« ថ្ងៃទី ៨ ខែ តុលា ។ តើដំណឹងល្អរបស់ព្រះយេស៊ូវគ្រីស្ទអាចជួយខ្ញុំពង្រឹងក្រុមគ្រួសារខ្ញុំដោយរបៀបណា ? អេភេសូរ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិឆ្នាំ ២០២៣ ( ឆ្នាំ ២០២២ )
« ថ្ងៃទី ៨ ខែ តុលា ។ តើដំណឹងល្អរបស់ព្រះយេស៊ូវគ្រីស្ទអាចជួយខ្ញុំពង្រឹងក្រុមគ្រួសារខ្ញុំដោយរបៀបណា ? » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិឆ្នាំ ២០២៣
ថ្ងៃទី ៨ ខែ តុលា
តើដំណឹងល្អរបស់ព្រះយេស៊ូវគ្រីស្ទអាចជួយខ្ញុំពង្រឹងក្រុមគ្រួសារខ្ញុំដោយរបៀបណា ?
អេភេសូរ
ប្រឹក្សាជាមួយគ្នា
ដឹកនាំដោយសមាជិកថ្នាក់ម្នាក់ ឬគណៈប្រធានកូរ៉ុម មានរយៈពេលប្រហែល ១០–២០ នាទី
នៅដើមការប្រជុំ សូមសូត្ររួមគ្នានូវ បាវចនាយុវនារី ឬ បាវចនាកូរ៉ុមបព្វជិតភាពអើរ៉ុន ។ រួចហើយ បន្ថែមលើការប្រឹក្សាអំពីកិច្ចការក្នុងថ្នាក់ ឬកូរ៉ុមជាក់លាក់នានា បងប្អូនអាចពិភាក្សាពីចំណាប់អារម្មណ៍ និងបាវចនាមកពីសន្និសីទទូទៅបាន ។ សំណួរខាងក្រោមនេះអាចនឹងជួយបាន ។
-
តើយើងចាប់អារម្មណ៍លើបាវចនា ឬសារលិខិតអ្វីខ្លះ ? តើអ្វីទៅដែលបានពង្រឹងសេចក្តីជំនឿរបស់យើងលើព្រះយេស៊ូវគ្រីស្ទ ?
-
តើអ្វីទៅដែលបានពង្រឹងទីបន្ទាល់របស់យើងលើពួកព្យាការីនៅរស់ ? តើយើងមានអារម្មណ៍បំផុសគំនិតឲ្យធ្វើអ្វីខ្លះ ដោយសារតែអ្វីដែលយើងបានរៀន ឬទទួលអារម្មណ៍នេះ ?
-
តើយើងត្រូវធ្វើអ្វីខ្លះក្នុងនាមជាថ្នាក់ ឬកូរ៉ុមមួយ ដើម្បីចងចាំ ហើយធ្វើតាមការទូន្មានដែលយើងស្ដាប់ឮនៅក្នុងសន្និសីទទូទៅ ?
នៅចុងបញ្ចប់នៃមេរៀននេះ សូមធ្វើកិច្ចការដូចខាងក្រោម តាមការគួរ ៖
-
ថ្លែងទីបន្ទាល់អំពីគោលការណ៍ដែលបានបង្រៀន ។
-
រំឭកសមាជិកថ្នាក់ ឬកូរ៉ុមអំពីផែនការ និងការអញ្ជើញទាំងឡាយដែលបានដាក់អំឡុងការប្រជុំ ។
បង្រៀនគោលលទ្ធិ
ដឹកនាំដោយអ្នកដឹកនាំជាមជ្ឈិមវ័យ ឬយុវវ័យម្នាក់ រយៈពេលប្រហែល ២៥–៣៥ នាទី
រៀបចំខ្លួនខាងវិញ្ញាណ
