« ថ្ងៃទី ១១ ខែ កញ្ញា ។ តើខ្ញុំអាចជ្រះស្អាត និងរីករាយម្តងទៀត ក្រោយពីខ្ញុំមានបាបយ៉ាងដូចម្តេច ? អេសាយ ១–១២ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២២ ( ឆ្នាំ ២០២១ )

« ថ្ងៃទី ១១ ខែ កញ្ញា ។ តើខ្ញុំអាចជ្រះស្អាត និងរីករាយម្តងទៀត ក្រោយពីខ្ញុំមានបាបយ៉ាងដូចម្តេច ? » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២២

ថ្ងៃទី ១១ ខែ កញ្ញា

តើខ្ញុំអាចជ្រះស្អាត និងរីករាយម្តងទៀត ក្រោយពីខ្ញុំមានបាបយ៉ាងដូចម្តេច ?

អេសាយ ១–១២

ប្រឹក្សាជាមួយគ្នា

ដឹកនាំដោយសមាជិកម្នាក់ក្នុងគណៈប្រធានកូរ៉ុម ឬគណៈប្រធានថ្នាក់ មានរយៈពេល ១០–២០ នាទី

នៅដើមការប្រជុំ សូមសូត្ររួមគ្នានូវ បាវចនាយុវនារី ឬ បាវចនាកូរ៉ុមបព្វជិតភាពអើរ៉ុន ។ បន្ទាប់មកសូមដឹកនាំការពិភាក្សាមួយអំពីកិច្ចការនៃសេចក្តីសង្រ្គោះ និងភាពតម្កើងឡើង ដោយប្រើសំណួរមួយ ឬច្រើនដូចខាងក្រោម ឬ សំណួររបស់បងប្អូនផ្ទាល់ ( សូមមើល ក្បួនខ្នាតទូទៅ ១០.២, ១១.២, នៅលើគេហទំព័រ ChurchofJesusChrist.org ) ។ ដាក់ផែនការដើម្បីអនុវត្តតាមអ្វីដែលបងប្អូនពិភាក្សា ។

រស់នៅតាមដំណឹងល្អ ។ តើការងាកទៅរកព្រះអម្ចាស់អាចជួយយើងប្រឈមនឹងឧបសគ្គ និងការសាកល្បងតាមរបៀបណា ?
ការមើលថែដល់អ្នកដែលត្រូវការជំនួយ ។ តើយើងស្គាល់នរណាខ្លះដែលត្រូវការការអធិស្ឋាន និងមិត្តភាពរបស់យើង ?
ការអញ្ជើញមនុស្សទាំងអស់ឲ្យទទួលយកដំណឹងល្អ ។ តើផែនការចែកចាយដំណឹងល្អអ្វីខ្លះត្រូវបានលើកមកពិភាក្សានៅក្នុងការប្រជុំក្រុមប្រឹក្សាយុវវ័យវួដ ? តើថ្នាក់ ឬកូរ៉ុមរបស់យើងអាចចូលរួមដោយរបៀបណា ?
រួបរួមក្រុមគ្រួសារសម្រាប់ភាពអស់កល្បភាពអស់កល្បជានិច្ច ។ តើការធ្វើកិច្ចការពង្សប្រវត្តិអាចពង្រឹងទំនាក់ទំនងយើងជាមួយនឹងព្រះវរបិតាសួគ៌ និងព្រះយេស៊ូវរបៀបណា ?

នៅចុងបញ្ចប់នៃមេរៀននេះ សូមធ្វើនូវអ្វីដែលត្រឹមត្រូវដូចខាងក្រោមនេះ ៖

ថ្លែងទីបន្ទាល់អំពីគោលការណ៍ដែលបានបង្រៀន ។
រំឭកសមាជិកថ្នាក់ ឬកូរ៉ុមអំពីផែនការ និងការអញ្ជើញទាំងឡាយដែលបានដាក់អំឡុងការប្រជុំ ។

