Moroni 2–3

Autoriteti i Priftërisë

Autoriteti i vërtetë i priftërisë nga Perëndia është i rëndësishëm në Kishën e Shpëtimtarit. Në disa prej fjalëve të tij të fundit për brezat e ardhshëm, Moroni dha mësim rreth autoritetit për të kryer ordinancat e priftërisë. Duke e bërë këtë, ai ruajti të vërteta të rëndësishme rreth mënyrës se si përdoret priftëria. Ky mësim mund të të ndihmojë ta kuptosh autoritetin e priftërisë në Kishën e Shpëtimtarit.

Ndihmojini nxënësit të përqendrohen te Jezu Krishti. Përsiatni se si shkrimet e shenjta japin mësim parime që na ndihmojnë ta kuptojmë më mirë Shpëtimtarin. Ftojini nxënësit të kërkojnë se çfarë mund të mësojnë rreth fuqisë, mëshirës dhe ndikimit të Jezu Krishtit nga parimet e ungjillit që i zbulojnë në shkrimet e shenjta.

Përgatitja e nxënësve: Merreni parasysh t’i ftoni nxënësit të flasin me një mbajtës të priftërisë ose dikë që shërben në një thirrje në Kishë. Nxënësit mund ta pyesin atë individ se si ndihet ai ose ajo rreth marrjes së autoritetit të Shpëtimtarit për të kryer përgjegjësitë e tij ose të saj.

Veprimtari të Mundshme të të Mësuarit

Përpara orës mësimore, fshihni një send që do t’ju nevojitet gjatë mësimit, si shkumësa, bojëra uji ose shkrimet tuaja të shenjta. Ftojini nxënësit ta gjejnë sendin dhe më pas pyetini përse është i nevojshëm për mësimin.

Kujtojuni nxënësve se shumë të vërteta të qarta dhe të çmueshme humbën gjatë Braktisjes së Madhe (shihni te 1 Nefi 13:26–27, 32). Shkrimet e Moronit na mësojnë të vërteta të rëndësishme rreth organizimit të Kishës së Shpëtimtarit që humbën gjatë Braktisjes.

“T’u vlejnë”

Moroni ishte një ndër mbajtësit e fundit të priftërisë të periudhës së tij ungjillore në kontinentin amerikan. Ai e dinte se kur të vdiste, do të humbnin njohuri të rëndësishme rreth Kishës së Shpëtimtarit dhe autoriteti i Tij i priftërisë. Në disa prej fjalëve të tij të fundit, Moroni shkroi atë që ndjeu se mund “t’u vle[nte]” brezave të ardhshëm (Moroni 1:4). Ai shkroi rreth autoritetit dhe ordinancave të priftërisë që janë në dispozicion vetëm në Kishën e Shpëtimtarit.

Kur Shpëtimtari i ringjallur vizitoi nefitët, “ai preku me dorën e tij dishepujt që kishte zgjedhur” dhe “u dha fuqi atyre që të jepnin Frymën e Shenjtë” (3 Nefi 18:36–37). Moroni përfshiu në analin e tij disa prej udhëzimeve të Shpëtimtarit për dymbëdhjetë dishepujt nefitë rreth mënyrës se si ta jepnin dhuratën e Frymës së Shenjtë.

Për ta rritur bashkëpunimin e nxënësve, merreni parasysh t’i ftoni ata të punojnë me një shok ose shoqe klase apo në grupe të vogla për veprimtarinë vijuese. Nxënësit mund të studiojnë kapitujt te Moroni 2 ose 3 dhe më pas t’ia tregojnë atë që mësuan dikujt që studioi kapitullin tjetër. Informacioni vijues mund të jepet për t’i drejtuar nxënësit në studimin e tyre.

Autoriteti për të dhënë dhuratën e Frymës së Shenjtë

Lexo te Moroni 2:1–3, duke kërkuar atë që Moroni dha mësim se ishte me vlerë.

• Çfarë gjete në këto vargje që e ndien se është me vlerë?

• Nga ajo që ti e di tashmë, çfarë autoriteti priftërie është i nevojshëm për të dhënë dhuratën e Frymës së Shenjtë?

• Çfarë të vërtetash mund të mësojmë nga Moroni 2?

Një e vërtetë është se mbajtësit e Priftërisë Melkizekede ua japin dhuratën e Frymës së Shenjtë anëtarëve të pagëzuar të Kishës me anë të vendosjes së duarve.

• Si mendon, përse dhënia e Frymës së Shenjtë është kaq e rëndësishme? (Për një rrëfim që e demonstron këtë, mund të lexosh te Veprat e Apostujve 8:14–24.)

• Si mund të ndikojë dijenia se autoriteti për të dhënë dhuratën e Frymës së Shenjtë vjen nga Shpëtimtari në ndjenjat e tua rreth kësaj dhurate?

• Si ta ka bekuar jetën dhurata e Frymës së Shenjtë?