មនុស្សខ្លះនៅក្នុងថ្នាក់ ឬកូរ៉ុមរបស់បងប្អូនអាចមានក្រុមគ្រួសារដែលរឹងមាំ និងពេញដោយក្តីស្រឡាញ់ដែលចិញ្ចឹមបីបាច់សេចក្តីជំនឿ និងជីវភាពខាងវិញ្ញាណ ។ អ្នកខ្លះប្រហែលជាខិតខំតែម្នាក់ឯងដើម្បីរស់នៅតាមដំណឹងល្អ ហើយអ្នកខ្លះទៀតអាចប្រឈមនឹងការទាស់ទែងគ្នា និងការឈឺចិត្តនៅក្នុងផ្ទះ ។ ប៉ុន្តែគ្មាននរណាម្នាក់នៅក្នុងថ្នាក់ ឬកូរ៉ុមរបស់បងប្អូនដែលមានគ្រួសារល្អឥតខ្ចោះ គ្មានបញ្ហានោះទេ ។ ហើយមនុស្សគ្រប់គ្នាមានសិទ្ធិទទួលបានព្រះចេស្តានៃព្រះយេស៊ូវគ្រីស្ទ ដែលអាចព្យាបាល និងពង្រឹងក្រុមគ្រួសាររបស់យើង ។
ព្រះអង្គសង្រ្គោះចង់ប្រទានពរដល់ក្រុមគ្រួសាររបស់យើង ។ ជួនកាលរបៀបដែលទ្រង់ធ្វើការណ៍នេះគឺតាមរយៈសេចក្តីស្រឡាញ់ និងគំរូរបស់យុវវ័យដែលកំពុងព្យាយាមធ្វើតាមទ្រង់ ហើយរស់នៅតាមដំណឹងល្អរបស់ទ្រង់ ។ កាលដែលបងប្អូនរៀបចំដើម្បីបង្រៀនយុវវ័យអំពីព្រះចេស្តាដែលមានសម្រាប់ពួកគេ និងក្រុមគ្រួសាររបស់ពួកគេតាមរយៈព្រះយេស៊ូវគ្រីស្ទ សូមសញ្ជឹងគិតគោលការណ៍ទាំងឡាយនៅក្នុងអេភេសូរ ដែលអាចជួយយើងពង្រឹងទំនាក់ទំនងក្រុមគ្រួសារ ។ បងប្អូនក៏អាចសិក្សា « ក្រុមគ្រួសារ ៖ ការប្រកាសដល់ពិភពលោក » ផងដែរ ( ChurchofJesusChrist.org ) ។
រៀនជាមួយគ្នា
បន្ទាប់ពីការផ្តល់ឱកាសឲ្យសមាជិកថ្នាក់ ឬកូរ៉ុមចែកចាយនូវអ្វីដែលព្រះវិញ្ញាណបានបង្រៀនពួកគេ នៅសប្តាហ៍នេះកាលដែលពួកគេបានសិក្សាអេភេសូរ សូមរកមើលរបៀបនានា ដើម្បីណែនាំពីប្រធានបទស្តីពីរបៀបដែលព្រះយេស៊ូវគ្រីស្ទអាចជួយយើងពង្រឹងក្រុមគ្រួសាររបស់យើង ។ ឧទាហរណ៍ បងប្អូនអាចអញ្ជើញយុវវ័យឲ្យស្វែងរក និងចែកចាយបទគម្ពីរនៅក្នុងអេភេសូរដែលមាននូវគោលការណ៍នានា ដែលអាចជួយយើងពង្រឹងទំនាក់ទំនងក្រុមគ្រួសារ ។ ឧទាហរណ៍មួយចំនួនអាចរួមមាន អេភេសូរ ២:១៩–២២; ៣:១៤–១៩; ៤:១–៣, ២៥–២៦, ២៩–៣២; ៥:១–២; ៦:១–៤ ។ តើដំបូន្មាននៅក្នុងខគម្ពីរទាំងនេះផ្តល់ពរដល់ក្រុមគ្រួសារយ៉ាងដូចម្តេច ? តើព្រះអង្គសង្រ្គោះ និងដំណឹងល្អរបស់ទ្រង់បានផ្តល់ពរនៅក្នុងគេហដ្ឋានរបស់យើងយ៉ាងដូចម្តេច ? នេះគឺជាគំនិតមួយចំនួនសម្រាប់ធ្វើសកម្មភាពដែលទាក់ទងនឹងប្រធានបទនេះ ។
-