បង្រៀនគោលលទ្ធិ

ដឹកនាំដោយអ្នកដឹកនាំជាមជ្ឈិមវ័យ ឬជាយុវវ័យម្នាក់ មានរយៈពេល ២៥–៣៥ នាទី

រៀបចំខ្លួនខាងវិញ្ញាណ

នៅពេលយើងមានអារម្មណ៍ថាមានកំហុសក្រោយពីប្រព្រឹត្តបាបកម្ម យើងមានជម្រើសមួយ ។ អារម្មណ៍ទាំងនេះ ខណៈដែលកំពុងតែឈឺចាប់អាចជាពរជ័យប្រសិនបើវានាំយើងទៅរកការប្រែចិត្ត ។ ប៉ុន្តែ សាតាំងប្រាប់យើងថាអារម្មណ៍ទាំងនេះមានន័យថាព្រះពុំសព្វព្រះទ័យចំពោះយើង និងព្យាយាមធ្វើឲ្យយើងមានអារម្មណ៍បាក់ទឹកចិត្ត និងអស់សង្ឃឹម ។ ប្រហែលជាមានមនុស្សដែលបងប្អូនបង្រៀនមានបន្ទុកជាមួយអារម្មណ៍បែបនេះ ។ ពួកគេប្រហែលជាឆ្ងល់ថាប្រសិនបើពួកគេអាចជ្រះស្អាត និងសប្បាយរីករាយម្តងទៀតឬអត់ ។ តើបងប្អូនអាចជួយពួកគេស្វែងរកសេចក្តីសង្ឃឹមនៅក្នុងដង្វាយធួនរបស់ព្រះអង្គសង្គ្រោះដោយរបៀបណា ?

ព្យាការីអេសាយប្រៀនប្រដៅប្រជាជនដោយក្លាហានចំពោះអំពើបាបរបស់ពួកគេ ។ ប៉ុន្តែលោកក៏បានថ្លែងទីបន្ទាល់ថា ពីព្រោះព្រះអង្គសង្រ្គោះ « ទោះបើអំពើបាបរបស់ឯងដូចជាពណ៌ក្រហមទែងក៏ដោយ គង់តែនឹងបានសដូចហិមៈ » ( អេសាយ ១:១៨ ) ។ សូមគិតអំពីរឿងនេះនៅពេលបងប្អូនអាន អេសាយ ១–១២ នៅសប្តាហ៍នេះ ។ តើអ្វីដែលអាចបំផុសគំនិតដល់អ្នកដែលបងប្អូនបង្រៀនឲ្យងាកមករកព្រះយេស៊ូវគ្រីស្ទដោយមានជំនឿថា បន្ទុកនៃអំពើបាបរបស់ពួកគេអាចត្រូវបានដកចេញ ? បងប្អូនក៏អាចសិក្សាទីបន្ទាល់របស់ ស៊ីស្ទើរ សារ៉ុន អូប៊ែង ថ្លែងពីព្រះគ្រីស្ទនៅក្នុងសារលិខិតរបស់គាត់ « Christ: The Light That Shines in Darkness » ( Liahona ខែ ឧសភា ឆ្នាំ ២០១៩ ទំព័រ ៧៣–៧៦ ) ។

ថ្នាក់យុវនារី — ដោយសារតែព្រះយេស៊ូវគ្រីស្ទ នោះបន្ទុកនៃអំពើបាបរបស់យើងអាចត្រូវបានដកយកចេញ ។

រៀនជាមួយគ្នា

ដើម្បីរៀបចំខ្លួនសម្រាប់ការពិភាក្សាមួយដែលស្ថាបនានៅលើ អេសាយ ១–១២ ពេលមកប្រជុំ បងប្អូនអាចសូមឲ្យយុវវ័យម្នាក់ៗយកអ្វីមួយដែលមានពណ៌ក្រហម និងពណ៌សមកជាមួយ ។ បងប្អូនអាចបង្ហាញវត្ថុទាំងនេះខណៈដែលអានជាមួយគ្នា អេសាយ ១:១៦–១៨ ។ បន្ទាប់មក យុវវ័យអាចចែកចាយជាពាក្យសម្តីរបស់ពួកគេផ្ទាល់នូវអ្វីដែលពួកគេរៀនចេញពីខគម្ពីរទាំងនេះ ។ ( សូមមើលការពិភាក្សារបស់ ស៊ីស្ទើរ សារ៉ុន អូប៊ែង ពី ខទី ១៨ នៅក្នុង « Christ: The Light That Shines in Darkness » ) ។ ទាំងនេះគឺជាសកម្មភាពមួយចំនួនទៀតដែលអាចបំផុសឲ្យមានសេចក្តីជំនឿលើព្រះចេស្តារបស់ព្រះអង្គសង្រ្គោះដើម្បីធ្វើឲ្យយើងជ្រះស្អាតខាងវិញ្ញាណ ។

