Суралцахуйгаа үнэлэх нь 10

Мормоны Ном; 1 Нифай–Моронай

Мормоны Номыг уншиж буй хүн

Сүнслэг суралцахуйгаа эргэн харж, үнэлэх нь Аврагчид ойртож, хөрвөлтөө бэхжүүлэхэд бидэнд тусална. Энэ хичээл нь энэ жил Мормоны Номыг судлах явцад гарсан ахиц дэвшил, тавьсан зорилго, хувийн өсөлт хөгжлөө үнэлэхэд тань туслах зорилготой.

Суралцагчдыг мэдрэмж, сэтгэгдлээ бичихэд урь. Ариун Сүнс хичээлийн үеэр чанга дуугаар ярьдаггүй зүйлсийг зааж чадна гэдгийг суралцагчдад сануул. Суралцагчид эдгээр сүнслэг сэтгэгдлийг тэмдэглэснээр Сүнсээр танин мэдэж, суралцах чадвараа нэмэгдүүлдэг. Энэ нь Их Эзэнд тэдний амьдралыг үргэлжлүүлэн удирдан чиглүүлэх боломжийг олгож чадна.

Суралцагчийн бэлтгэл: Суралцагчид Мормоны Номыг судалсан талаараа тунгаан бодож, Есүс Христийг улам их хайрлахад хүргэсэн ухаарал эсвэл үнэнийг хуваалцахад бэлтгэж болно.

Боломжит суралцах үйл ажиллагаа

Энэ хичээл нь суралцагчдад Мормоны Ном Есүс Христэд итгэх итгэлийг нь хөгжүүлж, Түүнд илүү хөрвөгдөхөд хэрхэн тусалсан талаар эргэцүүлэн бодох боломжийг олгох болно. Хэрэв Мормоны Номоос суралцагчдын судалсан тодорхой үнэнд анхаарлаа төвлөрүүлэх нь тустай байхаар бол та эдгээр үнэнийг багтаахын тулд үйл ажиллагааг өөрчилж болно. Суралцагчид үйл ажиллагааг дурын дарааллаар гүйцэтгэж болно.

Та Мормоны Номын талаар юу гэж боддог вэ?

Хичээлийн энэ хэсэг нь Мормоны Номыг энэ жил судалсан нь Есүс Христ болон Түүний сайн мэдээний талаарх тэдний мэдрэмж, гэрчлэлд хэрхэн нөлөөлсөн тухай бодоход суралцагчдад туслах зорилготой юм. Та суралцагчидтайгаа ярилцаж эхлэхийн тулд дараах асуултуудыг ашиглаж болно.

Ерөнхийлөгч Рассэлл М.Нэлсон биднийг Мормоны Номтой холбоотой гурван асуултын талаар бодоход урьсан.

Та дараах мэдэгдэлд байгаа гурван асуултыг самбар дээр харуулахыг хүсэж болно.

Ерөнхийлөгч Рассэлл М.Нэлсон

Нэгд, Мормоны Ном байгаагүй бол таны амьдрал ямар байх байсан бэ? Хоёрт, та юуг мэдэхгүй байх байсан бэ? Гуравт, танд юу байхгүй байх байсан бэ? (Рассэлл М.Нэлсон, “Мормоны Ном: Үүнгүйгээр таны амьдрал ямар байх байсан бэ?,” 2017 оны 10-р сарын Ерөнхий чуулган, 56)

Суралцагчдыг ерөнхийлөгч Нэлсоны мэдэгдлийн гурван асуултын талаар хэлэлцэхэд урь. Та суралцагчдаасаа хамааран, ангиараа хийж гүйцэтгэхээсээ өмнө жижиг бүлгүүдээр ярилцах цаг гаргаж болно. Суралцагчдыг хариулж байх үед анхааралтай сонсож, дараагийн асуултуудыг тавьж, бодлоо илүү тодорхой, гүнзгий илэрхийлэхэд тусал.

Та Тэнгэрлэг Эцэг, Есүс Христ хоёрын талаар юу ойлгодог вэ?

Дараах хэсэг нь суралцагчдад Тэнгэрлэг Эцэг, Есүс Христ хоёрын талаар янз бүрийн сургаалыг тайлбарлахад тусална.

Ерөнхийлөгч Рассэлл М.Нэлсон Мормоны Номын гол үүргүүдийн нэгийг тодорхойлсон.

