Môrônia 2–3

Fahefan’ny fisoronana

Zava-dehibe ao amin’ny Fiangonan’ny Mpamonjy ny fahefan’ny fisoronana avy amin’ Andriamanitra. Tamin’ny sasany tamin’ny tenin’i Môrônia farany ho an’ny taranaka ho avy, izy dia nampianatra momba ny fahefana hanatanterahana ôrdônansin’ny fisoronana. Tamin’ny fanaovana izany izy dia nitahiry fahamarinana manan-danja momba ny fomba ampiasana ny fisoronana. Ity lesona ity dia afaka manampy anao hahatakatra ny fahefan’ny fisoronana ao amin’ny Fiangonan’ny Mpamonjy.

Ampio ny mpianatra hifantoka amin’i Jesoa Kristy. Saintsaino ny fomba ampianaran’ny soratra masina fitsipika izay manampy antsika hahatakatra tsara kokoa ny Mpamonjy. Asao ny mpianatra hitady ny zavatra azon’izy ireo ianarana momba ny hery, famindrampo ary ny fitaoman’i Jesoa Kristy avy amin’ny fitsipika hitan’izy ireo ao amin’ny soratra masina.

Fanomanana ny mpianatra: Hevero ny hanasa ny mpianatra hiresaka amina mpihazona fisoronana iray na olona iray izay manompo amina antso ao amin’ny Fiangonana. Azon’ny mpianatra atao ny manontany izany olona izany ny fahatsapany momba ny fandraisana ny fahefan’ny Mpamonjy mba hanatanterahana ny andraikiny.

Sahanasa fianarana azo atao

Alohan’ny fotoam-pianarana, dia manafena zavatra iray hoilainareo mandritra ny lesona, toy ny tsaoka, marqueurs, na ny soratra masinao. Asao ny mpianatra hitady ilay zavatra ary anontanio ny antony ilana izany amin’ny lesona.

Ampahatsiahivo ny mpianatra fa fahamarinana tsotra sady sarobidy maro no very nandritra ny Apôstazia Lehibe (jereo ny 1 Nefia 13:26–27, 32). Ireo asa soratr’i Môrônia dia mampianatra fahamarinana manan-danja momba ny lamina ao amin’ny Fiangonan’ny Mpamonjy izay very nandritra ny Apôstazia.

“Misy lanjany”

I Môrônia dia iray tamin’ireo mpihazona fisoronana farany tamin’ny fotoampitantanany tany amin’ny kaontinanta amerikana. Fantany fa rehefa maty izy, dia ho very ny fahalalana manan-danja momba ny Fiangonan’ny Mpamonjy sy ny fahefan’ny fisoronany. Tamin’ny sasany tamin’ny teniny farany, i Môrônia dia nanoratra ny zavatra izay tsapany fa mety “hisy lanjany” amin’ny taranaka ho avy (Moroni 1:4). Nanoratra momba ny fahefan’ny fisoronana sy ôrdônansy izay tsy misy afa-tsy ao amin’ny Fiangonan’ny Mpamonjy ihany izy.

Rehefa namangy ny Nefita ilay Mpamonjy nitsangana tamin’ny maty dia “nokasihiny tamin’ny tanany ny mpianatra tsirairay izay efa nofinidiny” ary “nomeny fahefana izy ireo hanome ny Fanahy Masina” (3 Nefia 18:36–37). Nampidirin’i Môrônia tao amin’ny rakitsorany ny torolalana sasantsasany nomen’ny Mpamonjy ireo mpianatra Nefita roa ambin’ny folo mikasika ny fomba fanomezana ny fanomezan’ny Fanahy Masina.

Mba hampitomboana ny fiaraha-miasan’ny mpianatra, dia hevero ny hanasa ny mpianatra hiasa miaraka amina mpiara-mianatra iray na anatina vondrona kely amin’ity sahanasa manaraka ity. Azon’ny mpianatra atao ny mandalina na ny Môrônia 2 na ny 3 ary avy eo dia mizara ny zavatra nianaran’izy ireo amin’ny olona iray izay nandalina ny toko hafa. Azo omena ity fampahalalana manaraka ity mba hitarihana ny mpianatra amin’ny fandalinan’izy ireo.

Fahefana hanome ny fanomezana ny Fanahy Masina

Vakio ny Môrônia 2:1–3, hitadiavana ny zavatra izay misy lanjany nampianarin’i Môrônia.