Shugurimi i të tjerëve në detyrat e priftërisë

Moroni shpjegoi më pas se si të shugurohen priftërinjtë dhe mësuesit.

Lexo te Moroni 3:1–4, duke kërkuar se si shugurohen individët në detyrat e priftërisë.

• Çfarë vure re rreth mënyrës se si shugurohen individët në detyrat e priftërisë?

Nxënësit mund ta lexojnë dhe lidhin vargun te Nenet e Besimit 1:5 me kapitullin te Moroni 3.

Megjithëse Moroni 3 përmend në mënyrë specifike shugurimin në detyrat e priftërisë të priftërinjve dhe mësuesve, autoriteti zbatohet edhe për të gjithë ata që mbajnë thirrje në Kishën e Shpëtimtarit.

• Përse është e nevojshme që individët të cilët shërbejnë në Kishën e Shpëtimtarit të kenë autoritetin e Tij?

Nëse është e mundur, sillni në klasë një linjë të autoritetit të priftërisë.

Autoriteti i priftërisë vjen nga Jezu Krishti. Ndërkohë që të gjithë ata që mbajnë thirrje në Kishë kanë autoritet priftërie, ata që janë shuguruar në detyrat e Priftërisë Aarone ose Melkizedeke kanë një linjë autoriteti të priftërisë. Kjo linjë e gjurmon autoritetin e një mbajtësi të priftërisë deri te Jezu Krishti. Mbajtësit e Priftërisë Melkizedeke mund të kërkojnë një anal të linjës së tyre të autoritetit në ChurchofJesusChrist.org. Kisha nuk siguron dokumentacion të linjës së autoritetit për mbajtësit e Priftërisë Aarone. Gjithsesi, nëse një mbajtës i Priftërisë Aarone është shuguruar nga një mbajtës i Priftërisë Melkizedeke, ai mund të mësojë rreth linjës së autoritetit të njeriut që e shuguroi atë.

Plaku Xhefri R. Holland, i Kuorumit të Dymbëdhjetë Apostujve, shpjegoi:

“Për të vepruar me autoritet hyjnor duhet më shumë se një kontratë e thjeshtë shoqërore. Ai nuk mund të krijohet me anë të trajnimit teologjik apo autorizimit nga bashkësia. Jo, në punën e autorizuar të Perëndisë duhet të ketë fuqi më të madhe sesa ajo e zotëruar tashmë nga njerëzit në komunitete apo në rrugë, apo në seminare – një fakt që shumë kërkues të ndershëm fetarë e kanë ditur dhe pranuar haptazi ndër breza deri te Rivendosja. …

… [Linja e autoritetit të priftërisë të çdo mbajtësi të priftërisë në Kishë] kthehet prapa në një zinxhir të pathyer deri te shërbestarët engjëllorë që erdhën nga Vetë Biri i Perëndisë, duke e mbajtur këtë dhuratë të pakrahasueshme nga qielli.” (Jeffrey R. Holland, “Our Most Distinguishing Feature”, Liahona, maj 2005, f. 44)

Merreni parasysh t’u tregoni nxënësve një zinxhir. Shpjegoni se hallka e parë e zinxhirit përfaqëson Jezu Krishtin dhe hallka e dytë ata që Ai i shuguroi në priftëri. Hallka e tretë përfaqëson personat që ata i shuguruan e me radhë, deri te brezat e mbajtësve të priftërisë sot, që përfaqësohen nga hallka e fundit e zinxhirit.

• Përse është domethënëse që autoriteti i priftërisë mund të gjurmohet deri te Jezu Krishti?

• Si mund të ndikojë dijenia për këtë lidhje me Jezu Krishtin në mënyrën se si ndihesh rreth ordinancave, thirrjeve ose bekimeve që merr nëpërmjet priftërisë?

Nxënësit mund të raportojnë për veprimtarinë e përgatitjes për orën mësimore.

Nxënësit mund të shqyrtojnë gjithashtu kapitujt te Moroni 2 dhe 3, duke kërkuar ngjashmëritë ndërmjet kapitujve, si dhe të raportojnë se çfarë gjejnë.

Tregoje atë që ke mësuar

Nëse do të ishte e dobishme për nxënësit që ta demonstrojnë kuptueshmërinë e tyre për atë që studiuan te Moroni 2–3, merreni parasysh ta diskutoni skenarin vijues.

Imagjino sikur ke një pjesëtar familjeje i cili do të pagëzohet dhe konfirmohet, shugurohet në priftëri ose veçohet për një thirrje. Çfarë mund t’i tregoje atij nga Moroni 2 ose 3 për ta ndihmuar ta kuptojë rëndësinë e ngjarjes?

Komente dhe Informacion për Rrethanat

Çfarë bën priftëria për ne?

