“Моронай 7:20–43: Христээс найдвар олох,’” Мормоны Номын багшийн гарын авлага (2024)
“Моронай 7:20–43,” Мормоны Номын багшийн гарын авлага
Моронай 7:20–43
Христээс найдвар олох
Танд амьдралдаа илүү их найдвар мэдрэх шаардлага гарч байсан уу? Хүмүүс нь устгагдсаны дараа олон жил ганцаар хэрэн хэсүүчилсэн Моронай бидний Христ дотор ирэх ирээдүйд тохиох агуу зүйлсийн тухай аавынхаа үгсийг цэдэглэжээ. Энэ хичээл Есүс Христээр дамжуулан итгэл найдвараа нэмэгдүүлэхэд танд тусална.
Суралцагчдад амьдралд нь нөлөөлөх Аврагчийн нөлөөг таньж мэдэхэд тусал. Судруудад цэдэглэсэн Аврагчийн урам зориг өгөх хүч, нигүүлслийг онцлон харуулах боломжуудыг олж мэд. Есүс Христ хэрхэн тэдний хүнд ачааг хөнгөлж, хэцүү бэрхийг тэсвэрлэхэд тусалсан талаар тунгаан бодоход суралцагчдыг урь. Тэднийг Тэнгэрлэг Эцэг, Есүс Христ хоёрт итгэл тээн ирэхэд урамшуулан дэмж.
Суралцагчийн бэлтгэл: Суралцагчдыг 1 Петр 3:15-ыг уншаад, Есүс Христ тэдэнд хэрхэн итгэл найдвар өгдгийг тунгаан бодоход урь.
Боломжит суралцах үйл ажиллагаа
Сайн зүйл болгоноос зууран барь
Боломжтой бол суралцагчдын авахыг хүсэх эсвэл авахыг хүсэхгүй байх зүйлсийг ширээн дээр тавьж бэлд (Жишээ нь: Ширээн дээр зарим амттай зууш, түүнчлэн муудсан хүнсний ногоо, хоосон чихрийн цаас ч байж болно). Эхлэхдээ суралцагчдыг гарч ирээд, сонгосон нэг зүйлээ “барьж” үзэхэд урь. Тэднээс яагаад үүнийг сонгосныг мөн үүнийгээ “сайн зүйл” гэж ангилах эсэхийг асуу.
Моронай 7-д Мормон өөрийн хүмүүст хэрхэн “сайн юм болгоноос барьж” (21-р шүлэг) авахыг мэдэхэд нь туслахыг хүссэн гэж хэлсэн.
-
Мормон “сайн зүйл” гэсэн үг хэллэгийг ашиглахдаа юутай зүйрлэж хэлсэн гэж та бодож байна вэ?
-
Таны энэ эсвэл дараагийн амьдралдаа барьж үлдэхийг эсвэл хүлээн авахыг хүссэн сүнслэг болоод мөнхийн “сайн зүйл” юу вэ?
Та Моронай 7:12–19-д Мормон бүхий л сайн зүйл Есүс Христээс ирдэг хэмээн заасныг санах байх. Моронай 7:20–26-г уншаад, эдгээр сайн зүйлийг Христээс хэрхэн хүлээн авах тухай Мормон юу заасныг олж мэд.
-
Та юу олж мэдсэн бэ?
Шаардлагатай бол, Мормон биднийг Есүс Христэд итгэх хэрэгтэй гэдгийг онцлон тэмдэглэсэн болохыг тайлбарла. Тэнгэрлэг Эцэг биднийг Христэд итгэхэд туслахын тулд Хүүгийнхээ талаар заахаар тэнгэр элч нарыг илгээсэн гэж Мормон заасан.
-
Тэнгэрлэг Эцэг Есүс Христийг дэлхийн Аврагч гэдгийг тунхаглахын тулд тэнгэр элч нарыг илгээсэн тухай ямар түүх таны санаанд орж байна вэ?
Зарим хариултад Адам, Ева хоёр дээр ирсэн тэнгэр элч нар (Мосе 5:6–9), Хаан Бенжамин (Мозая 3:1–11), хоньчид (Лук 2:10–12) зэрэг нь багтаж болох юм.