• Inona no hitanao tao amin’ireo andininy ireo ka tsapanao fa misy lanjany?

• Avy amin’ny zavatra efa fantatrao, inona no fahefan’ny fisoronana tsy maintsy ilaina mba hanomezana ny fanomezan’ny Fanahy Masina?

• Inona no fahamarinana azontsika ianarana avy amin’ny Môrônia 2?

Fahamarinana iray ny hoe Ny mpihazona fisoronana Melkizedeka dia manome ny fanomezana ny Fanahy Masina amin’ireo mpikamban’ny Fiangonana vita batisa, amin’ny alalan’ny fametrahan-tanana.

• Nahoana, araka ny eritreritrao, no zava-dehibe ny fanomezana ny Fanahy Masina? (Mba hahitana tantara izay maneho izany, dia azonao vakina ny Asa 8:14–24.)

• Inona no fiatraikan’ ny fahalalana fa ny fahefana hanome ny fanomezana ny Fanahy Masina dia avy amin’ny fitaoman’ny Mpamonjy, amin’ny fihetseham-ponao momba ilay fanomezana?

• Ahoana no nitahian’ny fanomezana ny Fanahy Masina ny fiainanao?

Manendry ny hafa amina anjara fanompoana ao amin’ny fisoronana

Avy eo i Môrônia dia nanazava ny fomba fanendrena mpisorona sy mpampianatra.

Vakio ny Môrônia 3:1–4, hitadiavana ny fomba nanendrena ny olona ho amina anjara fanompoana ao amin’ny fisoronana.

• Inona no voamarikao momba ny fomba anendrena ny isam-batan’olona ho amina anjara fanompoana ao amin’ny fisoronana?

Azon’ny mpianatra atao ny mamaky sy mandrohy ny Fanekem-pinoana 1:5 amin’ny Môrônia 3.

Na dia miresaka manokana ny fanendrena ho amina anjara fanompoam-pisoronan’ny mpisorona sy mpampianatra aza ny Môrônia 3, ny fahefana dia mihatra ihany koa amin’ny rehetra izay mihazona antso ao amin’ny Fiangonan’ny Mpamonjy.

• Nahoana no tsy maintsy ilain’ny isam-batan’olona izay manompo ao amin’ny Fiangonan’ny Tompo ny manana fahefana?

Raha azo atao dia mitondrà fitohizam-pahefan’ ny fisoronana ao an-dakilasy.

Avy amin’i Jesoa Kristy ny fahefan’ny fisoronana. Na dia manana fahefan’ny fisoronana aza ny rehetra izay mihazona antso ao amin’ny Fiangonana, ireo izay voatendry ho amin’ny Fisoronana Aharôna na Melkizedeka dia manana fitohizam-pahefan’ ny fisoronana. Io fitohizana io dia manoritra ny fahefan’ny mpihazona fisoronana amin’i Jesoa Kristy. Ny mpihazona fisoronana Melkizedeka dia afaka mangataka rakitsoratry ny fitohizam-pahefan’izy ireo ao amin’ny ChurchofJesusChrist.org. Tsy manome taratasy mirakitra ny fitohizam-pahefana ho an’ny mpihazona ny Fisoronana Aharôna ny Fiangonana. Kanefa raha natokana tamin’ny alalan’ny mpihazona ny Fisoronana Melkizedeka ny mpihazona ny Fisoronana Aharôna iray dia mety ho afaka hianatra mikasika ny fitohizam-pahefan’ilay lehilahy nanokana azy izy.

Nanazava toy izao ny Loholona Jeffrey R. Holland ao amin’ny Kôlejin’ny Apôstôly Roambinifolo:

Mitaky zavatra bebe kokoa noho ny fifanarahana tsotra eo amin’ny olona ny fanaovana asa miaraka amin’ny herin’ Andriamanitra. Tsy afaka hivoaka avy amin’ny fiofanana ara-teôlôjia na asa ampiandraiketina avy amin’ny mpiangona izany. Tsia, mila hery lehibe kokoa noho izay efa ananan’ny olona any amin’ny dabiliom-piangonana na eny an-dalana na any amin’ny amin’ny toerana fiofanana ho mpitondra fivavahana izany—toe-javatra iray izay efa fantatr’ireo mpitondra fivavahana mahitsy fo aman-tsaina sy eken’izy ireo malalaka tao anatin’ireo taranaka maro nifandimby ka tonga tany amin’ny Famerenana amin’ny laoniny. …