ប្រសិនបើបងប្អូនចង់ពិភាក្សាពីបទបញ្ញត្តិទាំងឡាយដើម្បី « គោរពប្រតិបត្តិដល់មាតាបិតាខ្លួន » ( អេភេសូរ ៦:២ ) បងប្អូនអាចចាប់ផ្តើមដោយការសួរសំណួរសមាជិកថ្នាក់ ឬកូរ៉ុមអំពីអត្ថន័យពាក្យ គោរពប្រតិបត្តិ ចំពោះពួកគេ ។ ប្រហែលជាបងប្អូនអាចចែកចាយនិយមន័យនេះមកពីវចនានុក្រម ឬ សេចក្ដីណែនាំដល់បទគម្ពីរទាំងឡាយ ( scriptures.ChurchofJesusChrist.org ) ។ សូមអញ្ជើញយុវវ័យឲ្យនិយាយ អំពីរបៀបដែលពួកគេអាចអនុវត្តបទបញ្ញត្តិនេះនៅក្នុងជីវិតរបស់ពួកគេផ្ទាល់ ។ វាក៏អាចផ្តល់ការបំផុសគំនិតដើម្បីស្រាវជ្រាវពីរបៀប ដែលព្រះយេស៊ូវគ្រីស្ទគោរពប្រតិបត្តិព្រះវរបិតាដែលគង់នៅស្ថានសួគ៌ និងម៉ារា ជាមាតារបស់ទ្រង់ផងដែរ ( សូមមើលឧទាហរណ៍ លូកា ២:៤១–៥២; ការបកប្រែដោយយ៉ូសែប ស្ម៊ីធ យ៉ូហាន ២:៤ [ នៅក្នុង យ៉ូហាន ២:៤ ]; យ៉ូហាន ៨:២៩; ១៩:២៥–២៧ ) ។ តើយើងអាចរៀនអ្វីខ្លះមកពីគំរូរបស់ព្រះយេស៊ូវដែលអាចពង្រឹងទំនាក់ទំនងរបស់យើងជាមួយឪពុកម្តាយរបស់យើង ?
-
វាអាចមានប្រយោជន៍ដើម្បីនិយាយអំពីសម្ភារដែលត្រូវការដើម្បីស្ថាបនាគេហដ្ឋានដ៏រឹងមាំមួយ ។ តើមានអ្វីខ្លះដែលត្រូវការដើម្បីស្ថាបនាគ្រួសារដែលរឹងមាំ ? ជាផ្នែកនៃការពិភាក្សានេះ បងប្អូនអាចចែកចាយសេចក្តីថ្លែងការណ៍ដោយអែលឌើរ អិល វិតនី ក្លេតុន ៖ « អ្វីដែលសំខាន់គឺការរចនាផ្នែកខាងក្នុងនៃព្រលឹងវិញ្ញាណរបស់មនុស្ស មិនមែនរចនាសម្ព័ន្ធរបស់វានោះទេ » ( « The Finest Homes » Liahona ខែ ឧសភា ឆ្នាំ ២០២០ ទំព័រ ១០៧–១០៩ ) ។ បងប្អូនក៏អាចពិភាក្សាយោបល់ទាំងបួនដែលអែលឌើរ ក្លេតុន ផ្តល់ឲ្យនៅក្នុងសារលិខិតរបស់លោកសម្រាប់របៀបដើម្បីស្ថាបនា « គេហដ្ឋានដ៏ល្អបំផុត » ផងដែរ ។
-
« ក្រុមគ្រួសារ ៖ ការប្រកាសដល់ពិភពលោក » មានបញ្ចូលសេចក្តីសន្យានេះ ៖ « សុភមង្គលនៅក្នុងជីវិតគ្រួសារអាចសម្រេចទៅបានល្អបំផុត នៅពេលផ្ដោតទៅលើការបង្រៀនរបស់ព្រះអម្ចាស់ព្រះយេស៊ូវគ្រីស្ទ » ។ តើការបង្រៀនរបស់ព្រះអង្គសង្រ្គោះបង្កើតគ្រឹះសម្រាប់ក្រុមគ្រួសាររីករាយយ៉ាងដូចម្តេច ? សេចក្តីប្រកាសពីក្រុមគ្រួសារ និងបទគម្ពីរនៅក្រោម « ធនធានគាំទ្រ » ផ្តល់ជាឧទាហរណ៍ ។ តើសមាជិកគ្រួសារអាចជួយគ្នាទៅវិញទៅមកដើម្បីរស់នៅតាមការបង្រៀនទាំងនេះយ៉ាងដូចម្តេច ?