Presidenti Diter F. Uhtdorf, asokohe i Presidencës së Parë, shpalli:

“Ne të gjithë e dimë se priftëria është shumë më tepër se thjesht një emër apo titull. Profeti Jozef na mësoi se: ‘Priftëria është një parim i përjetshëm dhe … ekzist[onte] me Perëndinë [që] nga përjetësia … në përjetësi, pa fillim [të] ditë[ve] apo fund [të] vite[ve]’ [Mësimet e Presidentëve të Kishës: Jozef Smith (2009), f. 108]. Ajo mban ‘madje çelësin e [diturisë së] Perëndi[s]ë’ [Doktrina e Besëlidhje 84:19]. Në fakt, nëpërmjet priftërisë vetë ‘fuqia e perëndishmërisë manifestohet’ [Doktrina e Besëlidhje 84:20].

Bekimet e priftërisë e kapërcejnë aftësinë tonë për të kuptuar. Mbajtësit besnikë të priftërisë Melkizedeke mund të ‘bëhen … të zgjedhurit e Perëndisë’ [Doktrina e Besëlidhje 84:34]. Ata ‘shenjtërohen me anë të Shpirtit në ripërtëritjen e trupave të tyre’ [Doktrina e Besëlidhje 84:33] dhe më në fund të marrin ‘gjithçka që Ati … ka’ [Doktrina e Besëlidhje 84:38]. Kjo mund të jetë e vështirë për t’u kuptuar, por është e mrekullueshme, unë dëshmoj se është e vërtetë.” (Diter F. Uhtdorf, “Potenciali Juaj, Privilegji Juaj”, Liahona, maj 2011, f. 58)

Kush mund t’i përjetojë bekimet e priftërisë?

Presidenti Dallin H. Ouks, i Presidencës së Parë, ka shpallur:

“Ndryshe nga çelësat e priftërisë dhe nga ordinancat e priftërisë, bekimet e priftërisë janë të disponueshme për gratë dhe për burrat me kushte të barabarta. Dhurata e Frymës së Shenjtë dhe bekimet e tempullit janë shembuj të njohur të kësaj së vërtete.” (Dallin H. Ouks, “Çelësat dhe Autoriteti i Priftërisë”, Liahona, maj 2014, f. 52)

Veprimtari Plotësuese të të Mësuarit

Detyrat në priftëri

Përpara se të përcaktojnë të vërtetën te Moroni 2, nxënësit mund t’i renditin në tabelë detyrat e Priftërisë Aarone dhe Melkizedeke dhe të vendosin një shenjë përzgjedhëse pranë atyre që mund të japin dhuratën e Frymës së Shenjtë. Pyetini nxënësit se nga e dimë këtë. Më pas nxënësit mund të përdorin treguesin për të gjetur një varg që ua mëson këtë. Nëse është e nevojshme, drejtojini ata te disa vargje (shihni te Doktrina e Besëlidhje 20:38, 41, 43; 107:18).

Linja e autoritetit të priftërisë

Përpara orës mësimore, përgatituni të sillni një anal të linjës së autoritetit të priftërisë të dikujt në familjen tuaj ose lagjen apo degën tuaj dhe t’ia tregoni atë klasës. Merreni parasysh të bëni një zinxhir me letër. Në hallkën e parë shkruani emrin “Jezu Krishti”. Në hallkën e dytë shkruani “Dishepujt: duke përfshirë Pjetrin, Jakobin dhe Gjonin”. Vazhdoni duke e shkruar në zinxhir emrin e çdo mbajtësi të priftërisë nga linja e autoritetit. Ndihmojini nxënësit të shohin se priftëria në Kishën sot është e njëjta priftëri që Shpëtimtari e përdori për të kryer mrekulli dhe për të bërë punën e Atit të Tij.

Moroni 2–6. Ordinancat e priftërisë

Nëse ju nevojitet t’i ndërthurni mësimet, merreni parasysh të jepni mësim nga Moroni 2–6, duke kërkuar ordinancat e priftërisë. Ftojini nxënësit të mendojnë se në cilat ordinanca kanë marrë pjesë dhe se si ordinancat i kanë ndihmuar ata të vijnë më pranë Shpëtimtarit. Më pas ata mund të marrin parasysh se cilat ordinanca do t’i përjetojnë në të ardhmen (sakramenti, ordinancat e tempullit, e me radhë) dhe se si mund të përgatiten për të marrë pjesë në to. Merreni parasysh të shqyrtoni te materiali Eja, Më Ndiq – Për Shtëpinë dhe Kishën: Libri i Mormonit 2024 pjesën e titulluar “Moroni 2–6: Ordinancat e priftërisë duhet të administrohen sikurse urdhëron Zoti”.

Moroni 2–3. Materiali filmik “Blessings of the Priesthood” [“Bekimet e Priftërisë”]

Ndërsa jepni mësim nga Moroni 2–3, merreni parasysh të shfaqni “Blessings of the Priesthood” [“Bekimet e Priftërisë”] (3:04), në të cilin Plaku Robert D. Hejls (1932–2017), i Kuorumit të Dymbëdhjetë Apostujve, shpjegon disa mënyra se si priftëria mund ta bekojë jetën tonë.