Найдварын утга учир
Найдварын талаарх Мормоны сургаалуудын тухай илүү ихийг мэдэхэд бэлтгэхийн тулд Арван хоёр төлөөлөгчийн чуулгын ахлагч Дийтр Ф.Угдорфын дараах түүхийг унш.
Намайг 12 нас хүрэхээс өмнө дайн дажин, улс төрийн зөрчилдөөнөөс болж манай гэр бүл хоёр ч удаа гэрээсээ дүрвэж; үймээн самуун, айдас хүйдэс, түгшүүрт байдал дунд амьдралаа дахин эхлэх хэрэгтэй болж байсан. Тэр үе бол миний хувьд түгшүүртэй үе байсан. …
Дэлхийн II дайны дараах тэр цөвүүн цаг үе дэлхийд маш том толбыг үлдээсэн. Би ч гэсэн толботой үлдсэн.
Тэр үед би туйлын ганцаардаж гунигласан үедээ “Хорвоо дэлхийд найдвар төрүүлэх ямар нэгэн зүйл үлдсэн болов уу?” гэж бодлогоширдог байлаа. (Дийтр Ф.Угдорф, “Бурхан бидний дунд,” 2021 оны 4-р сарын Ерөнхий чуулган, 5)
-
Өнөө үеийн хүмүүст найдварыг үгүйлж байгаагаа мэдрэх болсон зарим шалтгаан юу вэ?
Суралцагчдын хариултыг самбарт бичиж болно.
Ахлагч Угдорф “дэлхий эрээ цээргүй байдал, хорсол гуниг, үзэн ядалт, айдаст автаж байсан тэр үед “түүнийг найдвараар дүүргэсэн зүйл олсон” гэдгээ дурссан юм” (“Бурхан бидний дунд,” 2021 оны 4-р сарын Ерөнхий чуулган, 5).
Та амьдралдаа найдварыг үгүйлж байгаагаа мэдэрч байсан уу? Хамгийн хүнд нөхцөл байдалд орсон үед ч юу танд найдвар төрүүлсэн талаар бод. Та энэ хичээлийг үргэлжлүүлэн судлах явцдаа, таныг найдвараар дүүргэж чадах үнэнүүдийг олж мэд.
Мормон найдварын тухай заав
Моронай 7:40–44-ийг уншаад, бидний Есүс Христэд итгэх итгэл найдвартай хэрхэн холбогддогийг олж мэд.
Хэлэлцүүлгийн нэг хэсэг болгон, Мормон Христээс ирдэг бүх сайн зүйлээс зууран барихад энэрэл шаардлагатай гэдгийг бас заасан болохыг онцол. Энэрлийг дараагийн хичээл дээр дурдах болно.
-
Та 41-р шүлгийг хэрхэн өөрийн үгээр хураангуйлах вэ?
Мормоны сургаалаас суралцах үнэн
Хэрэв бид Есүс Христэд итгэх итгэлээ хөгжүүлэх юм бол Түүний Цагаатгалаар дамжуулан мөнх амьдралд босгогдох найдварыг олж авч чадна гэсэн нэг үнэнийг бид мэдэж авч чадна.
-
Есүс Христэд найдах гэдэг нь юу гэсэн утгатай гэж та бодож байна вэ?
Суралцагчдыг хариулах үед, энэ төрлийн найдвар нь дэлхийн хүсэл биш гэдгийг ойлгоход тэдэнд тусал. Есүс Христэд найдах найдвар нь бид эцсийн эцэст мөнх амьдралд тэнцэх болно гэсэн баталгаагаар дүүрэн байх ёстой.
-
Бид Есүс Христэд итгэх итгэлээ хөгжүүлж, найдахын тулд яагаад дөлгөөн эсвэл “хүлцэнгүй даруу мөн зүрх сэтгэлдээ номхон” (Моронай 7:43) байх шаардлагатай вэ?
Есүс Христэд итгэх замаар найдварыг олж авсан хүний жишээг харахын тулд дараах түүхүүдийн нэгийг үз. Ингэхдээ тухайн хүн хэрхэн Есүс Христээр дамжуулж найдвар мэдэрснийг олж мэд.
Дараах түүхүүдээс нэгийг сонгож ангийнхантай хуваалц эсвэл бүх түүхийг бэлэн болгоод, суралцагчдад аль түүхийг унших эсвэл үзэхийг сонгох боломж олго.
