Моронай 7:1–19

“Христийн гэрлээр шаргуу судлах”

Заримдаа юу нь зөв, юу нь буруу болохыг мэдэхэд хэцүү байдаг. Гэсэн хэдий ч Бурхан бидэнд тусламж үзүүлдэг. Моронай аавынхаа үгсийг ашиглан, биднийг сайныг муугаас ялгахын тулд Христийн гэрлийг ашиглахад урамшуулан дэмжсэн. Энэ хичээл сайн, мууг ялган шүүхдээ Есүс Христэд найдахад тусална.

Суралцагчдыг сайн мэдээний зарчмын талаар гүнзгий бодоход урамшуулан дэмж. Судруудыг анхааралтай судлах нь суралцагчдыг сайн мэдээний зарчмууд тэдний амьдралд хэрхэн нөлөөлдгийг санахад урамшуулж чадна. Суралцагчдыг Есүс Христэд илүү ойртоход тусалсан өнгөрсөн үеийн туршлагуудаа эргэн дурсахад урь.

Суралцагчийн бэлтгэл: Суралцагчдыг Есүс Христэд итгэх итгэл үнэмшил нь тэдний сонголтод хэрхэн нөлөөлдгийг хуваалцахаар бэлдэж ирэхэд урь.

Боломжит суралцах үйл ажиллагаа

Аль дөрвөлжин нь илүү цайвар байна вэ?

Дараах зургийг харуулан хичээлийг эхлүүл. Суралцагчдыг хоёр саарал дөрвөлжин рүү хараад, аль нь илүү цайвар байгааг хамтрагчдаа хэлэхэд урь.

Хоёр саарал дөрвөлжин хоёулаа ижил өнгөтэйг мэдэх нь таныг гайхшируулах болов уу? Цагаан болон хараар хүрээлэгдсэн учир таны тархи хоёр саарал дөрвөлжнийг өөр өөр өнгөтэйгөөр харж байна.

Дараах догол мөрийг уншихаас илүүтэй суралцагчдыг Исаиа 5:20-ийг уншихад урьж, тэднээс дөрвөлжний хуурмаг үзэгдлийг Исаиагийн өнөө үеийн тухай бошиглолтой харьцуулахыг хүс.

Энэ хуурмаг үзэгдэлтэй адил, зөв шүүлт гаргахад хэцүү нөхцөл байдлууд байдаг. Исаиа хожмын өдрүүдэд зарим хүн “сайныг муу гэх, мууг сайн гэх; [мөн] гэрлийг харанхуйгаар, харанхуйг гэрлээр орлуулах” болно (Исаиа 5:20; мөн 2 Нифай 15:20-ийг үзнэ үү) гэж бошиглосон.

Исаиагийн бошиглол энэ цаг үед биелж байгааг хэрхэн харж байгаа талаараа бодоход нь суралцагчдад туслахын тулд эдгээр асуултаас нэгийг юм уу олныг суралцагчидтай хамт хэлэлц.

• Өнөөгийн цаг үед хүмүүс “сайныг муу гэх, мууг сайн гэхийг” харж байсан ямар тохиолдлууд байдаг вэ?

• Хэн нэгэнд үнэнийг амархан эсвэл ойлгомжтой харахад юу саад болдог вэ?

Суралцагчдыг дараах асуултын хариултыг чимээгүйхэн тунгаан бодоход урь.

• Та ямар нэгэн зүйлийг зөв үү, буруу юу гэдгийг яаж тодорхойлох вэ?

• Та сайныг муугаас ялгаж чадна гэдэгтээ хэр итгэлтэй байна вэ? Яагаад?

Сайн эсвэл муу болохыг нь тодорхой ялгахыг хүсэж буй зүйлийн талаар бод. Жишээлбэл: Хэн нэгэн өөрийн сонгож буй хөгжмийг зүгээр гэж бодож байвч эцэг эх нь санал нийлэхгүй байж магадгүй. Хэнийх нь зөв бэ? Бусад жишээ нь нийгмийн асуудалд ямар байр суурьтай байхаа шийдэх, хэнтэй нөхөрлөхөө сонгох, хоббитой болох зэрэг байж болно.

Та энэ хичээлийг судалж байхдаа аливааг сайн эсвэл муу зүйл болохыг мэдэхэд юу тусалж чадахыг олж мэдээрэй.