Ерөнхийлөгч Рассэлл М.Нэлсон

Бурханы хүүхдийг Түүний талаар болон Түүний Хайрт Хүүгийн талаар илүү ихийг мэдэхийг эрэлхийлэх үед гайхамшигтай зүйл тохиолддог. Мормоны Номоос өөр хаана ч эдгээр үнэнийг илүү тодорхой, илүү хүчтэй заадаггүй. (Рассэлл М.Нэлсон, “Мормоны Ном: Үүнгүйгээр таны амьдрал ямар байх байсан бэ?,” 2017 оны 10-р сарын Ерөнхий чуулган, 56)

Энэ жил Мормоны Номыг судлах явцдаа Тэнгэрлэг Эцэг, Есүс Христ хоёрын талаар сурсан зүйлийнхээ талаар эргэцүүлэн бодох цаг гарга. Та Тэнгэрлэг Эцэг, Есүс Христ хоёрын тухай бүтэн жилийн турш тодруулсан эсвэл тэмдэглэсэн байж болох үнэнүүдийг олж мэдэхийн тулд судруудаа эргүүлэн харж, тэмдэглэлээ судалж болно. Таны хувьд онцгой ач холбогдолтой байсан 3-4 үнэнийг судлах тэмдэглэлдээ жагсаан бич.

Суралцагчид судлах тэмдэглэл, судраа давтсаны дараа самбарт ач холбогдолтой үнэнүүдийг жагсааж болно. Суралцагчид ангийн бэлтгэлийн талаарх санаа бодлоо багтааж болно.

Суралцагчдын дурсамжийг өдөөх эсвэл уншихдаа бэрхшээлтэй суралцагчдад туслахын тулд “Нэмэлт суралцах үйл ажиллагаа”-д багтсан Мормоны Номын видеонуудаас аль нэгийг үзүүл.

Судлах тэмдэглэлдээ бичсэн үнэн бүрийг дэмжих дор хаяж нэг судрын хэсгийг ол. Үнэн бүрийн хажууд судрын эшлэлийг бичээд, тэрхүү үнэнийг заахын тулд судрын хэсгийг хэрхэн ашиглаж болохыг тайлбарла.

Хэрэв суралцагчдад Мормоны Номоос Тэнгэрлэг Эцэг, Есүс Христ хоёрын тухай үнэнийг заадаг хэсгүүдийг олоход тусламж хэрэгтэй бол та дараах зүйлсийн заримыг тэдэнтэй хуваалцаж болно. Сонор соргог байж, нэмэлт тусламж хэрэгтэй байж магадгүй суралцагчдад туслахад бэлэн бай.

• 2 Нифай 9:19–23

• Алма 5:33–34

• Алма 12:32–34

• Алма 34:8–10

• 3 Нифай 11:9–15

• Мормон 9:9–13

Ангид сонгосон Мормоны Номын сургаалаа хуваалцахад зориулан суралцагчдад цаг гаргаж өг. Суралцагчид ангийнхантайгаа хуваалцаж болно, эсвэл жижиг бүлгүүдэд хуваагдаж болно.

Мормоны Ном таны амьдралын хэв маягт хэрхэн нөлөөлсөн бэ?

Дараах хэсэг нь суралцагчдад Мормоны Номын сургаалын талаар болон сургаалын дагуу амьдрахын тулд хэрхэн хичээж буйгаа тунгаан бодож, илэрхийлэхэд тусалж чадна.

Бошиглогч Иосеф Смитийн (1805–44) дараах мэдэгдлийг уншиж, Мормоны Номын хүч чадлын талаар юу зааж байсныг олж мэд.

Тэмдэглэл: Суралцагчид Мормоны Номын удиртгалын зургаа дахь догол мөр дэх дараах мэдэгдлийг олж уншиж болно.

Бошиглогч Иосеф Смит

© 1998 Дэвид Линдсли

Ах нарт миний хэлсэнчлэн, Мормоны Ном бол энэ дэлхий дээрх бусад бүх номоос хамгийн зөв нь, мөн манай шашны тулгуурын чулуу, түүнчлэн бусад ямар ч номоос илүүгээр, үүний зааврыг мөрдсөнөөр хүмүүн Бурханд илүү ойртох болой. (Мормоны Номын удиртгал; мөн History of the Church (Сүмийн түүх), 4:461-ийг үзнэ үү)

“Үүний зааврыг мөрдөх” гэж Мормоны Номд агуулагдах зарчим, сургаалуудын дагуу амьдрахыг хэлнэ. Мормоны Номоос сурч мэдсэн зүйлс таны бодол санаа, хандлага эсвэл үйлдлүүдэд хэрхэн нөлөөлсөн талаар хэдэн хором эргэцүүлэн бод.