… [Ny fitohizam-pahefan’ny fisoronan’ny mpihazona fisoronana tsirairay ao amin’ny Fiangonana] dia miverina amina rojo tsy tapaka hatrany amina mpanompo anjely izay avy amin’ny Zanak’ Andriamanitra Izy Tenany, nitondra io fanomezana tsy manan-tsahala io avy any an-danitra. (Jeffrey R. Holland, “Notre trait le plus caractéristique [Ny lafin-javatra mampiavaka antsika indrindra],” Liahona, mai 2005, 44)

Hevero ny hampiseho rojo amin’ny mpianatra. Hazavao fa ny masom-by voalohany amin’ilay rojo dia maneho an’i Jesoa Kristy ary ny masom-by faharoa dia maneho ireo izay notendreny ho amin’ny fisoronana. Ny masom-by fahatelo dia maneho ireo izay notendren’izy ireo ary toy izany hatrany hatrany, nanomboka tamin’ny taranaka nifandimby hatramin’ny mpihazona fisoronana ankehitriny, izay asehon’ny masom-by farany amin’ilay rojo.

• Nahoana no manan-danja ny hoe azo fantarina hatrany amin’i Jesoa Kristy ny fiavian’ny fahefan’ny fisoronana?

• Ahoana no ahafahan’ny fahafantarana io fifandraisana amin’i Jesoa Kristy io miantraika amin’ny fahatsapanao momba ny ôrdônansy, antso, na fitahiana raisinao amin’ny alalan’ny fisoronana?

Azon’ny mpianatra atao ny manao tatitra momba ny sahanasa fiomananana ho amin’ny fotoam-pianarana.

Azon’ny mpianatra averina jerena ihany koa ny Môrônia 2 sy ny 3, hitadiavana fitovitoviana eo amin’ny toko sy hitaterana ny zavatra hitan’izy ireo.

Zarao ny zavatra izay nianaranao

Raha toa ka hanampy ny mpianatra ny maneho ny fahatakaran’izy ireo ny zavatra nohalalinin’izy ireo tao amin’ny Môrônia 2–3, dia hevero ny hifanakalo hevitra momba ity rafi-tantara manaraka ity.

Alaovy sary an-tsaina hoe manana olona iray ao amin’ny fianakaviana izay handeha hatao batisa sy horaisina ho mpikambana, hotendrena ho amin’ny fisoronana na hatokana ho amina antso, ianao. Inona no azonao zaraina amin’izy ireo avy ao amin’ny Môrônia 2 na 3 mba hanampiana azy ireo hahatakatra ny lanjan’ilay tranga?

Fanazavana sy fampahalalana avy amin’ny zava-miseho

Inona no ataon’ny fisoronana ho antsika?

Nilaza toy izao ny Filoha Dieter F. Uchtdorf, izay tao amin’ny Fiadidiana Voalohany tamin’izany:

Fantatsika rehetra fa ny fisoronana dia mihoatra lavitra noho ny fiantsoana fotsiny na anarana. Nampianatra ny Mpaminany Joseph Smith fa “Ny Fisoronana dia fitsipika mandrakizay, ary efa nisy niaraka tamin’Andriamanitra hatramin’izay, … ka ho mandrakizay, tsy nisy fiantombohany na fiafarany” [Enseignements des Présidents de l’Église: Joseph Smith (2007), 104]. Mihazona “ny fanalahidin’ny fahalalana an’ Andriamanitra” izany [Fotopampianarana sy Fanekempihavanana 84:19]. Raha ny marina, amin’ny alalan’ny fisoronana no hisehoan’ny “herin’ny toetra araka an’ Andriamanitra” [Fotopampianarana sy Fanekempihavanana 84:20].

Tsy takatry ny saintsika ny fitahiana avy amin’ny fisoronana. Afaka ny ho “tonga … nofinidin’ Andriamanitra” ireo mpihazona ny Fisoronana Melkizedeka mahatoky [Fotopampianarana sy Fanekempihavanana 84:34]. Ho “hamasinin’ny Fanahy ho fanavaozana ny vatany” izy ireo[Fotopampianarana sy Fanekempihavanana 84:33] ary ny faran’izay ambony indrindra dia ny mandray “izay rehetra ananan’ny Ray” [Fotopampianarana sy Fanekempihavanana 84:38]. Na dia sarotra takarina aza izany kanefa dia mahafinaritra ary dia mijoro ho vavolombelona aho fa marina izany. (Dieter F. Uchtdorf, “Ny Tokony hahatongavanareo, ny tombontsoanareo,” Liahona, mey 2011, 58)

Iza no afaka miaina ireo fitahian’ny fisoronana?