-
Алма 22:12–18 буюу хаан Лемонайн эцгийн талаарх түүхийг унш.
-
Алма 36:12–21-ийг унш эсвэл ChurchofJesusChrist.org дээрх “Alma Testifies to His Son Helaman (Алма хүү Хиламандаа гэрчилсэн нь)” видеог цагийн код 1:30-аас 2:32 хүртэл үз.
-
ChurchofJesusChrist.org дээрх “Finding Hope through the Resurrection of Christ” (Христийн амилалтаар дамжуулан найдварыг олох) (4:41) видеог үз.
-
ChurchofJesusChrist.org дээрх “Эдгээгч эзэн” видеог цагийн код 8:49-өөс 11:53 хүртэл үз.
Суралцагчдыг Есүс Христэд итгэх итгэлээ хэрэгжүүлэх замаар найдварыг мэдэрсэн үеэ мөн тийм найдвар төрөөгүй бол нөхцөл байдал хэрхэн өөр байх байсныг хуваалцахад урь.
Хэдийгээр бид Есүс Христэд итгэдэг гэдгээ харуулж, Түүний санал болгосон адислалуудад найдаж байгаа ч бидний амьдралд хүнд хэцүү, хичээж чармайх үеүд байсаар байх болно гэдгийг мэдэх нь чухал юм. Гэхдээ бид үргэлжлүүлэн Аврагчид итгэх итгэлээ хэрэгжүүлж, Түүн дээр мөн Түүний бидэнд боломжтой болгож өгсөн мөнх амьдрал дээр төвлөрөх юм бол эрэлхийлж буй найдвараа олж авах болно.
Дараах үйл ажиллагаагаар тараах материалыг хийж гүйцэтгэхийн тулд суралцагчдыг жижиг бүлгээр хамтарч ажиллахад урь.
Есүс Христээс найдвар олох
Мормоны Номын багшийн гарын авлага (2024)—“Моронай 7:20–43: Христээс найдвар олох”
Христийн ачаар найдвар тээх нь өөр өөр нөхцөл байдалд бидний амьдралд нөлөөлдөг талаар бодоход тань туслахын тулд дараах жишээнүүдээс нэгийг сонго (эсвэл өөрөө нэгийг бодож ол). Үүнд:
-
Жэймс хаяж чадсан гэж бодож байсан нүгэлт зуршлууддаа эргээд орчихсон.
-
Бэккагийн аав сүмд ирэхээ больж, Бурханд ч бас итгэхээ больсон гэдгээ хэлэв.
-
Аналист сургууль, ажил, гэр орны үүргүүдээ бүгдийг нь биелүүлэхэд хүндрэлтэй байна.
Дараах хоёр өгүүлбэрийг гүйцээгээд, тухайн хүн өөрийн нөхцөл байдлыг хэрхэн өөрөөр харж болохыг дурд. Үүнд:
-
Есүс Христэд найдах найдвар үгүй бол,
-
Есүс Христэд найдах найдвар бий бол,
Дараах асуултуудыг авч үзэн ярилц.
-
Энэ хүн Есүс Христэд итгэх итгэлээ хэрхэн хэрэгжүүлж чадах вэ? Та хариултдаа багтаах судар олж чадах эсэхээ хараарай.
-
Ийм байдлаар итгэлээ хэрэгжүүлэх нь Есүс Христээр дамжуулан илүү их найдвар тээхэд энэ хүнд хэрхэн тусалж болох вэ?
-
Хэрэв энэ хүн танаас яагаад Есүс Христэд найддаг тухай асуувал та юу гэж хэлэх вэ? (1 Петр 3:15-ыг үзнэ үү.)
© 2023 by Intellectual Reserve, Inc. All rights reserved.
Бүлгүүдийг үйл ажиллагааг дуусгасны дараа нэг төлөөлөгч гарган, өөрсдийн хамгийн тустай гэж бодсон нэг зүйлийг хуваалцахад урь.
Аврагчид найдаж байгаа талаарх гэрчлэлээ хуваалц. Зарим суралцагч тань амьдралдаа илүү их найдвар хайж байж магадгүй гэдгийг сана. Таны болон үе тэнгийнхнийх нь гэрчлэл тэдэнд агуу адислал болж, тэднийг илүү их найдвараар урамшуулан дэмжиж чадна.