« ថ្ងៃទី ១០ ខែ ធ្នូ ។ តើព្រះយេស៊ូវគ្រីស្ទធ្វើឲ្យផែនការរបស់ព្រះវរបិតាសួគ៌ដំណើរការទៅបានដោយរបៀបណា ? វិវរណៈ ១–៥ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិឆ្នាំ ២០២៣ ( ឆ្នាំ ២០២២ )

« ថ្ងៃទី ១០ ខែ ធ្នូ ។ តើព្រះយេស៊ូវគ្រីស្ទធ្វើឲ្យផែនការរបស់ព្រះវរបិតាសួគ៌ដំណើរការទៅបានដោយរបៀបណា ? » ចូរមកតាមខ្ញុំ — សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិឆ្នាំ ២០២៣

ថ្ងៃទី ១០ ខែ ធ្នូ

តើព្រះយេស៊ូវគ្រីស្ទធ្វើឲ្យផែនការរបស់ព្រះវរបិតាសួគ៌ដំណើរការទៅបានដោយរបៀបណា ?

វិវរណៈ ១–៥

ប្រឹក្សាជាមួយគ្នា

ដឹកនាំដោយសមាជិកថ្នាក់ម្នាក់ ឬគណៈប្រធានកូរ៉ុម មានរយៈពេលប្រហែល ១០–២០ នាទី

នៅដើមការប្រជុំ សូមសូត្ររួមគ្នានូវ បាវចនាយុវនារី ឬ បាវចនាកូរ៉ុមបព្វជិតភាពអើរ៉ុន ។ បន្ទាប់មកសូមដឹកនាំការពិភាក្សាមួយអំពីកិច្ចការនៃសេចក្តីសង្រ្គោះ និងភាពតម្កើងឡើង ដោយប្រើសំណួរមួយ ឬច្រើនដូចខាងក្រោម ឬសំណួររបស់បងប្អូនផ្ទាល់ ( សូមមើល ក្បួនខ្នាតទូទៅ ១០.២, ១១.២ ) ។ ដាក់ផែនការដើម្បីអនុវត្តតាមអ្វីដែលបងប្អូនពិភាក្សា ។

ការរស់នៅតាមដំណឹងល្អ ។ តើយើងបានឃើញព្រះហស្ដរបស់ព្រះអម្ចាស់នៅក្នុងជីវិតរបស់យើងតាមរបៀបណា ?
ការមើលថែដល់អ្នកខ្វះខាត ។ តើយើងអាចគាំទ្រគ្នាទៅវិញទៅមកនៅក្នុងរឿងដែលយើងនឹងឆ្លងកាត់យ៉ាងដូចម្តេច ?
ការអញ្ជើញមនុស្សទាំងអស់ឲ្យទទួលយកដំណឹងល្អ ។ តើយើងអាចប្រើបច្ចេកវិទ្យាឲ្យបានល្អប្រសើរដើម្បីជាឧបករណ៍ក្នុងការចែកចាយដំណឹងល្អតាមរបៀបណា ?
ការបង្រួបបង្រួមក្រុមគ្រួសារសម្រាប់ភាពអស់កល្បភាពអស់កល្បជានិច្ច ។ តើយើងកំពុងធ្វើអ្វីខ្លះដើម្បីជួយក្រុមគ្រួសាររបស់យើងឲ្យមករកព្រះគ្រីស្ទ ?

នៅចុងបញ្ចប់នៃមេរៀននេះ សូមធ្វើកិច្ចការដូចខាងក្រោម តាមការគួរ ៖

ថ្លែងទីបន្ទាល់អំពីគោលការណ៍ដែលបានបង្រៀន ។
រំឭកសមាជិកថ្នាក់ ឬកូរ៉ុមអំពីផែនការ និងការអញ្ជើញទាំងឡាយដែលបានដាក់អំឡុងការប្រជុំ ។