Nilaza toy izao ny Filoha Dallin H. Oaks ao amin’ny Fiadidiana Voalohany:

Tsy mba toy ny fanalahidin’ny fisoronana sy ny fanendrena ao amin’ny fisoronana fa ireo fitahiana entin’ny fisoronana dia natao ho an’ny vehivavy sy ny lehilahy araka ny fepetra mitovy. Ny fanomezana ny Fanahy Masina sy ireo fitahiana entin’ny tempoly dia endrika mahazatra antsika maneho io fahamarinana io. (Dallin H. Oaks, “Ny fanalahidy sy ny fahefan’ny fisoronana,” Liahona, mey 2014, 52)

Sahanasa fianarana fanampiny

Anjara fanompoana amin’ny fisoronana

Alohan’ny hamantarana ny fahamarinana ao amin’ny Môrônia 2, dia azon’ny mpianatra atao ny manao lisitra eny amin’ny solaitrabe ireo anjara fanompoan’ny Fisoronana Aharôna sy Melkizedeka ary manisy marika eo akaikin’ireo izay afaka manome ny fanomezana ny Fanahy Masina. Anontanio ny mpianatra ny fomba ahafantarantsika izany. Avy eo dia azon’ny mpianatra atao ny mampiasa lisitra manaraka ny abidia mba hahitana andininy izay mampianatra izany. Raha ilaina dia omeo andininy vitsivitsy izy ireo (jereo ny Fotopampianarana sy Fanekempihavanana 20:38, 41, 43; 107:18).

Fitohizam-pahefan’ny fisoronana

Alohan’ny fotoam-pianarana, dia miomana hitondra rakitsoratra iray momba ny fitohizam-pahefan’ny fisoronan’ny olona iray ao amin’ny fianakavianao na ny paroasinao na sampana misy anao ary zarao amin’ny kilasy izany. Hevero ny hanao rojo taratasy. Soraty eo amin’ny masom-by voalohany ny anarana hoe “Jesoa Kristy”. Eo amin’ny masom-by faharoa, soraty ny hoe “Mpianatra: anisan’izany i Petera, i Jakoba, ary i Jaona”. Manohiza manoratra ny anaran’ny mpihazona fisoronana tsirairay avy ao amin’ilay fitohizam-pahefana eo amin’ilay rojo. Ampio ny mpianatra hahita fa ny fisoronana ao amin’ny Fiangonana ankehitriny dia tsisy hafa amin’ilay nampiasain’ny Mpamonjy mba hanaovana fahagagana sy hanaovana ny asan’ny Rainy.

Môrônia 2–6. Ôrdônansin’ny fisoronana

Raha mila manambatra lesona ianao, dia hevero ny hampianatra ny Môrônia 2–6, hitadiavana ôrdônansin’ny fisoronana. Asao ny mpianatra hieritreritra ôrdônansy nandraisan’izy ireo anjara sy ny fomba nanampian’izany ôrdônansy izany azy ireo hanakaiky kokoa ny Mpamonjy. Avy eo dia azon’izy ireo saintsainina hoe inona ny ôrdônansy horaisin’izy ireo amin’ny hoavy (ny fanasan’ny Tompo, ny ôrdônansin’ny tempoly, sy ny sisa) sy ny fomba ahafahan’izy ireo miomana handray anjara amin’izany. Hevero ny hamerina hijery ny fizaràna ao amin’ny Avia, hanaraka Ahy—Ho an’ny ao an-tokantrano sy ao am-piangonana: Bokin’i Môrmôna 2024 mitondra ny lohateny hoe “Môrônia 2–6: Tsy maintsy tanterahina araka ny nandidian’ny Tompo azy ireo ôrdônansin’ny fisoronana.”

Môrônia 2–3. Horonan-tsary “Blessings of the Priesthood [Ireo fitahiana entin’ny Fisoronana]”

Rehefa mampianatra avy ao amin’ny Môrônia 2–3 ianao, dia hevero ny handefa ny “Blessings of the Priesthood [Ireo fitahiana entin’ny Fisoronana]” (3:04), izay anazavan’ny Loholona Robert D. Hales (1932–2017) fomba maromaro ahafahan’ny fisoronana mitahy ny fiainantsika.