ការពិនិត្យមើលគំរូបទគម្ពីរអំពីការប្រែចិត្តអាចជួយអស់អ្នកដែលបងប្អូនបង្រៀនស្ថាបនាជំនឿពួកគេថា ព្រះយេស៊ូវគ្រីស្ទអាចធ្វើឲ្យពួកគេជ្រះស្អាតខាងវិញ្ញាណ ។ បងប្អូនអាចសរសេរឈ្មោះនៅលើក្តារខៀនដូចជា សូល ( ក្រោយមកផ្លាស់ទៅ ប៉ុល ) អាលម៉ាជាកូន ស៊ីអែសរ៉ុម និងពួកអាន់តៃ-នីហ្វៃ-លីហៃ ។ បងប្អូនក៏អាចសរសេរសេចក្តីយោងបទគម្ពីរមួយក្រុម ៖ កិច្ចការ ៨:៣; ម៉ូសាយ ២៧:៨–១០; អាលម៉ា ១១:២១–២៣; អាលម៉ា ១៧:១២–១៥ ( ប្រជាជនទាំងនេះស្ថិតក្នុងស្ថានភាពមានបាបរបស់ពួកគេ ) និង កិច្ចការ ៩:១៣–២០; អាលម៉ា ៣៦:១៧–២៤; អាលម៉ា ១៥:៥–១២; អាលម៉ា ២៣:៦–១២ ( បន្ទាប់ពីប្រជាជនទាំងនេះងាកទៅរកព្រះអង្គសង្រ្គោះ និងប្រែចិត្ត ) ។ យុវវ័យអាចផ្គូផ្គងឈ្មោះនីមួយៗជាមួយនឹងបទគម្ពីរដែលពិពណ៌នាពីបុគ្គលនោះ ។ តើមនុស្សទាំងនេះធ្វើអ្វីខ្លះដើម្បីប្រែចិត្ត ? តើដំណើររឿងទាំងនេះបង្រៀនយើងអ្វីខ្លះអំពីព្រះអង្គសង្គ្រោះដែលស្ម័គ្រព្រះទ័យដើម្បីអភ័យទោសឲ្យ ? តើយើងមើលឃើញមាគ៌ាដែលយើងអាចធ្វើតាមដែរឬទេ ?
ដើម្បីជួយអស់អ្នកដែលបងប្អូនបង្រៀនឲ្យយល់កាន់តែច្បាស់ អំពីការភ័យទោសនៃអំពើបាប នោះបងប្អូនអាចឲ្យបុគ្គលម្នាក់ៗនូវរឿងប្រៀបប្រដូច និងប្រៀបធៀបដើម្បីសិក្សា ។ ដំណើររឿងទាំងនេះអាចរួមបញ្ចូលទាំងកូនប្រុសខ្ជះខ្ជាយ ( សូមមើល លូកា ១៥:១១–២៤ ); ព្រះអង្គសង្រ្គោះជាអ្នកគង្វាលរបស់យើង ( កថាខណ្ឌ ៥–៨ នៃសារលិខិតរបស់អែលឌើរ ឌែល ជី រិនឡាន់ « Our Good Shepherd » [ Liahona ខែ ឧសភា ឆ្នាំ ២០១៧ ទំព័រ ២៩–៣២ ] ) ព្យាណូដែលខូច ( នៅដើមនៃសារលិខិតរបស់ស៊ីស្ទើរ គ្រីស្ទីណា ប៊ី ហ្វ្រានកូ « The Healing Power of Jesus Christ » [ Liahona ខែ វិច្ឆិកា ឆ្នាំ ២០២០ ទំព័រ ៦០–៦២ ] ) ។ យុវវ័យអាចសង្ខេបរឿងប្រៀបប្រដូច និងប្រៀបធៀបនីមួយៗ ហើយពិភាក្សាពីអ្វីដែលវាបង្រៀនអំពីសេចក្តីស្រឡាញ់របស់ព្រះអង្គសង្រ្គោះ និងព្រះចេស្តានៃដង្វាយធួន ។
ការមានអារម្មណ៍សោកស្តាយដែលយើងមានអំពើបាបគឺមានអត្ថប្រយោជន៍ ហើយដឹកនាំយើងឆ្ពោះទៅរកការប្រែចិត្ត ។ ការមានអារម្មណ៍បាក់ទឹកចិត្ត ឬគ្មានភាពស័ក្តិសមពីព្រោះតែអំពើបាបរបស់យើងគឺគ្មានប្រយោជន៍ទេ ហើយអាចរារាំងយើងពីការប្រែចិត្ត ។ ថ្នាក់ ឬកូរ៉ុមរបស់បងប្អូនអាចអានជាមួយគ្នានូវជំពូកដែលមានចំណងជើង « Godly Sorrow » នៅក្នុងសារលិខិតរបស់ ប្រធាន ឌៀថើរ អេស្វ អុជដូហ្វ « You Can Do It Now! »( Liahona ខែ វិច្ឆិកា ឆ្នាំ ២០១៣ ទំព័រ ៥៥–៥៧ ) ។ តើមានភាពខុសគ្នាអ្វីខ្លះរវាងទុក្ខសោកចំពោះអំពើបាបដែលនាំទៅរកការប្រែចិត្ត និងទុក្ខព្រួយដែលនាំទៅរកភាពអស់សង្ឃឹម ? ( សូមមើលផងដែរ កូរិនថូស ទី២ ៧:៩–១០; មរមន ២:១២–១៤ ) ។ ប្រសិនបើនរណាម្នាក់មានអារម្មណ៍ថាខ្លួនមានកំហុស និងអស់សង្ឃឹមចំពោះអំពើបាប តើយើងអាចនិយាយអ្វីដើម្បីជួយពួកគាត់ងាកមករកព្រះអង្គសង្រ្គោះ ? សូមអញ្ជើញយុវវ័យឲ្យចែកចាយទីបន្ទាល់របស់ពួកគេពីព្រះអង្គសង្រ្គោះ និងសេចក្តីមេត្តាករុណារបស់ទ្រង់ ។