បង្រៀនគោលលទ្ធិ

ដឹកនាំដោយអ្នកដឹកនាំជាមជ្ឈិមវ័យ ឬយុវវ័យម្នាក់ រយៈពេលប្រហែល ២៥–៣៥ នាទី

រៀបចំខ្លួនខាងវិញ្ញាណ

នៅក្នុងទស្សននិមិត្ត យ៉ូហានជាអ្នកទទួលវិវរណៈបានឃើញក្រាំងមួយដែល « គ្មានអ្នកណានៅស្ថានសួគ៌ នៅផែនដី ឬនៅក្រោមដី » ដែលមានភាពស័ក្តិសមដើម្បីបើក ហើយការណ៍នេះធ្វើឲ្យលោកទួញយំ ( សូមមើល វិវរណ់ៈ ៥:៣–៤ ) ។ ក្រាំងនេះតំណាងឲ្យ « កិច្ចការទាំងឡាយនៃព្រះ » រួមទាំងផែនការរបស់ទ្រង់សម្រាប់អមតភាព និងជីវិតដ៏នៅអស់កល្បជានិច្ច ( សូមមើល គោលលទ្ធិ និងសេចក្តីសញ្ញា ៧៧:៦; ម៉ូសេ ១:៣៩ ) ។ ប៉ុន្តែបន្ទាប់មកនៅក្នុងវិវរណៈរបស់យ៉ូហាន កូនចៀមត្រូវបានឃើញថា « គួរនឹងយកក្រាំងនេះ ហើយនិងបកត្រាផង » ( វិវរណៈ ៥:៩ ) ។ ដំណឹងដ៏រុងរឿងនេះបាននាំឲ្យទេវតា « ទាំងម៉ឺនទាំងសែន ហើយទាំងពាន់រាប់ជាពាន់ » ច្រៀង និងហ៊ោដោយអំណរ ( វិវរណៈ ៥:១១ ) ។ ព្រះយេស៊ូវគ្រីស្ទជាកូនចៀមនៃព្រះ « បានលោះយើងរាល់គ្នា ដោយព្រះលោហិត [ របស់ទ្រង់ ] » ( វិវរណៈ ៥:៩ ) ហើយបានធ្វើឲ្យមានពរជ័យនៃផែនការរបស់ព្រះវរបិតាសួគ៌របស់យើង ។

សូមសញ្ជឹងគិតពីអ្វីដែលព្រះយេស៊ូវគ្រីស្ទបានធ្វើសម្រាប់បងប្អូន ។ តើបងប្អូនដែលធ្លាប់មានអារម្មណ៍ ដូចអស់អ្នកដែលនៅក្នុងការនិមិត្តរបស់យ៉ូហានដែល « ទម្លាក់ខ្លួនក្រាបចុះថ្វាយបង្គំទ្រង់ » ដែរឬទេ ? ( វិវរណៈ ៥:១៤ ) ។ សូមពិចារណាពីរបៀបដែលបងប្អូនអាចជួយសមាជិកថ្នាក់ ឬកូរ៉ុមរបស់បងប្អូនឲ្យយល់បានច្បាស់ ពីតួនាទីដ៏សំខាន់របស់ព្រះយេស៊ូវគ្រីស្ទនៅក្នុងផែនការរបស់ព្រះវរបិតា ។ ជាការបន្ថែមទៅលើ វិវរណៈ ១–៥ បងប្អូនក៏អាចអាន នីហ្វៃទី ២ ៩; « ព្រះគ្រីស្ទដ៏មានព្រះជន្មរស់ ៖ ទីបន្ទាល់របស់ពួកសាវក » ( ChurchofJesusChrist.org ) និងសារលិខិតរបស់អែលឌើរ អូលីសេស សូរ៉េស « Jesus Christ: The Caregiver of Our Soul » ( Liahona ខែ ឧសភា ឆ្នាំ ២០២១ ទំព័រ ៨២–៨៤ ) ។

រៀនជាមួយគ្នា

សមាជិកថ្នាក់ ឬកូរ៉ុមរបស់បងប្អូនអាចរីករាយនឹងការសម្តែង ធ្វើជាអ្នកផលិតខ្សែភាពយន្ត ដែលត្រូវបានសុំឲ្យផលិតវីដេអូអំពីការនិមិត្តរបស់យ៉ូហាន នៅក្នុង វិវរណៈ ៥ ។ សូមផ្ដល់ពេលពីរបីនាទីឲ្យពួកគេរំឭកពីជំពូកនេះ និងកំណត់ថា តើឆុតឆាកណាដែលពួកគេចង់ថត ។ តើពួកគេមានអារម្មណ៍ថា អ្វីទៅជាគ្រាដ៏មានអានុភាពបំផុត ? តើខ្សែភាពយន្តនេះនឹងជួយស្ថាបនាសេចក្តីជំនឿលើព្រះអង្គសង្គ្រោះដោយរបៀបណា ? ដើម្បីបន្តជួយដល់សមាជិកថ្នាក់ ឬកូរ៉ុមរបស់បងប្អូនរៀនអំពីតួនាទីរបស់ព្រះយេស៊ូវគ្រីស្ទ នៅក្នុងផែនការនៃសេចក្តីសង្គ្រោះរបស់ព្រះវរបិតាសួគ៌ នេះជាយោបល់មួយចំនួន ៖

