen. Ang mga lihim na pagsasabwatan sa ating panahon ay parang mga tulisan ni Gadianton noong panahon ng Aklat ni Mormon. Mayroon silang mga lihim na palatandaan at code word. Nakikibahagi sila sa mga lihim na seremonya at seremonya ng pagsisimula. Kasama sa kanilang mga layunin ang “makapapaslang, at makapandarambong, at makapagnanakaw, at makagagawa ng mga pagpapatutot, at lahat ng uri ng kasamaan, na salungat sa mga batas ng kanilang bayan at gayon din sa mga batas ng kanilang Diyos” (Helaman 6:23).

Kung hindi tayo mag-iingat, ang mga lihim na pagsasabwatan ngayon ay maaaring magkaroon ng agaran at lubusang kapangyarihan at impluwensya sa atin gaya noong panahon ng Aklat ni Mormon. (M. Russell Ballard, “Standing for Truth and Right,” Ensign, Nob. 1997, 38)

Bakit kailangan nating maging tapat sa ating sarili at sa Panginoon tungkol sa ating mga kasalanan?

Ibinahagi ni Elder Neil L. Andersen ng Korum ng Labindalawang Apostol:

Elder Neil L. Andersen

Sa hangarin nating magsisi, nagiging napakahalaga ng katapatan. Una sa lahat, dapat tayong maging tapat sa ating Ama sa Langit at sa ating sarili. Ang pagsisinungaling at panlilinlang ay nasa pundasyon at ugat ng halos lahat ng kasalanan. Kung minsan kapag nagsimulang magsisi ang isang tao, nagsisimula siya sa paglalahad ng isang bahagi lamang ng mas malaking isyu. Kung minsan ay hangal tayo sa pag-iisip na hindi kailangang sabihin ang buong pangyayari, o ang bahaging iyon ng nangyari ay kasalanan ng iba. Ang mabubuting tao ay maaaring linlangin ang kanilang sarili at malinlang. Ang anumang panlilinlang ay nagpapaliban sa proseso ng pagsisisi. (Neil L. Andersen, The Divine Gift of Forgiveness [Ang Banal na Kaloob na Pagsisisi] [2019], 194)

Sa sumusunod na video, “Pagiging Tapat sa Ating Pagsisisi” (4:05), tinalakay ni Elder Neil L. Andersen ng Korum ng Labindalawang Apostol ang mga kaisipan kaugnay ng kanyang aklat na The Divine Gift of Forgiveness [Ang Banal na Kaloob na Pagsisisi] (2019). Ibinahagi niya ang tungkol sa dalawang tao na tumugon sa magkatulad na kasalanan ngunit sa magkaibang paraan: ang isa ay matapat at ang isa naman ay hindi matapat.

Mga Karagdagang Aktibidad sa Pag-aaral

Alternatibong simula

Itinuro ni Pangulong Ezra Taft Benson (1899–1994) na ang Aklat ni Mormon “ay isinulat para sa ating panahon” (“The Book of Mormon—The Keystone of Our Religion,” Ensign, Nob. 1986, 6).

Maaari mong anyayahan ang mga estudyante na talakayin ang ilan sa mga mensahe o babala mula sa Aklat ni Mormon na makatutulong sa mga tao sa ating panahon.

Matapos ibahagi ng mga estudyante ang kanilang mga sagot, ipaliwanag na isa sa mga babala na ibinahagi ng mga propeta sa Aklat ni Mormon sa mga mambabasa sa mga huling araw ay tungkol sa panganib ng mga lihim na pakikipagsabwatan. Hikayatin ang mga estudyante na pagtuunang mabuti sa kanilang pag-aaral ang nais ng Panginoon na malaman nila tungkol sa mga lihim na pakikipagsabwatan at kung paano nila maiiwasan ang mga ito.

Ang natitirang bahagi ng kuwento

Maaari mong ibuod ang Eter 9:1–13 sa pamamagitan ng pagpapaliwanag na dahil sa kanilang lihim na pagsasabwatan, napabagsak ni Akis at ng kanyang mga kaibigan ang kaharian ni Omer. Gayunman, binalaan ng Diyos si Omer na dapat siyang tumakas kasama ang kanyang pamilya, kaya naligtas ang kanilang buhay. Ang masamang anak ni Omer na si Jared ay naging hari at ipinakasal ang kanyang anak na babae kay Akis. Ipinagpatuloy ni Akis at ng kanyang mga kaibigan ang kanilang masasamang balak, kung saan pinatay si Jared at maging ang isa sa mga anak ni Akis. Ang mga pangyayaring ito ay humantong sa isang digmaan sa pagitan ni Akis at ng kanyang mga anak na lalaki na sa huli ay halos ikalipol ng lahat ng mga Jaredita at ikinabalik ni Omer sa trono.

Mga lihim na pakikipagsabwatan sa Aklat ni Mormon

Maaari mong tingnan ang Gabay sa mga Banal na Kasulatan, “Lihim na Pagsasabwatan, Mga,” scriptures.ChurchofJesusChrist.org, para sa iba pang mga halimbawa sa Aklat ni Mormon na nagpapakita ng mga karagdagang babala at panganib ng mga lihim na pakikipagsabwatan.