Сайн, муугийн ялгаа

Исаиагийн адил Моронай ч мөн өнөөгийн цаг үеийг харсан (Мормон 8:35-ыг үзнэ үү). Тэрээр Мормоны Номд бидэнд зориулан тусламж болох зүйл оруулжээ. Сайн үйлийг чин сэтгэлээсээ үйлдэхийн ач холбогдлыг заасны дараа (Моронай 7:1–11-ийг үзнэ үү), тэрээр эцэг Мормоныхоо Сүмийн гишүүдэд сайн болон мууг шүүх талаар заасан үгсийг цэдэглэжээ.

Моронай 7:12–17-г уншаад, доорх сэдэл бүрээс олсон зүйлээ тэмдэглэж авахыг бодож үз. Үүнд:

1. Ямар нэгэн зүйл сайн гэдгийг бид хэрхэн мэдэх

2. Ямар нэгэн зүйл муу гэдгийг бид хэрхэн мэдэх

3. Аврагч бидэнд туслахын тулд юу хийдэг

Хэрэв та үүнийг үр дүнтэй гэж үзвэл дээрх гурван сэдлийг самбарт бичин, суралцагчдыг олж нээсэн тохирох үг хэллэгээ тус бүрийн доор бичихэд урь.

• Эдгээр шүлгээс олсон зүйлс дээрээ үндэслэн та хэлэлцсэн зарчмуудаа хэрхэн дүгнэх вэ?

Моронай 7:12–17-оос бид Бурханаас ирсэн бүх зүйл биднийг сайныг үйлдэж, Есүс Христэд итгэхэд мөн Бурханыг хайрлаж, түүнд үйлчлэхэд урьдаг гэдгийг мэдэж авч болно. Нөгөөтээгүүр, хилэнц биднийг нүгэл үйлдэж, Есүс Христийг үгүйсгэж, Бурханы эсрэг тэмцэхэд ятгадаг.

Суралцагчид дараах үйл ажиллагааг ганцаараа, жижиг бүлгээр эсвэл ангиараа гүйцэтгэж болно.

Мормоны сургаалыг ойлгоход тань туслахын тулд, хэн нэг хүн сонсдог хөгжим болон утсаа ашиглаж буй байдлаа мөн бусад технологийг зүгээр гэж боддог ч эцэг эх эсвэл удирдагч нь түүнтэй санал нийлдэггүй гэж бодъё.

• Таны саяхан тодорхойлсон үнэнүүд дээр тулгуурлан, энэ хүн өөрийнх нь хөгжим болон технологийн хэрэглээ сайн уу, үгүй юу гэдгийг олж мэдэхийн тулд өөрөөсөө юу гэж асууж болох вэ?

Суралцагчдын хариултыг сонсож, самбар дээр бич. Хэрэв суралцагчид дурдаагүй бол дараах жишээнүүдийг ашиглаарай.

• Энэ хөгжмийг сонсох нь эсвэл утас болон технологийг ашиглаж байгаа байдал маань …

  • … миний оюун санааг сайн үйлүүдээр эсвэл нүгэл үйлдэх бодлуудаар дүүргэдэг үү?

  • … намайг Есүс Христийн дагагчийн хийх ёстой эсвэл хийх ёсгүй зүйлсийг хийхэд урамшуулан дэмждэг үү?

  • … Бурханы зүйлсийг хайрлахад надад тусалдаг уу үгүй юу?

Та тодорхой уран бүтээлчийг эсвэл дууг, түүнчлэн тодорхой аппликэйшн, тоглоом эсвэл медиаг нэг бүрчлэн тунгаан бодох хэрэгтэй болж магадгүйг анхаар. Үүнээс гадна таны ямар нэг үйл ажиллагаанд зарцуулж буй цаг хугацаа анхаарах чухал хүчин зүйл байж ч болох юм.

Харахад туслах гэрэл

Зарим тохиолдолд сайн, мууг шүүхэд хэцүү байдгийг та анзаарсан байх.

Дараах догол мөр дэх суралцагчдаас төсөөлөхийг хүссэн зүйлийг бодитоор мэдрэхэд нь тэдэнд тусал.

Үүнийг гэрлээ унтрааж байгаад, суралцагчдаас зургийг дүрсэлж хэлэхийг эсвэл ямар нэг зүйл унших гэж хичээхийг хүс. Дараа нь гэрлээ асааж, тэднийг дахин дүрсэлж хэлэхэд эсвэл уншихад урь.

Ийн төсөөлж бодохдоо 16-р шүлэг дэх Аврагчийн хэрхэн бидэнд тусалж байгааг харуулсан үг хэллэгүүдийг анхаарч үз.

Христийн гэрлийг ойлгоход тань туслах Тэргүүн зөвлөлийн ерөнхийлөгч Хэнри Б.Айрингийн дараах мэдэгдлийг уншина уу.