-
ប្រហែលជាសមាជិកថ្នាក់អាចមើលវីដេអូ « Through Small Thing » ដែលបងប្អូនបង្កើតបីនាក់ និយាយអំពីការទទួលយកការអញ្ជើញរបស់ប៊ីស្សព ឲ្យគិតពីរបៀបដើម្បីធ្វើឲ្យគេហដ្ឋានរបស់ពួកគេកាន់តែជាទីបរិសុទ្ធ ។ តើក្រុមគ្រួសារនៅក្នុងវីដេអូនេះបានទទួលពរជ័យដោយសារតែសកម្មភាពរបស់យុវវ័យទាំងនេះយ៉ាងដូចម្តេច ? តើអ្វីដែលអាចធ្វើឲ្យផ្ទះក្លាយជាទីបរិសុទ្ធ ? សូមពិចារណាពីការអញ្ជើញយុវវ័យឲ្យទទួលការអញ្ជើញដូចគ្នាដែលប៊ីស្សពបានអញ្ជើញ ។ ដើម្បីជួយពួកគេពិចារណាពីអ្វីដែលពួកគេអាចធ្វើ នោះបងប្អូនអាចពិភាក្សាសំណួរដែលបានសួរនៅក្នុងវីដេអូនេះ ៖ « តើបងប្អូនស្ម័គ្រចិត្តធ្វើអ្វីដើម្បីមានព្រះវិញ្ញាណគង់នៅក្នុងគេហដ្ឋានរបស់បងប្អូន ? »
ការបង្រៀនទាំងឡាយរបស់ព្រះយេស៊ូវគ្រីស្ទគឺជាគ្រឹះសម្រាប់សុភមង្គលនៅក្នុងជីវិតគ្រួសារ ។
ធ្វើសកម្មភាពដោយសេចក្ដីជំនឿ
សូមលើកទឹកចិត្តសមាជិកថ្នាក់ ឬកូរ៉ុមឲ្យសញ្ជឹងគិត ហើយកត់ត្រាអ្វីដែលពួកគេនឹងធ្វើដើម្បីធ្វើតាមការបំផុសគំនិត ដែលពួកគេបានទទួលនៅថ្ងៃនេះ ។ ពួកគេអាចចែកចាយគំនិតរបស់ពួកគេបាន ប្រសិនបើពួកគេចង់ចែកចាយ ។ សូមអញ្ជើញពួកគេឲ្យគិត អំពីរបៀបដែលការធ្វើតាមចំណាប់អារម្មណ៍របស់ពួកគេនឹងពង្រឹងទំនាក់ទំនងរបស់ពួកគេជាមួយព្រះវរបិតាសួគ៌ និងព្រះយេស៊ូវគ្រីស្ទ ។
ធនធានគាំទ្រ
-
ម៉ាថាយ ៥:២១–២៤, ៣៨–៤២; ៦:១៤; ៧:១–៥; ២២:៣៦–៣៩; នីហ្វៃទី ៣ ១៨:២១; មរ៉ូណៃ ៧:៣៣; គោលលទ្ធិ និង សេចក្ដីសញ្ញា ១៨:១០–១៣
-
ហិនរី ប៊ី អាវរិង « A Home Where the Spirit of the Lord Dwells » Liahona ខែ ឧសភា ឆ្នាំ ២០១៩ ទំព័រ ២២–២៥
-
« សេចក្តីស្រឡាញ់នៅក្នុងផ្ទះ », « ផ្ទះជាស្ថានសួគ៌លើផែនដី » ទំនុកតម្កើង ល.រ. ១៨២, ១៨៥
ការបង្រៀនតាមរបៀបរបស់ព្រះអង្គសង្គ្រោះ
ប្រសិនបើយុវវ័យទទួលអារម្មណ៍ថា បងប្អូនទុកចិត្តពួកគេ នោះភាពជឿជាក់របស់ពួកគេលើសក្ដានុពលដ៏ទេវភាពរបស់ពួកគេនឹងចម្រើនឡើង ហើយពួកគេនឹងធ្វើឲ្យបងប្អូនភ្ញាក់ផ្អើលជាមួយនឹងអ្វីដែលពួកគេអាចសម្រេចបាន ។ សូមជួយពួកគេមើលឃើញទស្សនវិស័យនៃអ្វីដែលព្រះវរបិតាសួគ៌ដឹងថាពួកគេអាចប្រែក្លាយ ។