បងប្អូនអាចសរសេរពាក្យដូចតទៅនេះនៅលើក្ដារខៀន ៖ ជីវិតមុនឆាកជីវិតនេះ ជីវិតរមែងស្លាប់ និង ជីវិតក្រោយពីស្លាប់ ។ សូមអញ្ជើញយុវវ័យឲ្យរំឭកឡើងវិញនូវវគ្គបទគម្ពីរនៅក្រោម « ធនធានគាំទ្រ » ដើម្បីរៀនពីរបៀប ដែលបេសកកម្មរបស់ព្រះអង្គសង្រ្គោះនៅអំឡុងព្រះជន្មមុនឆាកជីវិតនេះរបស់ទ្រង់ អំឡុងព្រះជន្មរមែងស្លាប់របស់ទ្រង់ និងបន្ទាប់ពីការមានព្រះជន្មរស់ឡើងវិញរបស់ទ្រង់ ធ្វើឲ្យផែនការរបស់ព្រះវរបិតាដំណើរការទៅបាន ។ ពួកគេអាចសង្ខេបអ្វីដែលពួកគេរៀនក្រោមចំណងជើងនេះនៅលើក្ដារខៀន ។ សូមផ្តល់ឱកាសដល់សមាជិកថ្នាក់ ឬកូរ៉ុមដើម្បីចែកចាយពីអារម្មណ៍របស់ពួកគេ អំពីអ្វីដែលព្រះអង្គសង្រ្គោះបានធ្វើសម្រាប់ពួកគេ ។
ដើម្បីជួយយុវវ័យដែលបងប្អូនបង្រៀនយល់ឲ្យកាន់តែច្បាស់ ពីអ្វីដែលព្រះយេស៊ូវគ្រីស្ទបានធ្វើ ដើម្បីធ្វើឲ្យផែនការរបស់ព្រះវរបិតាសួគ៌ដំណើរការទៅបាន នោះសូមគូរផ្លូវមួយនៅលើក្ដារខៀន ដែលតំណាងឲ្យការធ្វើដំណើរត្រឡប់ទៅកាន់ព្រះវរបិតា ដែលគង់នៅស្ថានសួគ៌របស់យើង ។ សូមគូរឧបសគ្គនៅលើផ្លូវដោយសរសេរពាក្យ សេចក្តីស្លាប់ខាងសាច់ឈាម និង សេចក្តីស្លាប់ខាងវិញ្ញាណ ។ ( ប្រសិនបើចាំបាច់ យុវវ័យអាចអាននិយមន័យនៅក្រោម « សេចក្តីស្លាប់ខាងសាច់ឈាម » និង « សេចក្តីស្លាប់ខាងវិញ្ញាណ » នៅក្នុងសេចក្តីណែនាំដល់បទគម្ពីរទាំងឡាយ [ scriptures.ChurchofJesusChrist.org ] ) ។ តើព្រះអង្គសង្រ្គោះធ្វើឲ្យយើងអាចយកឈ្នះលើឧបសគ្គទាំងនេះយ៉ាងដូចម្តេច ? ( សូមមើល នីហ្វៃទី ២ ៩:៧–១០ ) ។ យុវវ័យអាចរំឭកឡើងវិញនូវសារលិខិតរបស់អែលឌើរ អូលីសេស សូរ៉េស « ព្រះយេស៊ូវគ្រីស្ទ ៖ អង្គមើលថែនៃព្រលឹងរបស់យើង » ហើយសូមសរសេរប្រយោគចេញពីសារលិខិតនេះ នៅជិតផ្លូវដែលបងប្អូនបានគូរ ដែលបង្ហាញពីរបៀបដែលព្រះយេស៊ូវជួយយើងត្រឡប់ទៅរកព្រះវិញ ។
នៅពេលអ្នកផ្សេងទៀតសួរយើងអំពីជំនឿរបស់យើង និងជម្រើសដែលយើងធ្វើ នោះយើងអាចឆ្លៀតឱកាសចែកចាយពីមូលហេតុដែលព្រះយេស៊ូវគ្រីស្ទសំខាន់ចំពោះយើង ។ របៀបមួយដើម្បីរៀបចំយុវវ័យឲ្យមានឱកាសបែបនោះ គឺត្រូវអញ្ជើញពួកគេឲ្យរំឭកឡើងវិញនូវសារលិខិតរបស់អែលឌើរ ឌៀថើរ អេស្វ អុជដូហ្វ « មើលចុះ មនុស្សនេះហើយ ! » ( Liahona ខែ ឧសភា ឆ្នាំ ២០១៨ ទំព័រ ១០៧–១០ ) សូមរកមើលសេចក្តីពិតដើម្បី ចែកចាយអំពីព្រះយេស៊ូវគ្រីស្ទ ។ បងប្អូនអាចសរសេរសេចក្តីពិតទាំងនេះនៅលើក្ដារខៀន ។ បងប្អូនអាចផ្តល់ពេលវេលាឲ្យយុវវ័យហាត់ពន្យល់ទៅគ្នាទៅវិញទៅមក នូវមូលហេតុដែលយើងត្រូវការព្រះយេស៊ូវគ្រីស្ទ និងរបៀបដែលជីវិតរបស់ពួកគេបានទទួលពរ ដោយសារពួកគេបានស្គាល់ព្រះអង្គសង្រ្គោះ ។