ធ្វើសកម្មភាពដោយសេចក្ដីជំនឿ

សូមលើកទឹកចិត្តសមាជិកថ្នាក់ ឬកូរ៉ុមឲ្យសញ្ជឹងគិត ហើយកត់ត្រាអ្វីដែលពួកគេនឹងធ្វើដើម្បីធ្វើតាមការបំផុសគំនិត ដែលពួកគេបានទទួលនៅថ្ងៃនេះ ។ ពួកគេអាចចែកចាយគំនិតរបស់ពួកគេបាន ប្រសិនបើពួកគេចង់ចែកចាយ ។ សូមអញ្ជើញពួកគេឲ្យគិត អំពីរបៀបដែលការធ្វើតាមចំណាប់អារម្មណ៍របស់ពួកគេនឹងពង្រឹងទំនាក់ទំនងរបស់ពួកគេជាមួយព្រះវរបិតាសួគ៌ និងព្រះយេស៊ូវគ្រីស្ទ ។

ធនធានគាំទ្រ

ដាល្លិន អេក អូក « Cleansed by Repentance » Liahona ខែ ឧសភា ឆ្នាំ ២០១៩ ទំព័រ ៩១–៩៤ ។
« ការប្រែចិត្តតាមរយៈដង្វាយធួនរបស់ព្រះយេស៊ូវគ្រីស្ទ » នៅក្នុងជំពូកទី ៣ នៃសៀវភៅ ប្រកាសដំណឹងល្អរបស់យើង ( ឆ្នាំ ២០១៩ ) ទំព័រ ៦២–៦៣ ។
« Repentance: A Joyful Choice » ( វីដេអូ ) នៅលើគេហទំព័រ ChurchofJesusChrist.org

ការបង្រៀនតាមរបៀបរបស់ព្រះអង្គសង្គ្រោះ

« ទីបន្ទាល់ផ្ទាល់ខ្លួនរបស់ព្រះអង្គសង្គ្រោះ ប្រទានសិទ្ធិអំណាចដល់ព្រះបន្ទូលរបស់ទ្រង់ ។ … នៅពេលអ្នកថ្លែងទីបន្ទាល់អំពីគោលលទ្ធិពិត នោះព្រះវិញ្ញាណនឹងបញ្ជាក់សេចក្ដីពិតនៃគោលលទ្ធិនៅក្នុងដួងចិត្តនៃអ្នកទាំងឡាយដែលអ្នកបង្រៀន » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ២១ ) ។