Энэ дэлхий дээр төрж буй Тэнгэрлэг Эцэгийн хүүхэд бүрд Христийн гэрлийг бэлэг болгон өгдөг билээ. Та нар үүнийг мэдэрсэн. Энэ бол юу зөв, юу буруу, юу үнэн, юу худал гэдгийг мэдрэх мэдрэмж байсан юм. Энэ нь таныг энэ амьдрал дахь аяллаа эхлэх үеэс л тантай хамт байсан. …

… Та нар өдөр бүр бараг цаг тутам уг гэрэлд алхахыг эсвэл уг гэрлээс холдож харанхуй руу алхахыг сонгож байдаг. (Henry B. Eyring, “Walk in the Light,” Liahona, May 2008, 123–124)

• Та Христийн гэрлийн талаар юу сурсан бэ?

Христийн гэрлийн талаар илүү дэлгэрэнгүй мэдээлэл авахын тулд topics.ChurchofJesusChrist.org дээрх Сайн мэдээний сэдвүүдээс “Христийн гэрэл”-ийг үзнэ үү.

Моронай 7:18–19-ийг уншаад, сайн болон мууг шүүх тухай Мормоны өгсөн нэмэлт зөвлөгөөг олж мэд.

• “Христийн гэрлээр шаргуу судлах” гэдгийг ямар утгатай гэж та бодож байна вэ?

  Суралцагчдын хариултыг анхааралтай сонс. Суралцагчид чимээгүй тунгаан бодох, шийдвэр гаргах замаар бодох, далд ухамсар эсвэл дотоод дуу хоолойгоо сонсох зэргийг дурдаж болох юм. Өөр нэг санаа бол биднийг Есүс Христэд ойртуулдаг зүйлсийн талаар бодох явдал юм. Хэрэгтэй бол дараах асуултуудаас заримыг нь асуу.

• Аврагчийн жишээ, сургаалууд хэрхэн өнөө цагт бидэнд сайн, мууг зөвөөр шүүхэд туслах гэрэл болох вэ?

• Бидэнд Түүний үгийг сонсож, биднийг удирдан чиглүүлж буй нөлөөг нь мэдрэх өөр ямар арга замууд байна вэ?

“Та өөрийн амьдрал дахь Христийн гэрлийн ачаар хэзээ ямар нэг зүйлийг сайн эсвэл муу гэж таньж чадсан бэ?” хэмээн асуух нь тустай байж болох юм.

Сурч мэдсэн зүйлээ хэрэгжүүлэх

Хичээлийн эхэнд сайн эсвэл муу болохыг нь тодорхой ялгахыг хүсэж буй зүйлийн талаар бодохыг хүсэх үед бодсон нөхцөл байдлаа эргэн сана. Тус зүйлээ зөв эсвэл буруу болохыг тодорхойлохдоо өнөөдөр сурсан зарчмуудаа хэрхэн ашиглах талаар залбирч байгаад тунгаан бодоход хэдэн минут зарцуул. Нөхцөл байдлыг тунгаан бодох үедээ Христийн гэрлээр шаргуу судлахыг хичээ. Бодол санаагаа судлах тэмдэглэлдээ бичиж тэмдэглэ.

Суралцагчид юу сурсан талаараа хэлэлцэж хичээлээ дуусгахдаа дараах асуултуудыг ашиглаж болно.

• Та өнөөдөр зөв, буруугаас сонгох чадварыг тань сайжруулахад туслах юуг сурч мэдсэн бэ?

• Амьдралын аль хоёр, гурван салбарт сайныг муугаас амжилттай ялгах шаардлагатай гэж та харж байна вэ? Яагаад?

Тайлбар ба нөхцөл байдлын талаарх мэдээлэл

Христийн гэрэл юу хийдэг вэ?

Далын ахлагч Тимоти Ж.Дайкэс ийн заасан.

Бурхан “дэлхийд ирдэг” [Сургаал ба Гэрээ 93:2] хүн бүрийг “сайныг хилэнцтээс ялган мэдэж,” [Моронай 7:16] “үргэлж сайныг үйлдэхэд” [Моронай 7:13] өдөөгдөөсэй гэсэндээ Христийн гэрлийг Өөрийн төгс хайраар өгдөг. Тэрхүү гэрэл нь бидний ухамсар гэж ихэнхдээ нэрлэдэг тэр зүйлээр дамжуулан өөрийгөө илчилж, биднийг ямагт илүү сайн үйл хийхийг мөн хамгийн сайнаараа байх хүслийг өдөөж өгч байдаг. (Тимоти Ж.Дайкэс, “Гэрэл гэрэлтэй нэгдэн нийлдэг,” 2021 оны 4-р сарын Ерөнхий чуулган, 117)

Христийн гэрэл бидэнд болон бусдад хэрхэн тусалдаг вэ?