Суралцагчдад судлах тэмдэглэл дээрээ дараах асуултуудын аль нэгд хариулах цаг гаргаж өг. Мормоны Номын сургаалууд амьдралд нь хэрхэн нөлөөлснийг харахад туслахын тулд Ариун Сүнсийг урихад мөн тунгаан бодоход тэднийг урамшуулан дэмж.

• Мормоны Номыг судалсан нь Тэнгэрлэг Эцэг, Есүс Христ хоёртой илүү ойр болоход танд хэрхэн тусалсан бэ?

• Та Мормоны Номыг судалснаараа ямар сургаалыг хэрэгжүүлж чадсан бэ?

• Та Мормоны Номыг тогтмол судалснаар ямар адислалуудыг хүлээн авсан бэ?

Суралцагчдаас хариултуудаа хуваалцахыг хүс. Цаг гарвал Мормоны Номын талаар болон таны амьдралд нөлөөлсөн утга учиртай сургаалуудын талаар гэрчлэлээ хуваалц.

Нэмэлт суралцах үйл ажиллагаа

Мормоны Номын видео

Хэрэв зарим суралцагчид уншихад бэрхшээл тулгарах юм уу суралцагчид хуваалцах ач холбогдолтой сургаалын талаар бодож чадахгүй байгаа бол дараах видеонуудын аль нэгийг үзүүл.

• “Jacob Teaches of the Atonement of Jesus Christ,” (Иаков Есүс Христийн Цагаатгалын талаар заах нь) цагийн код 1:49-өөс 4:21

• “Abinadi Teaches the Ten Commandments and Testifies of Christ,” (Абинадай арван зарлигийг зааж мөн Христийн талаар гэрчлэх нь) цагийн код 1:40-өөс 4:45

Моронай 7:44–48. Христийнхтэй адил энэрэх зан чанарыг хөгжүүлэх

Моронай 7:44–48-ын хичээл дээр суралцагчдыг энэрэх зан чанарыг хэрхэн илүү сайн ойлгож, хөгжүүлэх талаар төлөвлөгөө гаргахад урьсан. Амьдралдаа энэрлийг илүү сайн ойлгож, хөгжүүлэхийн тулд гаргасан төлөвлөгөө, үйл ажиллагааныхаа талаар тайлагнах боломжийг суралцагчдад олго.

Суралцагчдыг хуваалцах үед та эдгээр туршлага нь Аврагчийн хайрыг мэдрэхэд хэрхэн тусалсан эсвэл тэдний энэрлийн талаарх ойлголт бусадтай харилцах харилцаанд нь хэрхэн нөлөөлсөн талаар асууж болно.

Мормоны Номыг унших бошиглолын амлалт

Мормоны Ном дээр болон Христийн үгээр найрлахыг бошиглогчид Сүмийн гишүүдэд урамшуулсан байдаг (2 Нифай 32:3-ыг үзнэ үү). Суралцагчдыг энэ жил судалж суралцсаныхаа дараа үргэлжлүүлэн уншихад урамшуулан дэмжихийн тулд ерөнхийлөгч Рассэлл М.Нэлсоны хэлсэн дараах мэдэгдлийг хуваалц.

Ерөнхийлөгч Рассэлл М.Нэлсон

“Та нар өдөр бүр Мормоны Номыг залбирч судалбал өдөр бүр илүү сайн шийдвэр гаргадаг болно гэдгийг би амлаж байна. Та нарыг судалж байгаа зүйлийнхээ талаар тунгаан бодох үед тэнгэрийн цонх нээгдэн, та нар асуултуудынхаа хариултыг болон хувийнхаа амьдралд удирдамж хүлээн авах болно гэдгийг би амлая. Та нар өдөр бүр өөрсдийгөө Мормоны Номд эзэмдүүлбэл тухайн өдрийн хилэнцийн эсрэг дархлаатай болох боломжтой гэдгийг би амлаж байна.” (Рассэлл М.Нэлсон, “Мормоны Ном: Үүнгүйгээр таны амьдрал ямар байх байсан бэ?,” 2017 оны 10-р сарын Ерөнхий чуулган, 58)