ធ្វើសកម្មភាពដោយសេចក្ដីជំនឿ

សូមលើកទឹកចិត្តសមាជិកថ្នាក់ ឬកូរ៉ុមឲ្យសញ្ជឹងគិត ហើយកត់ត្រាអ្វីដែលពួកគេនឹងធ្វើដើម្បីធ្វើតាមការបំផុសគំនិត ដែលពួកគេបានទទួលនៅថ្ងៃនេះ ។ ពួកគេអាចចែកចាយគំនិតរបស់ពួកគេបាន ប្រសិនបើពួកគេចង់ចែកចាយ ។ សូមអញ្ជើញពួកគេឲ្យគិត អំពីរបៀបដែលការធ្វើតាមចំណាប់អារម្មណ៍របស់ពួកគេនឹងពង្រឹងទំនាក់ទំនងរបស់ពួកគេជាមួយព្រះវរបិតាសួគ៌ និងព្រះយេស៊ូវគ្រីស្ទ ។

ធនធានគាំទ្រ

យ៉ូហាន ១:១–៣, ១០; អេធើរ ៣:១៤; ម៉ូសេ ៤:១–២ ( បេសកកម្មរបស់ព្រះអង្គសង្រ្គោះក្នុងព្រះជន្មមុនឆាកជីវិតនេះ )
ម៉ូសាយ ៣:៥–១១; អាលម៉ា ៧:១១–១៣; គោលលទ្ធិ និងសេចក្តីសញ្ញា ១៩:១៦–១៩ ( បេសកកម្មរបស់ព្រះអង្គសង្រ្គោះអំឡុងព្រះជន្មរមែងស្លាប់របស់ទ្រង់ )
យ៉ូហាន ១៤:២–៣; នីហ្វៃទី ២ ៩:១៥–១៧; គោលលទ្ធិ និងសេចក្តីសញ្ញា ៤៥:៣–៥; ១៣៨:២៨–៣១ ( បេសកកម្មរបស់ព្រះអង្គសង្រ្គោះបន្ទាប់ពីការសុគតរបស់ទ្រង់ និងការមានព្រះជន្មរស់ឡើងវិញ )

ការបង្រៀនតាមរបៀបរបស់ព្រះអង្គសង្គ្រោះ

បុគ្គលម្នាក់ៗនៅក្នុងថ្នាក់របស់អ្នក គឺជាធនធានដ៏បរិបូរមួយនៃទីបន្ទាល់ គំនិតយោបល់ និងបទពិសោធន៍ជាមួយនឹងការរស់នៅតាមដំណឹងល្អ ។ សូមអញ្ជើញពួកគេឲ្យចែកចាយ និងលើកតម្កើងគ្នាឡើង ។