Далын ахлагч Марк А.Брагг ийн заасан.

Христийн гэрэл бидэнд бусдыг Аврагчийн мэлмийгээр харахад тусалдаг. Бид бусдын зовлон бэрхшээлийг илүү сайн ойлгож, тэднийг илүү их хайрлах болно. Энэ нь бидний адил шүтэн биширч, үйлчилдэггүй хүмүүст тэвчээртэй хандахад тусалдаг. Энэ нь аз жаргалын агуу төлөвлөгөөг илүү бүрэн дүүрэн ойлгож, өөрсдийгөө уг агуу, хайраар дүүрэн төлөвлөгөөнд хэрхэн багтдагаа мэдэхэд тусалдаг. Энэ нь бидний хийж буй бүх зүйлд амь амьдрал, утга учир, зорилго чиглүүлэг өгдөг. (Марк А.Брагг, “Төгс өдрийг хүртэл улам улам хурц болон өсөх болно,” 2017 оны 4-р сарын Ерөнхий чуулган, 22–24)

Нэмэлт суралцах үйл ажиллагаа

Өөр эхлэл

Хот эсвэл байшингийн зураг харуул, дараа нь урвуу харуулж тавь.

Суралцагчдад Далын ахлагч Ричард Ж.Мэйнс манай орчин үеийн ертөнцийг “урвуу харсан” юм шиг гэж хэлсэн гэдгийг хэл (“ A Celestial Connection to Your Teenage Years,” Liahona, Nov. 1997, 30). Суралцагчдыг Исаиа 5:20–21-ийг уншаад, манай дэлхийн урвуу харж байж болох арга замуудыг хуваалцахад урь.

Ахлагч Мэйнсийн дараах мэдэгдлийг хуваалцана уу.

“Залуучууд энэ урвуу харсан дэлхийд өсөж томрох тусам орчин үеийн амьдралын олон янзын дарамт шахалттай нүүр тулах яггүй сорилттой тулгарч байна” (Richard J. Maynes, “A Celestial Connection to Your Teenage Years,” Liahona, Nov. 1997, 30).

Моронай 7:5–12. Чин сэтгэлээсээ

Суралцагчдыг дараах асуултуудад хариулахад урь. “Сайн үйл хийхийг хичээх үед бидний чин сэтгэл хэр чухал вэ? Яагаад?” Суралцагчид Моронай 7:5–12-ыг уншаад, эдгээр асуултын хариултыг олж мэдэж болно. Есүс Христийг дагах бидний амлалт эсвэл үүний дутагдалтай байдлыг тодорхойлж чадах “чин сэтгэл,” “дургүйгээр” зэрэг үг хэллэгийг ойлгоход нь суралцагчдад тусал. Тэднийг хэн нэгний дараах зүйлсийг чин сэтгэлээсээ хийж чадах арга замуудыг дүрслэн хэлэхэд урь. Үүнд: Залбирах, сүмд очих, бусдад үйлчлэх. Мөн одоогоор чин сэтгэл байхгүй бол үүнийг хайж олохын тулд юу хийж болохыг хэн нэгэнтэй хуваалцахад тэднийг урь.

Хэн нэгэнд буруу, зөвийг таньж мэдэхэд туслах

Суралцагчдыг Өсвөр үеийнхний бат бөх байдлын төлөө сэтгүүл дээрх “Асуулт, хариулт” хэсэгт дараах асуулт байна гэж төсөөлөхөд урь.

“Аль нь зөв, аль нь бурууг хэлэхэд амархан байх ёстой гэдгийг би мэднэ, ихэнх цаг үед би ялгаж чаддаг. Хэдий тийм ч заримдаа манай найзууд хийж буй зүйлдээ итгэх мөн хийх хангалттай сайн шалтгаантай байдаг. Сайн, муугийн зураас үргэлж тодорхой харагдахгүй байх үед би юу нь сайн, юу нь муу болохыг хэрхэн мэдэх вэ?”

Суралцагчдыг энэ асуултын хариултыг бичихэд урь. Моронай 7:12–19-ийг болон нэмэлт судрууд эсвэл энэ сэдвийн дагуух бошиглолын сургаалуудыг судлах цагийг суралцагчдад гаргаж өг.